THINGTLANG MITE'N VOTE THLAK VE TAWH SUH SE

Mizoram inthlanpui kan lo hnaih chho leh ta a, phunna ngaia phun fo lo turin rilru leh ngaihtuahna uluk taka sên a hun ta. Vawi tam tak Mizoram hruaitu tur kan lo thlang tawh a, duh taka kan thlan kha an term a zawh dawn meuh chuan ar chuk tui lo khawpin kan sêl luai luai hman tawh țhin; hei hi a bulpui ber chu THINGTLANG MITE VOTE vang a ni.
.
THINGTLANG MI AN TAM
.
'Mizoramah hian eng mi nge mawl ber ang?' ti ta ila, inlungrual takin, 'Thingtlang mi,' kan ti țheuh âwm e. Chuti chung chuan Mizoram mipui tam zawk hi thingtlang mi an la ni tlat mai a, chawh rualin hnam mawl tak kan la ni tihna a nih chu. Thingtlang mi pakhat vote hi khawpui mi pakhat vote nen a hlutna a inang tlat a, thingtlang mi an lo tam bawk nen, hruaitu tlaktlailo pui pui hi kan thlan chhuah phah leh mai țhin.
.
NGAIHTUAH TAWI - THINGTLANG MI
.
Thingtlang mi chu an ngaihtuahna a tawi em em a, an thlawhhma leh an inchhungkhur bak hriat an nei lem lo a, chuvang chuan ramhnuk khawih phak, inthlanpuia vote neih ve hi an inhmeh lo.
.
Keini National Highway chungchangin kan rilru a luah em em laiin anni chu feh kawng leh tuikhur kawng bakin an ngaihtuahna a luah pha ve lo a, an iptepui leh êm lenna kawng chu zau tawk an tiin an lungawipui mai zel.
.
Ram intodelhna tur leh economics lama ram a țhanna tur kan thlir laiin anni chu vawiin tlai thlak tur leh naktuk zing chhum tur buhfai an neih chuan an lungawi em em a, lungkham nei miah loin bawp khawkherhin an ui puar țhut veng veng thei mai zel a ni.
.
Thingtlang mi ngaihtuahna leh ram hmasawnna hi chhim leh hmar ang hlauha inpersan a ni a, heti a ni chunga anni vote leh keini vote intluktlanga chhiar a la ni tlat tho si hi chu a lungchhiatthlak tak zet zet a, ramin a tuar mek zel chu a nih hi.
.
BUM NUAM THINGTLANGPA
.
A tam zawk hi mi rethei, sum leh pai awt ngawih ngawih, ngaihtuah tâwi si an nih avang hian sum hmanga thlem leh bum an nuam em em. Hei hi hriain inthlan dawn hnaihah chuan kan Politician fing vervêk tak takte hi sum tlem azâwng nen thingtlang lamah an liam sung sung zel a, a khaw pum pumin an va bum leh suau suau țhin chu a ni e!
.
Keini ang, ngaihtuahnain central zak dêk pha chin hi chuan kan vote 1 lek pawh a hlutzia kan hria a, kum 5 chhunga ram hmasawnna leh hnungtawlhna thlen thei a ni tih hriain kan vote hi kan nunna nen pawh kan thleng phal lo hial ang; chutih laiin thingtlang miho chuan Rs 100/- tih vel lek lekin an vote an lo hralh a, hlawk inti zetin an la nuihpui ang vur vur a! An ngaihtuahna hian an thlawhhma bak a pel hleithei lo chu a ni ber e!
.
PARTY RUIHCHILH CHING THINGTLANG
.
Politics-a thil pawi em em mai chu hruaitu en loa party mal țan tlat neiho hi an ni a, hetiang mi hi thingtlangah an tam hle.
.
Khawpui mi chuan politician-te mizia leh dinhmun engkim hriain kan ngaihtuah a, hruaitu ni tlak a ni em, ramin hma a sawnpui ang em, eiru chi a ni em tih te uluk taka kan ngaihtuah laiin thingtlang mi chuan, 'KHAWI PARTY MI LEH SA NGE A NIH?' tih chiah an ngaihtuah.
.
"Vawk pawh ni se MNF Party mi leh sa a nih chuan ka vote ang," ti tlat chi, mahni ngaihdan sahuai thing vawn tlat chi hi thingtlangah an la tam em em mai a, heng hoin vote an thlak ve ziah hi chu Mizoram hian kan tuar ta tlawk tlawk mai a ni.
.
VOTE NEI VE TAWH SUH SE
.
Ram hmasawnna an vei pha lo ta sa sa, keini rual hian vote te hi thlak ve fo tawh suh se.
.
Chutih rual erawh chuan, India mi an nih a, vote thlak thei rual an nih chuan vote thlak hi India dânpuiin a phût si a, chuvang chuan vote chu a hmingin thlak ve se, amaherawhchu thingtlang mi vote chu chhinchhiah bik ni se, thingtlang vote zawng chu 'VOTE THI'-a chhiar ni mai rawh se.
.
Hetia kan tih loh chuan thingtlang ngaihtuahna tâwi ho hian sum leh pai hmanga campaign peih peih an thlang tling zel ang a, kan ram riangtê hian ram dangte phâk ni leh tukkhum hmuh ni kan nei ngai lo ang.
.
A HLAWKPUI TUR THINGTLANG MI
.
Thingtlang mi vote tel lo chuan khawpui mifing chin hian mi dik leh țha, ram hmangaihtu tak tak kan thlang thei tawh ang a, chutih hunah chuan ramin hma a sâwn ang a, ei leh barah thlengin kan intodelh thei tawh ang. Kawng engkimah ramin hma a sâwn ang a, chutih huna a hlawkna têl nasa ber tur chu thingtlang mite tho tho an ni ang.
.
Chuvang chuan thingtlang mite pawhin uluk takin he post hi chipin lo țhial nawn ula, in thlâm chhunga in mutnaah te, in tui kang nghah pah te khan lo ngaihtuah ve ula, inthlan leh hunah chuan lungawi takin, vote thlak ni-ah in lo feh vek tawh zawk dawn nia


SAILO KHAWMA