TOTAL PROHIBITION ACT KAN TIH HI

Mi tam takten kan ngaih thin dan awma lang chu zu tam tak an man fovah hian Total Prohibition hi a hlawhtling lo ani kan ti thei awm e.Total Prohibition hlawhtlinna ropui tak mai chu he dan awm avanga zu tam tak an man hi a ni. Hmun dang atanga lo lut tur zu chi hrang hrangte hi Mizoram a lo thlen hma hian man zawh vek theih chu ni phei sela,Total Prohibition hlawhtlinna chu a va ni dawn nasa em! Helai Mizoram chhunga 'local' zawng zawngte pawh hi in ngai loten an in hma leh in thin tawhten an in hma ngei hian man fai vek hman chu ni phei sela, eng ang pawhin tam pawh ni mah sela, a hlawhtlinna ropui tak chu a ni ngei ang.

Zu an man tawh zawng zawng hi hmun khatah a vai hian dahkhawm ni sela, chutiang tlan tur chuan zu ngawlvei zawng zawngten man lova an duh tawka an tlan theih nan ngawlveiho khawm ve ni ta sela, an duhtawkin chutiang chuan tlan sela, an boral hma phah viauin a rinawm a ni. Chu mai chu nilovin, zu man khawm tawh zawng zawng chu thalai rual zu in ngai lo chenin a thlawna in theih turin dah ta sela, kan thalai rualte zu ngawl vei leh kawhmawh bawla, khawlohna kawng zawh an tam phah viau lawng maw? 

Zu reng reng hi man lo ta sela, in lohah an chhuan sen reng dawn loh avangin, in thin tawh emaw, in ngai lo emaw pawhin kan in zawh tho tho tur a nih avangin, tam tak taksa leh nunna thlengin tihchhiatin a awm phah ang a, zu in ngai lo tam takin an in phah bawng ang a, zu zawng zawng hi a vaiin man kim vek theih ni lo mah sela, hetianga an man tawh zawng zawng pawh hi Total Prohibition hlawhtlinna ropui tak chu a ni.

Total Prohibition dan hi tun hma kum 50 vel atang khan ngawrh taka lo hman tawh ni ta sela, kum 50 chhunga zu avanga boral zawng zawng hmun thuma thena hmun hnih chu chhungkua leh ram tan tha tak leh awmze nei taka hun rei tak chhung la hmang thei tur an nih a rinawm. 

Chutiang hun hmang thei lova an awm chu ram leh hnam, chhungkaw tan channa rapthlak a ni. Tunah ngei pawh hian i han ngaihtuah chiang teh ang u. Tuna zu ngawlvei kan tih mai, zu lova awm thei tawh lote, nghei duh ngawih ngawih, an ngheia an taksain a tawrh tawh si, mi khawngaihthlak te hi tun hma kum 50 kal tawh atang khan Total Prohibition hi uluk taka lo hman ni tawh selang chuan hengho hian harsatna hi an tawh a rinawm loh a ni. Chutiang bawkin tuna zu zuar hlun pui pui kan neihte hian khang hun lai atang daih khan zu hi lo khap tawh selang chuan harsatna leh buaina tam tak hi an tawh a rinawm loh a ni. 

Share and subcribe enjoy.