CHHANCHHUAH NGAI NAUPANG TE

Rev. B. Zosangliana,Tahan
Khawvela mihring awm mek maktaduai 7000 zingah naupang, kum 15 hnuai lam hmun thuma then hmun khat an ni a, ram thang mêk (developing) thenkhatah phei chuan mihring awm zâtve deuhthaw chu naupang an ni. Tun ang hian khawvelah naupang an la tam ngai lo va, tun ang hian naupang chhanchhuah ngai an la tam ngai lo bawk.

Mihring thluak hi kum thum a nih hmain 90% a insiam fel vek a, kum ruk kan tlin hmain kan mizia (personality) a indin fel vek niin mi thiamten an sawi. Khawvela hnam ropui leh

               

changkâng hmasa Sap ho chuan, “Puitling siam tha tur chuan naupang atanga bul tan a ngai (to shape an adult, reach a child)” tih hi an lo vawnna a rei tawh mai. Keiniho pawhin chhungkua, Kohhran leh khawtlang tihmasawn turin kan hmanrua, puitling siam thatna atanga bul tan kan tumna, hi thlâka naupang atanga mihring puitlin dan anga inlalâwn taka intihpuitlin dan kan zir a ngai. Kohhran pawhin puitling camping-na atana chêng a theh chhuah ang zât hi naupangte tan pawh a theh chhuah phal ve hunah chuan danglamna duhawm tak tak kan hmu chho zêl dawn a ni. US President-te zinga naupang ber John F. Kennedy-a chuan, “Naupangte hi khawvela hmanraw hlu ber an ni a, hmalam hun atana beiseina tha ber an ni,” a ti.

Naupang tam tak chuan puitlingte thiltih tha lo avangin harsatna an tâwk mêk a – indona avanga tuar te, nu-pa inthen avanga enkawltu nei lo te, mipat-hmeichhiatnaa hman khawloh te, retheihna avanga lehkha zir thei lo leh mite rahbeh tuarte an ni. Naupang nun tikhaw lotute hi mi bawraw pui puite an ni vek kher lo va, mi fel leh fing tak takte, sakhaw rawngbawltute pawh an bâng chuang lo. Tunlaia thu thar mak tak mai chu naupang khuaikhem thubuaia inhnam-hnawih Roman Catholic puithiamte chu an chungthu rêl felsak tura sorkar thuneitute kuta hlân turin UNO-in Vatican a hriattir thu hi a ni! Naupangten chhantu an mamawhzia a lang chiang hle awm e. Rev. Jubilee Thanga’n, “Naupangte hi Pathian leh Setanan an inchuh reng avangin nu leh pate leh kohhranhote hian mawhphurhna lian tak kan nei. Pathianin a chan loh vêk chuan Setana ta an ni ang,” a ti a, chak zawk nih tuma indo mêk kan nihzia a sawi fiah tha hle.

Mihring hlutna hre chiangtu chuan naupangte hlutna hi an hre ngei thin. Naupang pakhat tê boral pawh Pathianin a phal hauh lo nia (Mat. 18:14). Lal Isua pawhin puitling leh naupang a thliar hrang ngai lo. Tunlai hian kawng hrang hrangin naupangte hi kawng dik lova hruai an ni a, ruitheih thil leh zûk-hmuam lak ata te, retheihna lak ata te, zirna tlâkchham avanga mâwlna lak ata te chhan chhuah an ngai a. Beidawng leh beisei tur tha hre lo, rilru lama harsatna nei pawh an pung hle niin zirchiang miten an sawi thin.

Naupangte hi puitling aiin chhan chhuah an awl zawk a, hun leh hmanrua pawh a hautak lo zawk fe a, a hlawhtling duh zawk bawk. Thlai chu rah tha tak tak a chhuah theihna tura a tiah tirh atanga enkawl uluk a ngai angin mihring pawh a têt lai atangin vênhimna tha tak hnuaiah taksa, rilru leh thlarauva a mamawhte pêk tan a ngai a ni.

Kohhrante hian naupangte rawng kan bâwlsak danah pawh tan kan lâk zual sauh a ngai ang. In lamah an thil hmuh leh hriat milin Biak Inah kan kaihhruai thiam a pawimawh a; TV, computer, mobile phone leh internet an chûlnêl fe hnu-ah pawh lehkha puan chauh hmanga kan zirtirna leh kaihhruainate hi a tla tha sâwt lo hle niin a lang. Chhanchhuah ngai naupangten min au mêk a ni tih i hre reng ang u.

(He thu hi Kohhran Palai bu 121-na (Jan. – Feb. 2014 chhuak)ah tih chhuah a ni)