SERCHHIP AUDITORIUM SAKMEK AHRANG EM NI?

Tunlai hian Serchhip Field No.I a Auditorium sak mek chhungah Thlahrang a awm nia sawi a ni a, zanrei lamah thawm mak tak tak hriat a nih bakah a hring a hrana hmu hial an awm nia sawi a ni bawk a, hemi chungchangah hian mipuiin thil chiang zawk an hriat tha a hria in Dist. Information & Public Relation Officer Pu Andrew H.Lalremruata hovin Serchhip tualchhung chanchinbu mi thenkhat ten niminpiah Sept. ni 2, 2015 khan he Auditorium Hrang nia an sawi hi an va tlawh a, thil awmdan nia an hriat tlangpui chu hetiang hi a ni.

Serchhip Field No.I a Auditorium sak mek chhungah hian hnathawktu Vai leh Chawkidar te an riak thin a, hengmite hian thla 2 kalta vel atang khan zan dar 12 hnulamah thawm mak tak tak an hre fo mai a, an thawm hriat hi zan dar 12 leh zing dar 4 inkar vel a ni tlangpui.

Chawlhkar kalta khan Auditorium chung chih phui lo thawm turin Aizawl Bawngkawn North tlangval 2 leh patling pakhat, Duata, Tea, Buanga tia an koh mai te chu an lokal a, zanlama an thawm hriat thinin a tih mut that theih loh fo avangin zirtawpni kalta Aug. ni 28 zan khan, anmahni insawidanin Zu an inrui sauh sauh a, chu Thlahrang nia sawi chu an cho ta a, mahse mak tak maiin hemi zan hian thawm a awm lova.

A tuk inrinni Aug. ni 29 zan khan zan dar 8 velah Auditorium chhawng chung Room pakhat, an mutna sir bang bulah kawngka an inkalh khum vek laiin a thlanglam tukverh, Silpauline an zar chu mi pakhat, mihring ni ngeia hriat hian a rawn keu niin a hmutu Tea chuan a sawi a, chumi hnu chuan an mutna bul lawka Plyboard an kham hnuai awng thim zing atangin mipakhat, mihring pangngai mit aia mitmu lian, a mit lehlam samin a khuh hian a rawn bih leh a, chu chu Duata an tih chuan a tlawh a, mahse tlawh fuh tur awm lovin boruak tlawh ang maiin a awm a. Chumi hnu ah chu thil chuan Duata chu a rawn bawh ta a, Chuta tang chuan Duata chu mak tak maiin a tlanchhuak thut a, a riahpui Mizo 2 te chuan an va zawng a, Auditorium atanga hla vak lo, Upa Lalhmunliana te kawmthlang, kawngpui sirah hmeichhe awrawl chiah chiah hian mipa si kha a lo tap a, chutihrual chuan Hmar Veng lama mihlim, Upa C.Petera leh Tual Upa C.Lalthiang -hlima leh an thian thenkhat te chu an zu pun a, an ni chu zan dar 9 velah rawn kalin an manbet a, mi 4 pawhin an vuanbet hneh mang lo niin an sawi.Chumi hnu ah an han tawngtai a, engemawchen hnu ah chuan a ziaawm ta deuhva, chumi hnu dar 10 velah chuan Upa C.Petera te ho chuan mihlim rual te chu Auditorium chhungah va kalin tawngtaina te an va nei a, an haw leh ta a ni.

Auditorium a riak Mizo 3 te pawh chu an riak ngam zui ta lova, Hmar Veng a Tual Upa C.Lalthianghlima te Inah an riak ta daih a, thawhlehni Sept. ni 1 khan an hnathawh tur an zawh tawh bawk si avangin Aizawl panin an haw leh ta a ni. Sunday zing dar 3 vel khan Auditorium a Chawkidar riak chuan he Thlahrang/Ramhuai hian thawm a rawn nei leh a, Mizotawng in “Khawnge mama te kha an awm?” a awn ti niin a sawi. He Chawkidar pawh hi zawhfiah theihin a la awm reng a ni.Auditorium a riak ve thin Vai ho sawidanin he Auditorium ah hian tu an nih hriat loh Mipa 4ft vel 2 leh Hmeichhia 8 feet vel a sang an hmu thin niin an sawi a, Concrete bang chhah tak tak pawh an kaltlang zel mai niin an sawi a, a chang chuan a kut ringawt te hian an mu lai a rawn ban zuau zuau thin a, zan tam tak chu thlabar takin mu mang lovin an awm thin niin an sawi. He Auditorium a an Chawkidar vai pakhat sawidan chuan zan engemawzat chu Tuboh leh Chheni hmanga Auditorium chung Ceiling rel chhutrik thawm an hre thin a, heta Mizo leh Vai riak ten thil an sawi inang- mak leh deuh bawk chu zantir lama Current eng tha vek te hi zanrei lamah chuan thim loh leh a Bulb a puak leh pawp thin a, a tuk zingah a tha leh vek thin bawk si a, chhunlama Solar Light an charge full sa, eng tha tak te hi zanlamah chuan a eng che che thei chauh zel niin an sawi. 

TLANGKAWMNA: Serchhip Field No.I Auditorium sak mek a thil thleng hi Vai chauh nilo, a hmun a riak ve Mizo ngei te pawhin an hmuh leh an hriat a nih avang hian thutak khuk a khukpui loh hleihtheih pawh a ni lova, a hmu leh hria nia insawi ngei te pawh an la awm a, chuvang chuan hetia sawi neuh neuh a awm takah chuan Auditorium a thawm awm fo mai hi enge a nih? tih te, Thlahrang/Ramhuai anga an hmuh hi enge a nih? tih te, Power Supply, zantir lam thlenga tha thin, zanrei lama tha lo tlat zel, a tuk zinga lo tha leh tlat si thin hi enge a chhan? tih te, misual awm herh thiltih a lo ni reng mai em? tih te hi thuneitu lam ten finfiah thuai thei sela, thil tha tak a ni ngei ang.

Chuti a nih loh chuan thil pawi zawk te thleng palh thei a ni a, Auditorium hi mipuiin tihkhaiah kan neih anga, kan thinhrik zui phah mai ang tih te pawh a hlauhawm.

THUBELH : Nizan (3 september) khan Sub-Hqrs. YMA Serchhip hruaitu mi 23 vel in Auditorium hi Room hrang hrangah insemdarhin an va riahchilh a, thawm engmah an hriat loh thu tukin(4th Sept) zing khan an sawi.

Blog share la subcribe ve rawh le. Enjoy.