CHHUAHSAN VE VE MAI RAWH

29 \DECEMBER :Kum a thar dawn ta a, khawtlangah te, Kohhran leh pawl hrang hrangah te chanvo leh dinhmun siam fel a ni leh ang. Nihna te hi a ṭhen hi chuan kan ngah hlawm khawp a! President hlir te, Treasurer hlir te hi kan ṭhu ṭhup thei mai zel a, khawi khaw Miss thlan uar laklawh emaw-ah, Miss leh Miss an inpèl sup sup mai, an tih ang deuh khan, kan lawk thei búr búr khawp mai. A ṭhen chu kawngka biang ilo-a tár chi hi kan ni lehnghal a, kawngka chung leh a biang vel lùn fe fe, thlalak mak deuh deuh pawh kan hmuh zauh zauh hi. Pa ber, nu ber, an nula leh tlangval chanvo kan han bel khawm tak tak chu, Pu Englova pension tangkapui dawng tam ang maiin, kan hnawk rup mai a ni!

Nia. Kan han titi kual leh rih a! Whatsapp group chungchang daih hi a nia sawi ka tum. Hmanraw changkang zel hi kan ṭangkaipui hle hlawm a, Committee koh nan leh thil pawimawh sawiho nan te kan hmang a, a awlsamin a zangkhai hle mai. Hetiangah hian - chuta tel tur ka nihna a lo tawp emaw, ka hun a lo liam emaw a nih chuan - mahni insaseng nachang i hria ang u. Beginner Dept. zirtirtu whatsapp group-ah i awm a, kumtharah Primary Dept. lamah emaw i awm dawn chuan, Beginner lam Group kha 'leave' rawh, tihna a ni e!

I leave hma khan, 'He Dept/Committee-a ka awm tawh dawn loh avangin Group hi ka chhuahsan ta mai e, tluang taka rawng in bawl ka duhsak a che u' te han ti hmasa phei la chu, mi fel i ni mai. 'Ka left ta mai' pawh ti suh, 'Ka leave' ti mai rawh. Grammar rawlh tehchiamna hmun a ni lo! Thanga'n Group a chhuahsan a, 'Thanga left' tih a lo inziak a, 'Tinge a left?' pawh tih loh tur! A leave a ni! Zêk mai a! YMA Committee lamte pawh a ni vek, kum thara chawl ve tawh tur, Group chhuahsan nachang hre bawk si lo kan nih chuan, kan bula sawi duh si lovin 'A la awm reng mai' an ti sep sep mai ang.

I chhuahsan si loh chuan, an senghawi che a ṭul ang a, a nuam si lo ang. A senghawitu nih a nuam lo a, an senghawi nih pawh a nuam chuang lo. Kum tawpah chauh pawh a ni lo. Hnathawhna hmunah te leh Group dang reng rengah pawh hian, kan tel lohna chi chu chhuahsan thuai thuai a ṭha. Mi bengvarte hi an bengvar khawp a, eng khaw sawi set set lo hian min hnûk lût ve mai zel a nih hmel a, pachang zet hi 'Thlahrang' Group-ah te, 'Bungbel' tih lamah te hian kan lo awm leh vùng ṭhin. Hetianga mi bengvar kan tawn a, inthlahrung lem lova min lo hnuh luh ve chuan, inthlahrung lem lo bawka chhuahsan ve leh mai tur niin a lang! Chuti lo chuan, i inthlahrun a leiah, 'Group 200 chuangah ka tel a, ka ning tak tak i ni... ' i ti zut zut ang a, i phone kha i set fuh thiam loh phei chuan a chik ṭut ṭut reng mai ang!

Blog share and subscribes enjoy.