HOSTEL A KA AWM LAI!!

Mahni irawm chhuak hmet lang tura keyboard han thutchilh hi chuan, thupui lut lawk lova kual kual mai a awl thin a nia. ‘BigDaddy ka hmu ta’ tihah pawh khan ka hmuh hma kha a thui zawmah in ka hria. Nikin niah Lei tinreng a inpuan huna mahni chanchin sawi tur kan nih avangin lo inbuatsaih lawk nan pawh a tha e.

Khatia Matric te kan han Pass ve takah chuan rualawh na zual pui thawidam nan chhungten neih thinglung khawngin Shillong min thlenpui ta hram a. He khawvelah an lo piang ve tih ka hriat ngai reng reng loh Pu Zohminga(Tunah Chaltlang, Aizawl-ah an khawsa mek) te inah invawm lutin, anni chhungkua hian fa tlum duat takin min lo duat a ni. Tichuan buai deuh nak nak karah zirna tur leh awmna tur chu kan han inchingfel ta hram a. Naga Hostelah nuamsa taka awmin ka intithei ve nasa mai. Mahse he Hostel hi chu a Hran thu hriat a ni lo. Nuam ti viau mahila neihin a tlin miau loh avangin mahni tlin tawk Hostel dang zawn a ngai leh ta thuai a. Tichuan thiamzira ka rammut ve chhunga ka inpui ni tawh tur Hostel-ah chuan ka lut ve ta a ni.(Kohhran Hostel a nih avangin a hming ka sawi lo mai e)

Luh tirh a han titi khawm nikhua hian kan Hostel hi thlanmual hlui chunga sak anga sawi rik a ni zauh zauh thin. Mahse chu lam ka lungkham lo. A zalen hek hawk a, ka nunin mil tawk chiah a ni. Mizoram atang pawhin 6 lai an lo awm ve a, a thlamuan thlak hle. Mizo hnahthlak, Jampui tlangdung, Tripura lama tanga High School lut tura rawn kal, ka chhang rual vel, mi pawisawi hlau em em, tawngkam thiam loh luat avanga sawi fo si nen room khat kan han luah dun leh ta nghal a, a nuam ka ti takzet a ni.

He tia ka room mate, Hriata, mi pawi sawi fo anga ka tarlan avang hian sawifiah ngaiin ka hria. Rilru tha em em, tumlawk lem lova mahni ngaihtuah zawng phuhchhuak leh phawng thin a ni. World Cup chanchin sawi tui lai tak a ‘Shillongah hian Hostel hi engzat nge awm ang le’ tih angreng vel. Tumkhat pawh an khaw Tlangau a tawk dawn a. An intawh hma chuan a rilru in ‘Saw chu kan tlangaupa a ni maw’ tih a ngaihtuah ni tur a ni. An intawh lai takin ‘Tlangaupa’ an tih thut mai a, ‘Tlangau pa chuan min tin hman uaih e’ a ti. Hetiang a nih avang hian mi zingah pawh a inthlahrung em em thin.

Vaki tawngthei en tura Jampui tlangdung ka luh tumin a ni hian ‘U’ ang chiaha min la enin min lo mikhual a. Chuvangin a chanchin la sawi zui zel hi phuin ka hria. Khati khawpa ka nghaisa chunga min la ngai em em mai te kha phulo ka va inti em. A sikul kal Bag, nitin routine thunfel thlapa a dahte kha a inthiar lai ten kan lo shuffle leh ta thin ania. Ani mi rilru tha kha chuan check nawn leh kher ngai hek lo. Class roomah kekawrte, mawza, pheikhawk siai, Toothbrush, etc..tih vel kha a phawrh ta rui mai thin a. A zak ve thei hle niin a thianten an sawi. Mahse tlai a lo hawn hi chuan a thinrim a reh daih tawh zel.

Tum khat a lehkha zir laiin a Chair hnuaiah halpuah ka kam ru zauh a.

Halpuah hi a fuse a zen awm hi han zut fai vek ila, muangtein a mut riai riai thin a, a puah meuh chuan a haltu kha thui fe kan kal hman thin. Pawnlam kawngka awng atangin ka bihthla ta ran mai. Chutah a lehkha chhiar tui lai tak maia an puak chu Chair atangin chhuat laiah a hlawm thla tawl mai a. A hawi kual vut vut a, a titu a hrechhuak ni ngei tur a ni. Kawngka chu chhunglamah a kalh ve ta hmak mai. Hemi tum hian zan dar 12 thleng min hawn duh lova, mahse ka hla phuah ‘Khartung min hawn teh Valmawi’ tih kan sak meuh chuan ha pui lang thu a nui chungin min rawn hawn leh ta a ni. Tlem a tlemah pawn khawvawtah ka tlaivar lo chauh.

Hriata pianpui, amah chhangtu chiah Vula hi Pu Zohmingah te inah tho hian a awm ve a. Ka thiam lo ka ti ka ti chungin sakawrbakcheh leh samkhuih min hmeh bela, ka hmaah thuin a lu a dawh ta tawp mai a. Chuti na na na tiin keipawhin tlawmngaih chhuahin kan met ta alawm. A bek vei lam ka met a, ka met zel a, a tawp thei tlat lo. meh tur a lawi a awm tawh lo. Ka tihngaihna hre lo chuan “Ka peih tawh lo”tiin ka lensan ta daih mai a. Hemi tum hian a bek veilam chanchinbu a khuh chungin Bazarah a lo va meh that tir a ni awm e. Mahse min haw chuang lo.

Pu Zohminga te ina kan awm lai hian room khatah kan awm dun a, a muthilh leh hilh loh hriatna tha ber chu a muthilh hnua a thawm na ta em em thin hi a ni. A hnar ri ka ning ta deuh a, nawalh bawk engeng maw zat chu dim takin a ke zungpuiah ka tawn a, kan hal ta a leh. Ka mutsan ve hmak mai. Hemi tum hi chuan kan inbe lo rei deuh. Unau zaidam nih an tling.

Nun thlahdah na na na chuan chet fuh loh tum a tam ve thei riau. Tumkhat kan Hostel a kan rual u leh kan zah ber U Zotluanga(Tunah Industry Dept-ah a thawk mek) nen kan inhnial lawk palh a, BigDaddy-a thau lai ang deuh mut mai a ni sia. Ka che hmasa a nih loh chuan ka rethei hle mai dawn tih hriain kan rek hmasa ngawt mai a. Ka rek bet zo leh si lova, ka chawh teh asin. Mahse hemi zan la la hian hlim takin kan inkawm dun leh thei tho. U nih a tlingin a naute ho kha min va kilkawi thiam tak em. Ani pawh hi a chhang chiah Zokima(Tuna DIET lecturer ni mek) nen hian an awm dun a, kan u te rual fe ni mahse ani hi chu u lovin ‘Zokim’ kan ti ve mai thin. Pathian tih chhungkua atanga seilian tih takah an puitling hle mai a. Zokima phei hi chu kan awmnaah hian thalai inkhawm a thusawi pha a ni.

A hun neih dawn tum hian a lawm, kan lawmah a tla. Biak In zah lo tawk velin kan han in in nam sauh sauh a, thianpa Khuma(Sazaw mei rawhtu leh Sahuai sawisatu ka rawn post tawh kha) nen Biak In tlar hnung berah kan thu ve ta van mai. Chutah Zokima thusawi tur kha kan thiam thapui thawhin tlar hnung atang chuan kan lo awm ing euh khum ta teh reng a nih chu. Min rawn hmu lo thei si lova, a nui leh suk thin. Huatah zawng a la zui lo. A thiante khan kan lo chawimawi lo thin ngawt mai.

Thianpa Khuma nen hian inzui deuh chawt kan ni a. Tumkhat chu Alu Kudam lamah nula rim turin tlai ni nemah kan thawk chhova. Hetia kan chhuah hma thinna chhan chu Kongi te ina han lem hmasak zawk kan chin thin vang a ni. Kan sum neih hian karkhat bak a senchi a daih meuh lo. Kan chhuah hma lawk khan Tengtere tui ka in nghek mai a, a lo thawk chak nasa mai. Ka pum a inlet but but a, mawnglamah a rawn nawr thla ta rum rum mai a.

Tihngaihna a awm lo. ‘Khuma min lo veng rawh, Khulai daikalinah khuan ka lut dawn’ tih pahin kawng hnuaiah chuan ka zuang thla a, Ek in chhung chu ka bawh lut nghal rawk. Inthiar dawna kekawr leh kekawrte pawtthla rual mai thin ka nih vei nen vanduai a kal tluang. Ka kekawr hlih leh thut ka rual a, a duk chhuak nghal bawrh bawrh mai. Ani, ka kekawr te ka lo hlip tel lo niin. Hemi tum hi chuan ngaihtuahna a buai ve lek lek.

Phelh nawn lehna hman a awm chuang lo. Chutaha hmatawng hmanhmawh zualpui a tlak fel chuan fimkhur thei ang berin kan hlip a nih chu. Tihsual palh a malpui leh chawn vela a kai hlauh chuan a pawi dawn, an tui chhawp sa hiam mawng silna bak a daih lo. Kai miah lova ka hlip thei kha chu tun thlenga ka la inchhuan vena a ni. Mahse Kekawr te chu engtinnge ka senghawi ang. Inthiarna veilam chu a neitute in a ni nghal a, a dinglam lah phul hmun. Ka hmuchhuak ta, Ekin chung rangva Gola(an tia mawni, rangva awmdan hi) kara zeh ral a ngai.

Hemi kan ti leh thei phei hi chu han infak lo chi ka ni hleinem. Sherlock Holmes a pawh awmse ka tihdan bak hi kawngdang a dapchhuak hauh lovang. Hemi tum hian nula rim lovin kan hawng ta ringawt. Khuma nen hi chuan thlahrang kan hmu dun ta lo. Mahse ka thlahrang hmuhpui tur pa, Zama, Vairengte khawchhuak(A thlarau muangten chawl se), Shillong a Computer rawn zir chu kan Hostelah a rawn lut ve ta.

Zama nena kan inkawp zet hi chuan zakhua kan rawi. Mahni mizepui han tawn meuh kha chuan ze thup zawng a har a ni. Thla tawp lam, chengkhat thir lir kan um ruk ruk lai leh, biri bung pawh kan iai phal tawh loh chinah chuan a Suitcase uk bawk kha dahkham turin kan puchhuak leh thin. Mahse thla a lo thar a, kan la chhuak veleh mai zel bawk a. Hetih lai nanana hi chuan Thlahrang lam chu kan hlau lo dun khawp. A khat mawi tawkin kan insual dun reng bawk a. Kan insual pawn thinrimah leh huatah kan la ngai lo.

Hetia thlahrang thawm an hriat(hetih lai hian Zama nen hian ka la hre ve miah lo, mahse kan Hostel awmpuite chuan an sawi sep sep tawh) lai vel hi kan Exam dawn, lehkha zir uar hunlai tak a ni. Exam tur thawm kan hriat chuan keipawh arang arangin College lamah ka va tlan a, Exam Routine copy turin. Hetah hian a ni, ka la hriat ngai reng reng loh ka hriat thar takna chu. Mathematics Paper III zuk lo awm reng a. Kar khat chauh a awm tawh tiha Subject thar han hmuh chhuah belh leh kha chu felfai taka inbuatsaih a har teh a nia. Mark 3 ka hmu hram. Chutiang boruak karah chuan Thlahrang thawm a lo ri ve chhen nen.

A hran dan an sawi hmangin kan Hostel Corridor, feet 60 zet a sei ah chuan zinglam dar 1 velah thawm dim tak a pen ri an hre thin a ni awm e. A tawn tawn Room a ni a, light a awm mumal loh(an vuah pawn  mahni rooma bulb a chhiat chuan kan la daih zel) avangin zanah chuan a rapawm ve deuh roh thin. Engngemaw chang phei chuan hmawlhte ni awm tak hian room bang te chu a thai zei zei thin a ni awm e.

Hetih hun hi kei leh Zama mut tui lai, pentawng tuihalin min kaihharh hma, hun laklawh a ni. A tir lamah chuan engahmah an ngai lem lo. Mahse chian tuma Light nena chhuak ten engmah an hmuh thin si lovah chuan en ngam pawh an awm meuh tawh lo. Chutah chuan pasaltha pahnih, keini thian dun chu a chang turin kan in volunteer ve ta. Mahse thu delhkilh kan nei. Hostel a awm ten sum an thawhkhawm ang a, hemi zana kan in tur hi Whisky changkang an tum ngei tur a ni. Intiamna ang ngeiin Um hnih chu an rawn hung ta ran mai. Hemi kan tih zawh meuh hi chuan keini thian dun chuan Tuu Thlarang pawh nise kan va hlau lo leh dawn em! Mahse a hran hmain keini pahnih bawk hi kan in chem har ang tih a hlauh awm. Um khat khiat zawh tawh hnua kan chin fo a ni.

Zing dar khat a hnai ta, Bottle a ruak tawh, ka meng hlei thei tawh lo. Kan harh meuh chuan khua a lo var leh duai tawhi. Mahse ka thianpa chuan a lo chang chhuak ngei e. Min hrilh dan chuan, dar khat a pelh hnu chuan pen ri ngei mai chu a rawn ri leh ta. Chutah kan room zawn a lo thlen chuan ka thianpa chuan kawngpa tlawh hawngin an bawh thut mai a, an lo buai nasa mai a ni awm e.

Mahse a hrangtupa ber an han man a, room enga an han hruai luh chuan, kan Hostel bul lawka awm, tlangval pangngai tak lo ni lekin. A hrangtupa ber sawi dan chuan a muhil theiloin kawmtur zawngin, Hostel a zirlai mengrei deuh a rawn zawng thin a ni awm e. Mahse thenkhat chuan an awih chiah lo, tirtu awmin an ring tlat.

Mahse, kei erawh zawngin ka chah thlak san leh miau si avangin THLA HRANG ka hmuhna hun tha ber chu ka bawhpelh leh ta. Hmuh hun a la awm chek ang chu maw !

(Ka thian chatuan ram min pansan ta Zama pual ni teh se)

Blog subcribes la share ve rawh le , enjoy.