HMANGAIHNA LEH PHUBA !!!

Chu hmeichhe ruang chu ngunthluk fe hian a melh
ngawt ngawt a, keipawhin ruang chu ka han
belchiang ve a. Chu hmeichhia chu model tih takah
a piannalh zia chu keipawn ka hmuh hmaih lo
chiang hle, leiah a thu a, thutthleng a ngheng a, a
mit chuan chunglam a melh ru a ! hlau thlabar
hmel leh thinrim hmel a a inpawlh nawk in a hriat;
a sam chu thisenin a chiah khawng fuk tawh a, a
kawr dum nghawng zau ve angreng tak chu a dar
atangin a thler thla ruak a, a pawnfen chhing fen
chu a mal lamah a tawmchho vek a, a malpui
veilam chu a duk pheuh pheuh a, a nak dinglam ah
chuan vihna hnuhma a lang a; a lu pawh thil rit
nelh nawlha hlap niawm takin a pawng pur a, a kak
duai bawk, a lu atanga thisen chhuak chuan a sam
pawh a chiah khawng ani tih a lang. A nak a an
vihna atanga thisen chhuak erawh chu amal lamah
kalthla a. Leiah chuan thisen khang tawh chu a val
kulh kulh hlawm a.
“Kan mitthi hming kha tumaw?” a ti sap a.
“Ramdinpuii Chaltlang Lily veng a ni e” ka lo ti var
a; a hrim hrimin he nula hi chu a lar ve tawh tehlul
nen; lo la hriat loh chu..ka boss hi chu a tunlai lo
ve chiang a lawm..!
Tukin zing dar 4:46 mins velah khan ka mutui lai
phone call in min tiharh a, thinrim tun chungin ka
pick a, ka boss in zangkhai angreng takin ruang an
hmuh thu leh min nghah thu a rawn sawi anih
kha..diktak chuan kan hna hi chu ninawm tih chang
ka nei thin. Mipa zawk hi hmeichhe hnuaiah kun
duk duk a ngai fo a ! zui duan duan loh chuan ka
duty ka hlen lo tihna a ni bawk si..ka boss hi
hmeichhia a zawng a chekngel leh duhtui a lo ni
chhap nen..a hmel hi tha viau lo phei se chuan
department danga insawn ka dil rap rap tawh
maithei a ni..hehe..Detective thar kan nei tih ka
hriat khan ka lawm viau rawk a ..mahse, ka boss
tur chu hmeichhia a ni tih ka hriat khan ka hnual
rawih mai ! mipa intipa leh hmeichhe ngaisang lem
lo chi ka lo ni ve bawk nen..mahse, kum 1 kan
thawhdun hnuah meuh chuan ka rin ang a lo ni vek
bik lova, thawhpui nuam leh hmeichhe rilru pu
thinlung nei ve a ni tih ka hre chho zel a, ka hna
pawh nuam ka ti chho viau zel a, mahse, zan rei
tak taka chhuah ngai fo thin chuan min ti thinrim
lek lek fo..
Ramdinpuii hi sawi tawh ang khan model a ni a,
kum 24 a upa niin, chhungkaw awmthei leh
zahawm tak atanga lo seilian a ni. M.Com 3rd
sem zirlai a ni, karleh maiah MZU Festival hman a
ni dawn a, an department pawn Runway showdown
–a tel tura inbuatsaihna an kalpui mek a; ani hi an
show stopper tur a ni ni nghe nghe..analh a, a
hmeltha bwk, a mizia leh nungchang lam erawh ka
hre ve vak lo; hetianga rawng taka thah a ni hi
hriatthiam a har hle; a thattu zawnchhuah chu kan
hna a ni miau si a..hmabak a khirh leh ta talh mai;
ka boss in a chingfel leh thei turah ngai ang; ani
zawngin thubuai khirh tak tak a lo hmachhawn fo
tawh a, vawikhatmah a hlawhchham ka la hre lo,
thuruk inthup lah a haichhuak tam narawh, ka
thluak in a phak loh chin tawk zela chet hi a thiam
ve dan ni maiin ka hre tawh..henu hi chu..!
Ramdinsangi te inlama kan inkhalh phei lai chuan
hmalam a bih ngur a, a inngaihtuah nasa leh hle
aniang. Kan va thlen chuan inchhung pawh an lo
singsa fel tawh a, anu leh pate chu kawmfal kan
duh vangin ka va bekbawr a, roomah min luhpui ta
a. Anu chu nu valai tak, ngo ser sawr, mitmeng
ngilnei tak nei a ni a, apa erawh a mitmeng a thp
lam chu a ni. An fanu vanduaina chu an tuar hle tih
a lang reng mai, anu phei chu a tap fuih fuih reng
a, a mittui hru chawt chawt chungin, “Bawihi hi
tuinnge lo that duh ang le? tu pawimah a sawi ka
hre lo asin; tupawh a kawm thiam a, tupawn an nel
asin” a ti a. A fanu chu a ring tha ve khawp mai,
mahni rilarah te chu tu nu leh pain nge sawichhe
chiam chiam duh ang le?! mahse, a thawmhnaw
hak atang khan kei takngial pawn ngaihdan tawk ka
lo thiam ve tawh a, nungchang tha zawk zawk chu
a ni bik lovang tih hi.
“Nizan a chhuah dawn khan sawi a nei em?”
“Umm, nei e, an department ten an show tur
enchhin na na neih dawn vanga kal a nia, tin, a lo
haw tlai deuh tur thu min hrilh bawk” a nu chuan a
ti leh a.
“Engvanga haw tlai tur nge anih a sawi lo maw?”
“Sawi lem lo, zan dangah pawh a lo haw tlai dawn
chuan min rawn call mai zel a, nizan erawh kha chu
sawisa thung, ngaihthat lohna tur ka hre lo a ni”
“In nula khan diary lampang angte a ziak thin em?”
“Ziah ngai pawh ka hre lo, thil ziah neuh neuh hi a
tih chi a ni ve vak lo a”
“Hmelma a neih bawk siloh chuan rinhlelhtur
awmang te in nei ve tho em? Entirnan, a bialpa
emaw bialpa hlui ang chi te”
“A bialpa te hi kan hriatpui vak ngai lo a, tuna a
bialpa hi chu a lo leng fo a, misual niin ka hre lo,
kan fanu kha a hmangaih hlein ka hria; e..ngawi
lawk teh kar hmasa khan a bialpa hlui niawm tak
chu phone ah a hau hrep tak sin”
“Chupa chu hriat theih dan a awm angem le? “
“Tunge tih ka zawt si se lo a; ka lo nuihliam deuh
mai a lawm mawle”
Chutihlai chuan tleirawl hmeltha zet hian tray in
thingpui a rawn chawilut a, a mit chu a bui lak a, a
tap nasa tih hairual a ni lo.
“Bawihi nau chiah Nunu-I a nih hi” Apa chuan a lo
ti var a.
“Nunu, thu tlem zawh duh che ka nei a, I u nen
khan in inpawh viau ang tiraw? Bialpa chungchang
te pawh insawidun thin ka ring”
“Aw..a u khan min hrilh thin a, kan inkawmngeih
lutuk, ka pi, ka u thattu chu zawngchhuak ngei rawh
aw” hnukulh teuh in a ti a, ka khawngaih reuh hle
mai. Boss chu a bu nghut a, nelawm takin a nui a,
“Enganga hun rei nghah ngai pawh nise, ka
zawngchhuak ngei ngei ang, chuan maw..i u chuan
a bialpa hluiah huat deuh emaw han rel hrep ang
chi te a nei ve thin ngei anga tiraw?”
“Umm..u Johny-a nen hian an in hal tawp a, fb-ah
pawh u Johny-a hi a blocked ringawt a lawm; a
rawn tibuai chhen zel a, chu lo chu a ex te ah rel
zui vak a neih ka hre lo; Ka pi, u Johny-a hian a
that a ni ngei ngei ang” a ti hlak hlak a, a naupang
rilru chu ka lo hriatthiam pui khawp..Johny address
kan la a, tuna a bialpa chungchang kan zawh belh
hlek bawk a, chanchin thar a awm veleh inhriattir
nghal tura inngen tawn chungin kan chhuahsan ta a.
Bakah ruang te pawh an kil ve duhin a rinawm a,
an lusun mangan laia thu khirh deuh deuh lo
inzawh chiam chiam kha a hlawk lem lo.
“Ramdini chuan duh tawh lo chein a hnawl che a,
tichuan I tibuai zui zel a, nizan khan bum chhuakin
hmun fianrialah I kalpui a, in inhnial thinrim a, I
thinur insumzolo chuan I that ta mai nge? I lo plan
sa vek tawh zawk?” tiin min hmachhawn zawnga
thu tlangval thawven hmel zet chu a mitah tak a
melh a.
“Dawt a nih chu..nizan khan kan inhmu ngei e..ka
zep lo; mahse, keihian ka tibuai ngai reng reng lo,
aman min tihbuai chhen zel avang zawka min
tibuai tawh lo tura ngen mai ka ni, ka bialnu lo
phone tawh lo tur leh a lo be leh anih chuan a
bialpa ka hrilh ang tiin ka vau chiang a
lawm..mahse, ka that awzawng lo mai, kan in hnial
a, ka bialnu ka hmangaih thu ka hrilh a, ka kalsan
nghal”
“Nang hian I zarbuai zawk niawmin an sawi si a”
“A teuh lo lutuk, Ramdini nen hian nikum November
thla khan kan inngaizawng a, a mizia hi ka type a
ni hlawl lo a, tichuan, ka then ta a ni, bialnu ka nei
a, mahse, min tibuai reng a, min rawn be awl lo a,
bialpa a neih hnuah pawh a ngai reng tho, ka nin
em vangin fb-ah pawh ka blocked a, ka number ka
thlak bawk, mahse, a lo hre lehzel tho a, ni e, kan
inhau nasa thin, nizan khan engkim hmaichhana
chiang kekawka sawifel tumin ka hmu a, mahse,
ka that lo, thah tumna ka nei ngai lo hrim hrim, min
duh em vang khan ka khwngaih letliing zawk thin”
A va buaithlak tak em! Mitthi lah thuzawh theih a
ni tawh der si lo..keichuan he tlangval hi ka lo
ringhlel ve thawr a! a hmel bumro lek lek te chu a
nunrawn hmel riauin ka hre hmanhmawh a..mahse,
a tang na ve ropui bawk si; engpawhnise, enthlak
tur list-ah a awm ta phawt chu ania, dawt a sawi
leh sawi loh chu hunin a la rawn hril ang chu..
“Tualthahna thlen zanah khan khawnge I awm?”
tuna kan hmaa thu erawh hi chu Ramdinsangi
bialpa Zuala a ni thung. Tlangval sa tha lam,
hmeltha tak a ni a, thihna chu a tuarna hle tih
alang, a mitmeng te chu a vai ruai mai lehnghal a.
“Ka nuteii pasal damlo ICU ah a awm a,
damdawiinah ka nuteii te nen kan awm”
Thudik chu a sawi ngei mai, ahmain kan lo chhui
sa vek tawh a, damdawiiah chuan a awm tih
hriatpuitu an awm tlat a ni.
“I bialnu nen khan in inbia em?”
“Aw..kan inbiaklai chuan show zirna turah a awm
tawh a”
“Chuan, eng nge thildang deuh sawi a nei em?”
“Neih pawh ka hre lo; e chuan Johny nen an
inhmuh tur thu leh hauh hrep a tum thu a sawi a,
ka phal lo a, mahse, a luhlul ve a, a kal tho ang tih
chu ka ring, chuan a thiannu Cathy bula a riah tur
thu a sawi bawk”
Heizawng thu thar a ni tlat ! kan pahniha kan awm
hnu chuan Boss chu a vei tawn sek a, keiin ngawi
rengin ka lo thlir thung.
“Khamizan khan zantirah a lo riah tur thu min rawn
hrilh lawk a, chuan dar 9 pelh ah a lo kal a, mahse,
Johny nen an inhmuh dawn vangin a chhuak leh
nghal a, dar 11 velah min lo call leh a, a rawn tap
pur a, min lo hruai rawh a tia, mahse, amah bawk
chuan a bialpa Zuala’n a rawn thlah tur thu min
rawn hrilh leh nghal a ni, khawnge a awm tih pawh
a sawi chuang lo, amah kha a buai tawp ni berin
ka hria, tichuan ka lo nghak a, mahse, a lo kal ta si
lo a, ka call tlang thei tawh bawk si lo, Zuala ka
call a, a ring quit thak thak bawk si, an inlamah a
haw ta anih ka ring a, chanchin engmah min rawn
hrilh leh lo vangin ka thinrim hle nghe nghe “ a
thiannu Cathy chuan a ti a. Nula lianlam, hang
ngaihnobei an tih ang chi hi a ni a, a thiannu
thihna chu a vei ve hle anih hmel, a thattu
zawngchhuak turin min ngen lawm lawm mai.
“Thil hi a mak riau ! Ramdinsangi’ n M. Hall {an
show neihna hmun tur} a chhuahsan hun kha dar 9
vel a nia, Cathy bulah {Vaivakawnah} a kal phawt a,
Johny hmu turin a chhuak lehnghal a, dar 11 velah
Cathy a call leh a, chutihlai chuan a bulah Johny a
awm tawh lo tihna a nia, Johny khan thudik a sawi
zawk a nih hmel; chuan a bialpa Zuala ka zawh leh
chuan dar 7 vela an in biak bakah dar 10 velah
amah Zuala’n a va biak leh thu a sawi a, Johny
hmu lo tur in a va hrilh leh niawm tak a ni, chuan
Ramdinsangi pawn hmuh loh a intiam a, ngaihtha
takin an inmangtha tih a sawi a, Cathy’n a call a a
ring quit thak thak nachhan kha chu a nuteii pasal a
that loh zual tak thut vanga an buai deuh vangin a
lo hre lo niin a sawi a, a hnuah Cathy chu call back
a tum a, mahse, a phone a lo stwich off tawh a ni,
dar 11 velah chuan Ramdinsangi nen an inbiak loh
thu leh a haw daih tawh a rin thu a sawi,
Ramdinsangi call list kan en pawn Zuala hian
thudik a sawi niin a lang, record-ah chuan Johny hi
a biak hnuhnunber a ni tlat !
Johny pawn chu chu a pha lem lo, a lo call thu leh
thlah tura angen thu a sawi a, mahse, a bialpa be
zwk turin a lo hrilh thung aniawm e, chutihlai chuan
an thenawm dawra a awm thu asawi a, ka va zwt
chiang a, hriatpuitu mi pathum lai an lo awm ve
tlat! Dar 12 thleng kuhva an khehpui thu an lo sawi
bawk, Zuala ve thung kha damdawiin atangin dar 1
ah a haw a, a nuteii fanu a phur nghe nghe, amen
rim tawh vanga a chau tawngkhawng tawh a
muthilh nghal thu a sawi bawk, heipawh dar 1
hmalam zawng damdawiinah a phe buai char char
tih hriatpuitu an awm tlat bawk ! a khawlhkham ta
zek mai” ka Boss chuan vei tawn sek chungin a ti
mawlh mawlh a, kei chuan ngawi rengin ka lo thlir
a, min bia ni pawn ka hre lo, tiang hi chu a tih
than dan a nia.
“Cathy kha I va tlawh lawk ang hmiang”
Cathy chu amaha inluah a awm a ni a, a in pawh a
nuam reuh hle, hawihhawm takin min lo
dawngsawng a. A nu leh pate chu Shillong-a an
awm thu te, hetah hna a thawh vanga amaha inluah
ta mai anih thu te a sawi siam siam a; mahni
chauha inluah chu kan hmuhdan a sirhe a hlau
deuh a ni ngei ang.
‘Cathy, hmanzan khan Ramdinsangi khan Johny lo
thildang sawi a nei em?”
“Nei lo, Johny chungchang hlir a sawi a, hmuh
kher kha tul ka tihpui lo a, mahse, a luhlul ve em
a, a kal ta nge nge a nih kha”
“Engtia ani nen khan in kawm tan nge in nih le?”
“Nikum July thla khan ka thiannu MZU a zirlai ve
tho nen an lo leng a, ka thiannu atanga inhmelhriat
chho ta kan ni, kan inkawmngeih chho a, alo leng
fo a, riah pawh a riak zing; unau ang tak takin kan
inen thin”
“Zu a in ve zeuh zeuh tih te pawh I hriat tho ka
ring a, tin, zan a han fawr zauh zauh te pawh a hrat
ve hle tiraw?”
“Umm, a ni mai ang chu..mahse, misual chu a
nilo, thianhoa han ruih nam ve te chu a nei fo mai,
tin, mipa lamah pawh Johny runluih nana han kawp
ziai ziai ang chi hi chu a ngah ve mai, Johny kha a
hmangaih em a ni, khang a tal khawlohna chhan te
pawh kha Johny vang vek a ni” a thiannu thlavang
hauh chu a tina ve kher mai.
“Mahse, anau bulah chuan Johny hian mah chu
tibuai angin a in sawi si a”
“Nia, a sawi loh ten, a zak ve lawm, a chang
chuan Johny a duh luat vang hian Johny bialnu
pawh a vau fo thin, a chang leh Johny-a a chang
silo thinrim hian Johny chu a sawichhe chiam zel
bawk, a khawngaihthlak zawk a ni”
“Zuala hi a duh ve viau khan anu khan a sawi bawk
a”
“Zuala hi chu mi tha tak nia a lan vang hian a
chhugte pawn an duhpui a; amah pawh hian a thlah
thei bik lo a ni, keipawn ka duhpui ber a, Johny
vanga an inhauh chang pawh a awm ve fo thin “
“Nang bialpa I nei ve em? Hehe..” ka lo ti
hmanhmawh a, kan boruak uap churh chu ka ning
a ni.
“Nei ve nang, ka hmu zo ve lo a” nui chungin min
lo chhang ve a. thingpui kan in zo a, kan haw
dawn chuan Boss chuan book shelf chu a bih duk
duk a, lehkhabu pakhat chu hawh ah a dil pek a!
lehkhabu chhiar peih tak a ni tih chu ka hria,
mahse, a hmelhriat tha em em pawh nilo lehkhabu
a han hawhsak ve ngawt chu a ti ang lo ka lo ti lek
lek a, Cathy tan pawh hawhtir loh ngam a ni bik lo
nen..a hawh tir ve mai a, kan chhuah hmain,
“Cathy, hetiang anih vang hian nangpawh fimkhur
ang che, I him lo thei a nia, chuan Johny bialnu
kan hmuh theih dan tur min hrilh thei angem?” a ti
sap a.
Ramdinsangi chhungte pawh vawi 2 lai kan ko leh
a, thu thar hriat tur a awm lem lo; Johny bialnu kha
kan enthla bawk a, kiltin atanga thlira rinhlelhwm
thei tur chu kan hmaih bik lo chuan ka hria; mahse,
a tawp kan la khar thei si lo. Johny bialnu chu
rinhlelhawm niin ka hre lo; tleirawl te mai a nia,
tualthat duh khawpa nunrawng leh rawva a ni thei
lo, mahse, kan enthla reng tho a. Tualthattu hian
hnuhma eng emaw min lo hnutchhiah tal se kawng
a awlsam tur a nia.
Kar 1 a liam leh tawh a, Boss in min koh vangin a
inlamah ka phei a. Chair ah thuin ral lehlam tlang
inkhawh phei zung chu a lo thlir veng veng a, a
hmel hmuh a hahdam thlak hle. Hmeltha tak tia
sawi tur zawng a nilo, nula vantlang tak, hnute te
deuh, cher lam lek lek, mawngbawr vawng lah a ni
a, a sam chu a thlah khat hle, engkimah hian a
inthunun thei ni hialin ka hria; a nui ve hawk hawk
ngai lo a, mahse, sangha ang a vawt erawh a ni
bik lo. Titi hunah chuan sawi tur a hre ve thei phian
zel a, ngaihzawng lam erwh sawipui ngam kan la
awm lo ! ka thiante aiin kan inpawh bik deuh a,
kan inzui tam bawk. Amahin flat lian lutuk lo a luah
a, hnaa a insawrbing deuh chuan eirawngbawl a
theihnghilh fo a, eitur a chah mai thin, Detective a
nih vanga pa hrekhrawk ni turah inlo ngai maithei.
A ni lo a nia, a nu ve lutuk, mahse a hna vang hian
mipa ang maia chak leh huaisen nih angai a,
hlauhawm hmachhawn kawngah chuan mipa tam
tak te tluk loh a ni. A chhungte chu thingtlangah an
awm a, an inbe ngai mang lo, a chanchin hi ka hre
tam lo a, mimal nun chhui chiam kha a duhloh
zawng tak a nih ka rin vangin hriatchian em em ka
tum ngai lo.
“Sam, a tawp kan hnaih tawh khawp ania” a ti sap
a. Keipawn chu chu ka rindan ani, ni 3 chhung zet
a inkhung tawh a, chanchin min hrilh ngai lo bawk;
mahse, kha ni 3 chhung khan a mu mai mai lovang
tih erawh ka chiang ve tlat..mahse, keichuan kan
thubuai chu a khirh telh telh ni hian ka hria, tumah
chu kawhbik ka nei thiam hlawl lo.
“A that chu, min lo hrilh ve la”

“Ni hrih lo e, zanin chu party naa kal turin lo inring
rawh aw, nula hmeltha pawh an tam ang” a fiamthu
thawh ve dan chu leh !!
“Nawm dawn chu”
“Sam, I hna tur chu zanin party-a Zuala zuiruk a ni
mai”
“Zuala hi chu keichu ka lo ringhlel hleinem”
“Nangte chuuan tupawh I ring mai thin a lawm, kha
kha I chak lohna a nih kha” leh khawl khawl mai a!
“Nangin eng nge I lo tih ve thung ang?”
“Ka lam ang, party enjoy turin a lawm ka kal
dawn”
“A va fairlo awm ve”
“I bialnu hruai tel ve mai rawh, mahse, I buai phah
ang tih erawh a hlauhawm a”
“Bialnu ka nei teivet lo”
“Nei teivet tawh la”
“Min duh si lo lawm”
“Keiman maw?” nui sang chungin min lo enchho a,
tun tum chiah hi ngaihzawng lam kan sawidun na a
ni. Ka nuih a za hle.
“I lo inring ve ringawt a law?”
“Midang rin tur awm hek lo”
“Nangte chu bialpa tha deuh I neih ka ring”
“Nei teivet bik lo”
“Nih te chuan ni daih I la, mahse, I zei lo awm
ropui si ! ka bialpa emaw anti zawk ang che”
“Bialpa te chu ka tleirawl chhuah pawn ka nei fo
lawm, ka thiam ve reng e a”
“Tak tak ana ih maw..lesbian inih ka ring thut zel
a”
“Lesbian…umm..lesbian..Sam, ropui lutuk, nakinah
ka la hrilh ang che, haw tawh rawh, va insiam la,
min rawn lam phei dawn nia” a ti a, a tho a, fridge
a hawng a, tui vawt a va in khawlh khwlh a, a che
maksak leh tawh..ninawmmmm..la fiam hlak ka
chak a sin le..
Zanah chuan ka in kah rimtui fe hnuah ka chhuak ta
a, ka call nghal a, step atanga a lo chhuk chu
amah a ni lo emaw ka ti hial..amak lutukl!
Kawrdum malte thleng vel tur a ha a, chapal kaih
mawi deuh mai, simple bawk si a bun a, bag dum
a keng va bawk a, a sam mawlh chu a ni, a ngil
sang mai a, a thlah hnap mai bawk si! tun tum
zawng a mawi a ni. A mit leh a hmui pawh langsar
ve angreng takin a hnawih kha..car a arawn luh
chuan a rimtui zet chu car chhungah a nam chak
chak a, ka lo nuih hui ringawt!
“Sam, khatia mitmu pawng hlawt hlawt khawpa
min melh lo khan motor hi tlantir rawh le” a tih
chuan ka harh hlawl a, ka chebuai nak nak hle,
hmalam bih ngur chungin motor chu ka khalh ta a,
ka zak angreng, min naupangchhe cheibawl deuh
chu nuam ka ti ta phian a.
Zuala chu amahin dawhkan bawh tiitih a thu a, zu
no dawm bawk a, a ngui hlein ka hria, thupek
angin enthlak hna ka thawk a, midang hlim thawm
leh ruibuai te chu ka ngaihven hman mang lo; Boss
erawh khawnge a awm pawh ka hre lo, a hna a
thawk ve tho turah ka ngai, mipa nena awmdun tur
anga ka han ngaihtuah vel chu ka lo ui ru ve tawp!
Ka ngaizawng hran lo, mahse, ani ang hmeichhe
chhuanawm leh fing lutuk hi mipa naran mai maiin
a thinlung an hneh daih ang tih ka hlau, mipa
zahawm leh tha tak a phu a ni. Zuala chuan phone
in tuemaw a bia a, a mengphawk hru bawk a, min
hmuh hlau tak chungin lukhum kar atang chuan ka
melh tawk tawk a. Azu chu a tlak pap a, a tho a,
ka zui ve ta nghal a.
Music ring leh tang at chuan min ti tha tho hle,
tlem ka lo lem ve sek bawk nen, nula nalh fe fe te
chu han lampui a han khawih fet deuh pawh ka
chak, mahse, duty ka ni si a.Mi karah ka inzep
phei tawlh tawlh a, Zuala ringawt ka thlir avang
chuan min lo be tu an awm tih pawh ka lo hre lo a,
ka dara an rawn vawn chuan ka hawi phawk hru a,
Johny-a a lo ni.
“I lo kal ve law? I boss pawh sawtah ka hmu a” a
ti a, a nui sang a, hepa hi ka ngainat chi a ni lem
lo, mahse, ka nuih let ve tho a, Zuala hloh ka hlauh
em vangin leh inbiak tak tak hman a nih loh vangin
ka kalsan leh ta a. Johny-a hi chu a fihlim tawh
niin ka hria, a hming sawirik a ni tawh lem lo,
mahse, fimkhur thu hlaah kan la chik zui reng tho
a. Zuala chu ka zui zel a, kan party na hmun hi
building lianpui chhawng hnihna ah a ni a, Zuala
chu party room atang chuan a chhuak a, hnuailam
a pan ta a, mi insulpel kan awm nual avangin leh
hnunglam a rawn hawi hu hu bik loh vangin min
hmu lem lo. A chhuk zel a, Garage lam a pan ta
tlat ! tuemawni a call bawk a, Garage kil atang
chuan hmeichhe pakhat a lo phei zan zan a,
tudang nilovin Ramdini nau Nunu-I kha a ni. Mak
ka tiru hle..an indinchilh ran a, zawi te tein an phun
sep sep a, carah an lut a, an tlanchhuak ta daih
mai! Ka buai zo ta..tinge anni pahnih kher kher ?
an lo inngaizawng ru reng em ni dawn le?
tualthattu te kha an ni mai lo maw? a u in a
hriatchhuah tak avngin anau hian a that ta mai nge?
A u a thik vang zawkin a that? Sipai bang ka bo
leh ta..
Party naah chuan b zu kan in leh a, boss lah ka be
tlang thei der bawk silo. Chutihlai chuan nula
pahnih hi ka dawhkan kil chuan an rawn thu ve
thawr a! cathy te anlo ni, ka phu zawk nghe nghe.
Nui var var chungin min bia a. A thiannu chu
Ramdinsangi nau Nunu-I kha emaw ka ti hman a,
an inan em vangin. Reivaklo hnuah an tho leh ta
mai a, keipawh haw turin ka inbuatsaih ve ta a. Ka
chhuak dawn tihin boss chu a rawn lut ve chiah a,
engmah sawi lovin kan inzui chhuak leh ta nghal a.
A tukah chuan office-ah kan buai nileng a, case
pakhat chinfel loh kan chai avangin. Ka hah hle.
Zanriah kan kil laiin Boss hnen atangin call ka
dawng a, a ina kal tura thupek.Ka va thlen chuan
chhuak maitur angin a lo inchei a, engmah sawi
lem lovin kan chhuak leh tawp a, motor a kan thut
hnu chuan, “Sam, zaninah hian Ramdini thattu chu
kan hmachhawn tawh dawn a ni” a ti zawi sap a. A
fiah kek kawk hle, ka la bo hu a vangin zawhna ka
nei lo, ka nghak tawp. Kan tlanna tur min hrilh zel
a, ding tur a min tihna zawn chu mak ka ti hle. Kan
chhuk a, ka rinloh lam lutukah min hruai a, ka lo
ngiahdan leh rindan chuan Zuala te in lam emaw
Ramdini te inlam emaw kan pan ka ring a sin
le..mahse, tuna kan pan mek in neitu chu tudang
nilovin CATHY ni tlat mai!
Kawngka a kik a, minute 2 hnu velah a rawn
inhawng ta a..Mitmeng nelawm loh zet kan
hmachhawn ta ran mai.
“Cathy, Ramdinsangi I thah avangin man I ni e” a ti
fiak thak a, a aw chu a chang mah mah bawk.
Cathy chu a hnungtawlh deuh a, maktih hmel zet
hian, “I sawi awmzia ka hre lo e; tumah ka that lo”
a ti tuar a.
“Hnunglam hawi rawh le, I hunglamah I ban dah
la” a ti leh hmak a. Cathy chu a meng tal tawp
tawp a ni ber mai; a thinrim hmel hle bawk, a che
ta phut a, tlanchhuah tumin. Mahse, a tlai hret,
boss chuan a samah kekin a hnuk let bawrh a,
keiin kutkawl ka lo buntir ta thung a. Tahchhuah
hmel zet hian kan pahnih chuan min en a, a
mangan hmel kher mai. Kan hruaichhuak ta a.
“Le..i sawi hmain k’n sawi hmasa ange, a dik lo
lai I lo tidik dawn nia..ka hmuh hmasak ber che
khan Ramdini I ngainat zia ka hre thei; khamizana
thil thleng I sawi zawng zawng pawh kha rinhlelh
tur ka hre lo, thil pakhat I sawi hmaih tih chauh lo
chu ! khamini khan I lehkhabu kha ka hawh a nih
kha..ka la chhiar miah lo tak! Mahse, ka hlwk
thung, I TV hunna kil sira BENGBEH te takte khan
ka mit a ti var ta a ni, kha bengbeh ruk na chanche
atan ania I lehkhabu kha hawh ka dil ngawt che,
book shelf I hawn chhung khan ka zuk ban zauh tih
I lo hmu ru ang tih ka hlau teh sin aw..kha
bengbeh kha ka hmuh tawh hnu ani a, a behtu
pawh tudang nilovin, Ramdinsangi a ni; a ruang
kan hmuh ni khan a beng dinglamah chiah
bengbeh a beh tih kha a tir khan engvanga lo
ngaihven lo zawk nge ka nih tiin ka in zilh hlak a
sin. Mahse, I inah a bengbeh khing chu ka hmu ta
a, kha khan engkim a tiawlsam ta vek mai.
Nangmah enthlak hna ka thawk ta a, Ramdinsangi
leh Johny kha Chanmari thlamualah an inhmu tih
Johny ka atangin kan hria a, chutiang anih chuan
Ramdini ruang kha engtinge Tanhril dai ah hmuh a
nih theih? Nangmah hian lo that pawh nila engtinge
a ruang kha khalai hmunah khan I dah theih tih
khan min tibuai ta tlat a! thawhpui I neih ngei ringin
nitin deuhthaw ka enzui ru che ni. Mahse ka buai
leh ta lo, a chhan chu mipakhat ka hmuh atang
khan, I thawhpui pa kha. Ramdini kha I inah I that
lo a, in inhnial buai na leh in inchai na lamah a
bengbeh I phihthlaksak a, ani chu tlanchhuakin an
inlamah hawn a tum a; I umzui zel a, tichuan I
thawhpuipa kha I be ta a, Ramdini chu Tanhril dai
ah in khalh lut ta ani “
“Engmah awmzia ka hre lo, I dawt phuahchawp
chu a ngaihnawm hle mai, vai film la ziak la a tha
anga” tiin Cathy chuan deusawh zetin a lo chhang
a.
“Ok, ka hindi film ziah laia mi pawimawh tak kan
hmuhtir ang che aw..” a tih lai chuan Kawngka a lo
inhwng a, Johny-a a lo lut ta a ! maktia ka
menphawk hru lai chuan, “ Johny-a emaw tiin ka
buai hman thelh a ni, keipawh. Mahse, a ni lo tlat,
Rinawma a nih hi, Johny-a lemchang, Ramdini
thattu Cathy thawhpui pa a nih hi” a lo ti khal khal
mai a. Cathy chu a dang sawp sawp a, hnuailam a
melh a, thinrim tih hriat zet hian Rinawma chu a
melh leh thul..
“Umm, kan sawi zawm zel a nge aw.Rinawma hian
Ramdini haw tur chu raw umzui ve in a va
nangching , Johny-a angin a bia a, ngaihdam a dil
pawh a ni maithei! Ramdini rilru chu a hneh leh ta
thuai a! tichuan Rinawma Bike-ah inphurin Tanhril
lamah an tlan a, Ramdini chuan mak a tih vangin
chutiang lam kawng an zawh daih nachhan a zawt
a, ‘kan inru dawn, ka putea teinah’ tiin dawt a hrilh
a, ngaihtha takin a chuang leh a nih kha..tichuan
Cathy, nang chuan scooty in I umzui a, I lo
hrilhlawk tawh angin Rinawma chuan an tumram a
thlen hnuah Ramdini chu a tlansan leh ta nghal a;
Ramdini mangang taka a tah laiin I va thleng a,
tichuan I ruahmanna chu tim hlek lovin I ti
hlawhtling ta a ni..chumihnuah Rinawma chu hmu
lehin pawisa I pe a, a ka I hup ta hmiah bawk;
Rinawma’n Ramdini thih thu a hriat khan
hlauthawng takin a lo bia che a; mahse, nang
chuan Ramdini nen in awmdun lai video I kawl thu
leh police a call a nih chuan amah chu tualthattua
puh theih a nih thu in I lo chhang a, ani ang mipa
dawihzep leh thluak kawrawg tak chuan a hlau che
a, a ngawi ta hmiah reng a ni; mahse, vawi1 in
pahniha in ding dun ka hmuh atang khan thil
awmzia ka man thiam ta ruak a, hepa hian Johny-a
hmel ang tak lo pu lo nise tangkaina a nei kher
lovang. I fin khekrek zia bawk chu mw..a ruala
Rinawma leh Johny-a tal awh theihna tur video I lo
nei kha a ni, kha video kha tupawn hmu se Johny-
a a nih an ring nghal vek ang, Rinawma erawh I tan
a la hlauhawm theih dawn vangin a fin lohna
remchangah I la a, I vau ta zawk a nih kha..

Mahse, I thlamuang thei ngang lova, Party zan khan
Rinawma thah I tum a, pawi tak maiin Rinawma
emaw I tih kha Johny-a a lo ni ta tlat! I michhawr
ngei pawh I hai ve ta anih kha..Nunu-I kha ka zui
tir che a, Zuala nen I in kan va belchiang ta thung
a, kan indaihzai tiraw? Video pawh kha kan
hmuchhuak ta a ni, Johny-a pawh kha ka rawih tho
a nih kha..Rinawma lem a chang ve ta thung a,
Nunu-I khan I chhungril nun a rawn phawrh lang ta
thung..engvanga Ramdini kha that nge inih tih
hrechhuak tur khan mipa ni lovin hmeichhia ka
mamawh a ni, a chhan chu LESBIAN inih vang a ni”
a ti ta dap dap mai le..ka buai nuaih nuiah mai!
Tinge Zuala kha min umzui tir kher le? nunu-I leh
zuala te kha motorah an chuang dun bawk si..a
hnu a Cathy rawn hruai nunu-I emaw ka tih kha
nunu-I tak tak a lo ni bawk si !! engmah ka
hrethiam thlawt lo.
Cathy chu a nui hul hak a, a hma anga tawhkhirh
hmel erawh a pu tawh lo chiang hle.
“Ni e, a dik, a dik vek, Ramdinsangi kha ka thah a
ni e, a chhan chu ka hmangaih vang a ni. Ani khan
vawi tamtak ka thinlung a tina a, zak takin min lo
siam tawh thin. min mamawh apiangin ka pui thin,
mipa nen an lo riahdun pawn engmah ka
sawichhuak ngai lo, keichuan ka hmangaih , ka ta
ni turin ka duh mai chauh a ni, mahse, chu chu a
hrethiam duh lo a, mipa min ngaihzawn san a,
keichu thian ang baka min en theih loh thu a sawi
thin. Ka hmangaih em vangin ka nghak hram hram
thin a, mahse, Zuala’n neih a tum thu a sawi khan
ka puakkeh ta ani; an inneih theih loh dan zawngin
Johny-a kha Ramdinin a duh zia ka hriat vangin
Johny chungchang hlir ka sawipui thin, a chhan chu
Zuala hi a chhungte pawn an duhpui vang leh amah
ngei pawn pasal atan chuan a tha ber tia sawi thin
vangin Zuala chu a nei duh mai ang tih ka hlau em
a ni. Ruahmanna ka siam a, hun chiah ka mamawh
a ni, tichuan khamizan khan Zuala nen inthen tir
tumin chet ka la ta a ni, thah kha ka tum bik reng
reng lo; Rinawma hi chu ka mamawh huna rawn
lang nghal vat thei turin ka hrilh lawk daih tawh
hrim hrim a, tichuan, Johny nen an inhmu tak tak
dawn tih ka hriat khan ka buai leh ta vek mai,
Johny-a a duh em vang hian Johny-a kha a hneh ve
leh mai anga an inkar a tha leh mai ang tih ka hlau
a, ka mangang takzet a ni.
Mahse, Johny chuan a beisei angin a lo
dawngsawng ta lo hlauh a, ka lawm hman tawh
tehreng nen ka ina a rawn kal khan johny bawk chu
a be leh a, a tap bawk a, ka tan hmuh a hrehawm
zia chu in hrethiam lovang; tichuan, hnem ka tum
a, tha taka sawipui ka duh a ni. Mahse, thinrim
takin , keimah vanga chung chu thleng niin a sawi
a, Johny chungchang ka sawi thar pui avang leh
Johny chu beiseiawma awm anga ka sawipui
vanga na tuar a ni tih a sawi a, a dikna chen chu a
awm ve tho. Kan inhnial chho zel e, zaidawh takin
ka bula riak turin ka ngen a, chutah chuan , ‘nang
hmeichhe hur leh nasa, I hmeichhiatpui te pawh it
a enjoy tum zel thin mihring hi ka thian a tan pawh
ka duh tawh lo che; min hmangaih engang mah la
min nei dawn chuang lo; kumkhuain I ta ka ni ngai
lovang, Zuala ka nei dawn, palai lo tir turin ka ti
anga, Johny pawh ka theihnghilh ve mai ang, nang
erawh chuan min tibuai leh tawh ngai suh’ min ti ta
hrep a..a na thlawt!!
Ka thinrim insum zolo chuan ka phih hrep a, min lo
beilet ve bawk a, a bengbeh ka pawhthlak chuan a
rak tuar a, min nam dawrh a, a tlanchhuak ta nghal
a ni, tichuan I sawi ang khan thil thleng chu intan
ta a nih kha..Rinawma hi a fing lo tih ka hria a,
pawisa a mamawh bawk, kan inkar engmah hriat a
nei lo bawk; amah chuan Ramdini bialpa runluihna
emaw a inti ang, atira ka ruahman dan pawh a ni
bawk, Rinawma khan sawi hmaih a nei anih
kha..Tanhril daiah khan ka thupek angin Ramdini
kha a fawp a, a kuah bawk, chu chu video in ka
cover a, Zuala hmuhtir tumin, tichuan Rinawma kal
hnu chuan Ramdini chu ka va hmu a, vawi1 chiah
inngaihtuah tha leh turin ka ngen a, min hnial fithla
thak a, a tawpna chu a cho chhuak ta anih kha..ka
thah hnu khan Zuala ka call a, khalai hmuna koh
kha ka tum a ni, ‘Ramdini’n Tanhrilah ka awm a
tia, han hruai mai ta che, ka nuamsam lo a, a lo be
ngam lo che a’ tia hrilh ka tum a, tichuan, zuala’n
ka call a lak theih tak lohah chuan Johny ka call
leh a, mahse a phone a off ta si a, rilru fima
ngaihtuah leh turin ka haw ta a ni” a ti a.
A remruat dan fing phakar lutuk chu mak ka lo ti
hle..chu thawnthu zet chu!!
“Party zan khan Remruata chu thah ka tum ngei a
lawm..a hlauhawm tan tih ka hriat vangin, pawisa
min dil ngun mah mah tlat a tin ni. Mahse, Johny
a ni tih ka hre hauh lo” a ti hul hak a.
Khawngaihthla te pawh a la lek lek mai.
Cathy inpuanna kan ngaihthlak zawh hnu chuan a
chungchang ngaihtuah a ni a, damchhung lungin
tang tura hrem a ni ta a ni. Zuala, Johny leh Nunu-I
te pawh zalen takin an nui ve thei ta e.
“Tinge Zuala kha min zuiruk tir kher a?”
“Nang chu thluak aia tharum tangkaipui zawk inih
vangin Zuala khan buaina a tawh palh hlauh pawha
lo pui tur chein mawle”
“Ni 3 chhung I inkhung bo khan Cathy chu I lo
enthla char char a mi?”
“A ina luhruk dan ka zawng zawk mawle; a fimkhur
thiam lutuk khan min tihnual lek lek asin, hmeichhe
mak tak a ni”
“Nunu-I kha engvanga chhawr kher nge I nih?”
“Cathy nihna diktak haichhuah nan mawle, chuan
Ramdini ang tak hmeichhia chuan a hip bik hle tih
I hmuh kha”
“A lawm nan Dinner ka treat dawn che mi?”
“Ka la treat zawk ang che, nangmah vanga Cathy
kha phih awk thei kan ni sia” ka lo hawi leh hu a!
a nui a.
“Engvangin nge Ramdini kha a thah ang tih ka
ngaihtuah thiam mang lo a, kiltin atanga ka chhut
pawhin, mhahse, lesbian thumal I rawn phuhchhuah
zan kha I hria em? Kha khan ka harh ta a lawm!
Nunu-I pawh ka va be ta chuk chuk a, ka
ruahmanna pawh ka siksawi kual leh vek a ni, ka
lawm e, Sam” ti dam thlap a, a nelawm hle.
“Chutichu zaninah zanriah chu kil dun I la”
“Aih, ka lawm e, Nizana tlangval pakhat thih dan
runthlak tak chungchnag kha ngaihtuah ka duh”
“Inawkhlum a nilo mi?”
“THAH A NI”
“Ka pui dawn che em?”
“Boss thu hnial zut zut ching I ni em ni?”
Kan nui dun a. Zanriah ka eikham veleh a inlam ka
pan ta a, kawngka ka kik a, vawi 3 ka kik hnu
pawn a lo hawng thei si lo! Kawngka chu ka nem
hawng a, a lo eng uarh a, ka thil hmuh chuan min
tiding chawt mai! Sofa bulah chuan thisen nen
inchiahpiah nuaih in a lo mu a, ka va thingthi rawk
a, a mar ka dek a, a lo la phu det det tih ka hriat
chuan ka pawm nawlh a, rang takin damdawiin ka
panpui ta a. Kan thawhpuite an rawn lang tiam tiam
a, mahse, boss a la harh tlat lo. A lu chu ka chul
ka chul a, a thaw hawk a, a mit chu a rawn meng
ta diar diar a,
“Sam, min khawihtu te kha in man vat lo a nih
chuan, nangni pawh in dinhmun a derthawng a nia
aw ” a aw zawi tak chu a chau takzet a ni
“Tute nge” ka tih lai chuan a thaw hrawk hrawk a,
Doctor leh nurse rawn tlanlutin an buaipui ta chuk
chuk a; a hnara oxygen dawt vuah chung chuan
mitmeng fim zet hian min rawn melh a, a
maimichhing zui ta a, a rawn harh hunah eng thuruk
dang nge inthup chu kan hre leh ngei ang le…