KHA ZAN KHA AW,!!!!.....

Ka la hre reng mai......
.
Mami Varte-in ‘Damlai Pâr’ tih a sak lai chuan hmanhmawh baklengin Vanapa Hall chu ka lut fel ve chiah a. Ka bekang zawrh lai ka ahna ipte-pui chu an khualchhawn (usher) nula hmeltha zet mai hnenah chuan ka hlan hmasa te te a, dawhsân hmaa lo lâm suau suau-ho zingah chuan zuang lutin ka'n lam zuang ve nghal zawk zawk a.
.
Eng emaw chen ka lâm hnu chuan ka tih makmawh thil hriat chhuah ka nei. Dawhsân cheimawina atana an pangpar khawi zinga a bawr tha ber chu ka pawt dawk zawk a, dawhsan vengtu (guard) phar buai lai chu chuhin ka zuang chho zawk a. Ka lo châk em em thin angin, a changtunu chu ‘Chibai buk’ in pangpar chu ka han hlân a. Chu mai chu duh tawk lova ka’n lampui leh hrâm chu ka tifuh ta lo tawp mai!
.
Mami Varte meuh lampui tur chuan ka hmel chu a tha an lo ti tâwk lo nge, mipui lam hawia ka lam su tawrh tawrh lai chu an vengtupa chuan ‘target’ remchâng lutuk hmu-ah a inngai ve ta mai a nih hmel, a tiang lianpui mai ken chuan ka mawngtam hlui ve tawh tak chu dimna tel miah lovin a’n rawn hlap mai tehreng a! A na tih piah lam a ni !!! Mipui zingah chuan zuangthlain ka’n lam zui lehnghal tawrh tawrh tho va. Mami Varte a zai lai a ni miau tlat a!
.
Vawiin khan ka ipte-pui ti-âng hawk thei khawpa tam ka bekang zawrh lai chu Aizawl chhim lam Falkawn lam tlang dungah ka va vahvaihpui a. A hma lawkah bekang eisual an lo awm nual avangin ka hralh thei lo em em mai lehnghal. Thima ka haw chu ka lo tum rilruk ang ngeiin Vanapa Hall-ah hian ka tlan lut ve ta a ni.
.
Mami chu a’n zai zo va; eng hla nge a sak leh ang tih mipui chu min rawn zawt a. Kei chuan hrawk phiar tawng tawng khawpa ringin ka hla duhho chu ka lo aupui ve chiam chiam a. Chutia lam leh chiam mai inpeiha kan au nuai nuai lai chuan aurinna a lo ri a, mipa aw thum mawi zet mai chuan thu a rawn puang a,
.
“ Thu pawimawh kan rawn puang lawk ang e; khawngaih takin min lo ngaithla lawk teh u” a rawn tih chuan mipui au ri nuai nuai pawh chu kan reh ta diak a. A rawn sawi chhunzawm leh a,
.
“Lalduhawma, Edenthar veng kha hetah i awm em aw? I awm a nih chuan vawiina i pa tumbu khawrh chu a lo la haw lo va, zawn a ngaih avangin in ina haw tura ngen leh hriattir i ni e; Gate pawnah an lo nghak ang che,” a rawn ti dum dum mai a !! Ka thin a rimin ka zak kher mai!
.
Ka lâm chiam tumna rilru leh kan in lama ka pâ tumbu khawrh lo la haw lo buaina chu a inmil lovin a va han ‘timing’ lo tak em aw! Eng pawh ni se, ka haw vat chu a ngai a ni.
.
Mami Varte-in hla a rawn sak tan leh lai chuan Vanapa Hall chuahsan tum chuan hma ka la ve nghal a. Ka bekang zawrh lai chu an khualchhawn hnenah chuan a lo la awm mial a. Ka in-ak a, mipui innêk nulh nulh chu ka hleuh chho ve ta a.
.
Mipui phur vang lai a ni bawk a, pawna chhuah tum chu a khirh ngei mai. Mipui rawn luh thlak tum eng emaw zah an awm bawk, chu chu a chhuah tum pawlin kan nêk bawk, ka bekang vên ngai bawk, ka hah ngei mai !
.
Ka vanduaina kawng dang a lo thleng leh ta tlat mai. Ka pumraw te lutuk hi mipui karah hian ka lo buai phah fo tawh thin reng a. Ka hma chiaha kal tawnzau sen ha zakkha chu ka hip tawk chiah mai a lo ni a. Kalsawn thei dinhmunah ding hek lo vi, ka hah lutuk boruak mamawh thaw hluam hluam mai chuan a zakkha rim chu ka hip lut ngheng ngheng lo thei si lo. Ka lu a kai tan ta; ka lu a kai dan te lah chu sum tam tak senga kan bawh ruak ruak ang chi ‘lu kai’ dan nuam hi a ni hlawl lo lehnghal.
.
Eng nge maw ti ti chuan kawt chu ka han chuang chhuak ve ta hlawl mai a. Vanapa Hall kawtah chuan tâng phur motor (Prison Van) chu a lo ding ruau mai a. Tlangval hawklak rui an lo khung mawlh mawlh mai chu lo niin!
.
Chu Prison Van ka va hnaih lai chuan ka zakkha hip nasat luattuk luakchhuak chu ka tuar zo ta lo; a sirah chuan ka’n bun nghek mai a, ka nuam huai huaiin ka hria. Mahse, ka’n ding chhuak tur chu patling kut bawr hrawl tak hian ka kawrawmah min rawn thamin an motor-ah chuan min nawr lut ta mai a! Thawm bengchheng tak karah chuan ka tawng an ngaithla der si lo.
.
Khatia tlangvala pumpa, an bula ar chaw ka’n pe ngheng mai kha ka rui hle-ah an ngai a lo ni. Ka’n hawi tawk tawk a, ka thianpa min lo nghaktu nen chuan kan inhmu thei ta hlauh a; mak tihhmel taka min lo thlir chu ka va hmu vuai a.
.
“Lock-up-ah kan rawn lam mai ang che,” min rawn ti a.
.
Aizawl police station lock-up-ah chuan keini an mi manho chu kan thil ah ang ang chu kawl thatsak turin min phawrhtir diat diat a. Mi dang chu phone man tam tak tak leh wallet puar tak tak an lak chhuahsak laiin kei chu ka ipte-pui, bekang hlira khat leh ka pawisa, ka ticket lakna bâng Rs20 chu min laksak ve a!
.
Ka inngaihtuah nasa mai. Tukin zing kha ka rilru-ah a rawn lut a. Ka bekang zuar chu ina haw hmasa lova Vanapa Hall-ah kal nghal ka tum thu ka sawi laia ka phurzia te kha aw! Ka pa lah chu tumbu khawrh turin Nghalchawm ramah a liamthla ve bawk a nih kha.
.
Rei pawh ka la awm lo, kan YMA hruaitu fel tak tak pathumin min rawn hruai chhuak a. Thubuai engmah awm lova ka chhuak thei ta mai ka lawm lutuk chuan police duty-ho chu ka bekang zawrh lai fun khat theuh ka pe nghe nghe.
.
Kan In lamah chuan thenawm bengvar tak tak an lo pungkhawm a; a thlamuanthlak takzet mai. Ka pa tumbu khawrhna lam ramah chuan ka pa zawng chuan kan veng thalai eng emaw zah chu an lo liam tawh a lo ni a.
.
Pawn lama awmho chu an thum hak a, “Kan zawng che a sin. Khaw’nge i kal a?” tih thawmah chuan in chhunga awmho chu pawnah kan tlan chhuak huk a. Kan zawn lai mek ka pa chu a ipte-puia tumbu lian pui pui ak chungin kan kawtah chuan a lo ding heu mai a!!! Kan hlim tlâng ngei mai.
.
Thenawm hnai inlêng eng emaw zah la awmte nen chuan TV enin kan inkawm khawtlai a. TV-ah chuan Vanapa Hall-a Mami Varte zai chu an lo chhuah tha leh (Playback) chu lo niin! Ka lâm ing-euh tak tak lai te, dawhsâna ka tlan lawna Mami Varte ka han lampui lai te, an Vengtu-in dimna tel miah lova ka mawngtamah tharum a lo thawh lai te, engkim mai chu a lo lang chiang em em mai a!!! Kan inlengteho nuih chu a za ngei mai !
.
Chutah le(h).......Mak ti lutuka kan ‘Eu’ dialna thil chu a rawn lang ta le!! Khatia kan lam suk tawr tawr laia putar lam uar ve tak pakhat, ipte-pui ak chunga lam ka lo en chian lem loh kha KA PA chu lo ni rengin!! Kan lamna velah chuan kan lo insu thlu lo chauh chauh hi a lo ni! Mami Varte hi chu kan pafa bialnu intawm a ni ve reng a.
.
Thil awmzia ka hrethiam ta kuarh kuarh mai. Ka pa chuan khatia a tumbu khawrh zo kha Reiek road lamah rawn chuang chhuakin Vanapa Hall chu a rawn pan ve a; inhre tawn hauh si lovin kan pafa chuan kan lo lam nghek nghek mai a lo ni!!
.
Kha zan zet kha chu kan khawtlang leh kan inlengte an va zahawm duh tak em aw!