Inhlawhfak tih reng mai hi!

Tukin Ţhalaite Inleng phek hnung ber awhtu chanchin chu sum tuakna chanchin hlirin a khat a. Chumi bakah chuan nakin lama sum tuak dan tur ruahman lawkna chanchin bawk a ni!

Nangni kohhran ţhalaite pawh in ni ve vek tho! Rawngbawlna nei thei tur chuan pawisa a awm a ngai tih hi sum tuak a ţulna chhan rawn ţantute ţanchhan ber a ni bawk ang.

An ţanchhan hi a dik takzet a ni. Nimahsela, hei bak rawngbawlna a awm a ni tih hriaa kan che chhuak hlei thei si lo lai mawlh mai hi ka veiin ka sawi leh ţhin a nih hi.

A chhan chu tuna kan rawngbawl dan hian sual a ngam lovin tualchhûngah do pawh a do thei tlat lova ni! A dika dik chuan member inhmangte pawh kan dam ngawr ngawr a, thlarau awmpuina nena rawngbawl thei alawi pawh kan awm ta lo.

Sum tuak hian kan buai kumtluan ringawt leh mai dawn a nih hi. Zonet Beiseina lama kohhran hrang hrangte zaipawl zai ka thlir mek lai hian ka hah ru em em bawk a!

Music video a changkan piahah an incheina a nalhin anmahni lah an nalh narawh e. Mahse, an inbuatsaihna hautak zet hian Buangliankunga zaipawl anga thiltihtheihna keimahah an nei thei si lo!

Kan rawngbawl dan hi kan zei em em ringawt mai a nih hi! Mahse, heng zawng zawng hi kan tihmakmawh niin Lalpa lo kal leh hma chu kan tih reng tur an ni tih i hai lovang u.

Nimahsela, Thlarau Thianghlim be pawp turin prawkrem piahah taimak chhuahin mi sualte awh khawp nun duhawm leh thianghlim nei turin sum tuak kan uar tluk leh kan zai nasat tluk hian i bei ngam tawh zawk ang u.

A dik a dik chuan kan vela mi hlate hian kan nunah itawm hmuh an nei tlem lulaiin Lalpa rawng kan bawl avanga kan nuna êng chuan an nun a chhun êng pha thlawt lova nih hi!

Hetiang mi hi kan awm thlawt lo a ni lo. A awm zawng an awm ve pheuh pheuh a ni zawk. Rimtawng takin kan hahthlawn rei ta. Rawng kan bawl rau rau a nih chuan kan ram, thim mup bawh êng law law thei tur hian Thlarau Thianghlim awpna hnuaiah kan che chhuak zawk tur a ni dawn lawm ni? LALREMLIANA PACHUAU

SHARE and SUBCRIBES enjoy.