Mi rethei tana chênna tur in sak CHHUNGKUA 161-IN AN LUAH TAWH

nuary 6, 2018 : Sorkar laipui scheme, Basic Services to Urban Poor (BSUP) hnuaia Lawipu, Aizawla mi rethei chênna in nei lote tana in sak chu nimin thleng khan chhungkaw 161-in an luah tawh.

BSUP hnuaiah hian mi retheite tana in luah tur hi hmun pali - Lawipu, Durtlang, Rangvamual leh Edenthar Vengahte siam a ni a, a vaiin chhungkaw 1,096 luah theih tura siam a ni.

Tun dinhmunah chhungkaw 408 luah tur awmna Lawipua mi chu luah theih a ni tawh a; December 11, 2017  khan UDPA minister Zodintluanga'n allotment a sem a, nimin thleng khan chhungkaw 231 hnenah luah phalna (allotment) pêk tawh niin, chu'ng zinga 161 chuan an luah lût tawh a ni.

Chhungkaw 320 luah theih tur Durtlanga mi leh chhungkaw 368 luah theih tur Rangvamual/Edenthar Venga mite erawh chu peih a la ni lo.

Zawhna chhangin UDPA minister chuan, Durtlang leh Rangvamual/Edenthar Venga mite chu luah theih tura buaipui mêk a nih thu a sawi a, "Hun rei lo tê chhungin luah theih tura peih beisei a ni," a ti.

Zodintluanga sawi danin, BSUP hnuaia inte chu luah dîltu an awm chuan an dinhmun endik a nih hnuah, dànin a luah thei tura a tih ang an nih chuan allotment pêk țhin a ni ang.UDPA minister chuan, mi harsa zawkte'n in luah tur an neih theihna atan sorkarin theihtâwp a chhuah tih sawiin, "Scheme hrang hrang hnuaia mi harsa zawkte in luah tur hi buaipui mek a ni," a ti.

Zodintluanga sawi danin, BSUP hnuaia hmalàkna bàkah hian Housing for All hnuaia in hmun nei, a sakna tur nei lo leh in luah tlàk tawh loh khawpa chhiate țanpui tura hmalàk mek a ni a; hemi atan hian Aizawl leh Lawngtlai district tan bik first instalment hmuh tawh niin, țanpuina hi Aizawl district-a chhungkaw 187 leh Lawngtlai district-a chhungkaw 141 hnenah pêk a ni.

Chhungkaw engemaw zat chuan in an sa zo tawh a, țhenkhat chu khawsak harsa tak tak an nih hlawm avangin tlawmngai pawlin an sakpuite pawh an awm. Tlawmngaihna hmanga inpui tawn an awm chu sorkar hotute chuan lawmawm an ti hle a ni.

Ka blog subcribes in minlo share sak ve la, ka lawm e enjoy.