MI NU MAW KALO HMANGAIH!!????....

“Mate, a nu chu a lo haw tawh dawn lo”, tiin ka kianga ding patling pakhat chuan a fanu paw chungin a mittui a hru fap fap a. A hmel atang chuan a lungngai a ni tih hai rual a nilo.

“Kapu, i farnu mi ?”, tiin zawhna ka pe thuai a.

“Aw…ka farnu…..ang maia ka en, ka engkima engkim ka nupui a nia”. Sawi vek a duh, mahse a thei lo. A mittui hnam tuam chungin harsa ti takin, “Hei hi kan fanu neih chhun a nih hi”, tiin a belh leh hram a.

Awmlohna turah ka awm tih ka inhria a, “A ni maw, a va’n pawi ve, hahadam takin a chawl ngei ang tiraw”, tiin kalsan zai ka rel ta a ni.

A hma zan lampang duh aia ka in hnem deuh avangin hemi tuk kher kher hi chu thawh har ka ti hle mai. Ka chuanna tur Sumo lah chuan a tum ram pan turin ‘tuibur hmuam da’ chhung lek bak hun a nei tawh lo.  Hmanhmawhtaka ka insiam zawh chuan Sumo Counter chu thlasaphulin ka va thleng thei hram a; a hnuhnung ber ka inpeih takah chuan kan tum ram lam pan chuan kan lir chhuak ta a ni.

Ka kianga passenger pakhat chuan ka inthlahrung ang tih hlauin ka beng bulah zawi sap hian a rawn phun ser ser a, “Thianpa, kan lo nghak rei tawh che asin, passenger dang pawh an thinrim lek lek tawh a; ‘a lo thleng ve tep tawh ang’, tiin ka lo hnem hlawm a”.

A aw ringawt atang pawh chuan han zuam chi a nilo tih a hriat a, a sam ther leng velin ka beng a’n tai zeuh paw’n ka taksa hi mur maktaduai chuangin a mur ni berin ka hria. Ka hawi chhuak a, a hmel ka en a, mitkhapkarah ka mitmeng hian khaw dang hawi zai a rel thei tawh lo. A dik tak chuan he ka hringnun khawvel hi he nu aia sawi danglamtu hi hring ka chan tirh ata ka la tawng lo.

Kan titi a, thu ho tak tak kan sawi a, a karah NLUP chungchang kan zep tel bawk a; a hmang thiam leh thiamlo inkar hlat tur zia chu a sawi nasat ber a ni. Engpawh sawi ila, min chhanglo anih vek pawhin a ‘seih’ chuan ka lawm a ti kim tawk em em bawk.

Kan sawi duh zawng a inangin passenger dang biak nan hun kan neilo dun hle a, khawkar kawnga chaw einaah leh thingpui inna velah pawh kan inzui chawt a ni ber mai.

Karloah kan tum ram chu kan hnaih ta hle a, a thlen nan darkar tlemte bak hun kan nei tawh lo. Hun remchang a ni tih hriain khua kan thlen hunah pawh kan inhmuh zel theih nan address-te ka’n dil a, min pe a, kei paw’n ka pe a. A address ziahna lehkha them chu a bo palh hlauin ka ipte chhungril berah chuan ka ak tha hmak mai a ni.

Ruah tla sep sep chuan kawng a ti nalin driver chuan fimkhur a ngaih thu a sawi chamchi reng a. Ka thiannu thar pawh chuan driver chu tlan muang tur leh fimkhur tura a chah mawlh mawlh lai chuan thawklehkhatah thawm ring tak chuan ka beng a verh hawk a, ka mit hmuh pawh chu a thim zui ta nghal bawk.

Ka mit ka men leh hmasakna ber chuan min va’n tihrilhhai tak em, ka bulah chuan nurse pathum leh doctor pakhat hian min lo hual a, ka marphu chu uluk tak hian an lo ngaichang reng chu niin. Chutia ka harh leh chu an lawm em em a, damlo dang buaipui tur chuan min kalsan ta a.

Chanchin ka han ngaihchan chuan Sumo khan kawng thlang feet zahnih teh meuh hi min lo lum pui tehreng a nih chu. Passenger zinga panga chu a hmunah ka pawh chhawnloin an lo boral nghal a, chung zingah chuan ka thiannu thar pawh chu a hming langsar ber zingah a lo tel nghe nghe.

Chu thu runthlak em em mai ka han hriat hnu chuan ka nun ram hi a chau hnawk a, mu-leh-mal pawh ka nei theilo. Tih-tur leh tih-loh-tur pawh hre hrangloin ka bing muai muai a, ka hliam a nat em avangin kar hnih chhung chu pawn chhuak loin khumah ka mu nghe nghe a ni.

Tichuan zawi zawiin ka dam chho a, ka rilru hmasa ber chu ka theih veleha ka thiannu thar fam changta thlana kal chu a ni.

Chutia ke-a ka kal theih hnu chuan ka lo tum tawh ang ngeiin thlanah chuan ka va zawng ta a, kan zinkawnga a address min pek ang chuan thlan tharlam ho chu ka chhiar thla zel a. A tawpah chuan ka hmu ta…

‘KAN THEN TAK’

BRENDA L. DANIEL

KUM – 24

THIHNI – 14.8.2011

Ka mittui chu dan rual a nilo, midang hmuh hlauin ka inthup hram hram a. Damkawr tih takah chakna ka nei tlemin ka thinlung kehdarhin min khawihna chu a na vawng vang bawk si. Chutihlai tak chuan ka bula patling tawng ri chuan ka beng a rawn verh zawk a, “Mate, a nu chu a lo haw tawh dawn lo……….”.