ANDROID PHONE HMANG THAR TUETE TAN

Android OS hmang thar tur te tan kan hriattur pawimawh zual hetah hian sawi kan tum ang a. Heng kan sawi bak pawh hi thil tam tak pawimawh tak tak pawh a awm thei awm e - a remchan dan anga update zel kan tum dawn nia.

GOOGLE ACCOUNT

Android phone I lei a, I han switch on hmasak ber chuan a tlangpuiin google account register emaw sign in emaw turin a ti ang che. Sawi tak ang khan android hi google ta a ni a, hemi a nih avang leh playstore atanga apps chi hrang hrang I download theih nan google account hi I neih ngei a ngai a ni. Google account I la nei lo a nih chuan hetah hian a siam theih reng a, a free a siam theih a ni. He account hmang hian I phone kha tangkai lehzual zawkin I hmang thei dawn tihna a ni a. Contact back up te, application download te leh thil dang tam tak a tih theih a ni.

Sawi tak ang khan google account I neih hnu chuan I thlalak te, contact te, application te, Calendar te leh thil dang tam tak kha google ah khan I back up vek thei a. Hei hi phone bo/hralh chungchangah thil tangkai tak a ni a. I phone kha I tiral emaw/I tibo emaw a nih pawhin google account a I back up chhung chuan I duh duh hunah I restore (dahlet) leh mai thei a ni.

ANDROID SYSTEM

Audio

Phone chhuak hmasa ho ah kha chuan alarm te, ringtone te, media volume te kha a in ang vek mai thin a, mahse hei hi android ah chuan duh ang anga thlak kual theih a ni a. Ringtone zawi I tih chuan ringtone chauh I ti ring thei a, media sound zawi I tih pawhin media sound chauh I ti ring thei a, chutiang zel chuan. Hei hi a tangkai em em a ni.

Launcher

Tunhmaa theme kan tih ang deuh emaw, menu kan tih ang deuh - I phone home screen leh menu vel lan dan kha android OS ah chuan "Launcher" an ti mai a. Launcher hi duhthlan tur tam tak a awm a, a free leh paid te in playstore atangin duh aia tam download mai thei a ni. Hei mai bakah hian kan launcher chu kan duh ang angin kan thlak danglam (customize) leh zel thei a, hei hi android phone hman ti nuam lehzual tu a ni.

File Explorer

Android file system hi awlsam taka khawih zung zung theih a ni a, I phone chhungah/memory card chhungah khan enge awm tih awlsam taka en zung zung theih a ni. System file pawimawh bik erawh chu root phawt loh chuan a en theih loh thung. File explorer pawh hi duh thlan tur tam tak a awm a, hei hi playstore ah awlsam taka download leh mai tur a ni - a phone chhawm sa kan duhkhawp lo a nih pawhin.

Apps leh Games

Android app te hi APK tiin an sawi mai thin a, chu chu a application extension a ni a - android application reng reng chu a tawpah .apk tiin a awm zel thin a ni. Application leh games velah chuan android phone hi phone OS dangah tluk pha emaw han nihrual pha emaw an awm awm kher love. Tunah hian Playstore ah ringawt pawh hian apps maktaduai chuang a awm a ngaih a ni a. Hei bakah hian playstore a dah lem loh thahnem tak a awm bawk. Mizo apps pawh a awm ve nual tawh bawk.