Christmas's pua KH NAUPANG KHA!!!

Pawnlam thlasik boruak vawt vur mai chu kal sanin inchhung lumah chuan thawmhnaw lum thei ang bera inthuamin khawvel nungchang chu thlir tv hmaah chuan ka thu a. Ka lo en tui deuh ni tur a ni; kawngka kik thawm pawh chu ka lo hre lawk lova. An mangang hman tawh ang tih awmah chuan ka va hawng ve ta a. Chuta ka thil hmuh chuan min deng na hle mai.

Naupang kum 13 mi vel awm hian thlasik khawvawt hnuaiah chuan kawrlum pangngai pawh inthuam lovin thim thet thet tawh awm velhah chuan thil an lo zuar chu niin… an thil zawrh chu ka mawmawh zawng a awmlo nain ka leisak a, anni pawh chu an kal veleh mai a. An kal liam tur chu ka thlir zui vawng vawng a, an liam hnu chuan ka ngaihtuahna chuan kha mite nundan tur kha a han chhuizawm ta a….

Ka han hmuh chiah khan hlutna an neilo a, anmahni kha han sawr dawn pawh ni ila chng tam chuan ka chhang ngam kher lovang le. A incheidan atang pawh khan milian zingah a tal tamlo tih a hriat khawp mai. Mihring ve tho chu an ni si a. Siamtu hian vanduai bik turin a siam em ni niang le? ngaihtuahna a va kal thui duh em!!

Ka han ngaihtuah chhunzawm zel a. Ka hrechhuak ta!! Mami , ka hre leh si che! Hmanah chuan i pa hoin hlim takin incheng a. Chhungkaw lungrual tak pawh inni a sin. I nu chu a hriselloh vangin in lamah inchhung sekrek khawihin a awm a; in pa chuan ram lamah nitin inchhungkaw ei zawngin a chhuak thin. Hah takin i pa leh nu chu an thawk a, nang erawh chu naupang lungmawl tak ila ni a. I nu leh pa chuan mi i awh biklohna turin thlan tuiin a bual reng chung pawhin in tan a ni tih hriain an hlim reng thin a sin.

Thlan khur anchhia chu inchhungkaw chungah a lo thleng a, i pa chu naupangte i nih laiin thlan khurin a angchhungah a lem pila, inchhungkua atangin a pawh then a lo ni ta. I nu chuan i pa awmloh atang chiahin a bawrhsawm zual a. Tumah chhungkhat laina hnai innei bawk si lo. Khawtlangin thehtawpin an tanpui che u a, mahse inkhawsak chu a nawm phah chung si lo. He khawvelin i chunga ro a rel dan hi thenkhat chuan nunrawng an ti a sin!

I nu chuan thei leh thei lovin a enkawl chho che a, i tan a nih avangin na nei chung pawhin i eitur zawngin ram lamah a chhuak thin.Mami, i nuin mut hmuna inhmalam hun tur mittui tla zawih zawiha a ngaihtuah vel lai chuan nang chu a bul maiah mumang rama hlim taka chengin tui takin i muhil sek sek thin a sin.

He khawvelah hian hmangaihtu i neih chhun chu nangma nunchhohdan tur hre tu Engkimtitheia leh i bula nangmah avanga tap ru a, mittui tam tak seng tawhtu i nu chiah kha anni a sin. I hmalam hun hi thlir thiam la chuan i bei a dawng ve thinin ka ring. Mahse, Engkimtitheian a hmangaih che tih i hre reng dawn nia.

I lenkualna lama i thil awh i nu bula i sawi thinte khan i nu thinlai kha a rukin a rum vawng vawng thin tih i hrethiam ve si lo.Khang i thil awh te kha i nuin leisak hram che a tum thin avangin a hriselna pawh ngaihtuah thei lovin nisa hnuaiah thlantui nen rim takin a thawk a, nang erawh chu school hlim hnuaiah thiante nen nui chungin i awm thung a sin. Mami, i nu rilru tlemte tal han hriatpui la chuan hlim taka nuih hi harsa i ti ngawt ang le.

Mami, tun thla hi Krismas thla a ni tih i hria a. I thianten thil thar an neicsup sup tawh a, nang chuan ila nei ve lo tiraw? I thiante thil neih i nu bulah i sawi a, “ nakinah lei ve ang aw” i tihlai khan i nu rilru kha han hmutlang la chuan i dil nawn hauh lovang le! Mami, i nu tan chuan he khawvel Chhawndamtu lo pian thla hi a mittui ti tla tam tu leh i pa ngai em em a a rum vawng vawng thla a ni a sin. hlim taka Krismas i hman theihnan i nu khan eng anga rim leh hah takin nge hna a thawh leh dawn le??

Thil pakhat ka hrilhlawk duh che chu maw… nakinah ilo thanglian anga, thil nihphung chu i rawn man thuai ang. Mahse, mami.. lungngai lutuk suh! Zan a rei ngai lova, niengin zan chu a rawn luahlan thuai thin. Zingah chhumzing mahse chhun lamah erawh chuan khua a thiang vuk thin tho a sin. Khawdurin siruk-i te unau chu hliah thin mahse chiang taka an lo lan hun a awm thin tih i hre reng dawn nia…