SOCIAL NETWORK HI

Nikum tlem lai deuh khan Social Networking chung
chang hi ka ziak tawh a , Social Networking chuan
engchin nge a huam a , a tangkaina leh nun a hruai
khawloh theih dan lam te, Engtia hman tur nge tih
lam te kan sawi tawh a , tun tumah hian khatiang
lam kha sawi lovin Mizo thalai te hian eng tin nge
kan hman thin tam ber tih leh kan hman dan tamber
te hi kan tan a him em tih lam kan sawi dawn a ni .
Mithiam tak tak leh experience nei tha tak tak te
ziak /sawi chhiar a hmuh tur tam tak a awm a ,
amaherawh chu keiman a taka ka hmuh leh ka dai
chin atangin he kan thupui chung chang hi han chhui
chho ve dawn i la .
Nikum May thla ruahthimpui sur hunlai khan Saitual
atangin Aizawlah thilpawimawh tak ti turin Synod
Office leh Synod Bookroom ah te ka kal a , zing
atanga engmah ei hman lovin ka buai ve hle a ,
chawhnu dar 1: 00 velah Synod Office atangin ka
chhuak thei chauh a , Sikulpuikawn a City Bus lo
dingah chuan Bazar lam pana kal leh turin a
kawngka hnung lamah chuan ka lut a , a tlar hnung
berah chuan ka chuang ve a , Bus chu kal mai lovin
rei vaklo hi a la ding a , reilote hnuah Bus chu kal
turin a nung ta hlut hlut a , a kal dawn ruai tihah
chuan chu ka luhna kawngka ah chuan tleirawl te a
hmel en pawh a la upa lo tak tih hriat hi
hmanhmawh takin a rawn lut a , ka bula thutna
awlah chuan a rawn thu ve a , a hah hmel hle mai a ,
tui in tur ka pai em tiin min rawn zawt a , tichuan ka
tui pai chu ka intir a , a lawm hle a ni tih pawh a
hmelah a hmuh theih a ni .
Bus chu kal zelin Khatla kawn kan thleng tep tihah
Traffic a Jam a , chutah chuan tlangval pakhat
hmanhmawhtakin a rawn lut a , ka bula tleirawl thu
chu a samah rawn kekin a rawn pawt thova Bus
atanga hnuh chhuah chu a rawn tum ta mai a , chu
hmeichhia chuan a hlau hle a , “ min tanpuirawh” tih
pahin ka ban dinglamah chuan min man bet ta tlat
mai a , thilawmzia hre lo tak leh tihngaihna vak ka
hriat loh avangin ka hawi buai hle a ni . A hnu deuah
chuan chu tlangval hnenah chuan “ Enge thilawmzia
tih leh in buaina chu engpawh nise mi zingah
hetianga hmeichhia kut thlak hi a mawilo” tiin ka
han tawng chhuak a , engemaw chen kan titi hnu
chuan kan bulah chuan a thu ve ta a .
Bazar kan thleng a , chhuk tuma ka insiam lai chuan
chu hmeichhia chuan “ Ka pu , khawngaih takin kan
in thleng min thlah hawng thei angem ?” tiin min
ngen zui a , keichuan tihtur tamtak ka la neih thu leh
Saitual khua atanga thil pawimawh buaipuia kal ka
nih thu te, hun ka neih loh thu ka hrilh a , mahse
ngen tak meuh a min ngen avang chuan thlah hawn
loh chiah ka ngai ta lova, an in thlenga thlah hawng
tur chuan ka chhang ta a . Tichuan Bus atanga
chhukin an venglam pan tur chuan kan kal ta a , chu
a thianpa tlangval pawh chu hawsan hrih turin ka
han ngen zui bawk a , thu awih tak chuan min kal
kian san ve mai bawk a .
Eng ang mi nge an nih a , enge an hming tih pawh
ka hriat loh chu min ngen nasat em avangin ka thlah
dawn chu a ni a enge an buaina ni ang aw tia ka
ngaihtuah neuh neuh lai chuan chu tleirawl te chuan ,
“ Ka pu ” , tiin a hming leh an veng te, an chhungkaw
chanchin te chu min hrilh a , a pu rual ka nih loh thu
leh ka hming te hrilhin, ka hminga min ko ve turin
ka chhang zui bawk a , tichuan an harsatna chu ka
hriat chak deuh tlat avang chuan ka zawt ta a . Hreh
tak chung chuan min chhang ta a .
Kha a thianpa Tlangvala nen khan Social Networking
pakhat Facebook atanga inhria an lo ni a , vawiin
kha an vawikhat inhmuhna leh vawikhat awmdunna
a ni a , Chu a thianpa Tlangvala chuan chetsual pui
ah thlemin a duh lo a nih chuan a pawngsual dawn
tho tho thu te, a sawi chhuak a nih chuan thah ah a
vo a ni tih te chu min hrilh ta a . Ka khawngaihin
thlah tura min ngen ngawih ngawih pawh kha a lo
awm hle mai ka ti leh hnuhnawh a . Tichuan an in
chu kan thlenga , a nu leh pa te bulah chuan a thil
tawnte pawh sawi theilovin a tap hawk hawk a ,
keichuan thil engkim ka hriat chin zawng zawng chu
ka hrilh ta vek a . Tichuan ka haw san ta a .
Hetiang deuh chiah tho hian tun February Ni 14
(Valentines day ) khan Aizawlah Nula leh tlangval
Facebook atanga in chhar thar hetiang harsatna tawk
hi ka tawng leh a , heng ka thil tawn te avang hian
thil tam tak ka ngaihtuahin Social Networking chung
chang hi rilruah ka vei zui reng a ni . Mi thenkhatin
tangkai tak leh hun awl hnawhkhah nan an hmang a ,
thenkhatin hun neih zawng zawngah thil tihtur thulh
phah nan an hmang bawk a , thenkhatin zahmawh
ngialngan tak tak sawiin thlalak an in share tawn a ,
thenkhatin Pathianthu a mi kaihhruai tumin Bible
chang an in share tawn bawk a . Zirlai naupang
thenkhatin zirlai pui tuah an hman laiin thenkhatin
zirlai thulh phah nan an hmang mek bawk a . Thil
tam tak sawi tur a awm ang . Heng a nih avang hian
engtin nge hmang thiam tura kan in zirtir ang .
Facebook a fel tak leh hmeltha tak hian mi
pawngsual a thah hial pawh pawisa lo te an lo nih
theih si chuan tu hi nge mi rintlak leh mi tha chu ?
Pathian thu leh thu tha tak tak hmanga Status
update thin mahse Whatsapp leh Skype etc . lama
Oral Sex hmang hrehchuang miah lo. Pasal nei reng
chunga Facebook lamah chuan nula anga awm
thiam, mahni inchhung leh khawlaia kan hak chhuah
ngam loh tur khawpa thuamhnaw thehlep ha chunga
mi zawng zawng hmuh theih a mahni thlalak pawh
upload hrehlo . Chhungkaw nu ber chawhmeh neih
loh aia Internet Pack neihloh hlau zawk te, Patling
pui leh khawtlanga mi rawn kai ni awm taka
zahawm mahse tleirawl leh hmeichhia Inbox a an
thlalak Like hmaih miahlo te, Mipa thenkhat
hmeichhe status apiang zahmawh rawngkaia
comment sak talh te, Miin mipat hmeichhiatna lama
an harsatna leh zawhna an zawh avanga Inbox leh
Msg hmanga zahmawh buru tak tak hmanga
chhutzui ching te, Darkar 24 chhunga Darkar 18
chhung Face Book khawih nana hmang thin thlai leh
tleirawl engemaw zat kan ramah hian kan awm
avangin Social Networking hman dan hi uar taka
inzirtir kan ngai hle a ni .
Heng kan sawi te hi Facebook user zawng zawng te
chu kan ni vek lo, mahse mi engemaw zat hi
hetiang mi hi an ni tih chu a lang thei awm e .
Sawitawh angin Social Networking hi a hmang
tangkai thiam te chuan tangkai tak leh eizawn nan
hiala hmang te pawh an awm a , nimahsela hmang
thiamlo vek vek erawh chuan an chhiatpui hneh hle
thung . Heng a nih avang hian Nu leh pa , in tu leh
fate controll a la thunun zo te hian in enkawl mek in
tu leh fate hnenah hian Social Networking chung
chang a zirtirna hi i hlamchhiah lo ang u . Khawih
suh ti mahla an la khawih tho tho dawn .