Forensic Files (28): Seeing Red

Tleirawl pakhat chu a mut pin dan atangin a bo a. Evidence an neih te chu a bo tih finfiahtu te chauh an ni. Inves tigator te chuan computer ah chuan hnuchhui theihna hmanrua a awm an beisei a. Chumi khua a mi tho hmeichhe pakhat bo leh hma kum 2 dawn case chu chhuichhuah theih lovin a awm a. Policete evidence neih chu Suit Case, ruang leh ngalreka tattoo inchhu te chauh an ni a. Policete chuan serial killer chu khuahkhirh lovin a tualchai mek niin an ring a ni.  

Khawlum pangai ni tak hian Lub bock, Texas a ruam hnawhkhahna (landfill) hmuna hnathawk pa pakhat hian bawlhhlawh phur motorin bawlh hlawh a paih zingah chuan thil dang lam tak a hmu a. Chung bawlhhlawh a paih zingah chuan suit case hi a tel a. A  chhungah chuan thil awm ni hian a lang a ni. A tir chuan mi uangthuang fiamthu thawh ah a ngai mai a. Hriat chian duhin suitcase chu hawngin a han en ta a. A chhunga awm chu dawr vel a thawmhnaw phochhuah nana milem thawmhnaw an hak tir thin (mannequin/dummy) ni mai turah a ngai a. Mahse a chhungah chuan hmei chhia la naupang lam deuh ruang hi a lo awm a ni. Chu thil chu nuihzat thlak a ni mawlh lo. Chu hmeichhia chu a mu tawm a. A taksa chu a pilh pheng phung a. Hliam a neih nual bawk. La valai tak, sam sem leh thawmhnaw ha lovin a lo awm a ni. A ngal reka tattoo "summer" tih inchhu bak amah hriat theihna tur engmah a awm lova. Police ten hnuchhuina hmanrua an neih chhun chu ruang, suitcase leh tattoo te chauh chu a ni.

Medical Examiner chuan chu hmeichhia chu a thihna atangin dar kar 24 pawh la ral lo angin a chhut a. Evidence atanga a lan dan chuan nasa taka nghaisak a ni a. Suitcase chhunga khung a nih laiin a la thaw a ni tih a lang bawk. A thih chhan chu boruak tlakchham vang tih a ni. Tin, thla hnih leh a chanve a upa nau pai lai leh mipat hmeichhiat hmanpuina hnuhma an hmu bawk. Khawtlang a barakhaih tak zet a. "Tu minunrawng nge ni ngai hetiang thil rapthlak tak titu hi? Eng tin nge a tih theih zawk?" tiin zawhna an zawt a ni.

Fingerprint atangin chu nu chu kum 29 a upa Summer Lee Baldwin-i a ni tih hriat chhuah a ni a. Fa pali nei lai mahse pasal emaw kawppui emaw nei lo a ni. Tunhmain nawhchizawrh thu buaiah man a lo tawk tawh bawk. Hmei chhe dang te ang bawka hun harsa tak paltlang lai khawvel sualna a tang lak lawh a ni a. A chang chuan talchhuah theih loh chang te pawh a nei thin a ni. Summeri thattu zawn hmuh chu thil awlai a ni hauh lovang. A eizawnna vangin mi duk dak lo tam tak a dawr dawn tih hriat a ni. Landfill hmunah khan hnu han chhui theina tur hman rua lo awm ta pawh ni se hmuh chhuah thei a ni lo pawhin thil harsa tak chu a ni ngei ang. Chulai hmunah chuan bawlhhlawh hlirin a khat a ni mai a. Chutiang kara evidence zawn hmuh tum chu beidawn thlak thil lam mah a ni e.

Investigatorte chuan suitcase ah chuan fingerprint an hmu zo lo va. Mahse suitcase chu a thar diai niin an hria a ni. A chhunglam chu a faiin a vawnna a Label leh Barcode te pawh a la inbel thlap a. A chhungah chuan UPC number pawh a la awm thlap a. Chumi atang chuan chutiang suitcase chu miin Lubbock khua khawi dawr atangin nge a lei ang tih an han chhui tan ta a ni. Dawrkai tam tak an biak hnuin policete chuan chutiang model chu Walmart atang ngeia hralhchhuah niin an hria a. Investigatorte chuan Wallmart dawr chu a pan ta a. Walmart dawr lo nghak tu chuan chutiang Suitcase chu ni tlem liamta chhungin pahnih chiah an hralh chhuah thu a lo hrilh a. Chung suitcase pahnih te an hralh lai video chu an han en ta a. Suitcase pakhat leitu chu hmei chhia a ni a. Pakhat zawk erawh His panic mipa (spanish/latin american lam thisen kai) a ni loh pawhin vun thim lam deuh, cher leh sang lam feet 6 vela sang a ni a. Sam bul taka met leh kawr hring ha kum 20 bawr vela upa niin a lang a ni. Summer-i thah ni tak zing dar lam 3 velah suitcase chu a lei a. A leitu pa vek chuan thil dang lei tel a nei bawk a. Zing lam dar 3 vela suitcase han lei ngawt mai chu a danglam deuh chu a ni. Chumai bakah latex kutkawr a lei tel leh nghal.Investigatorte mamawh awm chhun chu chu pa zawnchhuah chauh chu a ni ta.

 An mirinhlelh pa enchiang tur in dawr bul vela surveilance camera te chu an han enfiah ta a. Surveilance camera ah chuan chu pa motor khalh chu chiang takin a lang a. Pick up rawng sen ni ngeiin a lang a ni. Tu nge a nih tih hre rih lo mahse chu suitcase leitupa chu rilru fim leh buai eih lo hian a awm a. Chupa chuan credit card hmangin suitcase leh gloves te chu a lei a. An han chhui chian chuan chu credit card hmangtu chu Rosendo Rodriguez-a a ni. He pa hi Texas Tech ah lo lut tawh San Antonio a cheng a ni a. Marine Corps reserves ah lotel tawh leh Sum meri thah a nih weekend a Lubbock ah monthly training tura rawn kal a ni. Record atanga a lan dan chuan a hnu minute rei lo teah chu credit card vek hmang chuan petrol lei a ni leh a. Investigatorte chuan Gas Station ep chiaha hotel awm chu an hmu a. Chu hotel 'Holiday Inn' nghaktu chu thu an han zawt a. Khualchhawn hmeichhia chuan driver license atangin Rosendoa chu a lo hre thei a. A sawi dan chuan Thomas Rodriguez angin a lo inziak lut a. Hotel room chabi atang chuan investigatorte chuan thu pawimawh tak an hriat belh leh bawk a. Room atanga chhuah hun lang thlei lo mahse mi tu emawin chu card key hmanga room chhung a luh apiangin a luh hun chu record lamah a lo inchhinchhian thlap thlap a ni. Record atanga a lan dan chuan Summeri thah a ni ni khan Rodrigueza chuan dar 12:30 am ah roomah chuan a lut a. Tichuan Rodrigueza chu zing lam dar 3.46 am ah roomah chuan a lut leh tih a lang a. Chu chu suitcase a lei atanga minute 20 bawr velah tihna a ni. Room chhung chu an han enfiah a. Carpet ah chuan thisen ang tak mai an hmu a. Matress tlangah leh bedsheet ah te pawh chuan an hmu bawk. Room pawn inkal pawh na ah chuan bawlhhlawh bawm a awm a. A chhungah chuan Holiday Inn bag a lo awm a. Chumi chhung lehah chuan walmart bag a lo awm leh a. Chu wal mart bag chhungah chuan latex glove pair khat a lo awm ve thung a ni.

Rosendo manna warrant an ti chhuak ta a.Investigatorte chu evidence lakhawm turin San Antonio, Midland, Lubbock-a Holiday Inn leh hmun dang ah an insem darh a. Rodrigueza chu khawiah nge a awm ang? A cell phone record an han enfiahin chu chhanna chu an nei thei ta a ni. Kha tia Summeri ruang a thehthang hnu dar kar rei lo te ah bus ah a chuang a. A zin kawngah chuan Walmart dawra a hak ngei kawr ha chungin thla a lo in la a. Eng thil mah thleng lo ang maiin a nui a. Chu thlalak chu a bialnu thawnin San Antonia lama a kir mek a ni tiin a hrilh a ni. Policete chuan San Antonio a Rodrigueza nu leh pa te chenna In ah ngei chuan computer a lo khawih lai mekin an va man ta a ni. Ani chuan a chanvo in ukil hmuh a phalhsak angin ukil hmu hmasak a ngiat a. Chu In atang chuan bungrua thahnem tak: computer, phone, bus ticket receipt, pick up sen hawh nana rental car agreement leh kawr hring walmart dawr chhunga a hak ngei te chu an la tel bawk a ni. Midland lamah thung chuan Rodriguezan a hman hawh pick up sen chu a thla la in an kawl tha mek bawk a.

Summer Baldwini thah chung chang an han zawh chuan inhnam hnawihna a nei lo tiin a pha a. Mahse Hotel bawlhhlawh bawm chhunga latex glove a DNA erawh hairual a ni lo. Chung latex glove chhung leh pawn ah te chuan DNA an han zawng ta a. Pawn lamah chuan Summer Baldwini DNA hmuh a ni a. A chhung lamah thung chuan Summeri DNA, Rodrigueza DNA nen inpawlh a awm thung a ni. Rodrigueza DNA chuan Summeri atanga Rape Kit a DNA an neih chu a mil chiah bawk. Investigatorte tan chuan zawhna harsa tak ni si chhanna awlai tak ang vel a ni. Fimkhur thu hla ah Rodrigueza computer chu an han enfiah leh ta a. Tih dan phung pangai ang chauh a ti an ni nghe nghe a. Mahse chutiang ngawt lo deuh chuan thil dang hmuh chhuah an neih belh leh ta a ni. Online kaltlangin hmeichhia hmu a tum nasa tih an hmuchhuak a. Mipat hmeichhiat hmanpui tumna lam te pawh a lang a ni. Computera search atangin "Summer Balwind" tih hming leh landfill-a a ruang an hmuh dan kaihhnawih vel a zawng tih an hmu a. Chu lo pawh hming dang zawn nawn sek a nei bawk a. Chu hming chu Joanne Rogers-i a ni.        

Kum 16 a upa Joanne Rogersi chu High School zirlai naupang niin Summeri ruang an hmuh hma thla 18 liamta atang khan a bo tawh a. A nu leh pa te chuan a bo hma zan (zinglam) dar 1.00 am vela Sandwich dawr a a hnathawhna atanga a lo haw lai an hmu chu an hmuh hnuhnun ber a ni. A tuk zingah chuan Joanna chu a lo awm tawh lova. A nu leh pa te chuan thil diklo tak eng emaw chu a awm tih an hrethiam nghal mai a. A hak lai bak a car emaw chabi emaw a keng lova. Thawmhnaw emaw pawisa emaw pawh a keng hek lo. Cell phone a keng lova engmah a keng chhuak lo a ni. Chu chuan ngaih a ti tha thei lo va. Chin hriat lovin a bo tawp a, a chungah eng thil nge thleng an hre lo a ni.

Pawnlam mi luhna hnuhma a awm lo va. Inhnuai pindan zau a mu a nu leh pa te chuan thawm hriat an nei miah lo bawk. Investigation an tih laiin Rodrigueza hming sawi rik a ni a. Mahse Joanna nen online chat page a an inbiak vang chauh a ni. Chumi tum chuan policete leh mitlawmngaite chuan zau thei ang berin an zawng a. Mahse an hmu zo lo chuang lo a ni.

Policeten Rosendo Rodriguezan a computer atangin Joanna Rogersi chu a follow reng a ni tih an han hmuh chhuah chuan an barakhaih chiang hle. An ngaih dan chuan Summer Baldwin chungah pawh khatiang khan a ti thei a nih chuan Joanna i chungah pawh a ti ve thei a ni tih an ring a ni.

Investigatorte chuan suitcase chhunga a khung hma khan Rodrigueza khan Summer Baldwini kha Lubbock Hotelah a that ngei niin an ring a. A hnuin chu suitcase chhunga ruang awm chu ruam hnawhkhahna (landfill) ah an hmuchhuak a ni. Rodriguez computera evidence an hmute atangin Rodriguez-a chu thla 18 lai bo tawh kum 16 a upa Joanna Rogers-i bo chungchangah pawh a inhnamhnawih ngei an ring bawk. Rodriguez computer ah chuan rilru tibuai thei deuh mai hmuh chhuah an nei bawk a. Joannai bo hma khan an inbe fo thin tih an hmuchhuak a. Joanna-i chuan Summeri chhunna riau a nei a. Sam sen, ngo leh kum inthlau lutuk lo an ni a. Chuvang chuan Rodriguez-a chu serial killer a ni thei mai ang em tih an ngaihtuah a ni. Chumi hre thei turin investigatorte chuan finfiahna tam zawk an mamawh belh ta a. Joanna Phone record ah chuan Rodriguez a call na emaw a lo call na emaw a lang lo va. Mahse Rodriguez an Joannai bed room a land line a call na erawh an hmu thung. Chuan a bo zan ah ngei a call bawk. Summer Baldwinin vanduaina a tawh ang kha Joanna pawn a tawk ve a ni tih ngaituahna ringawt pawh a chhungte tan chuan an tawrh theih phak bak a ni.

Heng case pahnih te hian eng emaw kawng zawngin inkungkaihna neiin Joanna ruang chu Landfill khawilai ah emaw lo awm ni ta se; football field pathum tiat a lian landfill ah chuan eng tin nge Joanne ruang chu an zawn hmu theih tak ang?. Thil khrihkhan chu a intan dawn chauh niin a lang. Bawlhhlawh dahkhawm chuan 1260  acres laia zau a awh a. Mahse Landfill Official te chuan inrelbawlna fel tak an lo nei a ni tih Investigatorten an han hriat chuan hlawhtlina lian tak an tawng ta.  Bawlhhlawhte chu awmze neiin chhunna hmun tur bik fel takin an lo ruat lawk vek a. Detectivete chuan khawilai bawlhhlawh bawm berah nge Joanna i ruang kha a awm ang tih ang chhut chhuak a. Tichuan chu bawlh hlawh bawm chu khawi lai hmun velah nge bunruah a nih tih an ngaihtuah leh ta a. Harsatna awm ta chu foot ball field tam tak awh tur khawpa zau a kum 2 dawn bawlhhlawh intiang khawm a nih avangin ton 50000 chuang zet laih tlang ngai a ni a. Chutiang kara Joannai ruang zawn chu buhpawl zinga hriau zawn mai a ni.

Mitlawmngai te chuan bawlh hlawh phumna lai hmun bikah chuan an han zawng ta a. Hmun nuam tak chu a ni lem lo. Bawlhhlawh rimchhe lutuk tak mai leh nisa lutuk karah ruang han zawn chu na mai lo tak a ni. Mahni chenna in a bawlhhlawh rim kha vawi 10000 velin puntir ta i la chutiang ai pawh chuan a chhe zawk daih ang. Ruang zawnna ah chuan tlawmngai za tam tak an thawk chhuak a. Kar 12 zet an zawn hnu chuan Investigatorte chuan Joanna ruang zawn hmuh an beiseina pawh a bo tial tial a. Ruang zawn hna chu chhunzawm zel a ni  a. Zawngtuten an nat phah ang tih chu hlauthawnpuiawm tak a ni.  Sazu leh natna hrik tam takin a bawm lukna hmun a ni a. Zawngtuten an tan a hlauhawm zia an hre lo pawh a ni thei a ni.

Thla hnih chhung an zawng tawh a. Pamtul mai an duh hman hial tawh a. Mahse, chutia beidawng taka an awm laiin a tawp a tawpah chuan bawlhhlawh intiang ul mai nawrsawn mek backhoe (JCB/Bulldozer ang chi) chuan suitcase a nawrchhuak ta nawlh mai le. A chhungah chuan hmeichhe la naupang tak ruang tawih chhe tawh tak mai chu a lo awm a. Sam sen mawi tak a nei ngei bawk. A bo atanga ni 904 na ni ah a ruang chu an hmu ta a ni. Dental Record chuan Joanna Rogers-i ngei a ni tih a finfiah ta a ni.

Rogers-i chhungten an fanu an vui liam thei tawh tur chu an lawmpui awm hle mai. Mahni fa te hloh mah a na a ni ngai a an chungah eng thil nge thleng a khawiah nge an awm tih pawh hre lova awm chu tawrhthiam har tak tur a ni reng a ni.

Zawhna pakhat chu chhanin a awm ta a. Chhan ngai dang a la awm ta fo mai. Forensic Evidence chuan Rosendo Rodriguez-a chu Joanna-i tualthihna nen a thlunzawm theih ang em!

Digital Technology vangin Investigatorte chuan Rosendo Rodriguez-a chu Summer Baldwin-i tualthihna nen thlunzawm nan ni 2 chiah an mamawh a. Evidence atanga Prosecutorte rin dan chuan Rodrigueza chuan Summer-i chu Holiday Inn hotel ah chuan a hruai lut ta a. Mipat hmeichhiat na an hmang a. Eng emaw karin an inhau a, tharum thawhna a thleng ta a ni. Tichuan Rodrigueza chuan Summer-i chu nikhua a hriat loh thlengin a vaw ta a. Thisen per te chu chhuatah te, bedspring ah te leh bedsheetah te chuan a tla ta a. Tichuan Rodriguez-a chu Walmart lamah a inkhalh chhuak a. Chutah chuan suitcase leh latex glove kawp hnih a lei a, a man pawh credit card hmangin a pe a ni. Chumi hnu chuan petrol a lei leh a. Hotel chabi atanga a lan dan chuan a thlenna hotel room ah chuan zing dar 3:46 am ah a lut leh ta a. A nung chungin Summer-i chu suitcase ah chuan a khung ta a. Tichuan gloves leh suitcase a leina receipt te chu bawlhhlawh bawmah a paih ta a ni. Chu glove ah chuan Summer-i leh Rodriguez-a te DNA a lo kai a. Suitcase a inkhung Summer-i ruang chu bawlhhlawh bawmah a paih ta a. Chu bawlhhlawh chu a hnuin truckin rawn senghawiin landfill ah khan a va chhung ta a ni. Rodriguez-a cell phone chuan San Antonio pana a tlanna kawng a tarlang a. Heng zawng zawng hi suitcase chhunga barcode atanga tanin chhuichhuah vek a ni.

        Summer-i thah thubuaia Rodriguez-a man a nih lai khan a Computer-a Evidence atangin thla 18 liam ta a Joanna-i bona nen thlunzawm a ni a. Computer Forensic chuan online hmangin Joanna-i nen an inbe ngei a ni tih a pholang a. A bo zan khan zinglam dar 2 velah a cell phone hmangin Rodriguez-a chuan pawnah a nghak reng a ni tih a hrilh ni a rin theih turin Joanna-i chu a bia a. Prosecutorte rin dan chuan sex hman chungchangah an inhnial buai ta a. Inhnialna chu tharum thawhnaah a chang ta a. Evidence atang chuan Summer Baldwin-i chunga a tih dan ang chiah khan Joanna Rogers-i chungah pawh chuan a ti ve a. Joanna-i a thah hnu chuan a ruang chu suitcase chhungah a khung a, bawlhhlawh bawmah a paih ta a ni. Chu suitcase chuan a tawpah landfill hmun kha a thleng ta a. Vanduaithlak takin Joanna autopsy atang chuan DNA hmuh chhuah a awm lo a ni. Mahse Joanna-i ruhro hmuh chhuah chu ruang zawnna a tel ve te tan chuan hlawhtlinnna mak tak chu a ni ngei a ni.

Rosendo Rodriguezan Summer Lee Baldwin-i a thah thubuai chu ngaihtuah a ni ta. He case ah hian Forensic Evidence tha tak tak a awm a. Thiam loh chan tir a ni ta. Thi tura a chungthu rel a ni. Forensic Evidence awm lo se he case hi chhuichhuah a ni ngai hauh lovang. Blood evidence te, DNA Evidence te, Computer Forensic Evidence te leh suitcase atanga an chhuichhuahna te kha evidence pawimawh tak an ni vek a ni. Atawpah chuan Rodriguez-a chuan Joanna Rogers-i pawh ama thah ngei a ni tih a pawm ta a ni.

Misual chuan a thilsual tihna lak atangin fihlim a tum ngei ang, chutiang mi te man chhuah chu Police hnah a ni thung. Pawikhawihna inthup bo hlen thei a awm tak tak ngai lo. "There's no perfect Crime".

Thubuai ngaihtuahna chung chang pawh hi a ngaihnawm viau. A sei dawn em a ka telh ta lo mai.