INDONA HMUNA THILTHLENG MAK

*ANGEL INLÂR*
He thil thleng hi kan hre fur tawh
maithei. Mahse hre tawh leh la hre lo
tan a ngaihnawm, mak dangdai reng tho
va..
Chhiar rawh le.
.
Indopui 1 na vanglai taka Battle of Mons
an tih mai hmuna German sipaiin British
sipaite a let thum vel zeta an tam hneh
chunga an tawlh let duai duai mai kha
thil mak tak a ni.
London Evening News in a tarlan dan
chuan British Expeditionary Force chu
German sipaiin an nawr bet tlat mai a.
British sipai te chi-ai taka an awm laiin
Angel a rawn inlar ta tlat mai a ni.
Angelte chu German leh British Sipai te
inkarah chuan a rawn tlazep ta a.
German ho chuan mak tiin awmze nei
lek lovin an tawlh let phah ta niin sawi a
ni.
Ram pahnih sipaite inbeihna hmun hi
France ram chhungah a ni a. Kum 1914
August thla kha a ni. He thil thleng hi
September thlaa London Evening News a
an rawn tarlan lai pawh hian British
sipaite pawh France ramah hian an la
awm nghe nghe. Evening News in a
tarlan mai bakah Kum 1915 khan Bristol
khawpuia Clifton hmuna Puithiam fanu
chuan he thu hi British Sipai officer
pakhat hnen ațanga chhechham meuha a
dawn thu chanchinbu ah a rawn tarlang
ve bawk.
Sipai officer sawi dan chuan Battle of
Mons ah chuan an chan a chau hle a.
Tawlh kir lo thei an nih loh avangin an
tawlh hret hret a, German sipai sakawr
chungchuang rualin an rawn nawr hum
hum bawk a. An sipaite țanhmun tur an
lo melh ruk lah German sipai ten an lo
hmakhalh zel bawk a, nungdama chhuah
an inbeisei lo hle a ni. Mahse thil mak
tak a lo thleng ta. German sipai sakawr
chungchuang lo tlan hum hum te nen an
inkarah chuan Angel rual hi an rawn
tlazep a. German Sakawrte chuan an
hlauh em avangin mumal pawh nei lovin
a rem lam lam hawiin an lim kual ta vak
vak mai a ni.
He thil hi British Sipai Pastor pakhat
Rev.C.M.Chavasse chuan British
Brigadier General leh a hnuaia Officer
hnen ațangin a hre ve bawk.
Hetianga Angel rual rawn inlar hun
chhung hi minute 20 vel a ni a. German
sipai pawhin British sipai an nawr beh
tlat tawh, mumal nei lova phili tawh chu
an inkarah Sipai rual tam lutuk an lo lan
thut avanga an bawhzui ngam loh thu an
sawi ve tho bawk. British Sipaite erawh
chuan Sipai pakhat mah an lo lan belh
loh thu leh an hmuh loh thu an sawi ve
thung. An inkarah chuan British sipaiten
Angel rual an hmu a, German sipaiten
Sipai rual tamtak an hmu ve thung anih
ber chu.
Thil mak ve tak erawhchu Battle of Mons
hmuna thil thleng hi a hlimchhawnah
Sipai Officer te hian *an ti* tih bakin an
sawi duh lo va. Mita hmu angin tuman
an sawi țha duh lo. Sipai tha chakna
hmanga bei an nih loh avangin an
Promotion chungchangah harsatna an
tawh phah an hlau niin an sawi. Mahse
Battle of Mons ațanga Sipai lo kir te
chuan an thil tawn mak tak tak chu an
sawi huai huai lawi si a ni.
Mons hmunah hian thil mak thleng a
awm ngei tih a lanna chu British sipai
mai ni lo, German sipaite pawhin an
hmu ve tlat hi a ni.
Engpawh nise he hmuna Angel/Sipai rual
tam tak rawn inlar ringawt mai hi British
sipaite tan malsawmna mak tak niin a
him phah chu a ni phawt mai.
.
*THLÂ IN SIPAI NUNNA CHHANHIM*
Indopui 1 na hunlai tho khan British
Sipai Officer William Speight leh a hote
chu Trench (Hmelma te lo channa atana
khur an laih) ah an tawm țhap mai a. An
hma zawnah hmelma an rawn chet leh
chet loh te, hmalak dan tur hrang hrang
ruahmanna te neiin an inralring hle.
Hemi zan hian Thla a en avangin
hmalam pawh thui tak a lang thei a.
Boruak reh ruih mai hnuaia hmalam an
thlir reng lai chuan an hma lawkah
chuan mihring hlim thla / ruangam, var
vek si hi chiang em emin a rawn lang
hlawl mai a. Thlahrang ni ngeia an hriat
avangin mak an ti hle. Chu hlimthla
chuan sipai ho chu zaizirin a rawn be ta
a. An hmasawna hnimbuk zau angreng
tak awm chu kawk kualin tifai ru ti
niawm takin zaizirin a hrilh a. An en
reng laiin boruakah a thamral leh ta.
A tukah khawvar veleh Officer William
chuan a hote chu an Trench hmalama
hnimbuk zau ang reng tak chu fimkhur
takin a check tir ta a. Chu hnimbuk
hnuaiah chuan kalkawng hlui angreng
tawh tak a lo awm a, mahse hnimin a
bawh tlat avangin bawkvak lo chuan a
kal theih loh. Chu kawng hluiah chuan
ralthuam chi hrang hrang, vawmpuah
bomb thlengin a lo awm țeuh mai a.
Darkar reilote hnua puak mai tura kam
thlap te pawh a lo awm nghe nghe.
Fimkhur takin an senghawi ta hlawm a.
A hma zanah khan Thla in rawn hrilh lo
se chuan an chil puak nual ang a, bomb
kam sa te pawh a puak ngei dawn a, an
nunna in a tuar ngei ang. Mahse mak tak
maiin Thla in a rawn chhanhim ta hlauh
zawk a ni.