LIRNGHING HI

He thu hi tunlai chu a darh leh hluai pek a! : [Nepal ram Lirnghing endiktute kha Aizawl ah lokalin mizoram dinhmun hmun thum velah an endika.. Rapthlak an ti hle.. Sorkar lam hian an puang chhuak ngamlo a nih hmel, mipui chiai loh nan,,

Lungdai leh Sihphir inkarah lirnghing siamtu plate lian pui pui a awm,, Hmuifang leh Aibok inkar leh Lengpui leh Aizawl inkar nen che mai thei dinhmunah a ding.. Che vaih se chu kan chhiat hle tur thu an sawi.. Mahse in Pathian in a veng che u a ni anti tawp mai. c/p]

Khi thu (Mizo țawng duhdah angreng taka ziah) khi tunlai chu a darh nasa viau mai a, mipui a tichiai thar thut niin a lang! Sorkârin mipui chiai loh nan a zêp tih lai tak phei khi chu a ‘dap’ ka ti!

Tin, plate lian pui pui a han tih hluaih te khi a len hmêl si a, major plate a nih ngei hmel a.. Mahse major plate ho hi chu an han lian angreng khawp a, Mizoram khua leh khua inkâr lam thil mai mai an ni lo! Lei khi chat (Fault) nên a ziaktu/phuahtu khian a hriat pawlh a ni maithei…

Hei erawh hi chu thudik awm sa, mi nawlpui ina kan hriat sa a ni : Lirnghing hlauhawmna laiah kan awm tih hi! Hei pawh hi kan pawm thlap : Pathianin min la vênghim zêl tih pawh hi. Che vaih se chuan kan chhiatzia tur pawh khi thudik a ni. Kan insak dan te hian a zir loh miau avangin…

Amaherawhchu, tûn a takah khi thu avang khian chiai thar thut chi a ni lova, a sâwt bawk hek lo! Hmân ațanga kan hriat sa tho kha a ni e. Inbuatsaih leh inrin lâwk reng erawh chu a țha viau mai… Lirnghing hlauhawmna lai hi zir chhuah theih a ni a, a thlen hun tur erawh chu tunlai thiamna hian a la hrilhlawk thei tlat lo..!

A thu hrimah, endiktute pawh chu lo kal ta tak tak pawh nise, sorkar pawh chuan lo zêp tak tak pawh se, Sorkar meuhvin mipui chiai a hlauh avanga thurûk a puan chhuah duh loh lo puang chhuak a, lo thawn darhtu hi ka mi rin loh zawng tak i ni! Nangman mipui i tichiai tho si a! I thu phuah khi a dik chuan Sorkar thurûk puangchhuaktu i ni dawn sia, an man mai ang che. Lo fimkhur hleee rawh!

Mipui kan chiai fo loh nan, lirnghing chungchang a țhen a zâr chu hriat ve a țha e tih thu ah, kim lo takin a tlangpui ka’n thâi lang ve ang e.

                  

Major Plates

Kan awmna lei hi hlâwm hrang hrang lian pui pui (major plate) pasarih (Indo-Australian plate, Eurasian plate, African Plate, North American plate, South American plate, Antarctican plate & Pacific plate) ah te țhen an ni a, heng bakah hian hlawm tê neuh neuh (minor plate leh micro plate) eng emaw zât an awm bawk (Nazca plate, Phillipines plate etc.).

Lei chunglang, kan khawsakna thuahthip (crust) hnuai chiaha awm, Mantle – a tuihnâng sa, insiam rem che vêl hi a so bulh bulh mai a, chu chu Mantle Convection an ti. Chu chuan plate hrang hrangte hi zawi muangin a nawr che țial țial reng a.

Chutia an chêt ve reng avang chuan plate leh plate inkarah chakna thahrui (energy) a lo inkhawlkhawm ta țhin a. Chu thahrui inkhawl khawm chu plate te khan an dâwl zawh loh hunah a lo che in, a chang phei chuan nasa takin a lo chim ta rup mai țhin a. Chu chuan thahrui fâwn vêl (wave) siam chhuakin, chu wave kal kual vel chuan LIRNGHING chu a lo siam ta țhin a ni.

Hetianga plate leh plate lo innêk chim vel hi a awmdan leh pianhmang (shape) azirin FAULT (lei khi chat) te, Joints te, Fracture ti te pawhin in an sawi țhin a, thahrui avanga lung innawr thlep kual vel hi Fold (khi chat ve lova leilung inthlep) an ti bawk. 

                 

Earthquake Zonation Map

Indian Plate leh Eurasian Plate inrina (boundary) lai bawrah Mizoram hi kan awm mauh mai a. Han thlêr sîn leh deuh ta ila, Mizoram hi India leh Burma plate (Indo-Burma plate) leh Eurasian Plate te innâwkna lai taka awm kan nih Mizoram mai bakah NE India pumpui hi ram pum huapa lirnghing hlauhawm berna hmun (Most Active : Zone V) ah kan awm phah ta a ni! A chhiar belh duh tan : LIRNGHING CHUNGCHANG CHIANG ZAWKIN

Tâwk phawt mai se, eng hunah pawh thleng thei a ni a, Lirnghing Magnitude 7 vel te chuan min han sawih vaih se chuan khawpuia in lian pui pui te hi min delhtu tur ‘mangkhawng’ ah an chang vek dawn tihna a ni! Mahse kan chênna in te an nih miau avangin tih ngaihna lutuk chu a awm chuang lo! Theihtawpa mahni sahimna lo zawn ve erawh chu kan tihtur ni âwm tak chu a ni.

PATHIAN THU AWIH A, THI TURA INPEIH a him ber! (Tuman sawi chhuak lo pawh nise, Rinna leh thiltih tehna dik lo thei lo, Bible – ah hun hnuhnunga chhiatna lo thlen tur thu kan hmu miau si a!)