Ka thil tawn kha!! Amak ngei mai!!!

A hun leh ni, kum chiah pawh ka hre ta lo, hre mah ila sawi kher pawh ulin ka hre lova, amaherawhchu hun rei vak lo kaltaa ka thil tawn a ni tih erawh chu ka hrilh hmasa duh che u.


Fur lai a ni a, ruah phingphisiau a tla sep sep a, zan rei tawh lam dar 10 pelh tawh a ni. Ka hna thawk zo in lam pana haw ka ni a, Chanmari West leh kan veng inrina bul lawka Chanmari West YMA Branch In sak ka thlen thlak dawn ep khian nasa mangkhengin ruah chu a sur ta mai a, a dova han do chi rual a ni lo. Tichuan YMA In bulah chuan ka lirthei (two wheeler) khalh lai chu hmanhmawh deuhin ka dah ta chawt mai a. 

Kawl a phein khawpui a ri dur dur reng a, Current a awm bawk si lo nen, a mangan thlak duh hle mai. Tichuan YMA In bathlarah chuan tawm hulna zawngin ka ding zum ta reng a. Chutianga ruahsur leh thli thaw vuk vuk kara minute 5 vel zet huh hnuang chunga vawt ti taka ka din reng lai chuan nasa deuh maiin kawl a rawn phe a, chu kawlphe eng chuan ka bul maiah chuan nula pakhat a lo mu reng mai ni tih min hmuh tir a. 

Kei chuan mitthi ruang nge, KS zurui chatthla ni ang tiin ngaih tha lo tak chungin, "Mami, mami...." tiin sawi harh ka tum a, a harh thei lawk bawk si lo nen, ka bei a dawng hman hle a. A hnu rei vak lo-ah chuan a rawn harh ta a. Chutiang zan rei tawh leh khawchhe hnuaia chutiang hmuna engvanga awm nge a nih tihte ngun tak leh chik taka ka zawh hnu chuan KS leh mi awmha duh lo a nih loh thu min hrilh a, hetiang hian a chanchin kimchang takin min hrilh ta a ni.

"Ka hming chu Zoramthari a ni a, ‘Tharpui’ tiin min ko hin a, kan unau hi panga kan niin hmeichhe 2 leh mipa 3 kan ni a, kei hi upa ber ka ni. Tleirawl te ka nih lai hian ka nu leh pa hi an inhen a. An inhenna chhan pawh ka pa in zu a duh luat vang a ni a, an inthen hnuphei chuan kapa cu Rangvamual leh Phunchawng lamah ringawt a tal a. Tichuan, ka nu hovin harsa takin kan khawsa ve ta awk awk a, ka nu hi rual awt mi leh mi puitlinga kan chhuah loh hlau em emtu a nih avangin lehkha kan zir puitlin theihna a nih dawn phawt chuan tiin bazar lamah chawhmeh leh thildangte kharchhawngin a hun zawng zawng tih theih deuh thaw a hmangral hin a ni. 

Tichuan kei pawh Matric ka lo passed ve hnu chuan ka nu thawhrim rah leh rualawhna avang chuan Lady Kean College, Shillong-ah ka zir chhunzawm ve thei ta a. Mahni tawkah ka tumruh ve bawk a, a thiam thei pawl tak pawh ka ni ve. Tichuan tun umah hian chawlh hmang turin Sumo-in ka rawn haw chho va, Driver chuan ka chuanpuite zawng zawng a thlah fel vek hnuah kei chu a hranpa a kan in kawtkai thlenga min thlah a intiam a, kei pawh chuan ka remti ve mai a. 

Mahse ka chuanpui te a thlah zawh vek hnu pawh chuan kan In/Veng lam min panpui ta lo chuan Rangvamual lam min panpui ta daih mai a, Rangvamual thlen hma deuh khuan kawngsirah min dinpuiin ka duh lo chung ka thianghlimna min tihchhiat sak chu a tum ta mai a, nasa taka angin ka au chiam a, mahse zan rei tawh a nih avangin tuman ka mangang authawm chu an hre pha tawh si lo. 

Mahse vanneihthlak tak maiin chutianga min pawngsual lai chuan a motor chu gear-ah dah lovin neutral-ah a lo dah hlauh mai a, chutianga kan inbengberek kual vel na lamah chuan motor chu lirin kawng thlangah kan liam ta a, engtin tin emaw ka rawn inham chhuakin helai hmun hi ka rawn thleng thei ta hram a ni" a ti a. Kei chuan, "Rangvamual aang chuan nangmah chauhvin engtin nge helai hmun hi i rawn thlen theih si ?" tiin ka zawt zui zel a, a ni chuan, “Taxi pakhat lo kal hi ka lo phar ve tawp a, tun ang zanrei tawha hetianga hmeichhia mahni chauha rampailenga vak ta chu min zuam a ni teh chek ang chu ani pawh chuan min beisei leh a, ka kalna tur leh awmnate min zawt a, kei chuan dawt hrilhin "Edenthar-a haw tur ka ni a, 

Sangliana Petrol Pump(IOC) kawta min dah theih chuan a tawk mai," ka ti a. Sangliana Petrol pump kan thlen chuan a ding deuh thuak a, mahse ka chhuk a phal ta lova, kei chu ka zuangthla lui ta thova. Tichuan baklengin Chanmari lamah hian ka rawn tlanchho ta a ni," tiin ap zawih zawi chungin a sawi ta a ka khawngaih hle mai. 

Ruahsur chu a bang an dawn hnai tihah chuan chu nula khawngaihthlak tak chuan khawia awm nge ka nih tihte min zawt ve a, kei chuan Edenthar a awm ka ni tih ka hrilh a, tui takin kan inkawm a. Chutih lai chuan ruahsur bang tur lam kawlphe chu a rawn de zuai zuai a, chu kawlphe eng zuai zuai kar aang chuan chu nula chu nula hmeltha tak leh ngaihno bei tak a ni tih ka hmu thei a,. 

A ni chuan, "Edenthar-a haw tur i nih chuan i rualin ka lo kal ve ang a, Bawngkawnah-ah sawn ka ni te an awm a, an inah ka riak mai ang, zan a rei tawh si a..." a ti a. Keichuan, "Tehreng mai, i ni te In thleng chuan ka va hruai dawn che a nia," ka ti a. Tichuan, ruahsur ban chuan kan inphur chhuak ta a, kan veng lamah rawn tlan thlain Bawngkawn lamah kan tlan phei zela, Fisheries Deptt. ho Sangha Kudam kan thlen chuan ruah chu a rawn sur nasa leh ta hle mai a. 

Varanda hulhliap chu belin kan han ding leh ta a, kawr pan tak ha a nih avangin vawt a ti hle mai a, a khur a khur tawh mai a. Vawt a tih em a vang chuan ka jacket haklai chu phelhin ka haktir ta a. "A vawt em mai, mei i chhem ang," a ti a. Kan bul hnaia bawlhhlawh leh eng eng emaw chu ka han fawm khawm a, ka han hal ta a, ka hal eng chiah tih chuan chu nula hmelha tak, ka Jacket hatu nula khawngaihthlak tak chu a lo bo daih tawh mai!! Khawiah tak awm ang maw?? 

Tichuan, beidawng takin In lamah ka haw ta a, a tukah ka zing thovin Chanchinbu ka han chhiar chu he thu hi ka hmu ta a, mak ka ti tawp thei lo! "Lady Kean College, Shillong-a BA Zirlai Nl. Zoramthari chu nizan khan Rangvamual bulah Sumo chesualah a thi. An chetsual chhan hi driver hian Zoramthari hi pawngsual a tum a, Zoramthari hi nasa taka a an avangin a anna lamah motor hi a chesual ta a ni," tih thu hi an rawn ziak a. 

Nizan lama ka thil tawn kha ka mumang emaw ni dawn zawk le!! tiin ka in ngaihtuah buai phah hle a, engmah tihzai pawh ka rel thei ta lo a ni