MIZO TLANGVAL SIAM GAME HLAWHTLING TAK MAI CHU

MIZO TLANGVAL SIAM GAME HLAWHTLING TAK MAI CHU

| August 17-31, 2015 : July thla chawhnu lama publish, ‘Bajrangi Bhaijaan’ mobile android games chu playstore-a download theiha dah a nih atanga kar hnih hnu lawkah mi nuai thum chuangin an download tawh a, Google Play ‘new free games’-ah pahnihna a ni mek a, action bik free games-ah pakhatna a ni mek bawk. Chu mai a la ni lo, Google Play-a free games awm zawng zawngah 13-na a ni mek; ranking hi active users leh download tam zawng atanga siam a ni ber. He games siamtu hi Chaltlang tlangval Kima @Mizohican a ni a, July ni 11-a tihchhuah a ni.

Nikum kum tawp lam khan India rama mobile games development company lar ni chho mek ‘FITH Media’ company chu a thiante nen an din a; tun thlengin playstore-ah games pasarih an publish tawh a, an games siam hmasak pahnih - ‘Nikal Padi: Slumdog Plumber & Pipes Puzzle’ leh ‘Where's My Cat’ tih games-te hi India rama gaming ho zawng zawng hruaitu lu NASSCOM Game Developers Conference (NGDC)-ah ‘Mobile Game of the Year’ atana nominate a ni hial tawh.

Heng bakah Kima hian Mahindra & Mahindra,Kingfisher, ESPN leh Axe Deodorant te tan games a lo siamsak tawh thin a ni

He games hlawhtling tak ‘Bajrangi Bhaijaan’ hi Salman Khan film thar ber ‘Bajrangi Bhaijaan’ behchhana siam a ni a, a film phei chu bollywood film zingah sum hmuchhuak tam ber a ni mek. ‘Bajrangi Bhaijaan’ games hi Salman Khan team-te ngenna angin a film an tihchhuah hma lawka siam tan a ni a, he games siamin kar hnih chhung chu zan tin an tlaivar!


He game hi Kima idea, a plan leh a design vek a ni. ‘Bhajrangi Bhaijaan’ game an siam hi a hit em avangin SKF (Salman Khan Film) production-ina an movie release leh tur ‘Hero’ atan game siam turin an ti nghal a, tunah hian a siam hna an thawk tan mek a ni. Amitabh Bachchan leh Salman Khan te tana game pahnih an siam chu an peih fel tep tawh a, chu mai bakah celebrity dang 4 tan game an siam mek bawk.

Subcribe and enjoy.

Post a Comment

0 Comments