Cincinnati-a Lung lam Doctor, Darryl Sutorius-a chuan nuthlawi la naupang tak mai nupuia a neih leh takah chuan a vawihnih nan hmangaihna a chhar thar leh ta. Mahse hlimna hi a chang hi chuan hriat thiam har leh hmuh thiam har tak a ni thin. Dr. Sutorius-a chuan nguina (Depression) nasa leh thuk tak a nei a. Chumi vang nge a .38 pistol hmangin a nunna a titawp/la ta ringawt a. Mahse, eng vang ngawtin nge amah leh amah a inkahhlum hma hauhin enchhin (test shot) nan sofa thutchhan (cushion) a kah hmasak kher ang le?.
Dr. Sutorius-a chu thiin a chenna Cincinati-ah hmu a ni a. Police te chuan mahni intihlum angin an ngai a ni. Hnu an chhui zelna ah chuan a nupui chu tharum thawh hmang leh awihawm lo khawpa sum ngaina mi a ni tih an hmuchhuak a. Forensic Scientists te chuan chu Doctor fel tak chu ama kut ngei hmanga thi nge; neih sum um a pasal belbultu a nupui in a that zawk tih hriatchhuah tumin theihtawp an chhuah ta a ni.
Cincinnati, Ohio hi USA a khawpui lian zingah a pa 6-na a ni a. Khawpui lian leh thangduang tak a nihna vang hian natna venna, bawihsawmna leh enkawlna (healthcare facility) lamah chuan hmun dang nen khaikhin pawhin a tha ber te zing a mi a ni hial awm e. Doctor Sutorius-a chu he khawpuia Doctor hlawhtling leh zah kai pha, Lung lam zai thiam bik te zinga pakhat a ni a. Mahse, dawhtheina tlachham leh mi ngenngawl tak a ni thung. Surgeon buai thei tak ni mahse mi chak ber te ang a thiamna nei a ni lem lo. A thawhpui tam zawk te chuan mi phunnawi hmang, thin ur hma tak leh tihlawm har tak mi angin an hmu thung a ni.
Dr. Sutorius-a chuan a thawhna damdawi In-a thawk ve tho nurse Jannet-i chu nupuiah a nei a. An nupa hian fa pali neiin; fanu pathum leh fapa pakhat an nei a ni. Mahse, Doctor buai tak pasala han nei rawt mai chu chona nasa tak a ni tih Jannet-i chuan a hrechhuak ta thuai a. Sutoriusa kha mahni mai pawh a hnathawk mup mup chi, a hun zawng zawng a hna a in sawrbing mi leh insawrbing duh mi a ni. Englai pawh a kawh theihin a awm reng thin.
Chu chu ama duhdan pawh a ni a. A hna lamah pawh a hlawhtling thawkhat hle. Mahse, chutiang ngawt chu thil awlai leh sam a ni hauh lo. Sutoriusa'n a damlo te Doctor dang hnena kal tura a rawn (refer) tawh te reng reng chu a rawn hnuhnung ber an ni ang tih a hlau em em a ni.
A thawhrimna leh inpumpekna chuan rah a rawn chhuah ta. Kum 1980 laihawl velah chuan Dr Sutorius-a chuan kum khatah $ 3,00,000 lai mai a la lut thei ta hial a. Mahse, chutianga eizawnna kawnga a hlawhtlinna chuan man pek let ve tur a keng tel ve ta tlat mai. Rei tak tak nawr tawtna leh Darryla thin butut lutuk vang te chuan an inneihna chuan rawih lam a pan ve zel a.
A nupui hmasain a sawi dan chuan Sutorius-a chu pa hlauhawm leh midang te hrehawm taka siam thin, fate chungah pawh thuneihna nei duh leh mawhphurhna nei duh reng thin mi a ni a. Mamawh petu leh enkawltu ni reng duh mi a ni bawk. A nupui fanau te chuan chung te chu hlimpui chang nei thin mahse a thuhnuaiah an awm tlat a ni tih leh a enkawlna hnuai awm an ni tih an hriat nan a vaukhan lawk reng thin. Chu tiang thil te chuan Sutoriusa chu an tibuai a; a nupui chuan a (Sutorius) lak atangin a tla fal deuh hlek te pawh a ni mahna.
Kum 30 teh meuh an inneih hnu chuan Sutorius-te nupa chu an inthen ta. An inthen hnu chuan Dr. Sutorius-a chu mal taka khawsain a nun a ngui a, a fate lak atanga a awm hran chinah chuan hun harsa tak a hmang chho tan ta a ni. A nupui hlui ngaihdan chuan a thu hnial ngam vak lo tu tur; "patha tak a ni" tia fak theitu tur leh a induhna dah hniam tir theitu tur hmeichhia a ngaihven nihin a hria a ni.
Thiankawm tur zawngin Sutorius-a chuan Dating Service lam a ngaihven ta a. United States ah hian Dating Service te hi sumdawnna hlawm lian zet mai an ni a. Dating Service dawrtu te chuan man chawiin an thlalak leh an mimal chanchin te chu Dating Service hnenanah an pe a. Chung thlalak leh mimal chanchin te chu Dating Service te chuan anmahni lo dawrtu dang te hnenah man chawitirin an pe chhawng ve leh thin a ni.
Dating Service te chuan Doctor Sutorius-a leh kum 45 a upa Dante Britteon-i te chu inkawpchawi dawn riauvin an hria a. Ms Britteonin ama chanchin a sawina-ah chuan Day Care neitu leh nuthlawi tharlam tak angin a insawi a. Aphrodite Jones, Crime Writer-in a sawi dan chuan Britteon-i chu nu duhawm tak, pumrua duhthusam leh hmeltha deuh mai niin a sawi a. Midangte hip thiam tak, kawppui zawng mek tana mizia pawimawh tak nei niin a sawi bawk a ni.
Thla li an inkawp hnu chuan Dr. Sutorius leh Dante Britteoni te chu an innei ta. A lan dan chuan Dr. Sutoriusa chuan a nunhlui kalsanin a nupui thar nen nunthar a din mek ni hian a hriat a. Mahse, an inneih hnu rei lo te ah a nupui thar chuan harsatna a tawk tan ta nghal a. A sawi dan chuan a pasal chu mi tha tak leh ngilnei tak; mahse mi ngui tak niin a hmu a. Nguina (Depression) a nei tih a hriat mai bak ah Dante-i chuan a pasal Sutoriusa chu a pa thei lo (Impotent) a ni tih a hmuchhuak bawk. Zah vangin chu thil chu a pasalin a hrilh ngam lo nihin a ngai a. Eng tiangin nge a nupuiin a lo dawnsawn ang tih a chiang lo te pawh a ni mahna. Chu thil a hriatchhuah chuan a pasal chu kuahin a biangah fawp ngawih ngawih mai a ni.
Depression a nei nasat luatah chuan a thawhpui te bulah mahni intihlum mai a duh thu a lo sawichhuak hial a. He harsatna lo intanna bul ni a lang chu a nupui thar thuruk tuihnai lo zet eng eng emaw hriatchhuah a nei vang te pawh a ni mahna.
Dr Sutoriusa'n Dante Britteoni nupui a a neih hnu chuan an nupa-in Upscale Cincinnati daifem a In nuam leh ropui taka chei ah an insuan lut ta a. Dantei chuan a pasal sum lakluh hmangin a duh dan leh nuam a ti zawngin a khawsa tan ta a. A duhthusam ber chu a thleng ta emaw ti mai tur hi a ni. Jaguar car te Porsche car te a duh hun hunah leiin a duh zawng zawng a nei vek emaw ti mai tur a ni. Spa ah te kalin a chang leh Caribbean tupui ah a kal a. Chawlh hmangin a zin chhuak thin bawk. A duh duh a nei zel mai a. Chu chu a khawsak leh nun a duh dan a ni ngei ang.
A tir atang rengin an inneihna chuan harsatna a tawk nghal a. Sawi tawh ang khan Dr. Sutoriusa chuan Depression neihin a pa thei lo va; an nupa chuan sum leh pai chungchangah inhnial chang an nei fo bawk. An sum bawm chunga thuneihtu nih inchuhin inbakkaih chang a thleng fo lehnghal . Dante-i chuan a pasalin a fa bik te tan pawisa a hmang hnem lutuk chu a ngaithei lo va. A pasalin afate te tan thil eng emaw leisak dawn se a thungrul nan kal chhuakin designer siam thawmhnaw te, sahmul lam thawmhnaw leh tlereuh eng eng emaw te a lei ve ang a.
An credit card bill zawh rak thlengin a hmang thin a ni. Chung thil a tihna chhan ber pawh a pasalin a fa te angaihsak lutuk thungrul nan a ni. Khatia pasal a han neih khan nupui mahni thu duh leh nupui dinhmun derthawng tak ang maiin a khawsa a. A pasal chu minute khat lek pawh a hmu phak atanga kalsawn tir a phal lo hi a ni ber.
Dante-i khawsa zia chuan Dr. Sutoriusa chu Dante-i nunhlui hriat duhna a neitir a. A nupui nunhlui chu a chhui ta a. A nupui Dante-in a sawi tam zawk chu dawt vek a ni tih a hmuchhuak ta. A hming dik tak pawh Dante ni lovin Della Dante Hall a ni tih a hrechhuak a. A insawi angin UCLA atangin a Graduate lo va. Dik tak chuan High School pawh a zo lo. Chu mai ni lovin pasal neih nawn zat a sawi pawh dawt vek. Dr. Sutoriusa hi Dantei pasal panga-na a ni a. Dantei hi dik tak chuan thu tawp sawi a inlaichinna pawtchat a thawklehkhat a pasal/ngaihzawng te then thut ang chi hi a ni reuh a. Dr. Sutoriusa chuan a nupui chu diklo taka tharum thawh ching mi a ni tih pawh a hmuchhuak tel bawk.
Dante @ Della hian a pasal palina kha silai hmangin a lo vau tawh a. A pasal pathumna pawh chemte hmangin a lo vau tawh bawk. Pakhat phei chu damdawia hrai ruiin khuma a mu lai chu a hal a. A kan hlum hmain a harh hman hlauh zawk a. Mahse Brain Death (Thluak hnathawk tawh lo) in a harh chhuak a. A dam khawchhuak hlauh zawk a ni. Thuthangah chuan a bialpa pakhat, a pasal pawh a ni hial zawk mai thei, California a mi chu a that niin an sawi a. He mi Case chungchang bikah hian Cincinnati Police te leh Los Angeles Homicide Squad te chu hnuchhuina ah hun eng emaw chen an lo thawk dun nghe nghe a.
Los Angeles Homicide Squad te chuan chu hnuchhuina kawngah chuan Cincinnati Police te chu an lo puihbawm tha hle a. Mahse, vanduaithlak takin Southern California a a bialpa/ pasal hmasa chu an chhuichhuak zo ta lo. Chu pa chu tunah chuan a dam tawh lo pawh a ni thei. Chu mai ni lovin a pasal hmasa silai hmanga vau thubuaiah Mrs. Sutoriusi chu thiamloh chantir a ni tawh a. Chung thil thleng te chuan Darryl Sutoriusa chu an tihlau a. Cincinati a Dr. Sutoriusa thawhpui lunglam zai thiam pakhat sawi dan chuan tuk khat chu Darryla chuan silai kahtlang zawh loh chakai khawrh kawr (bullet roof vest) ha chungin hnathawk turin a kal a. A thian Surgeon chuan mak a tiin a ring theih lo hial zawk a.
A sawichhawn leh dan chuan Dr. Sutoriusa khan a nunna chu hmun derthawngah awmin a hria a. Chumi vanga Bullet Proof vest pawh ha angin a insawi a ni.
Chutia a nupui chungchang thudik tak a hriat hnu chuan Dr. Sutoriusa chuan vawi khat chu Gas Station a Police pakhat lokal chu lo tidingin a nupui hand gun chu a pe a; kawl turin a ngen a, a chhan chu a nuna in a tawrh phah a hlau a ni. Chu Police pa chuan Dr. Sutoriusa chu mumal lo riau hian a hria a. Chutia silai a pek hnu chuan a Lawyer Office ah a kal leh a. An inneihna chu thla 10 chauh va upa ni mahse Dr. Sutoriusa chuan a nupui chu a thurochhiah atanga thaibo a duh a ni. Chu mai ni lovin a nupui nen inthenna tur chungchang pawh a buaipui nghal bawk. Heng thil thlen lai vel hian he mi te nupa hi khum khat-ah pawh mudun tawh lovin an mu hrang a. Dr. Sutorius a chuan a hun tam zawk chu an In hnuai lamah a hmang a.
Ni eng emaw zah inhmu lova awm chang pawh an neih fo thin a ni. Kum 1996 February Ni 19, Thawhtan tuk khat chu Dr. Sutoriusa chu hnathawk turin a hnathawhna hmunah a lang ta tlat lo mai. A Pager (khawl chi khat Text/voice message dawng thei) pawh a chhang lo va. A hnuaia thawk nurse chuan 911 a call a. 911 lama lo dawngsawngtu chuan, "Hei hi 911 Emergency a nia. I harsatna chu han sawi ta che " tiin tanpui tura an inpeih thu chu a hrilh a.
Chu nurse chuan, "Dr. Sutoriusa hnuaia thawk ka ni a. A ni chu Doctor a ni" tiin hnathawk tura a inlan lo thu leh a pager pawh a chhan loh thu chu a hrilh a. Tanpui turin a ngen ta a ni.
Policete chuan an thudawn bawhzuiin Dr. Sutoriusa te In lam chu an pan ta thuai a. Dr. Sutoriousa In an va thlen chuan Mrs. Sutoriusi'n a lo chhawn hlawm a. A pasal awmna an han zawh chuan a pasal chu khawiah nge a awm a hriat loh thuin a lo chhang a. Policete chuan inchhung enfiah an han dil a. A lo phal ve mai bawk a. Tichuan inchhung vel chu an han enkual ta a ni. Dr. Sutoriusa car chu garage ah a lo awm a.
Inhnuai pindan ah chuan Dr. Sutoriusa chu a lu a silai kahna hliam nen thi in an va hmu ta. .38 Caliber pistol chu chhuatah a lo let ran bawk a. A ruang hmu hmasatu Police Lloyd Zellner-a chuan mahni intihlum niin a ngai a ni. A lu sir lamah silai mu luhna hliam a awm a; pistol chu Dr. Sutorius-a ruang hnaih rawtah a awm bawk. A taksa atanga thisen chhuak te chu khawro tawhin Rigor mortis (thih hnua taksa khawngna) pawh a awm tan tawh bawk. Chu chuan nikhat emaw ni hnih emaw liamta khan Dr. Sutoriusa chu a thi tawh a ni tih a entir a ni.
Dr. Sutoriusa khan thihna thlen tura silai a hmehpuah lai khan zu a in a ni tih rin theih turin dawhkanah zu no chhunga zu la awm a inhung a; TV a en mek a ni tih a chiang bawk.
A nupui hmasa Jan Sutorious ngaihdan chuan mahni intihlum niin a ring a. A lawyer paw'n chutiang bawk chuan a ngai a. Mahni intihlum ni theihna chance tam tak awmin a hria a ni.
Dr. Sutorius thihna thlentu ni ngei a ngaih . 38 caliber pistol chu Mrs. Sutorius hminga chhinchhiah (register) a ni a; thah a ni hma dar kar 24 liamta a Target World Shooting Range dawr atanga lei a ni nghe nghe. Han en a hmuh dan hmasa berah chuan Dr. Sutorius a thihna chu mahni intihlum ni ngeiin a lang a.
Depression a neih vangin Anti-Depression damdawi ei lai mek a ni bawk. A thiante hnenah paw'n mahni intihlum lam a ngaihtuah thu a lo hrilh tawh thin nghe nghe. Pi Sutorius-i sawi dan chuan Inhnuai lam atanga silai puak ri engmah hriat a nei lo va. Mahse, an thenawm chiah a awm te sawi dan thung chuan Inrinni, zanlai pelh hnu hretah, Sutorius te In atanga silai puak ri ring tak an hre thung a ni.
Forensic Expert ten thihna thlenna hmun an lo thlen chuan thil inmil lo leh felhlel hmuh an nei ta thuai mai. Silai kha vawi hnih hmehpuah a ni a. Sofa Cushion-ah Vawi khat kah niin vawi khat dang leh chu Sutoriusa lu ah kah a ni thung.
Mi tu emaw silai hmanga intihlum tum tan silai han hmehpuah chhin (test fire) chu thil danglam em em a ni hran lo va. A chhan chu silai chu engtianga hman tur nge a ni tih an hriatchian duh vang a ni.
Silaimu chu Dr. Sutorius-a beng dinglam chung chiah ah a lut a. Mahse, silaimu chhuahna hnuhma (Exit Wound) hmuh tur a awm lo. Thisen te chu Sutoriusa ka leh hnar atang te in a chhuak a. A ban vei lamah thisenin a perna hmu tur a awm a. A kut ding lam; kutphah hnuai leh chungah thisen perna hmuh a ni bawk. A lan dan chuan silai hmehpuah a nih lai khan Sutoriusa ban dinglam chu a mal chungah a awm a; silai humin a lu hnung lamah a awm lo niin a lang. Chumi nemnghehna chu Sutoriusa kutphah dinglamah chuan thisen per kai nuaih hmuh a ni bawk. Dr. Sutorious-a kha mahnia inkap ni ta se silai kha a hum ngei a ngai a. Silai hmehpuah a ni khan silai handle khan a kutphah a thisen kai tur kha a lo dang dawn a. Chuti a ni chuan eng ti zawng mahin a kutphah ah khan thisen a kai thei lo tihna a ni.
Stuart H. James, Blood Spatter Expert sawi dan chuan Dr. Sutoriusa kutphah dinglama thisen kai lo awm kha pawi thlen hnu a thisen kha kai a ni tih a lantir a. Chung thisen te chu a kutphah hmun zau takah a in semdarh a. Chu mai bakah a kut dinglam kha a hmai (face) hnaih tak a awmin a ngaihdan chuan thisenin a kutphah a per hnu khan a kut chu dahsawnin a awm niin a ngai bawk a ni. Chutiang teh nuaih a ni avang chuan Police te paw'n an hnuchhui laiah chuan harsatna an neih chho ta. Darryl Sutoriusa khan silai hmangin amah leh amah inkap ni ta se silai humin a kut kha a lu hnung lam deuh a koki chung zawnah a awm ngei a ngai a. Tichuan silai (pistol) a hmehpuah khan thisen per te kha eng ti zawng mahin a kutphah ah an kai thei lo a ni.
Chu loh pawh thil felhlel dang a la awm leh ta cheu mai. Sofa hma lam, sofa tlang-ah thisen hmu a ni a. Chu thisen chu Sutoriusa ruang hma lama awm a ni. Chu thisen kai chu ama hnen atanga kai-chhawng a ni thei lo. A taksa hmalam ah 48 degree angle in eng tin nge thisen per kha a va kai theih ngawt ang?. Sofa hma lama thisen kai chu tu emaw kuta thisen kai a vai na lama kai a ang zawk mah a ni.
A tawp berah chuan chu thihna thlenna hmunah chuan silai mu pahnihna luhna a awm a. Thil ni thei leh awm thei ta chu Dr. Sutoriusa khan a thihna tura a lu a silai a hmehpuah hma khan a enchhin nan (test fire) silai kha a hmetpuak pawh a ni thei. Mahse Police te'n chik zawk a an han en chuan Dr. Sutorius-a kutphah leh Cushion a silai zen khu te chu thisen chhanah (chungah) an awm a ni tih an hmu a. Chumi awmzia chu thisen te chu silai vawi hnihna hmehpuah a ni hmain an awm hmasa dim diam tawh tihna a ni. Chuti a nih chuan Dr. Sutorius-a khan a lu a a inkah hnuin a vawi hnih nan silai kha a kap chhin thei lo va, midangin an kap tihna a ni. A ni chuan, Sutoriusa kut-a silai zen kang bang (Gun shot residue (GSR)/Cartridge Discharge Residue (CDR)) a awm thei nan silai vawi hnih kah a nihna lamah khan a kut chu dah sawnin a awm a ni thei ang. (Pistol han hmeh puah hian silaimu chhunga zen kang kha a barrel hmawr lamah a phuh chhuak vek kher lo va. A chengah leh chamber a hmunruak ah te pawh a phuh letin a phuh chhuak then ve bawk.
Chung zen kang bang nawi (residue) te chu kutah emaw kawrban/ kawrhma ah te a kai/bei ta thin a. Mit lawng a hmuh theih kher lo pawh Forensic Scientist te chuan bawlhlo hmangin Gunshot Residue awm leh awm loh an finfiah theih a ni. Tu emaw kha silai a kap/hmetpuak ngei a ni tih rinhlelh ni ta se. GSR hmuh a ni chuan silai a kap ngei a ni tih fiahna chance a sang bik: Ka hriat ve dan)-Chutichuan, kha silai hmetpuaktu khan a ngaihdanin tualthahna ai mahin mahni intihlum angin a lantir theih dawn tihna a ni.
Mrs. Sutorius-i kha Darryl-a thah a ni laia In-a awmchhun a ni a. Tichuan, enge a tualthana chhan tur chu ni ta ang?. Police-ten an han chhui zui zel chuan Dollar Million 1 it vangin Mrs. Sutorius-i khan tual a that duhin an ring a ni. Chu Million khat chu neih a duh vangin a pasal kha a that a ni thei. Darryl-a khan Pension Plan a nei a. Nupui a nihna angin chu Pension Plan chungah chuan thuneihna a nei ve a ni. Darryl-a khan then/ma ta se, Mrs. Sutorius-i chuan thlakhatah $ sangkhat sanghnih vel chauh Allowance (hunbi neia pawisa hmuh ang chi) a dawng thei dawn a. $ Million khat chu tualthah duhna tur chhan tha tak a ni reng a ni.
Mrs. Sutorius-i khan kum 10 liamta chhungin hming hran hran pasarih lai a hmang a ni tih Police te chuan hmuchhuakin hnathawh a nei ngai lo ti pawh an hmuchhuak tel bawk. Amah hrechiangtu te chuan a rilru a buai (trouble) hle nihin an sawi a. Mrs. Sutorius-i khan tualthah nana hman pistol kha inkahna thlenhma dar 24 ah 'Target World Shooting Range' dawr atangin a lei a ni tih an hrechhuak bawk. Chu dawrah chuan silai lam chauh an zuar mai ni lovin silai kah zirna/silai inthemthiamna hmun an neih tel nghal a Chutah chuan silai kah a zir theih nghal a ni. Chumi dawra thawkte chu Police-te chuan va hmuin an hnen atang chuan Mrs Sutorius-i khan chu dawr atang ngeia silai a lei thu leh silai lachhuak thei tura nghah ngai hun chhung a nghah fel hnu ni 4 ni 5 ah dawrah chuan let lehin silai chu a lachhuak a ni tih an va hre ta a.
Chu dawr neihtu hnen atang chuan dan naranin hmeichhia hnenah silai an hralh dawn reng rengin silai kah dan an zirtir thei thu an lo hrilh thin tih an hriat belh bawk. Mrs Sutorius-i pawh chuan silai kah in zirtir tur chuan lo remti in silai kah pawh a lo zir ngei a. Policete chuan Mrs Sutorius-in a inthemthiamna (target) chu an han lachhuak a. A silai kahna kua te an han en chuan a kap tha hle a ni tih an hmu bawk. Mrs. Sutoriusi khan silai kah thiam ngei tumin a lo in ruahma sa hle niin a lang. A chhan chu silai kah zitirtu sawi dan chuan a silai kah mu 25-ah 25 te khan target a sahuat lai (Kill Zone) an fuh vek a ni.
Policete thudawn zinga Mrs. Sutoriusi chhiatna thlentu ber chu a nu in Policete hnena thu a hrilh atangin a ni. A nu chuan Sheriff pisa chu phone-in a han bia a, Darryl Sutoriusa chu mahnia intihlum ni lovin thah ngei a ni tih a chian thu a hrilh a. A fanu ngei chu chu pawikhawihna thlentirtu chu a ni tiin a hrilh a ni. Nu leh fanu inlaichinna kawisawi tak mai chuan a vawrtawp thleng in chu chuan nu zawk chu thuneihtu te biak tirin "Darryl Sutorius-a chu a thi a; ka fanu ngei hi a thattu chu a ni" tihin a puan tir a ni. Dik tak chuan nu in a fanu a phatsanna te pawh a ang hial zawk. Eng ang pawh chu ni se nu tam zawk chuan an fanu te chu tual an that thei lovang tih an ring a. Mahse, he chanchin-ah hi chuan nuin a fanu chu tual a that thei a ni tih a ring mai ni lovin nu ngeiin a fanu chu Police te hnenah a hlan zawk a. Thawnthu dangdai leh maksak tak chu a ni.
Della Faye Hall, Dante Britteon tia hriat ni bawk chu man nihin a pasal Darryl Sutorius-a silai a kap a thattu ah puh a ni ta. A aiawha ding Ukil chuan tualthattu diktak zawk chu khuhkhirh lovin tual a la chai angin a sawi a. A chhan chu Sutoriusa thihna atanga ni 3 hnu lekah an bul hnaivai a cheng an chenna atanga hla lo te a mi chu rawng taka thah a ni a. Mahse, Sutoriusa In-ah khan chuan tharum hmanga luhna hnuhma a awm lo va.
Prosecution lam chuan Forensic Evidence leh Tualthahna chhan (motive) te chuan chiang takin Mrs Sutoriusi lam an kawk vek a ni tih an ring nghet bur mai a ni.
Prosecutor te chhuidawn dan chuan zing dar 2 velah Dr. Sutoriusa khan an inhnuai pindan a sofa ah thu-in TV a en ang a. A nupui khan .38 caliber pistol kengin hnung lam atangin a pan ang a. Thihna thlen turin a pistol chu a hmetpuak ta a. Sutorius-a hnar leh ka atanga thisen chhuak te chuan a kutphah dinglam chu a per ang a. Chu chuan hmehpuah a nih lai khan silai kha a hum lo a ni tih a tichiang a. Chumi zawh chuan Della-i chuan Darryl-a kuta GRS hmuh a ni ngei theih nan silai chu Darryla kutah hum tirin a vawihnih nan silai chu a hmetpuak leh ta a ni. Mahse, Darryl-a kutphah a thisen kai te chuan hrilhfiahna dang daih a kawk thung si. Chutiang tho chuan Cushion chunga silai zen khu te paw'n hrilhfiahna dang an nei ve bawk a, chu ta silai zen te chu thisen chungah tho an awm a ni.
Chutia tual a thah lai chuan Della-i kutah chuan thisen a kai ang a. Chu chu thinthlak tumin a kut a thing ang a; thisen per chuan Sofa hmalam ah 45 degree angle in a va per ta a ni. Dr. Sutoriusa kut a tihchet leh a kuta silai a humtir khan mahni intihlum a ni tia a tanchhan phet turin thil lian tak a tisual ta zawk a. A kuta thisen kai hnung lama thinthlak a tumna lamah Sofa ah thisen a tikai a. Mahse, chu thisen kai hawi zawng chu a dik si lo.
Bakah Darryl-a ke hnuai lamah daih a awm lehnghal. "Mahni intihlum awmdan a ni" ti thei turin Scientific Explanation a awm thei lo bawk. Chutiang chuan Mrs Sutorius-i sawifiah theih loh tam tak a awm a. Sofa a thisen kai hawi lam dik lo te; Sutorius-a kut awmna tur ni lo va lo awm te; a kut hnuai leh chung lama thisen kai te; thisen chunga silai zen phuhna awm te; engkim mai chu a diklo kual vel vek a ni. Dr. Sutorius-a thihna chu mahni intihlum angin a lang pawh a ni thei; mahse Forensic Evidence erawh chuan tualthahna a ni tih chiang takin a kawk thung a ni.
Thubuai ngaihtuah a ni lai chuan Dr. Sutorius-a aw ngei mai, Answearing Machine a a fanu hnena message a hnutchhiah chu ngaihthlak a ni a. Chuta a thu hnutchhiah chu:
" Dante-i lo phone miah suh".
" Dante-i lo kha be suh ang che".
" Kan inbiakna hi kan pahnih inkarah tawp
se la"
" Khawngaihin. He thil lak atang hian ka damchhuak zo lo mai thei a ni". Khing a sawi lai khian a tawnga hlauhna awm chu a hriat theih a. A nupuiin a that mai ang tih a hlau-in a dam khawchhuak theihin a inring lo a ni.
Cincinnati Jury-te chuan thuthlukna a puanchhuah hmain dar kar 4 chhung ngunthluk takin an ngaihtuah a. Kum 1996 June ni 7 khan Della Sutoriusi chu pawisak nei lova tualthah thubuaiah thiamloh chantir a ni ta. Hremna pek san theih ber; kum 23 atang dam chhung tang tura hremna pek a ni a; kum 2014 hma chuan intiamkamna neia lung In atanga chhuah lailawk phalna (parole) pawh a nei thei dawn ta lo a ni.
Police lam chuan a thiltih kha a rapthlak a Death Penalty a phu hlein an hria a. Doctor nunna a laksak ringawt a ni lova a (Sutoriusa) chhungkua leh lo hmangaih a lngaihven em emtu a fate nunna a tichhiatsak vek a ni. Crime photograph te; Case reconstruction te leh Sofa leh Cushion te leh hairual lo thisen tam tak kai te han enin mahni intihlum ang a lan tir tura siam chawp a ni tih a chiang a. Vawiin ni thleng hian Police te chuan Dantei khan eng chiah nge a ngaihtuah a eng tin nge a pawikhawihna lak atang khan fihlim thei a a inrin an hrethiam lo a ni. Della-i nu chuan a fanu chu a hming lemah "Black Widow Spider" a vuah sak a.
Anu chuan a fanu chu Fortune Hunter ang a mi hlawhtling tak pasal a a neih tak avanga hlawhtlinna hun nghak chhuak ta ang mai nihin a sawi a. Takna nei lo mi angin a chhuah hial a ni. Judge Richard Niehaus chuan Dellai chu Lionfish (Sangha tur nei; zangruh sei leh awm hrang thliah thliah nei) a sa seh tur te a zangruh a tur hlauhawm tak hmang a a tihlum hmaa a rawng eng tial mawi tak hmanga thlem thin nen thuhmun angin a ngai thung a ni.
Crime writer lar tak Aphrodite Jones-i chuan a lehkhabu hralh kal tak Della's Web-a ziah a tan Dellai chu a tanna jailah a interview a. Jones-i rindan chuan Dellai khan a pasalin then/mak a tum thu a hriat khan tualthah chauh kha a duh thlanna awmchhun a ni tiin thutlukna a siam a. A sawi zel dan chuan Della-i chu Killer tur sa renga piang; Sociopath tur reng a piang; khawvel pawh mahni thlirna tlang atang chauha hmuh tum tlat mi a ni.
A mithmuhah chuan khawvel kha tuikep sam taka han lak mai theih mai a ni a. A lak theih lo paw'n lak theih dan kawng a zawng tho ang. He tualthana tang hian hlawkna pakhat mah chan a nei lo va; han chhuanlam tur pawh a awm hek lo. Eng kim mai kha ama tan vek a ti a ni.
Sutorius chhungkua chuan atthlak tak leh awm-ai lo lutuka inphatsanna hmanga an hnen atang kum hlu tam tak lakbo sak an ni ta mai chu sam takin an theinghilh thei tawh hauh lovang. Sutoriusa khan fanau duhawm tak tak leh zirna pawh hlenzo tawh a nei hlawm a. La dam nise makpa pahnih leh tu pahnih lai a neih tawh dawn a ni. Anniho chu a chhuangin a ngaina ve hlawm ngawt ang le. An bula hun hman te pawh a duh ngei bawk ang. A hring nun hman dan te thlirkirin a tum leh chak zawng te a hlenchhuak tawh ngei ang a.
Della-i chu kum 2010 November 20 khan kum 60 mi nihin Ohio Reformatory for Women, Marysville Ohio tan in ah a thi a. La dam nise 2014 ah khan Parole in a chhuak dawn tihna a ni.
Blog Share la subscribe ve rawh le. Enjoy.
On 09 september 2024, at 03:26, Anonymous commented on 
){kind=link}
0 Comments
I ngaihdan han thawh ve teh le!