LAITUMA PUK (VANGCHHIA)

He pûk hi Vangchhe khaw tlangval hmelṭha hmingthang leh zei tak, Laituma, an khaw hmeichhia, nula leh nu zawng zawng, lalnu meuh pawh mutpui hial theitu pûk chu a ni a; a chhûng hi a zau thawkhat hle, vawikhatah nula pahnih/pathum a tawmpui ṭhin niin an sawi .

Vangchhe khaw thlanglam kawtchhuah, Motor kawngpui chhak lawkah, biru tak siin a awm a, pûk a awm tih hre sa lo tân phei chuan hmuh mai theih a ni lo.

 Laituma hi Mizo chanchina hmeichhia 'thei' tam ber a ni àwm e. An khaw hmeichhia zawng zawng ngaihzàwn rawn a han ni ta chu thîk pawh a hlawh ta êm êm rèng a, a tâna chhiatna tur zawngin tlangval mai ni lo, pa ho thleng pawhin an phî ta ruai mai rèng a ni. 

Nula a ngaihtheih zia thu leh nuho te pawhin an duh ṭhin zia miten a nu hnenah an hrilh fo avangin a nu hlauthàwng chuan atâna himna kawng dapin he pûkah hian a tawmtir a, a ralmuan fê hunah lo chuan chhuahtir mai ngam lovin, pûk chhûngah hian chaw te a va pe mai ṭhin.

Chutia a nuin chaw a pe ṭhin tih chu amah ngaizâwngtu, an khaw nula ṭhenkhatin lo hre ruin, an chhûngte hriat lohin a nu chu chaw an lo inpêk chhâwk fo ta maia, a ṭhen te phei chu pûk chhûngah hian an awm rei ṭhin hle a ni àwm e. Chutiang khawpa 'tlangval vannei' chu, amah chaw petute pawh chu an inphâwk rù suau suau fo! 

Vawikhat chu a tân vanduaina a lo thleng ta! Nula pakhat a tawmpui laiin a nula tawmpui chuan pûk pâwn lamah chuan Paikawng a lo dah kher pek a. Thli lo thawin a thlang lawka kawngpuiah Paikawng chu a chhèmthla  a. Chu chu mite chuan lo hmuin, "hei hi tu Paikâwng nge ni ta ngài le" an han tih chuan, chu nula chuan pawi vak lo turah a ngâi nge, a ta a nih thu a sawi ta maia, chutih mêk laiin Laituma chu Pûk aṭangin a lo chhuak ve chiah bawk nen, an man chhuak ta nge nge a, a pûk hmingah pawh, 'Laituma nula tawmpuina pûk' a lo ni hlen ta a, ṭhenkhat phei chuan 'Laituma khum' ti te pawhin an sawi ṭhin.

Laituma hi Mizo tlangval zinga lunga denhlum hmasak ber nia hriat a ni. An khaw Lal upa leh a hoten an thîk lutuk chu an insûm zo ta lo a. Ṭiau lui puiah sangha tlângvuak rawtin an hruai a, dàwta bumin lipuia a awm lai chu lungin an den rawn ta chiam maia, a chaknain chu chu chu tuar lovin a pil ruai ruai a, a thi zui ta a ni. 

Laituma an that tih an hriatin, a nu leh a ngaihzawng Chawngpuii chuan phuba lâk dàn tur an ngaihtuah a. Laituma lung phun nan zû an sa ta vak mai a, lal leh upate, sangha tlângvuaknaa kal te zawng zawng kha ṭhahnemngâitakin lungphunnaa kal turin an sâwm vek a. 

Lungphun nî chuan zu bêl tam tak rawn chhawp chhuakin, zu bêl mawngah chuan tûr chi khat, 'hnam tur' an telh vek a. Chu chuan amah thattu, an Lal leh upa ho bakah mi tam tak an hrài hlum zui ve ta a, anmahni pawh khua aṭangin an tlànbo ta vang vang mai an ti.