THILMAK paranormal lampang vethung

hlauhawm lampang ni chiah si lo mak bawk si hi in sawi ve thung teh ang.He thil hi 2010 kuma Letpanchaung lama titi lar tak pakhat a ni a. Letpanchaung khua hi Burma ram Tahan bula awm a ni a, he thlil thleng hi Chianthakyi-a in hrang tia sawi thin a ni. Finna khawvel chuan August ni 5, 2010 khan he thil thlenna hmun, Pu Do Khan Pau-a te inah kalin thil tak tak a ni chiah em? Tih a chhuizui nghe nghe a ni.

Pu Do Khan Pau-a te hi nupa chauhva khawsa an ni a, an in pawh dapa sak lian vak lo a ni. He thil hi 2010 July thla atanga awm tan niin zan khat chu an chhuatah pen ri khauh khauh thawm leh chhuat hiat thawm an hria a, pa ber mu tui lai chu a harh hlawl mai a. Thawm awmna lam chu a han en a, mahse engmah a hmu lova. Tichuan, vawilehkhatah in hnuai atang chuan a kawr hak lai chu a rawn pawt vak vak mai a. Chumi zan chu an hlau hle a ni. He thlahrang/ramhuai hi zan lamah chauh ni lovin chhunah te pawh a thawm an hre thin a ni. Zan lamah chuan sazu chaw zawng ang maiin a thawk thin a, chhunah erawh chuan inleng awm loh laia lung rawn vawm lut thin niin an sawi.

He thlahrang/ramhuai hi a che mak thei khawp mai, Pu Do Khan Pau-a nupui vawkchaw chan laite hian a chem hman mek leh a vawk chaw sahchhan hman lai mekte hi a la sawn a, chhuatlaiah a dah daih zel. A huangtau ang reng viau niin an sawi. Thawm engmah nei miah lo hian an bangte hi pawn lam atang a hrut kual vak zel niawm a ni. He thlahrang/ ramhuai thawm avang hian anni pawh inah pawh riak ngam lovin hmun dangah te an han riak ve thin a. Mahse mak ang reng tak chu hmun, “Hmun danga kan riah pawhin min rawn umzui zel a, mu thei lovin min tibuai zui zel a ni” tiin Pu Pau-a hian a sawi.

He thlahrang/ramhuai chet dan hi khawchhunga pa thenkhat chuan a tak a nih an ring lo a ni awm e. Nikhat chu pa pakhat hian a cho va, a inhrosak lai tak chuan ramhuai chuan a rawn bei thut mai a, a taksa hmun hrang hrangah a beng vak vak mai a ni.

Amah chotu apiang chu a vel hrep zel a, mahse an cho loh chuan mi tina zawngin a thawk lem lo niin Pu Pau-a hian a sawi.

Tum khat chu an huanah hmuh theihin a inlar a niawm e. A hmu tu an thenawmte chuan, “Fiah tak chuan kan hmu lo…. Mahse, feet 2 vela sang, dum ngel ngul, sa tha tak a ni” an ti. He thlahrang/ramhuai lo chhuahna chhan nia mi tam zawkin an sawi dan amah Pu Do Khan Pau-a ngeiin a sawi dan chuan tum khat chu an nupain an ramchhuak a, luikam lungpui pahnih inkar atanga to chhuak changel kung lianzet mai patling pawmkhat tia lawih mai hi vawk chaw atan an la a, he changel mak em emna pakhat chu patling pawmtia lai chu a nihphungah chuan rit ve tak tur hi a ni a. Mahse a zang em em thung a. Chuvang chuan mi tam zawk chuan he changel leh ramhuai hian inzawmna mak tak an nei ang a, he ramhuai hian a rawn zui haw aniang an ti a ni. Thil mak ve leh deuh mai chu he thlahrang hi changel an hawn zan atang chiahin a lo che ve tan a ni.

Amah Pu Pau’an a lo chhuah dan nia a ngaih ve dan thungah chuan, tun hmain Thingzung(khaw hming) miin an nu hi an lo dawi a, hetianga thil a rawn thlen takah chuan an rawn sut leh a. Zia awm lam chu an pan deuh mahse an tha chhuak thei tak tak tawh lo a niin a ngai a ni. He thlahrang/ ramhuai hi 2010 July thla vel khan a che deuh ber a, tawngtai mite tawngtaina azarah thawm hi a awm zui ta lo niin an sawi.

THU BELH: Mizote hi chuan hetiang thil lampang hi thlahrang/ramhuai hi kan ti vek mai zel thin a. Mahse para-psychologist ho te hi chuan chi hrang hrangin an lo then ve a. Hetiang anga buaina siamchi ang hi chu ‘Poltergiest’ an tih ang chi ah hian an dah deuh a. German tawng a ‘noisy spirit’ tihna ani a( German tawng in hriat belh leh ta..😁). An ngaihdanah chuan mihring thlarau lam ai mahin ramhuai hnathawh, ‘supernatural force’ lampang thil niin an ngai mah zawk a ni.

Share la subcribes verawh le. Enjoy.