Tlan chhia ang!!!

Phuahchawp ni lo, a taka an tawn ngei post leh mai ang aw. A ziak tu hian a ziah phuailuai deuh hlek avangin tlem tlem ka edit deuh a, min lo hrethiam dawn nia.

Kum 2001 kum kha a ni a, kum 25 mi tlangval hawklak leh zuang zang tak hi ka ni ve a, thiante nena damdawi te pawh lo khawih ve zauh zauh tawh ka ni bawk a (zêp lohvah chuan) khang hun lai chuan che bawrâw ve thei tak ka ni. 

Damdawi kan tih dawn hi chuan mi awm lohna lai hmun zawnte a ngai thin. Zan dar 11 velah kan thiante pahnih Siama leh Thara(hming lem vuah) te nen chuan damdawi tihna tur hmun remchang tak tur chu kan zawng a, thianpa Thara zawk chuan “Kan thlanmual thlang thingbuk hnuai kha a remchang mai lawm ni, tumah an kal ngai lo tho a,” hi a rawn ti a,Siama chuan “Naah a tih chi dawn ami, nikuma kan veng hmeichhe tleirawl in awhhlumna thingkung te kha a ni sia, ka hlau deuh reuh e ah, tunlaiah sawi thawm a awm lehnghal bawk si, ka țih riau a nia,” hi arawn ti chhuak a. 

Kei lah pek chuan in ti huai fahran mai hian “Sawi thawm mai mai, a ho lutuk, chutiang a awm tak tak lo ang, kal ru, tah chuan a tha ang,” ka ti sam êt a, (Let leh lawk ila, damdawi an tihna hmun tura ka sawi hemi te veng thlanmual thlang sir deuhvah hian thingkung…

engthingkung ber pawh hriat loh ah hian an veng nula tleirawl hi a bialpa in a rai, a neih leh duh si lo avangin a lo inawkhlum tawh a, chu nu thla chu a hrang thin tiin an sawi bawk) chumi thingkung hnuaiah ngei mai chuan kei chuan ka duh tlat pek a, thianpa Thara hlau chung chung chu kan hruai lui ta alawm, a hmun kan zuk thleng chu engmah hmuh tur phei chu a awm chuang lo, a reh ruih mai a, mahse full moon zan ang maiin thla erawh chu a eng em em bawk. 

Thuthmun tur te siam rem fel sauh sauh in kan kekawr ipte ami damdawi te chu kan phawrh chhuak ta a, No4 lar țan tirh lai te lo ni bawk nen, khang kan hun laia no4 khawihtheih chin kha chu kan damdawi khawih pui te lakah chuan changkang leh hausa takah min ngai a, chutah thianpa Siama chuan syringe pathum lai chu a pai bawk a, thianpa Siama hi che fair tak a nih avang hian engmah in hman țawm hi a duh ngai lo,

kan hman tur theuh tiin syringe te pawh chu min lei kep thin a, chutia kan damdawi tih tur te kan han siam fel hnu chuan kan ti țan ta alawm, kan tih tirh te kha chuan chutiangem em in a thawh tur angin a la thawk lo, mahse rei a rial deuh hnu chuan kan damdawi hnathawh chu a lang țan ta a, kan kai țan a, kan meng phili phung tawh mai a, mut te a ti chhuak a, thiante pahnih an chahthlak hnu lawkah chuan ka chatthla ve ta alawm….

chutianga kan chahthlak tak hnu ah chuan dar 1:30 vel hi niin ka hria(ka harh a, ka sana bun ka en chuan) chiang vak lo hian ka harh nghe nghe a, kan mutna chung thingbuk deuh chu chiang lo riai hian ka han hmu thei a, chuta ka han hmuh chu, chu thingbuk tak zar leh lam pharh tak mai ah hian hmeichhe pakhat kawrvar uk lam deuh tawh ha, a sam a sei avangin a sam chuan a hmai hi a khuh niin ka hria, chu nu chu lo țhuin a lo faifuk rât rât mai a, 

kei chu ka la harh chian vak loh leh ka mitvai mai mai a nih ka rin avang chuan eng teh ualah mah ka ngai lo, a ngai bawk chuan maimitchhingin muthilh zai ka rel leh ta zui a, mahse khatia kan muhil leh chiah kha engemaw hian min mawlh a, ka muhil nghet zui ta reng reng lo. Ka che sek mai a, a chang leh ka saisir a, a chang leh ka bawkkhup thul, a mut that theih loh hi a ni ber. 

Chutih lai tak chuan ka ngaihtuahna atang chuan ka harh chhuak hlawl a, thianpa Thara’n kanveng hmeichhe tleirawl in awhhlum hrang a sawi thu kha ka hre chhuak a, ka mu lai chu ka țhu chhuak nalh a, ka thiante ka en chu an lo muttui nasa mai si, Thara phei chu a lohnar kûk kûk leh nghal a, a hnar lah kha a faifuk deuh zawngin a lo hnar leh ta nghal a,ka ngei lutuk chuan ka tlawh zâwt nghe nghe a, 

ka tlawh tih pawh hre chuang lo chuan a la hnar zui zawm zat a, chutih lai tak chuan kan chung zawn thingbuk chu a rawn che luih a, ka han en chiang chu hmeichhe pakhat ka mitvai emaw ka tiha kahmuh kha, chu thingzarah chuan muangchanga rawn kal phei hian a rawn chhukthla a, kei chuan mak ti deuh leh mit tla lek lo hian ka lo en reng mai a, a rawn chhukthla zel a, 

chutah keimahni lam hawi zawng chuan a rawn in her a, min rawn pan ta mai a, kei chuan ka lo la en reng a, inawkhlum nu tê kha a ni thei mai ang ngemka lo ti rilru a, chutia ka awm lai ka ngaihtuah na atanga ka harh thût chu ka tirilah hlauh na in min man ta, ka hmul thi a ding ûr ûr a, ka mur chhuak vek bawk a, 

a nihna takah chuan ka hlau phut a nih tak ber mai chu. Kan lam a rawn pan hnai telh telh mai si, ka thiante mu lai chu ka zuk sawi “Thiante u harh ru” tiin ka zuk sawi nawk nawk mai a, thianpa Thara zawk phei chu a harh thei tawh lo, kan damdawi ti khan a hna a thawh tawh avang chuan, 

thianpa Siama zawk chuan “Umm, eng nge?”a rawn ti fan raih a, kei chuan “Tho la, heta tang hian kal vat ang,” ka ti a, ani chuan”Ngati nge?,” tiin phang chap leh mit nuai nawk nawk chung chuan vai deuh chuan a rawn tia, kei chuan chu nu lam chu ka kawk a, thianpa Siama hawi phei va hmu chuan a phu dawrh a, a kat nawk a, “Lawmawm, thlahrang a nih saw, 

TLAN CHHIA ANG,” tih a rual a, kei chuan “Thara hi,” ka ti a, Siama chuan “Thara tih a hun tawh lo, a awm awmin awm tir ang, kal ang, tlan chhia ang ka tih chu mawle,” a ti țeng hlut a, mahse keichuan a tawp nan tiin “Tharek” tih pahin na tawk chuan ka zuk tlawh leh zawt a, chuti chung pawh chuan a la harh zo ta chuang lo,

 “Imm hmmmhhh” tih pahin ka tho chhuaklawk a, thianpa Siama hnungah chuan ka tlan chhe ve ta a, tlanchhiat pah chuan hnung lam ka hawi phei leh kher chu, ka thil va hmuh chu ka râp hle mai, a hmai a samina khuh zun chu thlifim rawn thaw chuan a rawn chhem kiang a, a hmai a puam uk a, mihring damlai hmel pawh pu tawh lo hian adang bul mai a, a mitmu pawh var pup mai hian min lo en hru mai hi a lo ni a, 

ka hlau lutuk chu theih paling kawhin a chak thei ang ber hian kan tlan tak tak mai a, ka hma-a thianpa Siama tlan pawh chu ka pel phei fua fua mai a, engtik laiin nge kan in kathlen a, engtik laiin nge ka khum ka thlen pawh ka hre lo, ka khua te a sik hluah mai a.

A tuk khua a lo var te pawh chuan ka la harhve lo, chawhma dar 11 velah chuan ka harh a, ka bulah chuan ka chhungte leh thianpa Siama te chuan min lo kil bial laih mai a, ka nu chuan “Bawiha, nizanah eng thil nge in tawh a, nizan khan in i rawn thlen khan i dang vek mai a, i khua sik nasa mai a, a tia,”ka țawng hma chuan thianpa Siama chuan”Thlahrang kan hmu alawm,” a lo ti pek a, 

ka chhungte leh midang ho hma ah chuan nizan kan thil tawn engkim chu Siama nen chuan kan hrilh fai ta vek a, chutih lai tak chuan thianpa Thara nu leh pa hi an lokal a, anu in min hmu chu “Lawmawm, nizan Thara a lo haw ve miah lo a, a awmna chin in hre mial em, enga ti nge enge awmzia in va awm teh laih ve,” a rawn ti lut a, 

keini chuan a zan lama kan thil tawn te chu kan sawi hnu chuan kan thil tawnna hmun kan va kal chu thianpa Thara chu bawkkhup chung hian a lo mu a, thi ang mai hian a lo awm a, kan han en chiang chu a thaw leh a mar chu a la awm, a rang a rangin damdawi in kan pan pui nghal a, ka rilru chuan ka in thiam thei lo, chatthla chung pawh khan lo pawm tho ila, 

paw chung khan ka lo tlan pui daih lo a ni ka ti a, ka in thiam thei mawlh lo,thianpa Siama chu ka va kheuh a, pawnah chhuakin kan in chhuahchhal dun a, a hun takah thianpa Thara kan va hmu chu a lawmawm, vanneih a siamin a dam chhuak hlauh mai a, 

khata tang khan kan thian ho pawh chuan kan damdawi tih țhîn kha kan thlah chiang in kan sim chiang hle mai. Tunah chuan he thingkung hi a awm tawh lo, midang dang pawn he thingkung bul velah hian an hmuh thin avangin an kit tawha ni.A suankual theih tawh e