.
Thil engkim chu a ni deuh nuaih nuaih hian a hria a, an motor chu a lum ni berin a hria. Chutia mu leh mal pawh nei theiloa a theu lawp lawp lai chuan a thiannu chu a va hmu zuai a. Ani pawh nikhua hrelo tih hriat takin a rem lai lai a tauh chawrh chawrh ni berin a hmu. A tukhum a rawn hit zawk a. A thim mup a. Engmah a hre chhunzawm ta lo.
.
Thil far ri keuh keuh hi a hria a. A mit chu han men mai a tum a, chirh-a belphui sak ang luk hi ni berin a hria. A han tilui ngial naa, aqmzia a neih theih tak ngang silohah chuan a tum buai peih ting talo a. Chutia a thluakin hna a rawn thawh țan leh takah chuan a taksa na lai report pawh chu a rawn pe zawt zawt hi a ni ber mai. A thil hriat hmasak ber erawh a ke dinglam pang a che thei miahlo chu a ni. Veilam pawh che thei hming chu pu ve mahse, a chaurang lampang chu a ni ber e. A lu chu tuboha chhut tluk tluk ang mai hian a na a. A ban veilam pang thip sawr sawr mai leh a khat tawka a a banpuam thla vela lum leh pup pup thin chuan ngaihdan a neihtir thuai bawk a. A ban veilamah chuan hliam a tuar tih a ringhlel hauh tawh lo. Engchen chiaha nasa nge a nih ala hre theilo mai a ni.
Engtia rei nge nikhaw hreloa alo awm leh hman pawh a hrelo. A han harh leh meuh chuan a mit men chu a han tum leh hmasa ber a. A hma ai chuan hma sawn, tlemte pawh a meng vein a hria. Mahse ala thim mup avang chuan zan ala nih a han ring ngawt a. Zan alo nihloh hlauh chuan a mit chu a hmang țangkai tehchiam tawh lo ang.
.
Tlem han let leh ta ila, khatia an han chetsual chiah khan an vanneih a siamin kan ti dawn nge Vanlala vanduaina ai tur reng zawkin...leivung paihna hmunah an zu insawh a, an lumzui ta chiam kha a nia. A thianu pheichu khatia a va hmuh zuai zawh khan motor atang alo invawrh chhuak daih bawk a. Ani pawh hi a hnu lawkah a invawrh chhuak ve tho, mahse leikhichat laiah a tla lut mauh mai a. An motor lumin leivung a tihchet nasat avangin...leivung rawn tawlh thla chuan a rawn hnawh phui hmak bawk si. A dinhmun leh awmdan hi chu hria se (a na chu dahtha ila) hrehawm a tihna a zual nasa khawp ang. A tlak luhna lah hi ruam lai taka leikhi chat a nih avangin a thuk nek a. A leikhi chat kâ atanga leivung rawn tawlh lut tur lo veng deuhroha hnawmhnawk an paihin a lo hnawh avangin leivung lah chu lo luanglut loin...a awmna chung chu a chhilh phui mup tih pawh ala hre der silo. A dinhmun hi a duhawmloh takmeuh a ni.
.
Khatia an cjesual thawm vel kha a bula mite pawn an lo hria a, khawtlang tlawmngai ten an lo bawhzui vat reng a. Vanlala thiannu Amawii pawh motorin a vawrhchhuahna atanga hla lo tea thing ding kak inkarah taka saisir zawnga lo inzepin a hmu a. Ani chu a vannei kan ti mai dawn a mi? Hliampui pawh a tuar ve nual, mahse an hmu hmaa...damdawiin lamah an liampui nghal a. Vanlala car pawh ruam tawpah sawikawi fahranin an zu hmu nghal mai a. Mahse amah Vanlala hmuh tur a awm ta reng reng lo chuan a zawngtute hrilh a ti hai ngei mai.
.
Zankhuaa an hmuh tak lovah chuan zing dar 4 velah an țin san a, inlama intiharh zuai tur leh kawl a en ruala thawk chhuak leh nghal thei turin hruaituten ro an rel ta tawp a. Hetih lai vel pawh hian Vanlala leh Puitei chhungte pawh an rawn thlengthla tawh a. Amawiin a jeans iptea mobile phone a lo la ah țat atangin anlo han hrilh hre thei a ni awm e. Chutia Vanlala hmuh tur a han awm miahlo chuan rilru mak pui pui a put tir hial hlawm a. Ala dam a nih rinna te an neih rualin, lo bpral palh pawh nose a euang tal pawh hlawm tur awmlo mai theia a han awm chuan an rilru erawh a kar na ngang ngang viau zawk niin a lang.
A velah leh amah avanga mipui buai nuaih nuaih thawm te chu engmah hre thei țhuai heklo. A tlakluhna hi a inhnawhphui țha viau ni tur a ni. Vanlala pawh a mah leh amah chu a theih ang tawk tawkin a lo inbuaipui ve mek a. Tunah chuan rilru fim a put ve theih deuh tawh avangin a bialnu Amawii mawlh chuan a awm a tinuamlo a. An chetsual laia a va hmuh zuai lah khan ‘thi hnu paih’ ang thlawrh thlawrh kha a ni si a. A boral a nih ngat chuan ama thiamloh liau liau a nih dawn avangin, a chhungte chu sawiloh...khaw eng pawh a hmuh ngam a ring tawhlo hial.
.
A tir lam ah khan harh leh harhlo inpawlh nuaiha hun a hman avang te kha tuna a awmnaah hian engti fakaua rei nge a awm tawh pawh a chhut thiam lo a. A ban veilam pawh a thichhuak a tawp tawh a niang, a khing uaih ringawt a. A han indap kual velna atang a ke dinglam chu lung emawni...lian pangai takin a delh tih a hre thei thuai bawk a. Mahse a kerek hnuailampang engmah a ‘feel’ theihloh avang erawh chuan midum kawnglai tan pawh a tliak a ni tih chu hai rual a ni lo tawp ang. A taksa chu a theih ang ang in a han in check a. A ban veilam leh a ke dinglam tihloh chu na a neilo niin a inhre deuh a. A lehlam takah chuan a thawk pawh a thaw deuh huai nghe nghe. Mahse a hmai leh a mit bawr vel ti deuh luk chu a han dap a, ava phu nasa kher em!!! A thil khawih fuh kha a sam a ni. Mahse ngatinge a chal zawnah a rawn uai thlak pur??? Hlauthawng ru tak chuan a lu chu a han dap chho a...chhei le...a sam țo țana bawr vel...a chal chungah chuan vunpui chat hlawkin hliam alo la nei cheu tih chu a hre rang kher mai. A lu lah chu a kak naran pawn nilovin a luvun chu a rawn inhik thla deuh chu niin. A na ang zawng chuan a nat em em pawh a hrelo (a hliam dang nâ in a hliahkhuh rih pawh a ni mahna) mahse a râp kher mai. Chutianga hliam tuarlai a la hmuh/hriat ngailoh avang chuan. Mahse a rilru a ti paukhauh vat a, tihdan tur a ngaihtuah ta zung zung a.
.
Ni hnih leh zan thum ngawt Vanlala ruang (???) taksa chu an zawng tawh a. Mahse awmlo zawn ang hlauh a ni. A ruk tak chuan an bei a dawng tawh em em mai a. Bei han dawnlohna chi pawh a nilo ve deuh bawk a. A chhan chu an tlakna hmun hi leivung paihna, kham leh kham inkar rupp0am a nih avangin a pe hûn a, leivung an paihna tawpah lah thing a ding khup a. Chulai thinghmun lah chu an luhchhuah hneh nasa tawh mai si. Diktaka sawi chuan, thilmak tak a thleng a nih ngawt loh chuan han hmuhlohna tur hi a awmlo hrim hrim tawp mai a ni. Police lam leh khawtlang ho phei chuan hmanlai ngaihdan țhalo thlengin an suangtuah kai titih tawh a. A zawngtu ngei ngei te zingah pawh…”khawmu in a chawi daih a niang” lo ti tawk pawh an pung chak viau mai. An demawm hranloh. An mi zawna awmna hi an beisei phalo hrim hrim chiang em mai a ni. Mahse Vanlala chhung leh khat te hrilh hai lutuka siam an hlauh avangin an tha pawh an ti tho der mai mai a ni ber tawh e.
VANLAL-A THIL TAWN (Ama sawi danin)
***********************************************
Ka hriat thiam dan leh ka chhit ve dan chuan a lo berah ni 3 vel chu ka táng tawhin ka hria a, ka dinhmun hi han ngaihtuah chiang phei ula chu a rei duh dan tur chu in man thiam maiin ka ring. Ka chhawl a hal huam huam a. Ka ka ka ân ringawt pawhin ka hmui te chu a thip țhawt țhawt zel a. Ka rilțam dan phei chu sawi hian a siaklo...a suak zawk hial ta ve ang. Ka ke delhtu lah chu han nem sawn emaw, chawikang tur ngawt pawn thut ngilna tur takngial pawh hmun a awm silo. A chang phei chuan kuang chhunga dah te hi niin ka inchan rum rum thin.
.
Kan chetsualna lai vel ka ngaihtuahin min rawn țanpui tur an rawn thawhchhuah ka ring angreng bawk si. Tumah lah chuan min rawn zawng awm pawn a lang silo. (A awmna leh tlakluhna a la hriatchianloh vang). Ka bei te a dawng rum rum tawh. Ka nâte lah chuan hunbi an insiam emawni....an in natchhawk ang luai luai leh ta nghal a. Ka khua lah chu a sik hlurh hlurh bawk si. Hrehawm tak hi a ni ringawt. Mahse chutia tanpuina nghaka lo awm teh tlawng chu dik berin ka hre ta lo a. Ka taksa hliamte hi eng chen chiaha serious nge ka hrelo bawk nen. Ka rilruin,"Ti ringawt chuan ka daih rei nek lo ang. Dam khawchhuah ka duh chuan keimah hian engemaw ka tih a ngai a ni" ka ti ta ngawt a. Mahse ka dinhmun ka han in thlir chian erawh chuan bul han țan dan tur avangin a huphurhawm duh ngei mai. Rilruah ka thiannu a lo lang reng bawk a. A thih leh a dam ai mahin, engtin pawn lo awm se keimah vang liau liau a nihna khan min dwng na berin ka hria.
.
A chang hi chuan mihring thawm niawm tak ri leh kauh kauh thin te hi ka hria hian ka hre thin a. Mahse theih patawpa thawm ka han chhuah pawh hian hre awm pawn an awm ngai silo a, ka beng chhe ri ah te ka ruat ta mai mai a. Ka awmna chu ka thiam ang tawkin ka han chik a. Ka ban nalo lam chuan la han dap kual vel a. Hriatthiam a harsa ngei mai. Kan chetsual lai vel kha ka hre si a, hetia han awm teh daih chu tiin mahni ka inzawt chamchi a ni ringawt. A chang phei chuan "kei hi kan accident naah khan ka thi emaw an tia nga, min phum ta daih tihna emawnile" tih chang pawh ka nei. Mahse min phum ta se kuang velah min dah ve awm si a. Chutiang engmah a awm bawk silo. Ka awmna leh ka awmdan chu ka ngaihtuah thuk poh leh ka bo thuk hi a ni hawt mai.
Lei hnuaiah ka awm tih chu ka hrethiam tawh a, mahse engtin nge chulaia ka awm daih dan erawh ka la bo ngei mai. Ka rilru a vah ruai ruai lai chuan ka ban dinglam pawh chuan ka awmna vel bawr chu a dap pah ruai ruai reng a. Ka awm zawn velah hian thawmhnaw nge puan them emawni lo uaithla hi ka dap fuh hlauh mai a. A tirah tak phei chuan a awmzia leh a ngaihna hlawl ka hrelo. Engkim a thim mup mai si a, engtitiha chutia lo awm nge a nih pawh chu ka la hrethiamlo. Mahse ka theihpatawpin ka han pawt chhin a, ka ngaihbel nge ka chunglama lei chu a rawn țil ham ham bakah a che tlata hriatna ka nei a. Chu chuan ka awmdan pawh chu min rinthiam tir deuh ta a. Mahse eng titiha chutia awm nge ka nih erawh ka la hrethiam chuanglo.
.
Ka dinhmun chu ka han chhutchiang a, a hmasain ka hliam te ka han bel chiang a. Ka ban veilampang chu chetsawn a har hle mai a, ka ke lah chu engemawni hian a la delh run bawk a. Ka lu lah chu a tui deuh pur ni ber hian ka hre bawk a. Ka chunglam pang (leivung) chu engtin emaw ti vak ta ila, a rawn tlak huk chuan keimah bak delh tur a nei dawn chuanglo tih ka hre ve kar bawk si. Idea hi a thlawhin a thlawk bo duak hi a ni ringawt. Ka lu erawh chu engtin tin emaw-a tuam hram chu ka duh a. Ka kawr haklai chu pawhthler a, theih ang anga tuam chu țha in ka hria a. Chutia ka inpawh ka inpawh lai chuan a rawn ri huk a...a thim mup nghal a...engmah ka hre zui leh ta lo.
.
CHANLOH KHAN LAMAH
******************************
'
School an bang fel awrh a, hmanhmawh tawkin Fela chu in lam panin a tlan vang vang a. A uniform te chu chhuata vawm hnawk neih nuaih chung chuan a theih anga rangin a inthlak a, a tlanchhuak nghal a. Heti em em-a a hmanhmawh chhan hi...an in chhak leivung paihnaa motor accident a awm vang a ni. Mahse naupang mah nise accident vang khan a lawm a ni hauhlo, an thupui ber erawh chu motor accident atanga a theih ang ang thirchhia an lak theih dawn vang a ni zawk awm e. A duh leh mamawh ang thirchhia a lak khawm theih phei chuan a lo awh em em thin...crocs chappal a lei ve thei dawn miau si a. Han dem em em theih pawh a nilo. Tichuan ina țanga hmanhmawh tawka tlanchhuakin a thianpa Rema chu a va sawm var a. Tichuan accident na hmun chu baklenga hmanhmawhin an pan ta a.
A hmun an va thlen chuan hnatlang leh tlawmngai pawl ho chetna hnuhma a lo pherh veng vung a. Mahse anni chuan tum pakhat chiah an nei...motor chesual anla hnuhchhuahloh chu zu belbul a, thirchhiaa hralh tur hmantlak a awm leh awmloh zu hriat vat chu a ni ber awm e. A hmaa anlo tihfo thin angin, zei leh hnehsawh fahranin leivung ah chuan an tawlh thla par par a. Grand i10 lo let bam bulah chuan an ding chat a. Fela chuan motor chu a belchiang vat vat a...chutih lai chuan a thianpa erawh chuan an thirchhe hawnna tur buara emaw a țawnkhawm theihna tur hrui melhin alo vir be vat vat thung a. Fela'n țhahnem ngai taka an mamawh tur awmang a melh lai chuan a țhianpa Rema chu a rawn rak țhawt mai a. A awmna nia a hriat lam Fela'n a va en chuan Rema chu khuarkhuruma tlalut ang mai hian a lo awm a...leivung karah chuan a lo tla pil kûk chu niin.
'
A tirah tak phei chuan Fela chuan a thianpa chutia a han tla tlum vel thaih chu a nuih sawh vak vak a. Mahse hmanhmawh lutuka inhaichhuah tum chung leh, hlau tih hriat em em maia Rema a rawn rak tak teng tung ah chuan Fela chuan a va pawh phei thuai a. A thianpa tlakna lai a zu en nak chuan mitthi nge thilo tih pawh hriatloh, leivungin a lo bawk nuaih mai chu a zuk hmu a. Naupang tih takah, "pui tange" tilo chuan baklengin an tlan haw ta vang vang a.
'
Chung naupang pahnih thil tawn/hmuh chuan vengchhung a fan chhuak rang kher asin. Tlangau a au fel meuh chuan a hmunah (Accident na ah) chuan a ramtrang chin tur ang chu an kim deuh vek tawh awm e. Tichuan dimdawi takin an la chhuak a, a lo la nung lehzel te chuan mak tih a hlawhin...a lo tanna hmun an han belhchian hnu phei chuan mak tilo reng reng hi an awm lo. a chung zawn lawk lawkah te khan an vei fua fua hlawm si kha a nia. Mahse le, hetiang hian thil a awm ang tih ngaihna hre thuai heklo...tumah han dem theih pawh an ni bik awm lo e.
'
Mualpho inven sen te pawh a ni tawhlo bawk a, a veng neitute an beidawn miau tawh avang leh amah Vanlala chungte pawn tha bera an hriat avangin YMA branch hrang hrangten tlawmngaia inzawn chhawk tuma hma an lak tantirh lai vel a lo ni bawk nen...social media lamah phei chuan thu a darh chak kher mai. Thenkhat lah chuan an lo thih tir hmanhmawh thul. Hahthlak thin a nia. Heti a nih mek lai hian Vanlala pawh hi a dinhmun hi a tha tehchiam lo a. Civil ICU ah an dah a, thisen pawh an pe hnem tawh khawp mai. Chubakah a hliam vel te chu tihfai leh enkawl awm ta chu alo pan hman nasa viau bawk nen. Doctor ho pawh chuan beiseina chu nei tehmeuh mahse, an beisei sang ngamlo kher mai.
'
A accident pui-nu erawh chu Pathian zarah han enkawl zui emaw, beh tlawk tlawk ngai khawpin na a nei lo hlauh a. Mahse ani pawh hi a tirah kha chuan a damchhuah an ringlo nasa ve hlawm khawp mai. Damdawiin khata awm ho leh acccident dun nafam chu, rilru ah pawh a lo lian deuh a ni mahna. Vanlala bulah chuan a tap deuh chawt reng mai a. Thenkhat phei chuan an chhaih fiam zuk zuk a. Mahse a nihna takah chuan an chetsual nia inhre ve choh kha an ni a, mi tamtakin an chhaihna boruak phei hi chu an la tem chhin lo. Chu lamtluang zawh tum chuan bul an tran ve ek ek choh a ni a. AN bul tran dan lah chu a pui hriap hriap ropui mai sia. Lo inkawm zui lemlo pawh ni se, theihnghilh chu an intheihnghilh nek tawh lo ange tih hial a awl rum rum.
'
Beisei loh lutuka thil a thlen takah chuan a thlengtu Branch (ngaikawilo ila) hruaitu leh meizâng hlaptute pawh an che belebut ve nuaih mai. Naupangin “hmuh anlo beisei hauh tawhloh”...tihpalh thil liau liaua an han hmuhchhuah leh tak si ah chuan a veng mipui mai pawh niloin...a chanchin hre tawh phawt chu chulai bawr velah chuan a zik hian an zi hut hut ti ila a sual lo khawp ang. Tlailam ûmpawng pârna lamtluang a lo ni bawk nen. Lo tlawmngai fal fe fe leh, hetiang nîkhuaa fing ta bera inhre tlat te pawh an awm nual awm e.
'
LAWMNA ATA LUNGAIHNA AH BAWK
********************************************
'
Hetia hmuhchhuah a nih takah hian a veng hruaitute pawh an hamhaih luatah an che phelh ve phung mai a. An thil buaipui lama an rilru an pek nasat ata langah, Vanlala chhungte lam lo hrilh hre tu anlo awm reng reng lo hi a lo nia. Chhiatvtawk mêk (??) chhungkaw lam pawh hemi ni tlailam kher kher hian chhungkhat hnai inko khawmin, Vanlala hmakhua chu relfel mai țhain an hria a. Chawhlui kilho paha thutawp siam anlo rilruk mêk a ni. An zinga mi pakhatin Whatsapp lama Vanlala chanchin a hmuh thu a rawn sawilan lai pawh chuan (a hma ang deuhin) thu puarpawleng vel mai maia lo ngaitâwk an awm hman a. Mahse hetiang nikhuaah chuan a “tuartu” chhungkaw tan chuan eng news mai pawh hian beng a verh zawr mai thin tih kan hrethiam vek ang a. Khulama veng hruaitute zu biak rawih chu an titlu a.
'
“E khaiii !!! Min hrethiam hram teh u...Vanlala taksa chu leiin a lo chhilh bo daih a lo ni a. Hei tunah Civil ICU ah kan awm mek e…” tih thu an han hriat chuan han lawm hluai chi nge. “Vanduaina leh rilru natna belhchhahtu hmahruai mai choh a ni dawn” tih pawh anla hriat thiam miau loh avangin, ro an han rel zung zung a. “A chhungkhat tak tak te bakah, a phanchang zual ho chu chanchin ngaihvena lo han kal ve phawt a, chanchin inhrilh zel ah” tiin an ințhen darh ta phawt a. An chanchin dawn a beitham êm avangin “tunah hian Vanlala hian mihring a la chang zo ang em?” tih takngial pawh anla hrelo tih ka han zep zuai a nge.
Thil kal zel dan erawh a hmasa lamah tawite kan thai lang tawh a. Vanlala hi khatia naupang ten an rawn hmuh chhuah leh laia leivungin a rawn delh leh hukna atang khan a la harh chhuak ta reng reng lo mai a. Hei kar a liam mai dawn ta. Doctor te pawh an viak a țhain theihtawp an chhuah tih hai rual a ni lo a, media lamin an cover uluk êm vang chu a nilo turah ngai ila. Test pawh an nei kim narawh ta, mahse chutiang em ema han tawm-im pui reng tur chu ni tawhin an hre deuh a. Amaherawh chu an hna alo ni baqk a, hetiang case mak tak tak hi chu an hre nual thin a. Mangan emaw beidawn nan chuan ala hma tih hre reng mahse, Doctor naupang lam zingah phei chuam mak ti fâl deuh an awm nual tawh thung.
'
Chutia enkawl belh hleihtheih pawh nilo, enkawl loh hleihtheih pawh nilo-a a awm viau hnu chuan...a vitals te a stable nia an hriat tho avangin ICU chu an chhuahsan ren rawn phawt a. Mahse tuk khat zing chaw ei hun hma deuh hian Vanlala taksa leh a thawkdan vel chu a rawn buai ta riau mai a. Hetia a awm thut pawh hi, a accident puinu in lo vil lo se chuan tuman an hmu awmlo asin. A BP chu nasa takin a rawn sang chiam a, a thaw lah a buai tih hai rual a nilo. Tih theih leh a chhan hria la awm hek suh, chhungkhat laina hnai awm ve ho pawh chuan an “tlumtea thlir” ringawt rih mai a. A țhenin in lama chhungte an lo va hrilh hre bawk a. Mei alh hlep hlep reng chu petrol leih hluai ang deuh a ni leh ta. ICU lamah bawk chuan an inchhawp lut leh a, ventilator te nena an han rik tak rupah chuan tlemin a zia awm lam a pan leh deuh niin a lang. Mahse Doctor ho chuan chutia a han awm thut chu an ngaih a nuamlo ru viau mai ang a. A chhan ni thei awm ang pawh an ring thiam fur…”MAHSE AN TLAI LUTUK A NGEM?” tih chuan an rilru a luah hneh zawk a ni.
'
THLIAHLOH PARI NGE AWLE MITTUI
'
Vanlala thiannu kan tih chawk hi tunge a nih kan la sawi miahlo a. Tawitea sawifiah tum ta ila. A hming pum chu Lalhmingmawii a ni a, Amawi tiin an ko tlangpui. Vanlala te ho nen hian Mt Carmel lamah school an lo lut ho tawh a. An chet sual ni pawh hia Re-Union nei paha intihlim an ni nghe nghe. Hla thuin alo sawi ang deuhin “sakhmel tawng mahila thinlung kárdantu a awm si” a tih ang deuh emawni khan, hmel ah chuan an inhre lutuk. Mahse an school kal lai vel khan anlo inlawm chiang ngai reng reng lo thung.
'
Vanlala hi mahnia business nei ve rap tawh a ni a. Amah Amawii pawh sorkarah a nghetloin a thawk ve mek. He an picnic naah pawh hian an thiannu pakhat kaltlanga inhmelhriat chiang lehzual chauh an ni a. Reunion na vela kal tawh in ngai chuan...hmana chhe deuh te kha an lo țhat vei vuk thin kha...in hrethiam mai ang a. Chu chu Vanlala rilrua hnathawk tu pawh a ni. Tunhma kha chuan Amawii hian a ring a kuai her zo ngailo, mahse hei kum a han kal deuha tunah chuan Vanlala hian a ring a kuaiher let thei tawhlo thung a nih hi.
Hmeichhe fel tak a ni e, KTP ah a active etc etc tih ang zawnga țan kan lakpui dawn chuan Amawii chanchin sawitur hi a vang pharh mai thei. Mahse huai taka kan sawi ngam erawh hmeichhe lepchiah zawng a ni mawlh lo. Kum 30 a lo hnaih ve tawh a, amah hi a hlim theih em avang leh a nuih peih avang hian a hmel en ai fêin a lang naupang nghe nghe. Mahni tana țha tur chu hre ran thin a ni a. Mahse a hleihluak leh a bawh ruak ruak zawng chuan chet a thawh ngai hauhlo. Hei, kan Vanlala pawh hi chuti teh chawka hmel duhna a nei hranlo. Mahse background check a neih rûkna velah a tlingzo riau mai a. Han kawmzui a châk pakhat vang a ni a. Amaherawh chu, khati kha an ni ta bawk si. Tunah chuan duhaia chiang lehzualin an inkawm dawn ta a ang. Nge nianga, Vanlala hian kawm hman hauhloin țuanzai a rel thut dawn zawk. Nghah ngawt mai loh chu tihtur a awm ta rihlo.
.
Test țul ang angte an neih hnu chuan an hlauhthaqn ang ngeiin Vanlala chu scepticemia a lo ni ngei a. Amaherawhchu an hlauhthawn zawk...a thisen sang vak erawh a natnain a kal lam alo khawih țan avanga awm a ni tih an hmuchhuak bawk a. Chanchin lawmaqm over nilo mahse, hriatloh ai chuan a lawmawm rwng rwng e. Tuna a harhchhuah theih hauhloh chhan pawh “Sceptic Shock” vang niin an hre ber tawh a. Hetiang nikhuaah hi chuan antibiotics tha tak nena enkawla damtea a lo harhchhuah hun nghah a ni deuh mai thin a. Kan Vanlala pawh chu an nghak ta thawe mai a ni. Damlo mut ngai ni êm tawh silo, damdawi in-a la awm ngai a nih ve miau avangin Amawii pawn Vanlala chu a kan awl lova. A chanchin mi kâ atanga a hriatdan te leh, tuna a sumdawnna hlawhtling tura a fight dan te a hriat phei chuan, a inrin hman hma hauhin alo duh ru em em tawh tih reng a inhre lo. Mahse a bula engmah tilo chunga zu țhut ngawih reng ringawt pawh nuam a tih thin em avang leh, Vanlala chhungte a zahrûk leh ngainat rûk dan em em erawh chu mak a ti ru ve viau thin thung.
'
Thiamna te a san tawh bakah khawl lam te alo tha ve tawh bawk nen, kar 1 dawn hnuah chuan Vanlala chu a rawn harh hlawl mai a. A harh lai hian a bula Amawii awm lai tak a ni lehnghal a. Amawii hi...zep thu chenglo se...a lâi chhe lo chauh nghe nghe. Mahse a harh tih hriaa an rawn rik tak hluai hnu chuan ani pawn ngai a awh leh viau tawh. Mahse Vanlala laka a awmdan hian a ngaih chu a tingam zan tawhlo a ni. A han ngaihtuah chet chet pawn, chuti teh hluaia a duh awm a hre bawk silo. Insum theilo leh hamhaih zawngin a aqm ziah mai bawk si. Amah leh amah pawh a inchhut ru ve nasa mai a. Ngaihzawng lamah pawh a ngheilo pawl chu a ni chiang alawm. Ngaihzawng a duh deuh a neih dawn țum pawhin hetianga a awm a hre ngai silo a. A tawpah chuan “an accidwnt vel vangin a khawngaih ru a niang” tiin rilru a siam ta ngawt a.
'
I han kaitawi tawh teh ang. Hun a her ve beuh beuh a, Vanlala pawh Pathian zarah taksa chakvaklo tak chungin damdawiin atanga chhuahtir a ni tawh a. A chhuah hma kar hian Amawii pawh a lo chhuak dim diam tawh. Mahse ani zawng hmuhloh nghawngkawl a lo bát hman tlat tawh mai si a, tlangrel em chu kâi lemlo mahse...mi sawisep kai hial khawpin Vanlala chu a tlawh ngun ti ila a dik ber ang. A hriat dan hi chuan Vanlala pawh hian a be țha thaqkhat chuan a hria...mahse, chhungril lama a duhthawh vang nge ni a khamkhawp thinlo khawp mai. Mi zingah pawh han ngaihsak bik deuh hlek turah a lo beisei te pawh a ni mahna le.
'
Damdawiin lama an innel hman em avangin Vanlala te in lamah pawh Amawii chu a tlatlum hle tawh a. Mahse kan sawi ang khan Vanlala rilruah erawh a duh leh hminna zán ang khawp vhuan ala tlatlum tlat lo a ni. Ni khat chu eng tin emawni tak hian a lung a leng riau mai a. Nidanga a tih ngailoh deuh maiin chhun dar 11 velah Vanlala te inah chuan a va kal nawlh mai a. A kal țhan angreng avang hian awmanglo zawng pawn alo ruat tawh lemlo te pawh a niang. Mahse hemi țuma a thil tawn hian alaqm a chhungrila a lo inzawh ruk reng thin “zawhna” te kha chhan sak a. Alo beisei ruk ve em em thin...a suangtuahna khawvel luahâwl lo tu chhuchim vek tu chu.
'
CHINGHNE BERAM VUN SIN
'
Amawii chanchin hi kan sawi nual tawh a, hmeichhe ngaihtuahawm tak zawng a ni mawlh lo. Khatia an chetsual dawn nia an picnic naah pawh khan Vanlala mot chauh hi a la bik hauhlo tih kan hriat a tha in ka hria a. Zu an han kam nam deuh hnuah phei kha chuan huangtau deuh tak taka lo kawm tum pawh an awm nual a ni awm e. Hemi țuma Vanlala’n a lo chhan/puih vang hian a nia Amawii nen pawh hian an inkawm ve tak tak țan ni. Heta Amawii kawm luih phêt tumtu hi Albert-a a ni a. School an kal ho lai hian anlo naupangchhe inngaihzaqn ve thin deuh a ni awm e. Tin picnic spot ah pawh Albert leh Amawii te hi an rawn kal rual avangin a tirah tak phei chuan alo thleng hmasa ho chuan an fiam der nal nak nghe nghe a. Mahse zan te a han kal a, a rin leh beisei anga Amawii’n a lam a hawi tak miahlohah kha chuan a thiam ang tawkin hma ava la ve a ni ber awm e. Han dem theih vak pawh niin a lang lo.
'
Damdawiin lamah pawh Amawii natbeh lai kha chuan a regu pawl a ni thin a. Mahse khatia Amawii a han thawh harh hnu leh, Vanlala kan pui atana a sawm sek takah kha chuan lan zui reng te pawh a peihlo a ni mahna...Vanlala’n nikhua a rawn hriat meuh kha chuan thehmeh ang hlauh a ni tawh. Mahse Albert hian Amawii hi a duh em mai a. Chutia fight ve eih pawh awmlo a maiparthlawn hlawl chu a rumlo a ang khawp mai.
'
Amawiin Vanlala te in a han thlen chuan...a kal țhan tawh avangin kik pawh kik lo in a lut tlang pawp a. Hemi vang chiah hiba ni ngei ang a hmaa kan sawi thil te pawh a han hmih tak ni. Vanlala chu damdawiina a lo hmuh fo thin nurse pakhat nen hian tihtak tê hian thutthlengseiah chuan an lo inzial hnawk nasa mai a. An thawmhnaw lam pawh a țhen a inhlim a, a țhen a inpawt thla bawk a. Hrilh nawn a ngailo, engmah sawi pawh a tumlp. A inher a, chhiah nghal hmak a tum lai chuan Vanlala ngei mai chuan,”kawngka kikna chang pawh i hrelo a mi? Nula pumpa mawl lutuk” a rawn ti hram a. Chu zet chuan a thinlung chu a verh tlang zawk ni ber hian a hria. Vanlala tana a thil lo tih sak ve te chu a mitthlaah a rawn lang uaih uaih a. A mittui pawh chu a hnam nghal sawk tih a hailo. Mahse chhan chu sawiloh, hawi pawh hawilet lovin a chhuak ta nghal nal nal zawk a. A haw lawng tluan chuan thinrimna leh tha nat riau na te...mahni inkhawngaihna bakah rilru natna mum lian ber mai chi chuan a bawm haw luk luk a ni ber mai. Amaherawh chu, thil dang zawng ai chuan...a hriat leh tum em em vang pawh niloin Vanlala zunah hian thûk takin a lo uai tawh tih chu a ni.
.
ABUL ȚANNA
'
In a thlen chuan Amawii chu ngawi rengin a roomah a lut tlang a. An awmpuinu bak a awm chuanglo a, a chhungte chu awm se chuan an fanu hlim țhin em em...chuti em ema nguai ta chu a chhan pawh an lo zawt mahna. A rilruah thil a rawn lang zawk mai. Vanlala te nen school an kal ho lai vel thlalak en a chak thut mai a. A drawer chu a hai rawk rawk a. Khumah vaipa țhut meuha țhuin a phek kual ta chiam chiam a. Phek țhenkhat te chu a keu thuak thuak a, a thenah lah a nui sen sen a. Mahse phek țhenkhat zawng han keu hnan mai har a ti ve deuh a ni mahna.
'
Mihring leh hmangaihna hi a lo mak khawp a. Tunhmaa engah maha kan ngaihloh te pawh kan thinlungah thawktuba awm tawh chuan...damchhunga deuhthawa kan lo hmuh tawh pawh ni se kan han zah thar a. Anni lah chu an mawi thar ang telh telh bawk a. Hetiang deuh hi a ni ber awm e tun tuma Amawii awmdan pawh hi. Thlalak te chu a han thlir thin, herih lai hian sawi ang deuhin Alberta nen an inngaihzawn lai a ni a. He thla an lak lai pawh hi a la hre chiang lutuk. A hunlaia alo duh ve thin em em Alberta chu amahah chuan a hlui rup tawh a. Mahse he thla an lak laia melh pawh a melh peihloh chu tunah chuan a thar leh veng veng lawi tlat tawh si a ni. “Hetiang a ni dawn tihte chu hria ila, picnic naah khan ka kherh rhal tawp ang mawle” a ti rilru a. Amah leh amah chu a nui ang tut tut a.
'
Diktak chuan Vanlala pawh hian Amawii hi a duhlo emaw a ni hauhlo. Mahse mipa khawvelah hi chuan hmeichhe hma han la chak deuh leh in tawktarh thiam ru riau te hi an langsar hma thin em mai pawh a. A over chu tuman an duhlo ang a, mahse over lo tawk leka chet thiam hi an awm ve tlat mai bawk si. Damdawiin a awm lai pawh khan Amawii chungah pawh hian a lawm takmeuh meuh thin. Mahse zei leh nalh taka Amawii hliah tlat tu an awm miau a vangin ngaihtuah pawh ngaihtuah hman manglo a siamin a awm ve bawk a ni. Khatia an ina Amawii’n a rawn phawk thut pawh khan a thusawi tum kha a rilru chu a ni bik hauhlo. Mahse an awmdan ti kha a nia, a lo zah leh duh ruk ve tho lah chu a rawn hmutu a ni baw si. A kaw tawp atang aa rawn hram chhuak ti ila a dik ber awm e.
Hemi hnu pawh hian Vanlala hian Amawii hi a ngaihtuah zui ve phah nasa zawk hial a. Picnic nia an hlimdun dan te, Amawii phawk ru deuh leh mak deuh deuha a che leh nulh nulh tthin te kha a ngaihtuah a. A hmel pawh tha a ti...tuna a kawmlai ai pawh hian tha a ti zawk daih. Diktak chuan Amawii kut țang mum thianghlim leh sen sar mai te bakah, a puan thelem ven kara a ke thianghlim leh var sar mai te. A ke artui sen no chek mai te thleng chuan nalh a ti em em a...zu han ngaihtuah kai hial a mawle. Chuvang a niang khatia Amawiin a rawn phawk tak phutah pawh khan a zahna leh mualphona te chu a thiam ang tawkin...thinrim ang fahrana a han lantir ve ni. Ngaihdam dil emaw, an in vela zuu kal turin alo țawngkhum danin a zirloh bakah tuna a thiannu hi a la thlah chuang silo a. Mihring pakhat….rilru insual nasa ve tak chu a ni chiang alawm.
'
Kan kal zawr zawr ang, a nepnawi ah kan tang rei dawn, lehkhabu ziak tur ang mai. Amawii’n a rawn phawk ni atang khan thla 1 a liam fel der tawh a. Vanlala pawn a nurse kawp nu chu a lo thlah fel diam tawh bawl a. Mahse thlah fel theih tâk miahloh pakhat a nei...chu chu tudang a nilo. Khatia an ina a rawn phâwk laia a țawngkhum dan te kha a ngaihtuah chhuah chang phei chuan a țim uaih uaih thin hial a. Mahse bawnghnute baw hnu ruh leh tum ang choh a ni tawh in a hre si. A ni têlin Amawii a ngaihna a zual miau avangin an office lama va lenchilh rawih a rilruk tawp a. “Engtin pawn lo ti se, a dem hauhlo ang” tih rilru pu chunga ngaihdam va dil a tum a ni ber.
'
Țum hnih thum vel a han pamțul zak zak hnu chuan thih leh thih a ti te pawh a ni mahna, Amawii te office lampan chuan a chhuak ta nge nge a. Amawii te room te chu a zawt a, an han hrilh meuh chuan a han zâm thar leh a. Mahse “hei chen a thleng tawh” a a ti ve deuh a niang...a lut ta thawr a. Amawii chu kawngka epa țhu a nih avangin Vanlala chuan a duh aiin a va hmu hma ti ila a dik ang. Amawii pawh chuan a lo hmu chiang khawp. Alo en kal a. A hmelah chuan lawmna emaw thinrimna emaw han chhiar theih tur a awmlo reng reng. Mahse Vanlala chuan huaisen a chhuah lui ve thei hram hram a. Theihpatawpa ngaihdam a han dil vel lai chuan a thilsawi pawh ngai thla miahlo ni awm fahran hian Amawii chuan,”Thingpui i duh em?” a rawn la ti zui...Mihring mihrinnaah chuan tlawma laka haw vang vang a awm viau ang. Mahse sawi leh sawi hnu, Vanlala hian a ngaihtuah tawp thei miau silo a. Chu a chhapah, a ťawngkhum dan mawlh khan a vaw nawn tlut tlut bawk si. A tira a intiam rûk angin...a haw duh lo lui ve ngat a. A sawi lai sawi zawm a tumlai tak chuan Amawii phone chu a rawn vibrate vat vat a. …”Eeee...Albert, lo call che ka lo rilruk mêk a. Vawiin ka hmanlo ang ka tih kha hei, hna kan zo hma leh ta sia. I duhleh minlo lam la...tunah”...Hei zet chu Vanlala inphah hniamna pawn a tlin ta biklo a niang e. “awle, a țha e” a tia a tho ve ta thauh a. Kal tura a inher mek lai chuan Amawii chuan thusawi tumin a kâ a âng zuau tih Vanlala chuan a hmu reng. Mahse a lo tihdan bak baka inhnarna a awmtheia a hriat tawhloh avangin, engpawh sawi se a ke pen khat leh pawh tih ba hlah tir a tum lo hrim hrim.
Hmeichhia te hi an duhnaah chuan an fing thiamin an ngeiaqm thiam tihte chu tlâng hriat a ni a. Mahse Amawii pawh hian khati em ema Vanlala a lo dawngsawng kha chu “a ti mah mah” chu a inti ve deuh. Chu a chhapah, khuanu remruat nge Alberta khan a rawn call chiah bawk si. A intih ngeiawmna luipui luanlai a nih miau avang khan hmanruaah a hmang chhunzawm mai a ni. Alberta hian vawi tam dinner ei puiah a lo sawm tawh thin a. Mahse Amawii hian a la hnial zat zat thin a. Vawiin erawh zawng a boruak a zir kan ti dawn nhe….a zirlo. A chhuahpui ngei chu a ngai ta nge nge daqn a ni. Alberta’n a tir atang te-a (chhuahpui a sawm tirh) a rilru puthmang leh tumdan hi Amawii hian hria sela chu nichina Vanlala a tih dan kha chu “a ve mai chauh” a ni ngei ang.
'
Alberta chuan Amawii te office chu a rawn thleng rang kher mai. Mahse Amawii tan chuan awmzia a awm tehchiam lo. A chhan chu Vanlala ber a haw leh daih tawh si a. Alberta lo beisei dan chuan dinner ei hmain an leng khawthawng ve ang a, hun nuam tak han hmanpui te kha a lo rilruk ve hman tawh kha a nia. Mahse Amawii chuan trul em em lovah darkar hnih chuang dawn chu a han khawmuan san leh ta si a. Mahse thil tum a nei a. Zanin hian a hlawhtlinna hmu mai theiin a awm dawn tih a hre reng a. Chinghne beram hmul sin ang maiin, a nui der heuh heuh reng tawh zawk.
'
Hun lah chu chelhdin rual a ni bawk silo, Amawii pawh chuan Alberta chu a zui chhuak ve ta nge nge a. Vanlala a runluih duh lutuk na lamah aman a tawrh phah ta erh dawn tih a inhriat phei chuan tu hmuh lemlohin a ner leh sawk thin. Hotel Floria ah Dinner changkang leh tui fahran mai an ei hnu chuan rei mawi tawk an thu khawmuang ve a. Alberta lah chu engtik lai leh khawilaiah nge a lo in hman pawh hriat lohin zu rim a nam ther ther lehnghal a. Amawii chuan haw thuai thuai a chak ngei mai.
.
Chutia muangchanga an inphurh haw lai chuan Albert chu a nui leh deuh tut tut thin hian a hria a. Mahse a chhan a zawh pawhin a chhang duh silo...mên ah a thlak ta ngawt a. Mahse awmze awmlo tawp chu alo nilo tih pawh a hrechhuak rang kher asin. An inlam hawiin an tlan miahlo tih a hriat chuan "ngatinge" a ti tuarh a. Chutia a taksa a han chet deub thutah chuan a lu chu a rawn hai chhawk mai a. A hma pawh khan a khaw hmuh kha a vai leh chiai chiai thin a. Mahse an thil eite avanga a pum diklo hnathawh ni turah a ngai ngawt a. Amaherawhchu a lu hai chuan that lam a pan ta hauhlo mai a. Chu a hnehin, a taksa te xhu a rawn zawi tan riai riai a. Karlovah a ke te chu a mu ta chum chum mai bawk a. Durtlang chho vel an tlan lai chu ala hre vuai vuai a. Tin, motor an luh tirha a tui in ah khan engemaw tak Albert hian a pawlh a ni tih a ngaihtuah lai te pawh ala hre vuai vuai...mahse a bak zawng chu vuakthluk ang hlauh a ni.
Amawii a harh leh chuan a kut leh ke chu a la chethei chuang hauhlo mai a. Mahse a han inen chian chuan puan in a lo inťawn bet tlat zawk a lo nia. Tin a awmna velte pawh chu a han belchiang zung zung a. A chhung vel chu a lian lo nain a hnum tha riau a, chuvangin khawilai thlam velah emaw a awm a nih a ring a. Chutia ama tawka a dinhmun alo inenfel mek lai chuan Alberta chu kekawrbul nen, towel a nghawng a batin a rawn lut a. A inbual zo chiah a nih hmel. Amawii chuan thinrim tih hai rualloh hian,"khawnge min kalpuina hi. Hetiang chuan ka chhungten min zawng ang a. Police in an zawng bawk che ang a. Jail ah i tang khawp ang" a han ti ve pang pang tak naa. Alberta hmelah chuan hlauhthawnna reng reng a lang eihlo thung a. Awlsam zet huan,"kan inru ni ve mai alawm" a ti êt a. A chuak Leh ta daih a. Amawii chuan,"kan inru hlawl lo...min kidnap a nih hi...i hre khawp ang" a tihzui pang pang te chu hria awm pawn a lang lo.
A han ngaihtuah vang vang a, khati em ema Alberta hlauhawnglo leh thawveng hmel a han hmuh khan a rilru a nuam lo thar deuh thut a. A rilruin "ani pui roh hian engemaw remruatna mak tak hi alo nei reng hi a nilo maw" a ti tha leh a. A hlauthawng thar ngei mai.
'
Chutih rual rualin a rilruah Vanlala a lo lang zawk a, a ngaihtuah chhuah rual deuhthaw chuan a mittui a rawn hnãm nghal sawk a. A insum hman nganglo a ni. Nimin lamah te kha khati em em khan lo tilo sela chuan hetiang dinhmun te hi a pumpelh thei ngei dawn si a. Chubakah Vanlala chhuak tur...rilru na lutuk tih hriat reng mai te kha a mitthlaah alo lang. A thinlung chu chema vih ang ngawng ngawng hian a rawn na hial a. Mahse a nih tur a ni tawh si. Inchhir hian ban a chen takmeuh meuh a ni ber mai.
'
In lamah pawh chuan a hlauhthawn ang em em chu nilo mahse, a lo hlauhthawn ruk ang deuh chuan thil a lo kal thuak hi a ni pek a. Amawii chhungte chuan a hawlo tih an hriat rual rual chuan thenawm hnaivai leh chhungkhat laina te au khawmin...a mualpho tlem thei ang ber tura an hriat chuan hma an lo la ve bawk a. Amawii'n Vanlala chunga a rilru put dan vel te chu anu hian a lo hmuru khiau thin a. Chuvang chuan bei nge sei rundung a ti pawh a ni mahna, Vanlala chu a ruk thei ang ber chuan a va contact reng a. Mahse ani lah chu a hlauthawng leh a ngaihna hrelo ber ber ah alo tang bawk si. An hrilh a hai tlang ngei mai.
Chutia Amawii a hawlo tih a hriat chuan Vanlala pawh a awm hle hle theilo. Diktak chuan a hma nia Amawiin a lo tih dan te chu a la hrechiang lutuk. Mahse hetiang vut vuta che tur em chuan Amawii hian boruak a neih a hre lem bawk silo. Chutah le!!! A hrechhuak ta thut mai...Nimina Amawii chhuahpui hnuhnung ber tu chu Alberta a ni. "Mahse Alberta pawn chutiang êm chu a ti duh dawn a mi?" Engpawh nise, chanchin hre tam ber a ni rihin a ring a, Amawii te in lama pheia a thil hriat angte va sawi kha thain a hria a. A insiam mawlh mawlh a. A insiam lai pawh chuan a rilru chu a let but but ti ila kan uar sual lo ang. A chang leh "anlo inru reng te hi a niang a" te a tia...a chang leh "Amawii khan Alberta a ngaihsak loh zia chu damdawiin a awm lai atanga a hriat hlei hlui tawh a ni bawk si" titen a inhnem leh thul. Vanlala pawh hi a buai phili zo vek a ni ber mai. Engpawh nise...thleng phei phawt ang a ti rilru a...a inkhalh chhuak ta a.
Amawii chhungte in ava thlen chuan anlo zauthau hle a ni tih hai rual a ni lo a. Vanlala anlo hmuh rual chuan "a awmna chin hre ta" ni awm hrim chuan an lo bial luih luih a. Mahse Vanlala'n a thil hriatte a han sawi takah chuan beidawnna leh jrilh haina chhumpui ava zïntir hi a ni hawt mai. Amawii pa hmel chu chiang deuha lo en chu awm sela chuan "a lawm lo hle ani" tih chu an hmuh hmaih thei thruai lo ang.
.
Ni e, diktak chuan Alberta hi a hre ve reng alawm. Amah ai hlei hleiin a pa chu a la hrechiang zawk a. An tlangval lai pawha...mirethei fa a nih avanga chitin chitanga lo hmusit tawh thin tu ngei kha a ni. Pa rilru tluangtlam tak a nih avang hian, hetia a han dinchhuah hnu pawh hian eng a tizui ve duhlo mai pawh a. Mahse phuba leh saihlum a nget ngailo tih zawng zawng erawh a la paipawn ve reng a ni mahna. A lawm hlawl lo a ni. A hmasa berah a fanu hian a duhthua a zui hi a ringlo bur a. A dawt lehah chuan a duhthu pawn lo zui tehreng se, a duh thui lo nasa khawp ang tih chu a ngaihdan a ni bur tawp mai a ni. Vanlala leh a fanu boruak vel hi a nupui angin hre ve lemlo mahse, a ngaihven ru viau ni kha chuan a hre si a. Tin heipui Vanlala chu an kiangah a awm leh luau lawi bawk si. A rilru a vak rei ruai a ni ber mai.
.
Alberta pawh a rawn kir leh tawh a, Amawii chuan thinrim tih hriat fahran hian,"khawnge kan awmna hi" a han ti fiak thrak a. Fiak thrak kan ti tak naa...a aw te chu a lawi ang deuhroh bawk sia. Albert lah chuan Amawii lam pawh hawi ta lemlo chuan "kan thlamah" a ti sam et a. Han tih vak ngaihna a hriat tawhloh a vang leh han tih vak dan tur a awm tawh miau loh avangin Amawii pawh chuan a rilru chu a thlahdul a ni ber ang chu. Trap pur chung chuan,"ngatinge hetia min tih? Khawngaih takin min chhuah hram rawh" a han ti tha leh vei tak na a, Alberta ngeng chu a chhun eihlo tih hairual a nilo. Amawii beidawng pawh chu a trap leh ngawt a. Chutia an awm awma an awm mawp mawp lai chuan Alfreda chuan,"Amawi, kawng dang ka hre thlawtlo a ni. Ka duhzia che i hre reng chung pawn min ngaihsak duh miah silo a lawm"a ri ti dam vei hluam a. Mahse chutia a rawn ri vei duai tih a hriat chuan Amawii chu a hlir hlar mai a. Amaherawhchu a tawng chhuah hma chuan ngaihtuahna thar a nei ta phut a. Aw pangai tak chuan,"Albert vawi 1 mah min duh thu ila sawi ngai hleinem. Hetiang te chu hetia tihbuai ngai lo hian tha takin a sawi theih reng alawm" a han ti ve ngawt a. Mahse chutia dam taka a chhan avang chu nge Alberta chuan beiseina thar nei tih hriat tak hian a rawn hnaih surh surh a. Chutia a rawn chet takah chuan Amawii chuan a tifu dawnlo tih a hrechhuak ni hmiang...vin deuh hlek chuan,"min rawn khawih kher suh aw" a lo ti hlar a. Alberta pawh chuan tilui tange a ti biklo a..mahse tawlh let hrut hrut pah chuan,"ka thiante an rawn thleng trep ang. Lo ngai tak rawh. Mizoram hi kan chhuahsan dawn. Tuman an rawn zawng hmu dawn lo che"a ti ta piap piap mai a. Amawii mak ti leh hrilh hai leh hlau bawk si chu a meng ka hau ringawt...
Tlai a thim thet thet tawh tihah chuan an awmna pawnlamah chuan thawm hi a rawn ri tak tak a. Alberta chu phur tih hriat fahran hian a tho tharh a, a chhuak nghal a. Amawii rilru chu a vakthui hman ngei mai. A rin ruk leh a hlauhthawng ang ngei mai chuan khawchhak lam mi tih hriat mai pathum hi an rawn lut tel ta ngei reng a. Alberta thusawi te chuan a beng chhungah a thunawn an rawn vaw ri dup dup hi a ni ringawt a. A hma kha chuan eng ti kawng zawng zawng emaw deuha hmin theih kha a in beisei ru a. Mahse tunah chuan a beisei na te chu meikhu ang chauhin a thamral chiang ta ngei mai. A hma hun tur a chian em avangin tun ah chuan "Dah law maw" tih beisei na nena tlanchhuah tum chu a rilruk ta ngar ngar zawk a. Mipa ho lah chu zu an in a, an ri bel bul hlawm a. Zan a lo rei deuh hnu chuan an zu rui chu an let deuh phung tawh a, Amawii pawh a kut an tawnna talpit a tumna lamah a kut chu a vung deuh luk tawh a....tal phelh a tumna lamah a tih harsat belh ngei mai.
'
A hun tak hriatna tur va awm suh, zan lai pelh tawh deuhah chuan an zinga hotupa deuh ber nia a lo ngaih ruk chu a rawn tho tuah tuah a. Zun ram thiarin ava chhuak truih truih a. A rawn luh leh chuan Amawii chu chiang fahran hian a rawn melh ang kuau a, a hawi zuk zuk a. Midang an chatthla chiang ni-a a hriat vang nge a rawn pan phei ta dun dun mai a. Amawii chuan chupa thiltum chu a hre deuha a inhriat avangin a theihtawpin a lo vau ve khar khar a....mahse a sawt lo tih chu amah ber pawh chuan a hailo nasa. Chupa chu a rawn thlen phei rual chuan Amawii kawr chu a thler nghal kawk ti ila kan uar sual lo ang. Jeans kekawr a lo hak avangin a hnuailam chu a bei hleithei biklo a...pakhat lo tang ve bawk. An thawm chu a ring ta deuh a nniang, midang ho pawh hrilh hai hmel zetin an rawn thu chhuak he hu a. Alberta rawn tho chuan eng sawiloin (Thil kalhmang a man nghal ni tur a ni) thingfak chuan chupa chu a rawn hlap thawr mai a. Mahse midang ho khan Alberta chu an bawh thlu a, a ri awk awk a...reiloteah chhuatah chuan rum ngul ngulin a vial ta ngawih ngawih thung a. Amawii tan chuan beisei tur a vang duh ve viau ang chhu. Mahse an hotupa ber Albeta'n a hlap pa erawh chu a lo vaw chiang deuh a niang, thih chhu thi lemloin a rum ve nghut nghut bawk a. Midang la awm ho chhu an tawangin an in be su su hlawm a. An tawng a zawih mai bakah, a hriatthiam loh avangin ngaihthlak pawh a tum buai lo. Mahse Amawii rilru chu a vak thui kher mai.
'
A hlauh ang ngeiin an rawn phih tho lawp a, mahse an pu ber ang em ni lo chuan a kawr te chu an siam that sak lawi thung a. Thlam atang chuan an hruai chhuhak a, khawilam nge tih pawh a hriat thiam hauhlo pan chuan an kal pui ta a. Amawii chuan a rilru te te in "Alberta chu thuhran hran lo ni ta se, anmahni ngei rawn kalpui...an pu ber ni awm pawh hetia an kalsan hmak theih chuan pawisak an neilo tawp ang" tih chu a rilrua lian ber a ni a. Nuam a ti thei mawlh lo a ni ber mai. Amah hruaitute lah chu, an tawng hre thiam hauh lo mahse an inlungrual lo tih hai rual a ni bawk silo. Amawii chuan a hlau nasa ngei mai. A dinhmun hian ar ek chan pawh a chang pha lo tih a hai lo a. Theiin remchang chu hmu ngat se, "thih leh thih" tiin a tlanchhuak duh chiang khawp ang. Mahse a dinhmunin zir thuai si heklo le.
'
In lamah ve thung chuan tihtheih an nei tlem ropui mai si a. Khawtlang han pun hluai dawn ta se, an rin deuh...rin ngam chiah siloh angin "anlo inru" te a nih chuan an tlangthang chhe ve dawn bawk si. An lu a hai hlawm a ni. A dik takah chuan amah Vanlala hi a khawngaih thlak ber awm asin. An rinthua thil kaldan te hi a eng zawk zawk pawh lo dik ni ta se, a tan chuan a thinrim thlak ngawih ngawih loh pawn, a rilru chu a na ngawih ngawih dawn si a. Mahse tet te atanga mi sehhel a ni ve hrim hrim a, mi hmuha tuar emaw, baihvai tak anga lan chu a tum lo bur naa, thil thleng diktak a hriat chhuah hma chuan kawlva lenchham thleng pawha chhui ruk a tum ruh tlat thung a ni. Chutia a inngaihtuah lai chuan AMawii nu chuan thingpui a rawn pe a, "Vanlal, nang ngaihdan i nei mial lo maw? Alberta tih lohah chuan chiang taka a kawm kan hriat hnuhnun ber te zinga mi a ni si a" a rawn ti su su a. Vanlala chu a ngawih deuh ran avang chuan Amawii nu chuan beisei a nei deuh nge, a kiangah chuan a la rawn thu tak deuh deuh a. An inhmuh hnuhnun bera Amawiin alo tihdan te kha tlawmah la viau mahse, anu rilru tur a dawnpui ve deuhroh avangin an inhmuh hnuhnun bera an in thlah tak dan te chu a hrilh ta vek a. Amawii nu chu a hui pap a, a tho a, a phone chu a la seuh seuh a...Amawii number chu a han try leh ringawt a. Mahse a ngai bawkin switch off a la inti ngar ngar bawk si. A thu ni se, emaw...an pain rem ti se chuan khawtlang pun mai a duh rum rum ang tih chu a hmel atang chuan a rinthiam theih ruak ruak awm asin.
'
Chutia an thawm midangin an hria ang tih hlau taka an rik mer mer lai chuan an kawmchhakpa bengvar tak mai chu a fapa kum 18 mi vel, tleirawl uaih tawh hruaiin a rawn lut ve hlawl mai a. A rawn lan miau tawh avangin eng han zep theih ni ta heklo le. An chanchin chu an hrilh ve ta a. Ani pawh chu a hrilh haiin rilru siam a thiam bik hauhlo tih chu hai rual a ni lo. Mahse chutia mahni ngaihdan phul pui bual bual a an rik mur mur lai chuan an kawm chhakpa fapa chuan, "U Amawii chu zanin zantir deuh khan...kan haw kawngah motorin an rawn phur ka hmu. A muthlu lehnghal" a rawn ti thut mai a. Khuavang a va kal chiang em!! A pa chuan "Mama i chiang maw" a ti ang he haw a. Ani lah chuan, "Chiang e, passenger seat darthlalang ngheng a muthlu a, traffic a zam a, keini ke in kan kal a. Ka hmu chiang alawm. A motor pawh Bolero var a nia. A bialpa nen an lengchhuakah ka ngai a. Ka chhaih ngei ngei ang ka lo ti rilru lehnghal" a la ti deuh deuh a. Tunah chuan tleirawl te chuan lunghle a sem a, chanloh hlauin an bawr tuau tuau hi a ang ta ber mai. Kiltin atang zawhna an zawt nghal sup sup a. Mahse an vanduai a siamin kan ti dawn nge, chu tleirawl chuan Durtlang lamah nge Zemabawk lam panin an kal a sawi zui thei bik tlat lo mai a. A motor a sawidan hmang atang chuan Albert-a a ni ngei tih erawh an chiang tlang viau a. Amawii pa chuan a phone a phawrh nghal a. A va biak tur nih chu a huphurh awm ve sateh khawp ang le.
DUHTHLANNA KAL SUAL
'
Darkar 4-5 vel chawl hauhloa an inchhawm hnak hnak hnu chuan hmun fai lai deuh an thleng a, Amawii chau tawngkhawng lutuk chu a sawp hian a sawp hnawk ringawt tawh a. An chevel a thlir dan atang chuan mut hahchawlh an tum niin a hria a. Amah pawh chuan a hmaa a lo tum angin tlanchhuah na remchang a awm theiha ring rilru deuh naa, a taksa hian a rilru hi ala thurual pui zo angem tih chu a hrethiam bik tawh lo. Mahse tihdan tur erawh a ngaihtuah ru reuh reuh a. Chutia a han thut hahdam takah chuan tum sateh mahse a taksa in a tlin ta bik ngang lo a niang...a hmain mutmu a lo tuah tha bawk silo nen...a lo muhil daih lehnghal a. A harh chuan a hruaitute ho chuan thingpui emawni hi an lo in a, a thiltum chu a fail chiang hle tih a hriat chuan amah leh amah chu a inngei rum rum a. Mahse a thu a ni bik hlawl silo a ni. Amawii a rawn harh tih an hriat chuan an riat nawk nawk a, kal zai an rel leh nghal titih ta mai a. Kawng lehlamah chuan an fel ve phian lawi mai. Amawii hah dan tur an hisap pui ve ni ten a lang rum rum thei hial awm e. Engle khawle, thut reng thu awm suh. An inchhawm chhuak leh ta a. Amawii rilruah chuan Vanlala a rawn lang zawk a, office-a a lo tihdan leh a chhuahsan tur lunghnur hmel a mittthlaah a lo lang a. Tin, Alberta leh an hotupa ber emaw ni pawh kha a rilruah a rawn lang a. Engtin awm hlawm zel tak ang maw? Vanlala chu a ngaih hian a ngai vawng vawng a. Mahse a chinchang takngial pawh hi a hriat a ring silo. A tihngaihna hrelo lutuk chu a tawngtai ta tawp a, chutia maimitchhinga kal ta fam chu a inchhuaih a, a bawk thlawrh nghe nghe a. A beisei loh lutukin an zinga pakhat chuan a rawn bawihsawm teh mauh a. Mahse chupa mitmeng a hmuh chuan lawmna lam hmuh tur a vang ngei mai. A chunga chhum zing hian zual lam a pan dawn ni berin a hria a. A rawn bawihsawm tu khan a ngaizawng tih hai rual ni thuai hek lo le. A hmaa an inhnial bap bap te kha ama chhantu leh engti emaw taka tih tum an awm vang a nih thleng thlengin a riruat chho a. Tunah chuan khuarkhurum thuk takah a tang chiang hlein a inhre ringawt tawh mai a ni.
'
CHawhnu her rawih thlenga an kal hnu chuan kjhaw pakhat la thingtlang ve tak mai hi an lut hlawl mai a. An kal dan leh an kal na lam te a thiam ang tawk tawka a chhut ve danin Mizoram chhung pelh chu sawiloh, a hmaa Albertan a dahna hmun atang pawn thui over an kal a la rin loh tehlul nen. He khuaa mi cheng te hi Chakma deuh vek an ni tih a hriat chuan mak a ti ngei ami. Chutiang a nih takah chuan amah kidnapped tute pawh hi Chakma mi an ni ang tih rinhlelhna a nei tawh lo a. Tunah chuan ama chungah engmah thlentir lova an hruai zel mai hi a lawmna neihchhun a ni ta ber mai awm a sin.
Amawii a bo atang zan hnih lai a liam ta. Tunah chuan ti tlangthang lo theilo dinhmunah an ding ta niin an in hria a, Alberta pa lah chu Amawii pain a va contact chuan a bo bo ah a lo tang bawk si nen. Police lam pun phawt a, a tul leh khawtlang pun chu an rawt thlu ta nge nge a. Mahse an ni te chu chhungkaw hlun an lo ni bawk nen, khawtlang pun buai pawh a ngai tawhlo tih hial a ni. Amaherawhchu hetiang ni khuaah chuan official taka inpunna a aawm loh chuan han khawtlang zawn hluai kha a rem lo tih chauh mai a ni. An hre fur tawh. A thenin Amawiin a um a niang an tih laiin Alberta mizia hre chiang zual tute leh Amawii a duhdan hrechiang tute chuan rilru tha tak put har an ti ngei mai. Vanlala pawh in lamah a haw mang tawh lova, a tap ve chawt a. Kil khatah chuan amahin a rilru a lo kawm neuh neuh a. Amah Alberta hi a lo hrechiang bik em em silo a, mahse hetia a thut ngawt chuan minute chu sawailoh second tin pawh a uihawm tih a hrechiang ropui si. Ama thu in leh, tuma hriat lemloha Alberta te ina va kal a, a hriat duh ang thil chinchang te va zawh a tum rilru a. Tichuan midang mit la lo thei ang ber chuan a chhuak ru ta zal zal a.
'
Albeta te in a va thlen chuan anni lam pawh chhungkhat laina an lo awm ve laih laih bawk a. Va pawh rawih chu a hreh ru angreng hle mai. Mahse a nawrtu in a nawr nat rm avang chuan a va luhchilh ve rawih a. A chhunga lo awm te hrilh hai hmel chu mak tih tham a tling hial ta awm e. Vanlala hian ngaihdan nghet tak pakhat chiah a neih avangin a awki te pawh ngaihno a lo beilo deuh a ni mahna, "Khawnge Alberta hian Amawii a kalpui" tia a zawhna pawh chu chhanna a dawng no fahran lo hle mai. Amawii pa chuan, "Nizanah ka sawi vek tawh kha...kan hre biklo. A reng reng thuah tu fa lubawk nge maw i nih a, ka inchhunga hetianga mi rawn tih le" a lo tih zek takah chuan Vanlala chuan a awmdan chu a inhmu vat a. "Thinrim leh buaina siam tuma lo kal ka nilo a. Amawii te kalna lam hriat dan eng tin tin emaw a awm chuan tiin ka lo kal mai chauh a ni" tiin...dam deuh zawk chuan a chhang ve leh mai a. CHutia a aw a nem deuh takah chuan Alberta pa pawh chuan "Seling lamah khian huan chu kan nei a, mahse an kallo tih kan chiang tawh a. Hman deuh khan Lawngtlai lamah hna thawkin a va awm reng tawh a. Chulam te chu a pan emaw ni kan lo ti mek a nih hi" a tih chuan eng sawi lovin Vanlala chu a inher nghauh a, a chhuak ta nal nal a. A luh laia an mak ti hmel ang bawk khan an thlir liam zui ngei mahna.
Vanlala chu in lamah a haw tlang vang vang a, Amawii te in lam tlawh leh pawh kha tulin a hre lo a ni. Ngaihdan ngah fe fe, tutu emaw tawng luai luai kara a ngaihdan va sawi ve khan awmzia a nei dawn chuanglova a hriat vang te pawh a ni mahna. A thianpa ve ber Lunglei lama hnathawka awm, Kima chu a call a. Zep tit tet awm lovin engkim a hrilh te te a. A thianpa lah chuan a beisei loh lutukin "Lunglei lo thleng phei la, helamah ro i rel ila, a tul leh ka zawn pui ang che" a lo ti mauh mai a. Phur khat khat chuan a phur belh leh ti ila kan uang hauh lo ang. Engtia rei nge a thang dawn a hriatloh avangin a chhungte pawh a tawi fel thei ang bera hrilh tha a ti a. Mahse Lunglei lama kal tur angin a insawi mauh thunga. A pa erawh chuan boruak awmdan te a thlirin thil a hrethiam niin a hria a. A hlauhthawn ang ngeiin, "Mama thil atthlak lutuk te kha va ti su aw" a rawn ti ta reng a. mahse chu chuan a thil lo tum tawh thulh tir thei a ni lo. a .22 rifle lei ve chu a chhungte hmuh hlau takin tukverhah a thawlh chhhuak zauh a. Tichuan chauh emaw, laklawh emaw...hunbi pawh sawi lovin Lunglei lam pan chuan a tlan ta vang vang mai a ni.
'
An thlenpuina khua hi a hre hauh lo naa, mahse sawi tawh angin Chakma khua a ni tih chu a man thiam ve ruai ruai thung a. Amah hruaitute khua hi a nih a ring hial a. A chhan chu hmelhriat an neih ngah em avang in a ni mah awm e. Engpawh ni se a lo ring sual lutuk lo a, an zinga pakhat zawk te khua chu a lo ni a. A tuiin lah chu a hal ang huam huam lehnghal bawk nen, pek tum emaw khawngaihna mitment chhetea han melhtu lah pakhat pawh a hmu silo. A nunau takngial pawh chuan an kal pel ang ngawk ngawk a. Hmeichhia pakhat khawchhungah kut phuar sak chungin an hruai lut a, mak ti hmel pakhatmah pawh a hmulo chu mak a ti ngei mai. An kalkawng te a han chhui kir a, Alberta khan khawilai chen nge nikhaw hreloa a awm lai khan a lo phurh thlen a hre der bawk silo. A mual bo hian a bo mup mai a ni ngawt mai a ni. Nakin deuhah chuan naupang te hian a rawn pan hnai hreih hreih a, a thiam ang tawkin a kut zaizirin tui a han dil a. Cu naupang lah chu a tlanchhe daih lehnghal a
'
Darkar vel dawn a thut tlawk tlawk hnu chuan patling panga...amah hruaitute pahnih tel chuan an rawn kal a. An zinga pathau deuh chu a tawng lung lung a, a nui huah huah bawk a, Amawii chuan a rilru te te in an hotupa deuh a nih a lo ring ru deuh a, a ring dik hlauh mai...i ti teh ang. Mizo tawnga an rawn biak takah chuan a phu zawk thei hial nghe nghe a. Amah hruaitute ngei pawh kha Mizo tawng chuan an tawng ang zawt zawt tawh lehnghal a. A thin lam lam chu a rim a. Mahse enge a tih theih chuan ang le? An hotupa chuan zawhna tam tak a zawt mawlh mawlh a, a rul tawk lek lekin a chhang a. Mahse "I thianpa chu a dam tha ang maw?" a han ti sak chu a thin a khei ngei mai. Alberta chu thinlung takin ngei mahse an tihdan leh hnam feeling te pawh a rawn chhuak a ni mahna..."Amah a nih loh pawn min rawn zawng chhuak tu hi an awm tho tho ang" a ti ve ta sak a. Engtin emaw kut an thlak a rin tehlul nen an nui vak vak ringawt a. An hmela confi na a hmuh chian em avang chuan khaw pangai deuh takah an awmlo emaw ni chu aw a ti hial a.
'
A ni lah tak a, heng ho hi an khua atanga titau chhuak ho an lo pek a. Tuna an awmna pawh hi TLangbawhmual an ti mai a. Ti hian chhungkaw 20 vel an lo inbawl hrang ve a ni ber ang chu. Anihna takah chuan Chakma khawpui Chawngte atanga hla lo te a ni a, mahse ngaihsak an hlawh loh ve em avangin tuman an rawn en peih pawh an ring lo a ni mahna le. Engle khawle, a hmaa ding patling ho chu chakma tawng chuan an inbe leh su su a. Amawii chuan hetiang reng renga Chakma tawng thiam a chak lai hi a hre leh tawh ngai lo hial awm e. A hmaah a chanchin leh chungthu an rel a, awmzia pakhat pawh han hriatthiamloh chu hrehawm ve viau mahna. CHutia an inrawn khawm hnu chuan an hotupa ber chuan Mizo tawng pai hlek lo hian, "I hming kha Amawii tiro kha" a rawn ti luam a. Amawii chu a lo bu nghauh a. "Tihnat che kan tum hauh lo tih hria la, hei kan khua ve hi kan pachhiat zia i hmu ang a, i chhungte bulah thamna sum kan dil ang a, dam takin i chhuak leh mai ang" a ti dam thluam a. Mahse an kal pah chuan nui tut tut chung hian "zanin chu ka inah lo dah phawt rawh u" a ti zauh pek a. Han ngaihthat na tur a van mai bakah a sawi dan ki atang chuan Amawii ngaih chu a nuam lo nasa ngei mai.
'
Hetih lai tak hian Vanlala pawn Lunglei a thleng phei vel chiah a, a thianpa Kima chuan a lo welcome var a. In chhhung an luh rual chuan hah leh eng khaw sawi set set lovin hma lak dan tur chu an rel ta nghal pawp pawp a. A chhan chu kan sawi tawh ang khan second tin mai hi a hlu em em a ni tih an chian em avang ni mahna. Kima chuan "Ka theih ang tawkin Police lama ka thiante pawh ka lo hrilh a, CHawngte outpost lam an biakna ah Chawngte atanga km 30 vela hlaah thlam pakhat chhunga mi pahnih thi chhawnga let reng leh, motor pakhat an hmuh thu report an lo dawng hlauh a. Chulai bak chu a nih ka ring thei nganglo a ni" a tih lai chuan Vanlala chu a lo bu nghauh nghauh a. A hmel chu a chhan hrelo tan chuan hmuh hrehawm tur hial khawpin a inseh ruh ttrung mai ti ta ila kan uar sual miah lo ang. Vanlala chuan kal nghal rum rum a duh nghal mai a, mahse a thianpa chuan "Ka thianpa SI in kan kal dawn chuan Police tlem a zawng min kalpui turin an detail tawh a, han hrilh hriat phawt a tha in ka hria a. Chubakah keini pahnih lek chai sen rualloh pawh kan tawng thei a. A hrim hrimah nang pawh hahchawl sek la, tha thar deuh te pawn i tan a zia zawk ang. A tul leh zanah pawh kan chhuak mai dawn nia" a tih takah chuan Vanlala chuan a hmaa a lo ngaihsak miahloh a taksa condition te chu a han ngaihtuah chiang a. Hmanni lawkah accident puui a tawk hlim a ni a, a hliam te chu dam ve tawh viau mahse, a tkasa in ngai a la awh loh zia chu a hrechiang tu ber a ni awm e. Chuvang chuan han hahchawlh sek pawh chu a hnial lui duh ta lova. Chutia a remtih takah chuan Kima chuan, "PS lamah ka lo han kal leh anga, rem kan han ruat ang e, lo hahchawl rawh, i mamawh nasa tih chu nang pawn i hria ang" tih pah chuan a chhuak nghal a.
Vanlala chu a thianpain khum a kawh hmuhah chuan inti fai lem ta lo chuan a tlu zal nghal thlawrh a. A han hahchawlh takah chuan a lo chauh zia chu a hrechhuak thar uaih uaih a. A ke te chu a mur hian a mur uaih uaih thei hial a. Tlem mut tum chuan a rilru a han thlahdul ve siai siai a, mahse ngaihtuah lo theilo dinhmunah a ding hi a ni ringawt....a mit a chhin rual hian Amawii hmel chu a rawn lang zel mai bawk si. A dinhmun tura a ngaihruat ang lampang a ngaihtuah phei chuan a mur uaih uaih thei hial a. Amah chauha awm e ti lo chuan a thin hi a rim trung reng mai a. Mut thilh chu tum buai chi niin a ngai ta lo law law a. A thianpa chokaah chuan a phei a, eitur a hmuh ang ang chu a ei mawlh mawlh a. A chaw ei te thleng hian a ri buan buan ta ve hian ka ring hial mai.
'
A eikham hnu chuan mut chu sawi loha lum a ni ta bawk si, inchhungah chuan a vei sek a, a chang leh a thu a. A chang leh a silai chu a han chul fai leh thin. Silai mu a thun a, a han tin vel a...a la chhuak a, a thun leh thin a. Tunah chuan Amawii tan hian engpawh tih a inhuam tih a inhre chiang ta ngei mai. CHutia a silai a lek lai chuan a thianpa leh police pathum silai nena inthuam hi an rawn lut thut a, kawngka lam a lo tin lai a nih pek avang chuan an phu suau hlawm nghe nghe a. Rang takin Vanlala chuan silai chu a dahthla thuai a, ngaihdam te chu a han dil luam a. Police zinga bel thum pa chuan thut pawh a thut fel hma chuan "Kha hmanrua te i inreng vek elaw...licence te i nei em"? Police investigation ah hi chuan civil mite hian ralthuam an thawh hi kan remti lo asin" a rawn ti nghal bawrh bawrh a. Mahse Vanlala ngaihdan a lo nilo nasa, "Silai ka ken rem in tih dawn loh chuan keimahin ka kal mai ang. I duh leh min rawn man la" a lo ti chher chher mai a. Kima lo inrawlh vat lo phei se chuan a engamah hmain boruak a sang nghal auh ngei ang.
Amawii chu an hotupa kan tih pa inah chuan a thu ran mai a, a kut phuarna chu an phelh sak zawk a, tui leh eitur an han pe mai chuh...a pian tirh ata khatiang em em a thil tui a in leh ei kha ala hre ngai lo. An chawhmeh chhawp te lah chu baibing tih vel mai mai te an ni. Aizawlah milian fa a ni a, hmun changkang tak takah thil tui tinreng eikualin a kal fo thin...mahse tun tuma a thil ei hi chuan a tluk lo a ti ve ngang mai. A ril a tamin a chhawl a hal viau a niang e. A thlengtute nupa chu an titi su su a, a nupui chuan a khawngaih ni ve deuh tlat hian a hre roh a. Mahse an hotupa chu a rawn phei tawrh tawrh a, an ban laiah chuan a rawn thlung leh thawr mai a. A hmaa an lo thlun tawhna a lo vung bawk nen, chutia a han tawn leh vel chu Amawii chu a tre thrat htrat hial a. Na a ti ngei mai. Mahse a rilru in pachang taka a awm loh chuan he thil hi a tuar chhuak theilo ang tih a hlau a. A hma hun chu hre hauh lo mahse, bei tih dawnloh hrim hrim phawt chu a tum tawp mai a ni. Chutia a thlung fel awrh tih chuan a hmaa a mah hruaitute leh midang pali lai hi an rawn lut a. Zu in pah chuan enge mawni an sawi sep sep reng a. Amawii chu an rawn melh leh fo thin avang chuan a chungthu an rel tih chu a hailo chiang kher mai. Mahse a taksa a chauh em avang leh a thil tawrh te avang chuan a khua te hial a sik takah chuan a chau tawngkhawng chu a niang chu...a lo muhil ta daih a. Enge thil thleng dawn lah a hre der silo.
'
Vanlala te pawh amahin a tur hmanhmawh em avang chuan a rang thei ang ber chuan an chhuak ve nghal a. Mahse neuh neuh thil tih tur te a awm vangin zanah an chhuak thei chauh thung a. Amah Vanlala mai bakah a thianpa Kima ngei poawh chu a in ngaihtuah thinrim ve treuh tawh a. Amawii chungah enge thleng an la hre ve der silo a, anni thinrim na erawh Alberta chungah a la ni fan thung a. An hmu a nih chuan awm mai mai bik a lo tum ve em em ringawt mai a ni. A thianpa Vanlala chu a va en a, motor khalh mah ni se a rilru chuan thil dang a ngaihtuah bik lo tih chu hai rual a nilo thung. Tuna Amawii awmdan leh a thil tawn te hi hre ta se, eng tin tak awm lehzel ang i maw.
Amawii lah chu a pian tawh a chin a puitu a mamawh lai ber a ni lehnghal vei nen. An Police hruai te erawh chu an muhil bawrh bawrh a. An tlan rei ta vang vang hle mai, Vanlala leh Kima ngei pawh chu inbe hauh lo mahse, a meng kar thung a. Chutia an ngawih reng lai chuan Vanlala chuan "Kima keichu ka that duh mai ang" a rawn ti sep a. Mahse Kima chuan chhanloha sawipui loh law law chu fing zawkin a hria a, a chhang duh lemlo a. A rilru erawh chuan a thianpa hian engtin pawn ti se, a dem lo ni mai lovin, a pui hial zawk ngei ang. Mahse fuihpawrh emaw sawipui vak kha chuan amah Vanlala tana thil pawi thei tur thlenga a tih a hlauh tak tak deuh roh a vang chauhin ngawih a chuh a ni ber awm e. Hetih hunlai vela Amawii chunga thil thleng tur inmung mek te hi hria se chuan aw...an va han sa dawn pep pep tak em!!!!
(to be continue)
On 09 september 2024, at 03:26, Anonymous commented on 
0 Comments
I ngaihdan han thawh ve teh le!