Forensic file : skin of her teeth

Kum 1996 khan mipa naupang pahnih Ohio dil a nghakuai chiah te chuan mihring luruh niawm tak hi an chhar a. Chu luruh a ha te chu hmuh tur an awm hauh lo mai. Khem awm nuaih te chuan sawi sen rual loh tharum thawhna nasa tak a thleng a ni tih a lan tir a. Police te chuan chu luruh chu tu luruh nge tih leh eng tianga rei nge tui ah chuan a awm tawh tih ngaihdan an neih hauh lo.

Hamilton khua hi thil deh chhuahna hmunpui nihin mihring 62000 vel chenna a ni a. Ohio chhimthlang lam depa awm a ni. Khuarel mawinain mal a sawm khua a ni a. A michengte chuan hmuntin mai a luite leh dil awm thliah thluah te chu an hlimpui em em bawk.

August ni 7, 1996 tlai lamah kum 12 a upa Tim Lyons leh athianpa TJ Dejohn te chu Linden Dil lamah tlai nghakuai chiah turin an kal a. Chutia nghakuai an han chiah chu Blue Gill emaw Catfish emaw ni lovin mihring luruh niawm tak hi an khai chhuak ta nawlh mai a. Tim Lyons a chuan chutia nghakuaia mihring luruh an han khai chhuak ta mai chu rin harsa a ti hle a. A ring thei lo hial zawk a ni. Chung mipa naupang pahnih te chuan eng tia han ti tur nge tih angaihna hre lovin luikamah chuan luruh chu hnutchhiahin an hawsan a. Tima’n a nu leh pa te hnenah an luruh hmuh chungchang a han hrilh chuan an awihsak hauh lo. Thu holam ah an laksak zawk a. A hnu a an va kal leh pawhin chu luruh chu a ngaiah a lo la awm a. Hemi țum hi chuan mipa naupangte chuan Police lam an hriattir ta thung a ni.

Policete chuan luruh hmuhna hmun chu an lo thleng ta thuai a. Tim leh TJ te chu zawhna eng eng emaw an zawt a. Minute 20 a ral leh meuh chuan chu lai hmunah chuan policete an tlim hmurh tawh a ni. Tichuan a țhenin tuihnuai luhna khawl hmanga tuihnuai lutin chung lai vel dil chu an dap bawk a. Mahse tuihnuai lutmi (scuba divers) te chuan dilah chuan ruh dang hmuh belh erawh an nei lo thung. Dil kam vel an han dap ngial pawhin hmuhbelh an nei ta chuang lo va. Sarthite thih dan endiktu (coroner) chuan chu luruh chu a han enfiah ta a. Coroner chuan chu luruh chu dilah khan rei tak a la awm lo a ni tih a nemnghet a. Kar tam bak a ni lo ang, a chhan chu luruhah chuan tisa them a la bet tlat a ni. Mahse Investigatorte chu hriat thiam loh thilin a hmuak ta thung a. Luruh atang ringawt chuan han hriat thui vak tur thil a awm lo reng a ni. Tu emawin rohlu duh vangin thlan rawkin a hai ang a chu mi a ruang chu a thehthang ta pawh a ni thei a. A ni loh pawhin chenna nei lo tu emaw chu a thi tlaw ang a a taksa chu sachhia emaw ramsa te paw’n an pu darh te pawh a ni thei bawk. Chutiang karah chuan luruh atang ringawt chuan tualthahna emaw tualthihna emaw a thleng a ni tih a hriat theih bik lo a ni. Tu luruh nge ni ta ang? Eng tin nge chu nu/pa chu a thih? A taksa bung dangte chu khawiah nge an awm tak ang le? Tu luruh nge tih finfiah a puih turin Coroner chuan luruh chu Cincinati pawn lama awm Dr. Elizabeth Murray , College of Mount St Joseph hnenah a thawn ta a.

Dr. Elizabeth Murray-i hi Board ten United States a Forensic Anthropologist 63 an pawmte zinga pakhat a ni. He case bik hi Dr. Elizabeth-i tan paw’n chona lian tak, phurhawm tak ni si leh ama mimal tan pawh a manhla tak tur hi a ni a. Case a khawih tawh chinah chuan rapawm a ti ber a ni hial a ni. Chu luruh chu ngunthluk takin a han enfiah a. Luruh chhipah chuan kak/khuar thuk tak a awm a. Chumiin a lantir chu tualthattu chuan chempui emaw sa sah chem emaw a chhip a sah nan a hmang a ni ngei ang. Chumai bakah luruh hmun hran hranah chuan inzaina leh inthai rang a awm nual a. Luvun hihna ni ngeia ngaih theih hnuhma a hmu tel bawk. Dr. Elizabethi’n tu emaw chu chu luruh bulah chuan țhuin a kut hmangin a vun a lip a ni ang tih a ngaihtuah chuan a tirilah a khur hial a ni. A landan chuan tu emaw chuan chu luruh chu hmanrua eng emaw hmangin a nghaisa a ni thei bawk ang.

Chu luruh a hnar awm dan atang chuan mingo ngei a ni tih a chiang a. Computer a programme duansa tehna hrang hrang 24 lai hmanga chu luruh an han teh chuan hmeichhe luruh ngei a ni tih finfiah a ni. Chu mai bakah kum 35 hnuai lam mi ni ngeiin a chhutchhuak bawk a ni. Luruh chhip a ruh bung hrang hrang inzawmna lai te chu la in zawm phui chiah lovin a la inkau a. Dan naranin luruh a ruh bung hrang hrang inzawmna lai hi kum upat hnu chauhvin a phui thin a ni.

Evidence atanga a lan dan chuan tu emaw chuan chu hmeichhe nihna (identity) thupbo nan hmanrua chi hrang hrang leh tha tam zet mai a hmang a ni ngei ang. Luruh a ngil taka inrin awm tlar thluah chuan tukrek (ara ha ang chi) anga kak chemte a hmang a ni tih a entir a. Chawhmeh channa chemte hnuhma pawh luruh sir lamah hmuh a ni bawk. Biang ki ruh a kak awm dan ațang chuan khabe ruh chu kuaithleh chemte tlang khat chau hriam ang chi hmanga tharum a thlawn/bal a ni tih a lang a. Mitmu awmna laiah chuan thil zum hmanga vihna/chhun pawhna hnuhma a awm nual a. Tualthattu chuan chu hmeichhe mit chu a kher chhuak a ni tih a entir bawk a ni. Chu mai bakah a hahmai pawh hmuh tur awm lovin a thlawn vek a. A khabe chung lamah chuan ha tliak a bul lam la invuah hi a awm a. Chu chuan tum reng vanga ha te phawi an ni tih a lan tir a ni.

Chu luruh chu right angle a han enin ha phawi nan chuan chepchak (pliers) a hmang tih hriatna turin pliers chehna hnuhma a hmuh theih a ni. A landan chuan pliers chu hahni ah chuktuahin ha te a phawi ta nihin a lang.

Dr. Elizabethi chuan a thil rinhlelh leh hmuh dan te chu Homicide Investigatorte hnena han hrilh chawt mai chu a tim deuh a. A chhan chu a thil hrilh tur chu an pawmsak a ring lo a ni. A thusawi tur chu a dik ngei a ni tih an pawm a ring lo ani ber. Chuvang chuan Policete a biak pawh hmain chu luruh chu Expert dang pahnih hnenah a thawn ta a. A chhan chu hetiang thil hi tunhmain a la hmu ngai loh vang a ni pakhat bawk.

Investigatorte tan chuan he case hi tualthahna Case an hmachhawn tawh zinga a khirh khan ber a la ni a. Investigatorte chuan Linden Dil a luruh an chhar chu mingo hmeichhia kum 35 ral la kai lo a ni tih an hria. Chu bak hriat belh erawh an nei lo. Luruh a hnuhma an hmuh ațangin chu hmeichhia nihna (identity) thupbo nan luruh a tisa te chu lip an ni a; ha te pawh phawi an ni tih a chiang.

Prosecutor Robin Piper chuan, “Pawikhawihtu an pawikhawihna thupbo leh an thil tih thup ta tam tak ka hmu tawh a. Chutiang chu beisei lawk pawh an ni reng a. Mahse hetiang khawpa pawihkhawihna thup tum vanga innghaisakna hi chu ka la hmu ngai lo.” tiin luruh a hnuhma an hmu atanga tualthattu chet dan rapthlak tak mai chu a hrilhfiah a.

Hamilton Policete chuan an han chhui zui zel a. Tunhnai ah mibo report pali chiah a awm tih an hmuchhuak a. Chung mibo pali zinga pakhat chu kum 21 a upa Tina Mott-i, luruh an hmuh hma thla hnih liam taa a bo thu report an dawn chu a ni. Tina-i hi nausen thla 18 a upa pawmlai leh pasal nei lo a ni a. Thawm bengchheng lo tak venga inchhawng chung lamah a bialpa leh a fapa pa ni bawk kum 24 mi Tim Bradforda nen an chengdun a. A mah hi New York khawchhuak a ni.

In tin fangkual a Magazine a zawrhna lamah Tim-a nen an intawng a. Tichuan Tim-a chenna khua Hamilton ah an in bengbel ta a ni. Chu khua ah chuan dawrah clerk in a thawk zui a. Tim-a pawh frame vuahin Moss Galarry ah a thawk ve bawk a. Amah ruaitu Cathy Moss-i sawi dan chuan Tim-a chu kum 20 bawr chho vel a upa a ni a. A rualpui te ang thovin thil han tih vel nuam a ti a. Len vah, thiante nena han inkawm ho te leh concertna a han kal te nuam a ti hle a ni.

Policete’n Tim-a chu thu an han zawh chuan Tina-i chu a chhungte tlawh turin New York lamah a kal thu leh an fa sen pawh a kalsan niin a sawi a. Policete’n a thu sawi chu chhui zui zelin New York ah Tina-i chu a awm em tih hriat tumin New York lam an han bepawp ta a. New York ah chuan a awm lo va. Tina-i khan New York a thleng lo hrim hrim a ni tih an hmuchhuak ta thuai a ni. Bakah mahni duhthuin a fasen hnutchhiahin New York ah a kalna chhan tur a awm lo reng a ni. Tin Tina-i bo thu kha a chhungte ni lovin Tim-a nu Elizabeth Bradford-i zawkin a report a ni tih pawh an hriat belh leh ta bawk.

Elizabeth Bradford-in Policete hnena a hrilh dan chuan Tim-a chu a thinramna vangin a hlau/tih a ni.

Warrant kengin Policete chuan Tina-i bo hnu lawka Tima’n storage locker a luah-hawh chu an han dap ta a. A chhungah chuan choka a hman chi chemte chi hrang hrang 19 lai mai an hmuchhuak a. Chung zingah chuan len lam inang lo thluah tukrek (ara ha ang) nei chemte te pawh an hmu tel bawk a ni. Policete pawh chuan “Kutlawng a mi thah dan” tih lehkhabu an hmuchhuak bawk a. Setanic inthawina serh leh sang inziahna note book an la hmuchhuak ta cheu bawk.

Elizabeth Bradfordi’n Policete hnenah chuan a fapa Tim-a chuan setan hnenah a inthawi thin tih a hrilh a. Tina-i bo lai vela Tim-a khawsak dan chuan rinhlelh a kai hle a. ATM Security camera in Tim Bradforda’n Tina bank account atanga pawisa a lachhuak lai a lo la fuh hlauh a. Chu chu Tina-i bo hnu lawk ah a ni. Chu mai bakah Investigatorte chuan Tim Bradforda’n Drugs a khawih thin ti pawh an hrechhuak leh ta zel a ni.

Mi thusawi atanga Policete’n an hriat dan chuan Tina-i khan a thawhpui thiante hnenah a pasal Tima’n drugs a khawih avanga a hlauh thu a sawi a. An rin dan chuan miin drugs a khawih chuan tharum han thawh mai duhna hi a chhuak hma bik a. Han rik pharh chang a awm thin a ni. Chuvanga Tina-i khan a pasal kha a hlau a ni ngei ang.

Tichuan Policete chuan chumi te pahnih inluah lai chu an han dap leh ta a. Inchhungah chuan Luminol test (hei pawh hmun dangah kan sawifiah tawh kha) an han ti ta a. Chemical chi khat hi chhuat emaw bungrua chunglang ah emaw an han phu ser ser a. Chulai hmuna thisen awm sahbawn leh tui emaw hmanga silfai tawh kha a lailang theih a ni. Thutkhawmna pindana carpet ah chuan mihring thisen ni ngeia hriat an hmu a. Mut pindan chhuatah, bualthleng leh chhuat insikna laiah leh Ek in bulah
thisen an hmu bawk. Policete chuan Linden Dil a luruh an chhar kha Tina Mott-i luruh ngei a ni an ring nghet hle a. Mahse a ni ngei a ni tih ti chiang turin scientific proof an mamawh ta a ni.

Ohio a Linden Dil a mihring luruh an chhar chu Investigatorte te chuan tu luruh nge tih chiang thal a an finfiah theihna turin Forensic Technique an mamawh ta a. Nihna hailanna (Identifiaction) tlanglawn ber chu mitthi te ha enfiah a, chu mitthi ha leh Dental Exray awmsa nena khaikhin leh a ni a; a chhan chu mi pakhat ha leh midang ha inang chiah a awm theih loh vang a ni. Mahse he case bikah hi chuan khabe hnuai lam chu hmuh tur a awm lo va. Ha chunglam zawk pawh phawi vek an ni bawk. Identification tih dan dang leh chu skul photograph superimposition a ni. Anthropologist te chuan luruh thlalak chu an han la a. Hmaitlang ruangam nen an inmil beiseiin Mibo te thlalak ah khan an han dahthuah leh ta chiah a.

Technique dang leh chu Facial Reconstruction and Forensic Sculpture (Lists Murders a an hman ang kha) hmanga luruh atanga hmel an din chhuak leh ang chi hi a ni. He technique hmang hi chuan Forensic Anthropologistte’n za ah 70% bak hlawhtlinna an hmu ngai lo. A chhan chu luruh pianzia khan hmelhmang thenkhat mitvun, hmui, ka leh beng te awm dan tur a hril lawk theih bik lo va. He technique hi dan naranin identification method dang zawng zawng hmanga an hlawhchham hnuin an hmang chauh thin a ni. Linden Dil a luruh chungchang bikah hi chuan Scientistte’n inthlah chhawnna hmangin harsatna an su kiang ta thung a.

Linden Dil a luruh chungchangah hian sawi tawh ang khan tualthattu khan luruh a ha te kha hapui pahnih tih loh chu a phawi vek a. Chung hapui pahnihte chu hahniin a la tuam avangin pawikhawihtu khan ha dangte a phawi lai khan a hmuh hmaih te pawh a ni mahna (hapui then khat hi chu puitlin hnua to chhuak te an ni thin). Chung hapui pahnih te chu hahni khan him takin a lo vawng tlat a ni.

Dr. Elizabeth-i chuan chung hapui chhunga thling ang tak awm chu la chhuakin Tina-i fasen thla sawmpariat a upa thisen sample nen DNA test turin a thawn ta a. Mahse scientiste chuan hapui a thling ang tak atang chuan DNA chipchiar an la chhuak thei ta tlat lo mai. A chhan ni thei a lang chu hapui kha a la to chhuak kim lo va, a la insiam puitling hman lo a ni thei. Ha a insiam chho lai mek hi chuan a zung lam kha a kaw/awng a. Dil chhunga thil nung sin te te (micro organism) cell khat chauh nei Diatom an ti te khan hapui chhunga cell awm te kha an lo ti chhia emaw an lo khawih danglam emaw pawh a ni thei a ni. Dr. Elizabeth-i chuan a tawp nan tihin surgical drill hmangin luruh atang ngei chuan DNA lak chhuah a tum ta a. Luruh chhah lai ber atang chuan fimkhur takin sample paruk a la chhuak a. Chu luruh sample a lakchhuah te laimu chu drill bak in an la tawk lo te an ni a. Chung luruh sample a lakte chu Mitochondrial DNA test turin a thawn leh ta a. Hetiang test hi tisa them te kha test turin a tlem lutuk emaw enfiah tlak lo khawpa a lo chhiat chang a test an tih dan ber thin a ni.

Lisa McDaniel, DNA Diagnostic Center a mi sawi dan chuan Mitochodrial DNA hi a danglam bik hle a. A chhan chu he DNA hi nu te thisen kal chawng zel atanga kan dawn a ni a. Nu hnen atang chauhin kan rochun thei tihna a ni chu. Chutiang a nih vangin kan nu chhungte tu emaw ber an awm phawt chuan chu mi DNA leh sample DNA te kha kan khaikhin theih tihna a ni.

Mitochodria te hi nuclues pawn a cell cytoplasm ah hmuh an ni a. Cell pakhat lekah hian Mitochondria za tam tak a awm a ni. Scientistte chuan mihring a DNA awm theihna hmun hnih atangin mitochondria DNA an la hrang thei a. Chuta tang chuan Mitochondrial DNA sample an neih leh nu thisen zawmpui atanga DNA an neihte chu an DNA inanna lai an zawng theih dawn tihna a ni.

Scientistten Mitochondrial DNA an han enfiah chuan Luruh atanga Mitochondrial DNA an hmuh leh thla 18 leka upa nausen Johny Mott-a Mitochondrial DNA te chu an lo inang ta chiah mai a. Chumi awm zia chu luruh chu nausen nu Tina-i luruh ngei a ni tih finfiah a ni ta. Tim-a bungraw dahna In a luah-hawh atanga chemte sei an hmuh atangin investigatorte chuan mihring taksa thanna hlo (protein) a kai tih an finfiah ta bawk.
Chung finfiahna an neih zawng zawng nen chuan Policete chuan Tim Bradforda chu thu an han zawt fiah nawn leh ta a. James Nugenta, Investigator chuan Tim Bradford-a chu sa pel a thiam leh thiam loh a han zawt hmasa te te a. Tim-a chuan sapel a thiam thu in a chhang a. Ramsa vun lip leh a sa chandarh a ei a tana buatsaih dan a thiam em tia zawhna pawh a thiam tihin a chhang a. Sa kawchhung a hai thiam em tia zawhna pawh thiam tihin a chhang bawk a ni.

A sawi dan chuan chung thil te chu a naupan lai a ta tawhin a zir thiam vek tawh nihin a sawi a ni. Tichuan Tina-i thah a nih chungchang chu an han dawp chho ta zel a. A tawpah chuan Tim Bradforda chuan tawngka maia sawifiah rual lo tharum nasa tak thawhna leh thawnthu rapawm zet mai chu Policete hnenah a sawi ta a. Chu chu Tina Mott-i a dam lai a a hun hnuhnung ber thawnthu chu a lo ni ta reng mai.

Let leh lawk i la. DNA Testing hmanga Linden Dil a luruh an chhar chu Tina Mott-i luruh ngei a ni tih an finfiah hnu chuan Policete chuan Forensic Evidence hmangin Tina-i chenpui Tim Bradforda chu an han hmachhawn ta a. Darkar eng emaw zah hnu chuan Tim Bradforda chuan tualtha thubuai ni lova thubuai dang hmanga hekna an siam phawt chuan inpuan leh Tina-i ruang a thehthangna hmuna hruai chu a remti ta a. Policete chuan Tina-i chu pangai taka phum an duh avangin Tim Bradforda chu inremsiamna an siam pui ta a(Tina-i hian chhungkhat hnai vai tak a nei lo). Bradforda chuan Police te chu an nupa chenna atanga mel khat tling lova hla thinghmunah Tina i ruhro darhsarh nuaih a lo awmna hmunah chuan a hruai a. Thla 14 lai a liam tawh a, sachhia ten Tina-i ruang chu an pu darh a ni ngei ang; Tina-i ruhro chanve bak hmuh tur a lo awm tawh lo va. 
Ruh an hmuhchhuah tin mai chu ara emaw chemte hmanga tan chhum vek an ni.

Tim Bradforda inpuanna ah chuan kha tualthahna kha tihpalh thil a thleng nihin a sawi a. Kha mi zan khan Tinai nen an pahnihin Monopoly game an khelh dun a. Chu mi zan chuan drugs a rui ngei thu a sawi bawk. Chutianga game an khelh lai chuan an nupa chuan chhan eng emaw vangin an inhau ta a. A thinthawk a chhuak thut a Tim-a chuan Tina-i chu a hnek a a hnar a thi ta a. Tichuan Tina-i chu bual inah intifaiin a lut a. Chuti lai chuan Tim Bradford-a chuan chhun lama a nghakuai chiahna hmanrua vel chu a lo seng fel mek a. Tina-i chuan bual pindan atanga lo tlanchhuak lehin an inhauhna chu a rawn chhunzawm leh a. Bradforda sawi dan chuan kutphah chen vel chemte a keng a. Chutia an han inchai buai chhoh zel ah chuan Tim-a chuan a chemte kenna lam kut chu a vai hrawih a. Tina-i hrawkhrui chu chemte chuan a zai ta a. Tina-i chu chhuatah a tlu ta. Chumi zawh chuan Tim Bradforda chuan apartment chu a chhuahsan a. A lo kir leh chuan Tina-i nunna nei tawh lo taksa chu bualthleng ah a lo awm a. Eng tin nge chutah chuan a lo awm theih tih chu a tan pawn thil mak a ni ve tho mai. A sawi zel dan chuan ruang chu zankhuaiin a chan darh a. Tina-i kawchhung chu ek In ah a paih lut a.

Mihringin a mihringpui chungah chutia a chet theih mai chu rin harsa a ni a. Bradforda chuan ruang chandarh nan chuan chemte 19 an hmuhchhuah te kha a hmang vek a ni tih a sawi a. Chumai bakah Tina-i ha atanga a nihna hailan theihna tur ven nan pliers hmawr zum chi hmangin ha te chu a phawi thu a sawi tel bawk a ni. A bul tan nan mihring vun han zai ri ngawt pawh thil harsa a ni a. Tina-i lu tan chhum a a ha phawi tura kut lehlama han ken mai chu thil awih harsa tak tur a ni. Chutia Tina-i ruang a chandarh hnu chuan ruh leh tisa te chu bag leh bawlhhlawh ip-ah thunin an apartment atang chuan hmun finrial lamah a ak chhuak ta a. Bawlhhlawh sawngbawlna bulah chuan ruang bung hrang hrang te chu a thehthang ta a ni. Chumi hnu chuan Linden Dil lamah a kal leh a, tah chuan luruh a khabe a bal tak chu tui chhungah a paih lut ta a ni.

Kha luruh kha hmuhchhuah ni lo se chuan he Case hi chhuichhuah a ni lovang a. Tualthahna kha chhui thlen a ni ngai lo bawk ang. Mibo pawh mibo angin a awm satliah kum khua tawh dawn tihna a ni.

Tualchhung mi te chu inthahna chanchin chuan a thawng hlawm hle a. Tim Bradforda lo ruaitu tawh thin tu Cathy Moss-i chuan thinphu eih pawh nei lova tualthattu nunrawng tak kiangah hna a lo thawk tawh thin tih chu rin harsa a ti a. A sawi dan chuan Bradforda khan kha tiang inlaichinna atang khan kal chhuah a duh a. Mahse kum khua atan a kalsan ta zawk a. Chu mai bakah a fapa hring nun atang pawhin a kal bo ve nghal a ni. Chu chu thil zahthlak tawp khawk a ni tiin a hnuaia lo thawk thin Bradforda chanchin chu a sawi a.

Tim Bradforda chuan Tina-i kha eng vanga that nge a ni tih han sawi tur a hre lo va. Tina-i kha a hmangaih a pawi a ti hle a ni tih bak sawi tur a nei lo. Tim Bradforda chuan tihluihna tel lo va mi thah, ruang nghaisak, Credit card hmansual leh ruk ruk thubuaia an puhna a pawm a. Thiam loh chantir a ni ta. Kum 12 atang kum 25 chhung tang tura hremna pek a ni.

Tim Bradforda’n Forensic Files programme siamtute hnena lehkha a thawn ah chuan a thilsual tih chu a pawm thlap thu a hrilh a. A sawi dan chuan, “Pathian leh mihring mit hmuhah nunrawn thlak tak thil ka ti a ni. He ka thil tih hi keima mawhphurhna ngei a ni tih ka pawm e. ….. ka chet dan hian Tinai tana ka rilru putna te chu dawt ah a chan tir vek a. Ka taksa peng tin hian a hmangaih tak zet a ni.” tiin Tinai a hmangaih thu a la sawi ta fan a. Bardforda chuan a thil lo tih tawh avanga natna a tawrh chu hrem nana tan ina tan aiin a nasa zawk daih nihin a sawi a. “Kha mi zan atanga ka mangchhe neih te, mumang ka neih a ka harhchhuah changa Tina-i hming ka lam thin te, chung thil te chu keimahah hian an awm kum khua tawh dawn a. An cheng reng tur pawh a ni. Ka hun tawp a thlen hma loh zawng ka thinlunga phurrit ka ka phurh reng tawh tur chu an ni.” tiin hrehawm a tawrhna te a sawi tel bawk a ni.

He case ah hian Bradfordan a hmangaih nia a sawi ruang a nghaisak dan atang khan amah Bardforda ah hian mihring bung hnih a awm tih min hrilh a. Bung khat zawk chuan a hmeichhia kha a hmangaih a; a chan mai tur kha a zuam lo va. A thil tihah inthiamlohna a neih avangin a chunga a thil tih dan te a inpuang a. A bung lehlam thung erawh chuan chutiang rilru atang chuan inla hrangin bualthlengah kun hniamin ruang kha a chan darh a. A vun a lip a nih kha.

Hmangaihte chunga thil tih atan chuan thil theih loh hul hual a ni. A hmangaih chungah kha tiang khan a ti duh a ni a, a hmel hriat loh emaw a ngaihsak vak lo chungah eng thil tak ti duh ang maw?

Robin Piper, Investigator chuan, ” He case hi dan kengkawhtute leh hnuchhuitu la tuai te te ten an lo hre ve ngei ka bei sei a. Ka chah duh chu beidawng suh tih hi a ni. Hnuchhuina tur hmarua te tham te i neih a i chhia leh tha hriatnain thil eng emaw dik lo a awm ngei a ni tih a hrilh che a nih chuan hma lam panin kal tang tang ang che. Evidence chu chhui zui zel la. Chutiang chiah chu he case ah pawh hian a thleng a ni. Dil atangin ruamah min hruai thleng a. Kan pheikhawkah chirh kaiin kan in ti bal hlek bawk a. Mahse a tawpah chuan Tinai- ruhrel la awm te kan hmuchhuak a. He case a thuthlukna tawp kan siam theih phah ta a ni. He hnuchhuina a ka tel ve thei hi ka inchhuang hle a ni.” tiin hnuchhuitute chu evidence an neih chaurau vanga beidawng mai lo va bei tang tang turin a fuih a ni.

Policete thawhrimna leh khawvela forensic anthropologist hriathlawh Dr. Elizabeth Murray-i hnathawh leh beidawng lo va a ti tang tang na vangin a tawp a tawp ah kha luruh kha tu luruh nge tih finfiah thei leh Policeten Tim Bradforda kha man thei chauh an ni.