TWO WHEELER TAXI, KUMKHAT CHHUNGA A DANG PALI PHURCHHUAK THEI MIZORAM TAXI NGAT. (Four wheeler Taxi aiin an lak luh a tam.)

Tunlai chu Two wheeler Taxi neituten  rate pawh nilo, to uchuak takin passenger te rate an charge țhin ni a mi tamtak sawitu an awm avangin,hemi chungchang hian ti ti a ti tam hle a. Heng avangte hian Transport department lam pawhin, Two wheeler Taxi rate chungchangah mipuite hriattur thuchhuah tepawh an siam hial ani.

An khawngaihthlak awm viau ang a post awm hi an duham nghal lutuk vanga hetiang hi tawk an ni. Hetiang ani chung pawh hian two wheeler Taxi nei chak tak tak kan nih deuh fur ka ring.

Two wheeler Taxi rate hi a hmangtu țhenkhat ten tlawm tiviau țhin mahse, țhenkhat tan erawh sorkar rate siam nen rate an charge a inpersan hle țhina a lan avangin sawiloh theihloh a nive bawk a, an nikhat rate ngaihtuah hian, Four wheeler taxi rate nen, an rate hi a inthlau nep hle niin alang.

FOUR WHEELER TAXI NGE HLAWK ? : Two wheeler Taxi nei pakhat ka zawh chuan, petrol man Rs.300 kan paih hnu ah Rs. 1300 everage  angin a chawhrual theih. Kan țhian țhenkhatte phei chu heng aia hlawh țha daih pawh an tam. A tlangpui chuan Rs.1000 aia tamin kan chawkrual pha vekin ka ring tiin a sawi. Tunah erawh mipuiten an hlawk dan hi kan hriatchhoh zel avangin, an daily rate hi a hlawk si a ansawi țha duh tawhlo niin ansawi. An nikhat rate hetiang hi a nih chuan thlakhatah ni 25 tlan ang nitase, 1300x25 = Rs. 32500 thla tin an lalut dawn tihna a ni.Kumkhat chhungin Rs.32500x12 = Rs.390000 tehmeuh a tlan chhuak hman. Two wheeler cheng Rs.90000 man pali lai a thawh chhuah bakah Krismas bazar nan, Rs.30000 ala paipawn thei dawn a ni. Hetiang hi an income anih chuan, Two wheeler Taxi neih hi Four wheeler Taxi neih aiin a hlawk chungchuang/uchuak hle niin alang.

Four wheeler Taxi țhenkhat daily rate ka zawhte chuan, nikhatah petrol Rs.500 man kan la tlangpui a, Rs.1000 te kan la hawnthei ti a chhang an awm nual a, țhenkhatin Rs. 900 hawnthei niin an insawi a. Țhenkhatin Rs.800 vel in a chawhrual theih kan intlanchhawk hnu ah tiin ansawi. Rs.1000 aia hlawh  hnem thei tumah ka zawt fuhlo. Heti anih chuan a tlangpuiin Four wheeler Taxi țhahnemngai zual deuh chuan Rs. 1000 in an chawk rual pha ah ngai ila. Intlanchhawk an nih avangin daily chuan Rs. 900 ang vel an lalut ah ngai ila. Thlakhatah ni 25 tlan ang nitase, Rs.900x25= Rs. 22500 an lalut thei tihna a ni ang. Two wheeler aia an hlawh tlem zawkna hi Rs. 10000 lai a ni. Kumkhat chhungin Rs. 22500x12 = Rs.270000 an tlanchhuak thei a, two wheeler Taxi aia kumkhata an hlawh tlemna chu Rs.120000 lai a ni. Four wheeler Taxi thar hi permit nen chuan Cheng nuai li vel niin ansawi a, Taxi thar pakhat man thawkchhuak turin kumhnih chhung deuhthaw regular taka an tlan a ngai tihna a ni. Cheng nuaili vel senga kumkhatah Rs.270000 lakluh nge  ? Rs. 90000 vel senga kumkhata Rs.390000 lakluh thlanawm zawk ang ?. Two wheeler Taxi tamzawk hi Rs. 90000 senna tur  a nilo lehnghal.

RATE UCHUAK AN CHARGE TIH HI A DIK ANG EM ? : Two wheeler Taxi leh Four Wheeler Taxi inhlawk hleih dan han ngaihtuah hian, Two wheeler Taxi te hian Rate uchuak tak takin an la țhin tih a hmangtuten ansawi thin hi rin ngamloh rual a nilo, Sorkar rate siam ang hi chu mipuite pawhin a tlawm lutuk a, chhe phalo mahse, hlawk em em a nilo tih kan hriatpui vek. Chuvangin Sorkar rate siam hi an zawmlo deuh a, Rs.20 velin lo charge to ang pawh nise, Rs. 1600 tlanchhuak tur hi chuan taimak viau a ngaih bakah ding mang lova tlan kual char char a dar riat dar kua vel thleng tlan a ngaih a rinawm. 1600 petrol man nen khawthim hma in an tlanchhuak țhin anih chuan, Sorkarin rate a siamsak ang hi an zawmloh dan a nasa hle tih a lang chiang hle. Tin Two wheeler Taxi service tirh  ațang a sorkar dan siam an bawhchhe ngam nghal hrim hrim pawh  hi an huaisenin  a mak takzet a, a dan zamtu leh Permit petu, Sorkarin dan a siam zawng zawngte, permit an dil laia an intiamna, Sorkar pawh an zahlo takzet a ni.. Sorkar hian report a awm chuan huaisen takin hma la nghal zung zung se, a theih ang leh antih nawn ngam tawhloh nan action na takin  la nghal țhak țhak  rawhse..

 Hmana țang report tu an awm zeuh zeuh tawh a, passenger ten an han report hian thuneitu lampang hian a koh chu an ko ve ngei a. Mahse rin ang he hu in action lak a awm ngailoh avangin, an zilh zo an tlanchhuah rual hian an tlandan ngaiin passenger an la leh nghal zat țhin niin ansawi. Chuvang chuan Sorkar lam hian a report tu mipuite lam hi, Two wheeler Taxi hovin rate dik lova an charge ngamloh nan leh passenger ten  an report an hlauh zek zek theihnan, report a awm tawh chuan rang takin  action lo la țhin rawhse.

Two wheeler Taxi te hian hlawk nghal vak an tum tih hi an nikhat rate ațang hian a chiang reng a. Tuna an daily rate chanve Rs 600 ang vel hi petrol man Rs.300 paih hnu a an daily rate pawh nise, Two wheeler Taxi rate atan chuan ala hlawk hle ang a, kumkhat chhungin Rs. 180000 Two wheeler 90000 man a thar pahnih man a la phurchhuak pha dawn tho a ni. Four wheeler Taxi aiin neih ala chakawm zawk daih. Petrol man paih hnu ah nikhata Rs.600 rate vel hi a ruahmantu sorkar rilru leh tum dan vel pawh a ni ngeiin a rinawm. An in dah sang nghal  lutuk hrat a ni.

Two wheeler Taxi rate chungchangah hian, mipuite pawhin diklo taka min charge a min namnul mai mai ngamloh nan, huaisen chhuahin thuneitute hnenah report pe țhak țhak ngam ang u. Chuti anih loh chuan tun ațang a kum li nga a liam leh chuan Four wheeler Taxi rate nen a in ang reng tawh ang. Tuna pangin cheng 20 khat baka in tlawmhleih lovin rate an charge nghal tawh a nih hi. I harh mawlh ang u.