KHA ZAN KHA!!! Hostel-ah

Zan khat chu ka tihtur hre lo, lehkha zir peih bawk si lo chu Senior-te room ah ka leng a. Kan senior pakhatin phone thar a lei a, va en ka duh reng reng bawk a. Ka va thlen chuan ka roommate leh junior te pawh an lo awm ve a, titi khawchangte sawiin kan hlim dar dar hle.

Hetia mahni in leh lo chhuahsana mi rama han awm takah chuan lunglen te a na duhin Mizo awmchhun chu kan lo inngai ve bawk nen; reilote kan awm emaw tih laiin hun erawh a kal chak duh phian mai. Mizo hlate kan ngaithla a, Lemchan hmuhnawm tak takte kan en hnu chuan sana pawhin zinglam dar 2 a lo kawk vu tawh a. Tin zai kan rel ta a.

Ka lenna hi hostel hran a nih avangin kan hostel a haw leh tur chuan kawtthler reh ruih mai zawh phei a ngai a. Ka kal lai chuan thli a thaw vuk vuk a, ui a bauh chuah chuah bawk a. Van lam ka han hawi a, chhum chhah pui pui mai hi kawlkil atangin a rawn in pangawzial tup tup mai bawk a. Dawizep deuh tan phei chuan tim ur ur na tham khawpin khaw awmdan chu a tihbaiawm a ni.

Reiloteah hostel ka thleng phei a. Kan hostel hi a lian angreng hle a, E-shape a sak niin ka room chu E a a lai taka inrinphei laiah hian a awm a ni. Kan awmna corridor ah hian inbualna leh zunna chiah a awm a, Ek in a awm loh avangin E-shape a a sir pahnih ah hian khawi emaw zawk zawkah kal a ngai thin a, a buaithlak duh hle thin.

Hemi zan pawh hian mut dawna inthiar hi ka tihthan a nih avangin room a lut lovin inthiarna lam ka pan tlang nghal a. Thli chu ala thaw vuk vuk a, ui bauh thawm pawh ala ring hle. Hostel chu a reh ruih a, inthiarna ka thlen dawn chuan mak tak maiin hlauhna in min rawn zem thut mai a, ka sai hlawk hlawk mai a nih chu!

Mahni tawka inla pa ve thei tak mai, ramhuai leh thlahrang tih vel pawh hlau ngai miah lo ka ni a, chutia eng ber nge ka hlauh pawh hre hawt lova ka khur ringawt mai chu mak ka tih rual rualin ka thin a rim em em mai bawk a. Ka intipachang lui a, ka kal lui ta zel a.
Inthiarna pali lo awm tlar zinga a hnuhnung ber dawttu, ka inthiarna hmanthiam ngat chu ka pan ding nghal a. Kawngkhar ka hawng chiah chu ka hmai zawnah tak mai hian thli a rawn thaw vuk a, ka phu zawk nghe nghe.

Kan College piah lawkah hian Agriculture lam zirna college ho ram zau tak mai a awm duai a, chhunah chuan inthiarna in tukverh atang chuan a lang chiang thei hle thin. Chumi zan erawh chuan thla mang lai a ni bawk nen, a thim phui mup a, ka hun tawn lai nena ngaihbel phei chuan a rapawm lek lek lehnghal.

Ka inthiar lai chuan thawm engemaw hriat inbeiseiin beng ka chhi kar a, mahse, engmah thawm a awm tak lovah chuan ka thaw huai a, thlamuang takin ka inthiar ta a. Ka inthiar zawh chuan room lama phei mai lovin corridor atang chuan Agri College huan chu ka thlir a, a hmaa ka thil tawnte chu ka ngaihtuah a, tlema ka thlamuan deuh tawh avangin ka nui var var a.

Chutia thlamuang taka ka awm lai chuan thawklehkhatah huan laia thing ding thup karah chuan hauhuk rual riak hi thawn thut ang mai hian an hualreu ta chiam chiam mai a, ka phu chiang kher mai! Kawmthlanga chhimbuk tuibirhin alo chhawn vel rawl nen. Ka nui hmel chu hlauthawng hmelin a thlak nghal a, ka hawi kual hruk hruk a.

Thawklehkhatah khua chu vawh namen in a vawt ta lova. Vawt tia khur hlawk hlawk chungin room lam panin ka phei ta a. Tunah zet chuan thil awmdan chu a pangngai lo tih ka hre chiang ta takzet mai!

Inthiarna atanga ka room hi kal pangngaiin pen zahnih vel lai tur a ni a, tlan em chu ka hreh si a, hlau rilru deuh siin kal pangngaiin ka kal zel a. Chutia ka kal lai chuan zuitu nei tlatin ka inhria a. Ka pen rual chiahin a pen ve a, ka kal leh a kal a, ka din leh a ding ve zel a.

Ka chalah thlanfim a rawn bawl nghal tuam tuam a, ka hnunga min rawn zuitu chu ka en ang nge en lovang tiin ka rilru a insual nasa hle. Chutih laia ka hlauh ber chu ka hawilet ang a, thil tihbaiawm zet mai ka hmu ang a, ka hriselna in a tawrh phah khawpin ka chesual ang tih a ni. 

Kawng chanve vel awm ah chuan ni thei ngang lova ka hriat avangin ka ding ta chawt a. Lehhawi ka tum a ni. Keimahah chuan mi pahnih an insual a, pakhat chuan hawilet turin min duh a; pakhat erawh chuan kal zel turin min duh thung. Chutih laia ka rilru awm dan chu tawngkaa sawifiah chi a ni lo.

Rei fe ka din hnu chuan ka rilru ka siam fel ta. ''Ka hawilet tur a ni. Engpawh awm se, engpawh thleng dawn mah se, ka hawilet tur a ni. Mipa ka ni ngai e.'' ka ti a, ka hawilet ta thut a!

Ka hnungah chuan tumah reng reng an awm lo. Corridor chu a reh tlawk tlawk a, a tawpa tui khawihnaa tui far ri keuh keuh leh a chung zawna bulb eng tha thei lo, thim leh zuk zuk thin chauh lo chu thildang reng reng che eih pawh a awm lo.
Mak ti takin ka dar ka tichhing zauh a, kal leh mai tumin ka inher a, inher pawh ka la inher kim lo tih chuan thil ka su a, mawng sawh dawpin ka tlu let hnawk a. Ka thil sut chu ka han en a....Karei! Ka hma ah chuan mi pakhat a nghawnga hrui valhin a lo inkhai then nawlh nawlh mai chu niin! Ka au chhuak teuh kher mai. Rang takin ka kut chuan hnungtawlh zawngin ka inbengkal zawt zawt a.

Chu inkhai pa chu en mai chuan pa lian lem lo tak a ni a, a hmel erawh chu a thim avangin ka hmu thei lova, ka lungphu a rang nghal zawih zawih a, thlantuiin min bual huh vek bawk a. Chutih lai chuan ka bul lawk room kawngkhar a rawn inhawng a, rang takin ka hawi vat a, vai pahnih hi an rawn inbe chhuak mawlh mawlh a, min hmuh veleh an ding chawt a, enge ka tih min zawh chuan kei chuan chhuata la thu reng chung chuan ka hmaa inawkhlum pa chu kawh mai ka tum a.

Mahse, a hma minute khat pawh tling lova ka hmaa inkhai then nawlh nawlh kha a lo awm tawh hauh lo a nih chu! Ka ho chungin ka tho taih taih a, vai pahnihte nui tut tut chu rum deuha melh pahin ka kal leh ta a. Chutih lai chuan ring zetin tek a rawn tla a, ruahpui vanawn a sur nghal bawk a.

Room ka thlen chuan kawngka vawnna vuan chungin ka hawi kual leh hram a. Tek tla zuai zuai karah chuan kawmthlang huana hmawng thing lian tak mai chuan ka mit a lak tlat avangin ka en reng a. Chutia ka en lai chuan engtik laiin nge a lo awm ka hre lo, nichina ka inawkhlum hmuh ngei mai kha hmawng thing zarah chuan a rawn inkhai then leh ta nawlh nawlh mai a nih chu! Kawl a phet avangin a hmel pawh chiang takin ka hmu thei a, karei!...rang takin ka tlan lut a, khumah ka lawn thuai a, khur hlawk hlawk chungin rizai chuan ka inkhuh tlat a.

Ka thil tawn chu mak ka tih em avangin ka mu meng kur a. Ka thianpa lah chu a hnar ring nasa mai si. Sana ka en a, dar 3:27 a lo ni a. A tukah class kal te a ngaih avangin mutthilh ka tum a. A sawt lo kher mai! Ka mitthla ah a hmel tihbaiawm tak kha a cham reng a, ka tim uaih uaih thei nia!

Chutia ka mut men kur lai chuan phun ri mawlh mawlh hi ka hria a, ka thianpa tawngvai a nih ringin ka va en a, a lo la hnar burh burh mai si. Beng chhi karin ka ngaithla a, hla tak atanga zawitea rawn ri tanin a rawn hnai tial tial a, a ring tial tial a, ka bul vel a rawn thlen phei chuan ring tak a ni tawh!

Ka te thawt a. Ka te thawm ah chuan ka thianpa chu harh chiang mang hlei lo hian a phun niah niah a. Ka phun ri hriat chu a hla leh tial tial a, a zawi leh tial tial bawk a. Mak tak mai chu khatia a rin viau pawh khan enge a sawi ka hre thei miah lo!

Rei vakloah chuan a ngai te bawkin a rawn ri leh bul bul a, a hma ang chiah khan ka zawnah a ring leh chiam a, a ral leh thin a. Chutiang hlir chuan vawi tam fe a rawn ri a, rizai hnuaiah ka thlan bawrh bawrh mai a ni.

Darkar chanve vel lai hnu chuan thawm chu a reh ta a, ruah pawh a han ta bawk a. A reh hian a reh ngawih ngawih a. Tlema ka ngaih a ngam ve ta maw tih ah kawmthlang atang chuan hmeichhe thlabar au thawm chiah chiah hi a rawn ri leh a. Ka phu chiang kher mai!

Ngaihthlak loh tumin ka beng ka hup a. A ring tulh tulh mai bawk si. Khatih laia ka mangan zia kha sawiin a siak lo. A aw chu a tihbaiawm in tiril a fan a, mihring pangngai aw ni thei turah ka ngai lo.

Rei fe hnuah chuan a reh fel leh ta a. Khawfing a chat chhunzawm ta bawk a, eng em a thleng tawh lovang chu maw tiin, ka chau deuh bawk nen, mutthilh ka tum ta a. Ni chhuakin ka room a rawn chhun suar suar lai chuan ka maimitchhing riai riai a.

Ka harh leh chuan sana ka en a, dar 10:00 a lo ri tawh a. Ni pawh a tlangsang tawh hle a, a lum nangiang mai bawk a. Ka thianpa guitar perh lai hnenah chuan nizan lama thawm danglam a hriat leh hriat loh ka zawt a, engmah a hriat loh thua min chhan avangin engmah ka hrilh duh ta bik lova. Chumi zan chuan engemaw hriat leh inbeiseiin zan rei tak thleng ka beng ka chhi a, mahse, eng em a thleng ta lo.

Ni a liam a, kar a liam a, kha zana ka thil tawn pawh kha ka ngaihtuah em em tawh loh laiin tlai khat chu inthiarna ka pan laiin room pakhat chuan ka mit a la ta tlat mai a. Ding meuhin ka thlek ta reng a.

Chu room chu inthiarna thlen hmaa room hnuhnung ber a ni a, single room niin rei tak chhung luah tawh loh tih hriat tak maiin a hnawk rum a. A kawngkhar chu tala a kalh niin tukverh te chu darthlalang pawh a awm mumal tawh lova. Single room lehnghal ni si, engti tiha chutia luahlum lohva an dah reng mai le aw ka ti rilru a.

Kan hostel a mite ho chu a chhan hria an awm leh awm loh ka zawt a, hria reng reng an lo awm lova. Inhnuaiah ka chhuk a, gate vengtu putar tawh tak mai hnenah chuan chu room chanchin chu ka zawt ta chawt mai a. Ani chuan muangchangin, "Eng room maw?" a lo ti a. "Room no 78" ka ti vat a.

Muangchangin a tarmit a phelh a, "Enge I hmuh?" min ti ringawt a. "Aaaa...engmah phei chu ka hmu lova. Mahse, hman zanah thil mak tak mai ka..." ka tihlai mek chuan ani chuan, "Engtikah?" a lo ti vat a. Ka phu deuh zawk nghe nghe a. A ni leh thla ka hrilh hnu chuan a maimitchhing vang vang a, he thu hi min hrilh ta a.

room no. 78 khi mi pakhat, Mirzapur lam chhuak hian a luah thin a. Tlangval fel tak leh lehkhathiam thei tak a ni reuh a. A sang lem lova, in intiat vel maithei a ni. Vanduaina in a tlakbuak nasat avangin a lungngai thin hle a, thian pawh a kawm ngai meuh lo...'' a tih lai chuan ''Eng nge a vanduaina chu?'' ka lo ti thuai a.

"Aaaa, thil sawi nuam a ni lova, a nu leh pa hi tawhsual tawkin an boral tih hi ni mai teh se, a dang chu min zawt lo mai rawh.'' a tih lai chuan lu ka lo bu nghauh nghauh a. A tarmit chu a vuah a, a aw a thian kharh kharh a. A sawizawm leh ta a.

"Zan khat chu ri deuh laih laih ka hria a, ka han tlan chhoh chuan kan tlangvala chu corridor ah inawhhlum a lo tum hi alo ni a. A thianten an hmuh hman hlauh a, a chauh hma in an la thla leh a..." a tih lai chuan, "Dar engzat vel nge ila hre thei em?" ka lo ti leh hmanhmawh a.

"A rei tawh viau mai a, ka hriat sual loh chuan zing lam dar 2 atanga dar 3 inkar chu a niang. A rei tawh a, ka chiang lutuk ngam lo." a ti a. Ka rilru te te chuan hman zana ka hmaa inkhai then nawlh nawlh kha ngaihtuah a, ka la tim deuh ur ur a. Gate vengtupa chuan a sawi zel a.

"A room ah te kan hruai phei a, a thianten an awmpui laih laih avangin ka chhuksan leh ta mai a. A tuk khua a lo var chuan engtin tin emaw a thiante lak atang a pit chhuak ni tur a ni, kawmthlang hmawng kungah khuan inawkhlum in kan hmu ta a ni.

"Chuta chin chu hostel ah hian thawm eng engemaw an hre fo mai a, kum 10 dawn lai chu buaina kan tawk nghe nghe a. A room phei khi chu luah ngam pawh an awm lova, tikhian kan tiruak ta reng mai a ni." a ti a.

Mak ti tak leh phun nuah nuah chungin ka chho leh ta a. Kum tam tak chhung engmah an hre tawh lo a nia, engatinge kha zanah kher kher, ka lakah kher kher a rawn inlar? Enge a duh? Zawhna a tam kher mai. Harh chhuak thut ni awm takin gate vengtu bulah chuan ka tlanthla leh a, thaw hlawp hlawp chungin, "A thihni I la hre thei em?" ka zu ti mawl tawp a.

"Ka chiang lutuk tawh lova, Babu saw va zawt teh" tiin hostel thil pawimawh chingfeltu room min kawhhmuh a. Babu hnenah chuan ka duh ka va sawi a, ani chuan register bu hlui zet mai hi min pe a, 1964 kuma Room no. 78 luahtu hming, luhni leh chhuahni ka han en a, a chhuahni (a thihni) chu September 21, 1964 alo inti kalh a.

Room ah ka let a, ka diary ka keu a, kha zan kha ka han en a, September 21, 2011!! Ka hrethiam ta. Kan tlangvala thlarau chuan kum tam tak liam hnu ah pawh a chenna thin chu a la kalsan tak tak thei lova. A thih zanah pawh ala rawn tlawh tawk tawk a nih chu. Ka thaw huai a, nakum ah he ni hi alo thlen leh hunah mutthilhna ka ei ang a, zantir atangin ka mu hmak ang ka ti a. Ka nui vur vur a.

Pawnah ka va chhuak a, ni tla tur chu kawlkilah suk tiat velin a inkhai nal nal a. Thlifim thaw heuh heuh chuan ka hmai leh sam a rawn chhem heuh heuh a, ka thil tawn mak tak ngaihtuah chungin ralkhat a naupang infiam chu ka thlir reng a. Amak kati ngei mai.