HRIATTIRNA/HRILHLAWKNA MAK

@. Kum 1951 khan English hmeichhe 2 hi France
ram a khaw pakhat Dieppe bul lawkah Holiday
hmangin an kal a. Tuk khat chu zingkarah hian an
hmuh theih si lohin darkar 3 zet chu Indo ri an hria
a. Dieppe khaw chung zawn velah chuan Silai leh
bomb puak ri chawl lovin a ri zawih zawih mai a
ni. Mak tiin a tak hmuh tumin an hawi kual a,
hmuh theih si lohin darkar 3 chhung zet thawm an
ngaithla. Hlauthawng chungchungin Dieppe an va
thleng a, engmah boruak danglam a lo awm si lo.
An thil hriat an sawi chuan khaw mite chuan kum
9 vel kal ta a Indopui 2 na thlen laia British hovin
Dieppe khua an beih thawm ni ngeiin an hria a.
Kum 9 hnu ah Indo thawm chu a rawn inlar nawn
leh ni ah an ngai ta thlap a ni. .
@@. Kum 1969 January ni 16 khan Joseph
Delouse chuan Chicago chhim lam deuhah Rel insu
avangin mi tamtak an thi ni tlatin a hria a.
Chanchin chiang zawk hriat tumin a tuk Jan 17 ah
Kawtthler mipui tamna laiah a zuk kal a.
Chanchinbu ah engmah an ziak lo va, a zawh
apiangin Rel chetsual thu an hre bawk si lo. Ani
lah chuan Chicago ațanga chhim lam deuhah
Chhum zing nasa avangin Rel a insu alawm a ti tlat
a. A sawina hmunah thil thleng engmah a awm si
lo va, a fiamthu ah te an ngaihsak vel. Mahse a
sawi ațanga Darkar 2 na velah Chicago chhim
lamah Chhum zing nasa avangin Rel a insu ta
chiah mai. Mi 47 ngawt an thi a, tamtak an hliam
bawk. Hriatlawkna mak ve tak chu a ni. .
@@. Kum 1930 Oct 4 khan British Boruak Lawng
R 101, 777 feet zeta sei chu France hmar lam
Beauvais khaw bulah a tla a. A hnuai bawm an
khaia chuang mi 6 an him a, a bak mi 48 Boruak
Lawng chhunga awm te chu an thi vek. Kum 1925
khan Civil Aviation Director Sir Sefton Brancker
chuan Aienthiam a rawn a. Chu aienthiam chuan
1925 ațanga kum 5 bak Brancker nunah engmah a
lo hmuhsak lo. A hrilh lawk ang chiahin kum 5 ral
hnu chiah ah Brancker chu he Boruak lawng
chesual ah hian a thi a ni. Tin, Oct 4 a an thlawh
chhuah dawn hnaiha khawl an check lai velin
thawktu zinga mi Walter Radoliff fapa chu 'a pa a
bo' tiin a rawn țap chhuak chiam ringawt. Radoliff
pawh hi thi zingah a tel ta nghe nghe. He Boruak
Lawng captain Carmichael Irwin pawh a thi ve a. A
thih thu a nupui an va hrilh chuan a nupui chuan,
'tun țum a thlawk chhuak hi damin a lokir tawh
dawn lo tih kan nupain hriat lawkna kan nei asin' a
lo ti thên mai.!! An tlak vel lai hian Captain Irwin
office a telephone duty chuan Irwin office a
telephone chu a rawn ri a, tu emaw hian mi a be
mawlh mawlh tih a hria a. Mak a tih em avangin
rang takin a va en a, tumah an lo awm si lo.!! An
tlak ațanga ni 3 na ah chuan London khawpuia
cheng Mrs.Garrett chu zêl angin a awm a. A rawn
rak chhuak nawk nawk mai a. A aw chu captain
Irwin aw chiah a ni. Boruak lawnga thil fel lo
awmte a rawn rak chhuahpui nawk nawk mai.
Hemi hnu ni 20 velah zêl angin a awm leh a.
Director Selfton aw ang chiahin a rawn rak chhuak
nawk nawk bawk a ni. Mrs.Garrett hmangin mitthi
tawh ten thu an rawn sawi leh a ni ber ang chu. .