LPS SAMARI MITHA LO CHHUAH DAN KIMCHANG

Samari Mitha chungchang hi Group eng eng emaw ah sawi neuh neuh leh inhnialna eng eng emaw a awm nual a, Samari Mitha hi, a lo chhuahna bulthum hretu ka nih ve miau avangin,hetia sawiselna leh inhnialna a tam tak em ah chuan sawichhuah ve hrim hrim ka chak ve tlatKum 2012 vel bawr ni ta in ka hria (ka chiang chiah lo) Office-ah keimah chiah in ka lo awm a, Pa pakhat tawi lampang, havar zet mai hi a rawn tek lut hlawl mai a, ka dawhkan bula lo kal in " Mami khawnge Lal Pusawma hi a awm" a rawn ti a, kei chuan "Kapu ka va hre mai lo ve, tun lawk khan a chhuak a, a lo let hun tur ka va hre mai lo em, enge ni ta?" ka ti a.

A ipte atangin pawisa fai cheng singnga chu ka dawh kan a rawn theh thlak pah in " Mami , he pawisa hi mi harsa zawk tetanpui nan ka hlan duh a, kei chuan pek tur ka hre mai bawk si lo, nangnin in hre zawk ang, lo buaipui mai teh u" tih pahin kal leh mai a tum a, kei chuan koh let pahin " Ngawi teh ka pu,heti ngawt chu a diklo, charity programme engmah LPS hian siam kan nei ngai si lo a, engtin nge ni dawn le?' ka ti a, ani chuan " Nang ni zawkin in hriat loh ten tunge hria ang, in pu hovin lo sawikhawm ula lo sem mai roh u" a ti a, kei chuan "a nih leh i hming leh veng tal min hrilh teh, kan pu bulah pawh ka lo sawi theih nan" ka ti a, ani chuan " hming leh veng sawi a ngai lo a, mi harsa zawkte chu lo zawng ula, lo pe tawp rawh u" tiin min chhuahsan ta a. Khatiang kha kan la tawn ngai loh avangin mak ti rilru tak chuan pawisa chu ka dahtha ve tawp a.

Tlaiah Kan pu lo hawng chu, thil awmzia ka lo hrilhthuak thuak a, ani chuan " engpawh nise, mi harsa zual deuh chhungkaw panga vel thlang ila, cheng singkhat den den in i sem mai ang u, Pu vana'n a sem hna buaipui mai se, TV- ah kan tihlan loh chuan kan pe ngei em tih a hre dawn si lo a, a dik dawn lo tlat, a programme pawh "samari mitha" tiin i vuahmai ang u" a ti a, tichuan YMA te be rawnin chhungkaw panga thlanchhuah te hnen ah cheng singkhat theuh in kan sem ta a. Khabak tih leh tur a awm pawh kan ring bik lo ani.

Chu kan tihchhuah chu chupa vek chuan a lo hmu a, mi harsa kan pek te chu a rilru a lo luah ngang a niang, kan chhuah atanga karkhat hnu vel ah a rawn kal leh a, keimah chauh bawkin ka lo awm leh a, chumi tum chuan nuaih 1 a rawn dahleh a, kei chuan ka pu i hming leh veng tal min hrilh tawh rawhka lo ti a, mahse a hma ami ang bawkin a sawi duh leh chuang lo a, " in thil chhuah atang khan mi harsa zawk tanpui ngai an lo tam zia ka hmuh belh zel a, keiin tanpui tur mai ka hre bawk si lo nen, tikhan nuaih 1 kha lo sem leh rawh u, ka sumdawnna ah pawh ka tluan phah viau ani, Lalpa'n mal a sawm a nih kha, kalpui zel rahw u " tiin min chhuahsan leh a. A hma ang bawkin YMA te kaltlang in chhungkaw sawm hnen ah cheng nuaih khat chu kan sem ral leh ta a. Chumi ni atang chuan hei vawiin ni thleng hian, samari mitha ti a sum rawn dah hi an la chawl lo reng reng ani..Sum rawn dah te hi , an in anglo khawp mai, "Ka nikhat inhlawhna ka rawn dah dawn" ti te, naupang te te in " ka khawl bawm ami ka lo dah dawn" ti te, " ka vawk hralhna", " ka in hralhna" etc..Sum an rawn dah dan hi a in ang lo nuaih mai ani.

Chutiang MI inphalte sum an rawn thawh khawm atang a tlingkhawm chu LPS Vision hian a semchhuah hna a thawk mai chauh ani. He programme hi intihlar duh vang, mirethei tih mualpho duh vanga kalpui lam a ni lo. Kan duh vanga kan kalpui pawh nilo, Mi inphalte sum thawh khawm, kan tihtur, kan kova lo tla mai chauh a ni tih ka sawi lang ve duh tlat. LPS Vision hian kan tum vang leh kan duhthu vanga kan kalpui a ni lo a, Pathian Programme liau liau a ni. Sum rawn thawh tu te hi, hmingthup chu an awm teh meuh mai, chutih rual chuan association ang te, pawl ang te, thian hming ang te a rawn dah te an awm ve thin a, thenkhat phei chuan pawl thil a ni sia kan pe ngei tih hriatna tur tiin receipt te kan pek te a awm nual bawk, a then phei chuan TV-a kan tihlan huna a chhiar chhuah dan tur thlenga, thuziak min pe te an awm bawk...

chung zawng zawng karah chuan keini tan TV-alo tihlan sak loh ngawt hi a fel ber bik lo ani.A dil tu lam lah nitin lehkha a lo lut chur chur a, emergency taka min rawn ba thin lah bo lo. Chutiang karah teh nuaih chuan "Samari Mitha" hi LPS Vision hian tlinglo takin kan kalpui ve lawp lawp a, selna tur pawh a tam ang, mahse kei nichuan Pathian Programme kan ti lo thei lo a, Mi inphalten sum an rawn dah chhung chu keini chuan kalpui zel kan tum a, a tullo a nih chuan Chunglam khian min tihtawp sak mai turah kan ngai tih hi ka sawi ve duah duh ani.

TANPUI NGAI TE I TANPUI HIAN NANGMAH IIN TANPUI ANI.

Blog share la subcribe rawh le, enjoy.