KA LEATHER JACKET KA UI EM EM KHA!!!!

He thu ka rawn post leh tur hi, ka thianpa pa tawn a ni a, tunah amah hi rawn lengin, ama tawngkam chhuaka rawn post a harsat avangin paper-ah min ziah sak la, post tur ka neih loh laite a ni si a, fb lamah ka lo post sak ang che ka ti a.

A ziah zawh rual leh a ziah ang ang a rawn post nghal ka nih angin tihsual/ziahsual a awm pawhin min lo hrethiam dawn nia. He thu hi kan naupan lai vel khan a lar angreng tawh a, hria pawh in awm mai thei. A hrang tehchiam lova, chutianga hlauhawm tih tur pawh a ni lo. Ka type lai hian ka naute(ka zawhte tih pawha ka koh phalloh)pawn ka malchungah bawk chungin min rawn melh chhova, a hrethiam ve ni awm zia zangin zawi rata meow-in a mit a chhing siar siar a, i hrethiam ve ami ka ti pawh, thawp sata meow leh in a hmai ka kawrlum chhungah a rawn in thawlh lut kak kak mai.

Pehhel lovin keima tawn angin ka ziak mai anga. Kum 1969 rambuai zawh tawh a ni a, mipui lah kan zalen in, nuam kan ti a, favang awllen lai tak a nih vangin, a tu pawh chuan hlim hmel kan pu sang reng mai a. Ka u phai awm lo haw chuan leather jacket dum nalh tha deuh mai hi min lo hawn nghe nghe a.

Khang hun lai kha chuan leather jacket nei pha chin hi chu nula duh duh thlang thei ah kan la in ngai hlawm a. Nula tuai nalh, dawng tha tak tak chai thlu thei ni ain sawi pha chin kan ni nghe nghe. Kumtawp lamah chuan kan thianzaho panga chuan kan thianpa Siama(hming lemvuah) jeep nei thar lawm ang u, tiin kan in rawt phur khawp mai a, a pa te dilin a pa pawh chuan a remti a, mahse a thar te a la ni si a, dim leh fimkhur turin min chah bawk a.

Thianpa Rema(hming lem vuah)chuan selesih tlang dungah khian nula chhelo deuh a awm a nia, han rim ve ang u, kan ti a. Chumi zan chuan thianpa Ngura(hming lem vuah)bialnu kan rimpui hmasa phawt a. Dar8:30 velah chuan mahni ina haw tlang mai lovin thianpa Siama te in chu kan pan ding ta hlawm a. Apa chuan fimkhur tur chuan min chah lawm lawm bawk a, a nu lah nise bang lo, khalh dim turin a lo chah sek bawk a. Zan dar 8:40 vel chuan Selesih pan tur chuan kan tlanchhuak ta a, durtlang road chho kan tlan lai khian thli vawt a thaw ver ver a, a vawt duh angreng khawp mai. Khang hunlai kha chuan durtlang road chho khi a la ramhnuai in a la pik angreng a, in pakhatmah hmuh tur pawh a la awm lo.

Leitan thlen dawn tuna kraws an dahna bulah khian nula pakhat kawr var ha hian min lo phar a, a hmel han en chuan nula pang ngai ve tak, hmai fai veng vawng tak hi a ni nghe nghe a(let leh lawk ila Selesih leng tura kan chhuah hma khan thianpa Siama nu buh zu siam kan in nghe nghe a, khami khan ka lu a ti hai chiai chiai lehnghal a) ka bulah ka thuttir a, kei lah nula chaih peih leh lawm ve tak ka lo ni bawk nen, ka ban puam chuan chu nula ban puam chu motor in min sawh zawng chuan ka va nek zauh zauh a,

mak deuh mai chu kha nula kha khatia ka va nek vel lai khan pangti lum reng reng a nei lo tih a hriat a, a vawt hian a vawt thler mai a, amah lah a dang bal mai si, keia pek chuan "Nula, i va han vawt ngiak nguak ve, tun zan khaw vawtah te eng nge i tih a, vawt i ti ve lo ami, kawrlum lah i ha bawk si lo" ka ti chu, chu nula chuan "Ti ve thove, ka kawrlum ka thianten min hawh sak a, hak tur ka nei lo a tin ni" a ti chu kei chuan "Nula, khawilaiah nge in awm" ka ti a, ani chuan "sawlai kawi maiah sawn" a ti a, kei lah pek chuan "ka jacket i ha hawh duh em, haw lmah ka rawn lam leh anga" ka ti a, ani pawh chuan "a pawi chuang hlei nem,

kan in lampang kawng a ni thova" a ti a, a tawng tlem thin angreng, mahse ngahihthat lohna pawh ka nei chuang lo. Ka leather jacket thar ka u min hawn chu ka hak tir ve ta mai a, an in zawn kan thlen chuan, "hei hi kan in a nia, ka lo chhuk ange" a ti a, a chhuk a, a lut a, a lut lai te pawh kan hmu chiang hlawm hle mai. Kan haw lampang kan tlai deuh tawh avang chuan a tuka len paha lamah kan ti ta mai a. A tukah chuan thianpa Rema nen chuan kan han kal ta a.A chhungte chu an lo fel khawp mai a, min lo dawngsawng tha em em mai bawk a.

Kei chuan "nizanah in fanu kan rawn phur haw a, a vawt a tih avangin ka jacket ka hak haw tir a, len paha rawn lam ka tum ka ti a",

a nu chuan thingpuisen sa ver vawr min pek pah chuan "kan nula naupang zawk maw" a ti a, kei chuan "nula naupang zawk leh upa zawk in nei a ni maw" a ti a, a nu chuan "nei e, a u zawk hi thla3 liam ta khan min boralsan a, a nau hi tunah chuan khawiah emaw a chhuak zawk a ni" a ti a, kei chuan "a thlalak in kawl em?" ka ti a, a nu chuan "kawl e, kan en tir ang che" min ti a, min entir a, a upa zawk accident-a boral ta zawk chu ka kawk ta, a nu chuan mak a ti nasa mai. A awih lo bawk si. Keini thian dun lah kan phawk em em mai a, ka hlau rilru deuh lehnghal a, mahse ka thiana bula hlau deuh anga han awm kha a zia lovin ka hre bawk si.

Chil han lem kawk pah chuan a thlana kal ka rawt ta a, a nu chuan min kalpui a, a thlan kan zuk thlen chuan, a thlan lu chung, kraws chungah chuan "KA LEATHER JACKET KA UI EM EM KHA!" a lo in tar a nih chu. La ta lo chuan ngawi rengin kan thiandunin kan haw a, khata tang khan veng hla-a nula rim chu kan zuam tawh lo.