HNAM HNATLAN HUN SAWN ANI.

March ni 14-a Zofate Chawlhbuk sa tura Hnam Hnatlang neih tum chu, thil tha zawk beiseiin sawn rih a, Mipuite hriat thiamna a ngen a ni.

Zofate Chawlhbuk sak tum chungchangah hian, MZP-in hnatlan ngei a tum laiin hnatlang rih lo tura ngenna a dawng nual a, March ni 13 (Thawhlehni)-ah phei chuan kan tlawmngai pawl unaute- Central YMA, MUP, MHIP leh MSU te meuhin thil tha lo pumpelhna a nih beiseiin a hun hi sawn rih turin MZP an ngen tawh. A zanah Mizoram chief minister leh home minister te'n MZP an ngen bawk a, Mizoram Kohhran Hruaitute Committee (MKHC) pawhin Zofate Chawlhbuk sa rih lo turin an ngen bawk. Kil hrang hrang atangin mi hrang hrangin MZP hi an ngen a, thisen chhuah a hnai nia ngaia hlauthawng pawh thahnem tak an awm tih hriat a ni.

Chuti chungin MZP chu a dinna ngaiah a ding zui tho a, amaherawhchu, March ni 13 tlai leh zan lama thil thlen dan enin hmanhmawh takin zanlai dar 12-ah MZP Executive Meeting neih niin, thil tha zawk beisei vangin a hun sawn a rel ta a ni.

March ni 13 tlai lamah union home secretary-in state pahnih chief secretary-te ve ve March ni 20-a inbe tura a tih thu hriat a ni a, kan hma lawkah state pahnih an inbe dawn chunga lo chet hi khawvel mitah a mawi lo thei a, Mizoram tan a tha lo thei ang tih ngaihdan te a awm. Hei hi mi tam takin a hun sawn tura MZP an ngen chhan pakhat pawh a ni. Tin, hemi ni hian tlai tawh takah Kolasib District pumah Cr.PC 144 an puang a, a zanah, office ban hnuah Aizawlah pawh Cr.PC 144 an puang ve leh. Aizawl leh Kolasib district-ah mi panga aia tam awmkhawm khapna dan an puang hi Zofate Chawlhbuk sak tumna tinzawn rana tih a ni tih a chiang a, MZP chuan hei hi na a ti hle. Cr.PC 144 puan avangin hnatlang tura thawkchhuakte leh Mizoram Police an innek dawn tihna a ni a, Mizo leh Mizo inbeihna thlen phah ta se, chu chu MZP duh dan a ni lo.

MZP-in kha chen Zofate Chawlhbuk a buaipui lai khan sorkar hotute'n an dawr lo a, March ni 13-ah NGO te, MKHC te, political party aiawhte chief minister-in a kawm pawhin Bairabi Zophai-ah police an inrintir thu a la sawi laiin hnatlang tura MZP kal turte dan nan Cr.PC 144 an puang leh si hi MZP chuan mak a ti hle.

Zophai-a police inring renga awmte'n hnatlan hun an nghak kher hi MZP duhsaktute ngaih titha lotu a ni a, Mizoram sorkar hian ramri vei lova puh an nih vanga an hmingchhiatna khuh nan, silai hmeh puah chhuanlam atan Hnam Hnatlang hman a tum nia ngai an awm a ni.

Hnam Hnatlang neih dawnah tak Cr.PC 144 puanga MZP tihthuanawp tum a nih avang leh ramri vei tura Mizoram sorkar koh eih tumin MZP chuan total bandh huaihawt a tum a ni.

Ram humhalh tuma MZP hmalakna thlawpa tha leh sum senga puitute chungah lawmthu kan sawi a, thawhho zel pawh MZP chuan a beisei a ni.



                 Sd/-
    (LALNUNMAWIA PAUTU)
         General secretary