THLA TAP THAWM RAPTHLAK CHU

Mexico City laili taka zan dar 12 a han rik bul bul meuh chuan kum zali chhung zet an lo hriat tawh, lungchhe em em maia rapthlak taka țap rawng rawng chu hriat a la ni fo mai.

Chu hmeichhe lungngai leh mangang, lungchhe vankaia țap țhin chuan "Aw, ka fate u, Ka fa ve te kha, ka fa khawngaihthlak leh chanhai takte kha aw.." tiin a fate chungchang chu a chham reng mai a ni.

Mexican țawng chuan 'La Lloruna' an ti a, 'Lusun Nu' tihna a ni. Thawmhnaw țet hniang hnuang leh kawrfual, thisenin a luan huh zuih a inbel a, lungchheem ema țap chungin Mexico City zan boruak chu a tiralkhel țhin a ni.Mexican hovin kum 500 vel kal ta ațanga an sawi chhawn țhin dan chuan chu nu chu Dona Luis de Olveros a ni a. Spanish leh Indian thlahpawlh a ni.

Amah chu hmelțhat em avanga lar tak a ni. Chu nu chuan lal upa pakhat Don Nuno de Montesclatos hi a hmangaih em em mai a, rei tak inkawpin fa pawh pahnih an nei hman nghe nghe. Dona chuan a thinlung zawng zawngin Nuno chu a hmangaih avangin an Inneih hun tur leh akianga a khawsak theih hun tur chu a nghakhlel em em a, rilru leh tihtakzeta țawngțai chungin a suang tuah țhin.

Mahse a beiseina chu a thamral tial tial a, a suangtuahna chu puitlin ahnekin Nuno chuan a rawntlawh khat tial tial a, a ngaihsak lo zui der ta mai a.Dona lungleng lutuk, ngaihțhalo chuan zan khat chu Nuno te in chu a va pan ta rawih mai a. Nuno chu hmuh a, a hma anga engkim dinthar leh tura ngen tuma thawk chhuak a ni nghe nghe.

Nuno chu a va hmu ngei a. Mahse a thil va hmuh chuan a thinlung kehsawm khawpin Intihhlimna ropui tak siamna hmunah a va hmu ta tlat mai.

Intihhlimna satliah pawh ni lovin Nuno leh Spanish lal upa fanu Inneih lawma intihhlimna siam an lo ni reng mai!!

Dona chuan Nuno chu a va pan nghal ruak ruak a. Mittui tla chungin a hnena kir leh turin a va ngen ta tho va. Mahse Nuno chuan lo nam sawh dawrh pahin Indian thisen kai anih avangin engtikah mah nupuia a neih loh tur thu leh neih tlak a nih loh thu a lo hrilh ta hmiah mai a ni.

Dona thinlung na lutuk chu rilru tawt up up leh meng â deuh riai ruai   a tlan haw ta nal nal a. A bialpa Nuno a'n Chemte a lo pek tawh ngei hmang chuan a fate pahnih chu a va that ta hmiah mai a ni. A fate thisen kai hne hnu chungin khawilaiah țe tuarh tuarh chungin a tlan kual a. An man a, Jail ah an dah ta nghal a ni.Jail a an dah hnu reivak lovah Dona chu Tualthah thu buai avangin Mexico City ah van tlang hmuh laiin khaihlum a ni ta a.

Khaihlum mai duh tawk lovin elsen nan darkar 6 zet an khai nghe nghe a ni. An khaihkum tuk zan ațang chuan zan lamah a thla țap leh lungngai ri chu an hre ta fo va. An sawi danah chuan he thla țap leh au ri hi reh mai lovin, hun reitaka daih an ring nghe nghe a ni.