MAHNI INTIHHLUM THINNA RAMNGAW!!

Japan ramah sawn Ramngaw pakhat, tihbaiawm zet mai a awm a. chu hmun chu Aokigahara an tih thin kha a ni. Aokigahara chu Suicide Forest tih te, Sea of Trees tih te leh Japan’s Demon Forest tih tein a lar hle a. he hmun hi ramngaw 35-square-kilometre (14 sq mi) biala zau niin, northwest base of Mount Fuji, Japan-a awm a ni.

He ramhnuaiah hian lung khawkrawk tak tak leh puk a tam em em mai a. chung zinga thenkhat phei chu hmun lar leh hmingthang tak takte an nih hlawm avangin, tourist-te pawhin an tlawh zing thin hle a ni.

Aokigahara ramngaw hi a chhah hle a, he hmun hi alawm Japanese mythology-a ramhuaiho tawmkuk an tih thin kha ni. chu mai bakah, mahni inthat an tam tawh hle a, kum 2010 chhung pawh khan, mi 57 lai mahni intihlum an awm hman a ni.

Engvanga he hmunah kher mahni inthat zel nge maw an nih chu le! rau sual, mihringte inthat tura hip thintu a awm em ni ang? Chutianga inthat an tam tawh em avangin, Aokigahara luh pheina kawngah pawh, mahni inthat tur chuan chhungte dinhmun ngaihtuah hmasak a, suicide prevention association-te biakpawh hmasak tur tih chu tar a ni nghe nghe a ni.

Kum 1988 khan, kum tin mi 69 lai chu mahni intihlum an lo awm tawh thin a. kum 2003-ah, ruang 105 lai chhar a ni leh a, kum 2002-a mi 78 thi ta aiin an lo tam ta daih mai a ni. Tun hnai khan, local government chuan thi zat a puangzar tha duh ta vak lo a.

mahse, kum 2004-ah, mi 108 lai an thi leh bawk. kum 2010-ah phei chuan, mi 200 aia tam ngawt mai chu mahni intihlum an awm leh a. kum 2011 khan, mahni intihhlum dan tlangpui chu, inawhhlum leh OD (drug overdoses) a ni.

chuvangin, kum 1970 atang khan, kum tina ruang zawngtu pawl (Annual body search) an awm a. chungahte chuan police, volunteers leh attendant journalists te an tel thin a ni.

Thawnthua a lan dan chuan, inngaizawngte chu he ramngaw ah hian an inthat ve ve a. chu chhiatna rau vang chuan, tunah hian inthat an awm tak zel phah ta niin mi tam takin an ngai a ni. Aokigahara ramngawa thingah hian inawkhlum an tam tawh em em mai a. Pa titi thiam tak chuan Thla inlar sawi tur pawh an ngah tawh viauvin a rinawm.

Hman lai Legend-ah pawh, Tam tlak laiin, eitur a vang hle a. chhungkaw tam takin an chhungkaw member thenkhat chu, Aokigahara ramngawah thi turin an hnutchhiah a. eitur nei lovin an thi zui a. chutih laiin, a la damte chuan eitur tlema zawng la awm chu an khawpkham theih phah ta thin a ni.

chutianga thi an tam tak em avang chuan, Aokigahara ramngaw chu mitthite thlarauvin an chelhchilh ta zel niin an ngai bawk. chu mai bakah, Aokigahara ramngawah chuan Thlarau leh ramhuai thawnthu kaihhnawih sawi tur pawh a tam hle bawk a. va tlawhtu tam takin an hmu thin reng a ni.

Japanese spiritualist-te rin dan chuan, Aokigahara leilung leh ramngaw chuan thihna a kengtel a, tlawhtute rilruah thawktu awmin, inthah duhna a lo piang a, mi tam tak an intihhlum phah thin a ni. ramngaw chhah leh dur khup mai a ni a, mahni inthat tamna tia a lo lar tawh em vang pawh a ni mahna, va fangtute pawhin an tih ru hle thin.

Mak ve tak chu, ramsa, nungcha hmuh tur leh thawm hriat tur pawh a tlem hle a, a reh ruih mai kha a ni. chubakah, hmun thenkhatah chuan, magnetic iron tam vangin compasses, cell phones leh GPS systems a hman theih hauh loh. chung thilte leh mihring chhia leh tha hriatna hian, inzawmna a nei thei zawk ang em tihte pawh hi ngaihtuah tham a ni.

Aokigahara ramngaw hian huai a nei nge ni dawn a, mahni inthahna hmun remchang tak a nih vangin, inthah tumte'n an pan thin zawk ni ang? Nge ni, inthat tamna hmun a nih vangin ngaihbel tur leh hmehbel tur rilruin a dap zawk ni ta ang?