NI 7, THLA 7, KUM 1981/ MIZORAMA MOTOR ACCIDENT RAPTHLAK BER/ 33rd ANNIVERSARY

Pasarih kan uar ta sa sa. Khawvela thil mak
pasarih chu ni 7, thla 7, 2007-ah puan a ni a.
Mizorama Kohhran lian ber Presbyterian Kohhran
chuan Synod Office thar tur lungphum phum nan
ni 7, thla 7, zing dar 7 a hmang bawk. Mizo hnam
hruaitu langsar, MNF Founder President ni bawk
Pu Laldenga pawh kha ni 7, thla 7 veka boral bawk
a ni. Mizorama MOTOR ACCIDENT RAPTHLAK BER
tuna a chanchin kan sawi tur pawh hi ni 7, thla 7,
kum 1981 a thil thleng kha a ni.
Kum 33 lai a lo ni ta reng mai. Mithenkhat tan
chuan thawnthu ang hial a ni der tawh awm e.
Mizorama motor accident rapthlak ber tia chhal
ngam chu ni 7, thla 7, 1981 khan Kawnpui daiah a
thleng a nih kha. Bus chetsual dan, a chuangte
tawngkam, a bawisawmtute thusawi leh a hun laia
chanchinbua a landante i han tarlang thar leh teh
ang.
July ni 6, 1981 tuk zing chuan Shillong
khawpuiah chhum leivak a awm avangin a vawt
phian a. Mizoram State Transport (MST) Bus
ZRX-82 pawh a chhuahna hmun tur Fire Brigade,
Jienking-ah Laison Office atangin a lo ding fel
tawh a. He bus hi service pangngai ni lovin,
Mizoram Post Graduate Students' Shillong-a exam
zo tena haw nana Mizoram Sorkar-a an ngen
chhuah a ni. Post Graduate Students te hi an
beisei aia haw tur an tam leh tak loh avangin mipui
tan L.O. Office atangin ticket hralh chhuahna siam
a ni.
Zing dar 8 a lo rik meuh chuan kal tur
passenger lam pawh an in peih thawkhat ta. Exam
zo te, admission ngaihvena haw lamte leh
sumdawngtr phurtu bus chu Aizawl lam panin a
herchhuak ta tual tual a. An thiante thlaha lo kalte
nen, passenger te chu inthlahlel tih hriat takin an
in vai liam ta a. Madanriting ah passenger an lak
belh a; tichuan, Jowai lamtluang zawh zelin driver
Chhuanvawra chuan ZRX-82 chu a tuai kual chho
ta a.
Motor lamah eng eng emaw harsatna an tawh
hnu chuan Meghalaya chu an pel fel thei hram a.
Lungalhthei phur truck pahnih in pelh fel theih loh
avangin darkar engemaw chen an ding khawtlai
bawk. Bus chu tlanpui zel chia an ngaih loh
avangin workshop ah an luhpui a. Mechanic te
chuan "In driver hi huaisenin thiam hle lo se chuan
in rawn tlan thleng thei hauh lovang ", an lo ti nghe
nghe. Tichuan, Mizoram lam panin an rawn tlan
leh a, lungmuang takin Vairengte ah chuan an riak
ta a.
Thangkhat an mu awrh tiah Vairengte chu an
chhuahsan leh a. Phai lama awm, zo bai leh
vawksa rep ei tur nei mumal lotena engphiara an lo
hisap, Kolasib a vawsa zankhat rep leh zobai tui
tak ei turin ni 7, thla 7, zing dar 7 vel chuan
Kolasib Diakkawn ah chuan an chawl a. Motor a rit
a, bungrua leh mihring khat tlat chung chuan
tukthuan eikham hnuah Aizawl lam pan chuan an
rawn tlan zel a.
Kawnpui an lut ta! Eng nge lo thleng dawn tih
hria an awm lo. Kawnpui Hmar Veng a F. Lianhlira
(F. Malsawma Ex- Minister U) te inah an lehkha
ken pein an ding zawk a. Chulai hmuna motor lo
chang, K. Sawiluaia chuan remchang ti takin
chuan a lo dil var a. Mahse, an khah taswh em
avangin, driver chuan tihngaihna a awm tawh loh
thu a lo hrilh a, a chuang ve ta lo! ZRX-82 hi mi
33 chuan theihna a ni a. Hemi tum hian a let, mi
66 an chuang a ni. Tichuan, an rawn tlan leh a;
zanlawn kawng an rawn zawh tan ta! Thui an tlan
hma in driver chuan motor steering leh brake vel
chu check in a'n ding vel thut thut a, engkim a tha!
Kawi tinah chuan an rawn duk thla ta pur pur mai
a. Helai kawng thui zia leh kawi zia chu mitin hriat
a ni. Khankawna ram riak, Pu Thangrikhuma,
Kawnpui Hmar Veng chuan hlo a thlawh lai chuan
zaithawm a hria a. Ani chuan "Ka han hawi phei a,
bus atanga zaithawm ni hian ka hria a. Bus bang te
pawh kha an beng hlawm ta awm e. Ngaihthat lohna
tur engmah a awm pawh ka hre lova, hlo ka thlawh
san leh mai a. Ka thlang zawn an rawn thlen awm
vel chuan bus chu a ri buk a. Passenger te chu an
chiau chul a. Changel tlu ri, mau auh tuarh tuarh te
leh mangang au thawm nen chuan a in thum rawn ta
nuk mai ni hian ka hria. Thawklehkhatah thawm chu
a reh duk mai a. ' E khai! An chesual a ni reng mai
a', ka ti rilru a. Kawngpui ka zuk thlen chuan tih
theih vak nei dawn a ka in hriat loh avangin feh lo
kal chan phawt chu tha in ka hria a. Mi an lo thleng
a, motor a lo tlan pawh an awm bawk a. Tichuan,
chhanchhuah hna kan thawk ho ta a ni ", tiin a sawi.
MIZORAMA MOTOR ACCIDENT RAPTHLAK BER
chu a thleng ta.
A hma lawk a an hnawl hnu, mistiri hna
thawk tur a Aizawl a kal tum kha bus hnung chiaha
Manipur truck ah a rawn chuang a. Bus chetsual
thu mi ten an lo hrilh a. Tichuan, tanpui ngaite pui
tur chuan a tlan liam ve nghal a ni. A hmuna
thleng hmasa zingah Thangrikhuma leh Sawiluaia
ten kawng an sial a. Mi an lo thleng bawk a;
tichuan, a tul ang ang an thawk ho ta a ni.
MIZO TLAWMNGAIHNA chu Mizoram in
chhiat a tawh ni chuan sawi ngai lovin a par vul
chuk a ni ber e. Tlawmngaihna definition chu chu
hmunah chuan sawifiah leh chuan a ngai tawh lo.
Rei a rial lo. Reiloteah chhiatna rapthlak tak chuan
Zoram pum chu a deng chhuak nghal a. Kawnpui a
tleirawl leh pavalai chin zawng zawng deuh thaw
chu he chetsualna hmunah hian an tlan liam a,
Kawnpui chu khaw ram ang maiin a reh ruih mai a
ni. Mitin an mahni tih tur theuh tiin kawngpui chu
lu hlir hian a khat a ni ber. 'Khawilam mi nge ni zo
zai?', tih mai tura tam an pung khawm a. Ei tur an
siam lahin daih hek suh. Ruang a puta pu ta lawp
lawp te, puana zawnte, "Kan chhungte an ni em?",
tia lo en kual tawkte leh tap rawih rawih tawk nen,
mitthi ruang lo rem tha pawl, hliam damdawiin a
phur dan tur lo buaipui te, a hmun thleng a che zui
hleithei ta lo, thi suk nei te, a rapa rap hrim hrim
te nen, mi chitin an kim a ni ber mai. Changel leh
mau hmun a ni a. Changel tlu nal zia leh maute
sep rah zut nat zia leh beng palh hlauhawm zia
chu Mizo te hi a hrechiangtu te kan ni. Mahse, chu
hna hautak zet mai chu hreawm ti hmela thawk an
awm hauh lo kha a va ropui em!
Hliam pahnih chu Kawnpui damdawiin ah dah
luh an ni a. Mitthi pawh Kawnpui Bazar ah
dahkhawm an ni. Kurtai leh thei tinreng zawrhna
hmuna mitthi ruang sawmthum (30) zet mai han
thal phung mai chu rapthlask chan a chang lo thei
lo a ni. En hreawm, en chakawm a ni ber ang chu.
Mitthi chu puana khuh vek an ni a. En duh hrim
hrim ten an keu hawng a, thenkhat mit la siam loh
lo la meng kur maite han hmuh chuan mit lak sawn
vat pawh thil awl tak tur a ni ve tho. Mahse, a thi
chhungte tan erawh chuan kuah ngawih ngawih na
tham a na ni si. A va rapthlak teh lul em!
A hma lama kan tarlan tawh angin ZRX-82
hi mi 33 chuan theihna a ni a. A let mi 66 an
chuang a nih kha. Mi 33 in an nunna hlu tak an
chan a, chuang zat chanve lai an ni nghe nghe.
Him piala chhuak pahnih (2) an awm bawk. A
hunlaia ROMEI chanchinbua a landan in Aizawl
Republic Vengah phei chuan ruang li ngawt a lut
a. Thlan lai ringawt pawh mi 864 lai an tling hial!
Hei hi Mizorama thlan lai tam ber RECORD a ni
nghe nghe. he chetsualna hmuna dam a chhuak
thenkhatte pawh mi pangngai pa ta lo hial pawh an
awm hial a ni. Statistic lungchhiat thlak leh
vanduaina rapthlak tak chu a va ni teh lul em!