ZAN RAPTHLAK

Ka thil tawn ka han sawi leh ange thu ziah thiam lo ka nia chhiar har deuh mai thei min hrethiam dawn nia. Thingtlang a cheng leh seilian ka ni, kan khuaah hian sawrkar hna chhe te ka thawk ve a, ofis thil pawi mawh lam tur leh lehkha pawimawh submit tur hian kan pu ber hian min tir fo thin. Tlangval awm chhun ka nih vang nge kan pu ber hian hreh hle mah ila, kan pu ber hian min tir chhuak leh nge nge thin.

Nikum hmasa fur lai khan ofis thil pawimawh tifel tur leh lehkha pawimawh submit turin kan pu ber chuan min tir chhuak leh a, hreh hle mahila hnial ngam ni hek lo, phur lo zet chuan ka inkhal chhuak leh ta. (kan khua a tang hian khawpui hnai ber hi bike chuan darkar thum vel ka tlan thin) Zing chaw ei hma a kal ka ni a, hman hmawh lutuk lovin ka tlan bauh bauha, ka tih tur pawi mawh vel chu tifel zung zungin chawhnu her dar hnih velah chuan ka inpeih fel hman hram.

Ka tih tur engkim felfai taka ka tih zawh hnu chuan ka nite inah ka peng kawi zawka, ka nite in ka thlengfel vel chiah ruah tam em emin a rawn sur buan buan ta mai, han kal lehna chi zia zang ni hek lo thingpui tein ka thu ta renga, ban mai a tum loh hmel bawk nen chaw te ka ei leh te te phawta, dar ruk a rik meuh chuan ruah sur pawh a bang fel ta. Haw nghal mai ka tum lai chuan ka ni'n "a tlai tawh sia riak mai rawh, naktuk zing karah i phei mai dawn nia, nangmah chauh ini bawk si kal kawngte pawh a chhe thei, zan leh nghal i ngaihtuah awm lutuk ang" a tih pawh chuan "min ngaihtuah suh, kal kawng a chhia nih leh ka lo let leh mai ang, a hla vak lo bawka ka thleng thuai mai ang" tiin kal nghal mai ka tum a, ka ni rilru erawh anuam zan lo tih ka hria "va fimkhur hle rawh aw" tiin min chah leh hram a, chhang ta lem lo chuan kal san ve ta.

Ruah a sur tam em a vang chuan tuihawk ten bawlhlawh leh lungthil a len chhuah te chu kawng dungah a in zam darh niai a, chhum lei vak vel te chuan kawngpui dung te chu a bawh deuh chiai bawk nen hmanhmawh lutuk lo chuan ka tlan zela. Ka bike head light chuan a chhun thui thei lo kher mai, a vawt deuh vur nen ngaih that loh rukna riau ka la nei zui, let leh mai te chu ka duh rum rum thin. Mahse ka kal laklawh tawh let thei ka ni lo, ka hma lam chu ding tak maiin ka pan phei zel a.

Chu tia fimkhur taka ka tlan zel lai chuan thawk lehkhatah ka bike chu a thi ta mai, khua lah chu a thim em em mai bawk si, ai mitthlawn chu nep te ani ringawt. Ka bike a tang chuan chhuk nghalin ka mobile phone eng chhete hmang chuan ka han check, en vel a chhiatna awm reng ka hre bawk silo. Ka han kick ngial pawh chuan a nung thei der lo mai, ka beidawng tan ta. Ka ni'n "riak mai rawh" a tih khan lo riah mai tur, ka inhaw tak zet, let leh turin ka kal hla tawh lutuk, bike daha kea kal tur lahin khua a la hla ropui mai si, eng ka nei silo ka mobile phone lah battery a low tep tawh, khaw thleng min daih dawn lo hrim hrim, ka inchhir tak zet ani ka riak mai lo kha.

Ka beidawng tih ngaihna hre lo chu kawng sirah ka thu hnawk mai a, motor rawn kal nghah ngawt mai loh chu tih theih ka nei ta lo. Ruah lah chu sur leh tum niawm hrimin khawpui a ri dur dur mai bak si, thli lo kal tur ang maiin kawlkil te chu a eng zen zuai zuai bawk nen ka mang ang tak zet ani. Beidawng taka ka thut lai chuan motor rawn tlan thawm ka hre ta, a head light eng pawh ka hmu ta ngei mai, ka thaw huai mai. Mahse a rawn thleng thei ta reng reng lo mai, enge a chhan a accident ta mai em ni? Accident ta se a thawm ri ka hre awm tho si, motor ngei chu ani tih ka chiang lutuk a reh ta mai kha mak ka ti ngei mai.

Ka chhungte tal biak tum chuan ka phone chu ka han hmet eng signal reng a awm ta lo ka tah a va han chhuak tak em aw! Chu tah le patling phun deuh bul bul chunga ka lam pana lo kal thawm ka hre ta, ka phone eng chuan ka han chhun hmuh tur reng tumah an awm chuang si lo. Kha tia phone ka hmeh en chiah khan tawng bul bul thawm pawh a rehve zui nghal. Reife ka nghah hnu pawh a engmah ka hriat zui tak lohah chuan ka phone eng chu ka ti thim ve leh nghal mai a, ai mitthlawn ang maia thim hnuaia minute 5 vel ka thut hnu chuan thli vawt tak mai khawi lom a tanga lo thaw nge tih pawh hriat loh chuan min chhem vawt sung sunga, chu tah le a hma aia ring zawkin patling aw thum chher chhut mai a phun leh bul bul ta mai, hlauhna chuan min rawn man ta chat mai, ka khur der der a, ka hmulthi a ding sung sung ta mai. Ngun leh zuala ka han ngaih thlak pawh chuan enge ansawi tih reng ka hre thei lo, tawng ri erawh a fiah hle thung si. Tunah chuan mipakhat mai ani ta lo, mi sawm chuang mah tur an ni ta, tawng mur mur karah chuan tapri leh natuar rum ri a inpawlh nuka, naute tapri niawm tak chhuak em em hian a tap chiam bawk si nen, ka hlau tak zet ani. Ka bul vel te chu thisen rim thang huam mai rim a nam vung vung bawk si nen, kawng dungah te chuan mihring insul pel zut zut ang mai hian an kal ri chhet chet bawk nen chetna chang pawh ka hre tawh lo, ka khur hlawk hlawka.

Reife engmah hrelo ang maia ka thut hnu chuan ka inthing harh lui hram hrama, ka bul vel thawm maksak pui pui a tam em vang chuan ka phone eng chuan ka han chhun kual vel, ka rei le(h) ka awmna ber kher chu karkhat liam mai khan he hmunah ngei mai hian sumo a accident a, a chuang zawng zawng deuh thaw anthi vek, mi pahnih erawh andam chhuak hram mahse tun thleng hian mipangai anpha ta lo. He accident hi a rapthlak ngei mai, lengkir kham chheng chhia, chhawrdawh pathum inthuah sang em em mai, an ruang pawh hi hruizen hmangin harsa tak chungin kan la chhuak thei hram ani. Thenkhat ril a chhuak pur mai, then khat lubung bawk, hmel hmuh tlak lo khawpa chhia deuh vek an ni. Ka thutna hmun lah ruang kan mut tlar tir dulna ngei mai kha ani, ka imitthlaah chiang em em mai hian mithi ruang hmel hmuh tlak awm lo kha rawn lang zut zut ta mai a le....ka rap ngei mai.

He hmun a tang hian rang taka chhuahsan ngei ka tum ta, harsa tak chungin ka ding khur hlawk hlawka, ka bike chu indap chawpin nawr sawn ham hram ka tum a, chu tia bike ka nawr sawn dawn chiah chu tek rawn tla de zuai zuaiin kawl a phe zawr zawr bawka, khawpui a ri dur dur bawk nen chu ta ka thil hmuh chuan min va han rap teh lul em! Ka thlarau a thlawk chhuak hialin ka hria. ka bik ka bawh thlu rawka, chet pawh ka che thei lo, khawnge ka tha te kha an awm zawh tak? Tek tla de eng zawr zawr khan chiang em em hian ka bul cheta ding chu a rawn en zawrvzawra, chu hmeichhe hmel chu rapawm tak ani. A sam thur buam maiah te chuan thikhar a khang tet tuta, thisen thang rim a nam huam mai bawk si, a khabe lah a sawi ang nuaih a, a hnar a hek huam mai bawk si, a mit meng nawlh kha ni rapawm a var pupa, zau em emin a meng bial kulh in min melh runa, a hmel kha lungngaih thurun thlak tak, vei nei ang mai in ka hmu. Ka hlau lutuk kha ka mit sulha enmah ka hre zui ta lo. (He hmunah hian driver tam takin thawm mak sak tak tak an lo hre tawh thina, buaina neuh neuh an tawk fo thin. A hrang tia ansawi ka hre fo tawh bawk thina, mahse ka hmuhve ngai loh vangin ka awih sak duh ngai lo, kha ta tang khan zan tlan tumahin an ngam ta lo kha ani reng a)

Engtia rei nge kha tia engmah hre lova ka awm ka hre chiang chiah lova, minut10 vel chu anih ka ring. Ka han harh chuan ka han hawi vel ruai a, a thim si thim thamah chuan ka tha neih zawng zawng chu sawm khawm in ka bike chu ka kuai dinga, khur dur dur chung chuan ka han kick leh ta, a nung thei mai lo, vawi thum ka kick hnu chuan a nung ta ka va lawm tak em! Hawi kir leh tawh miah lo chuan chak em emin ka tlan haw vang vanga, in ka thlen chuan ka chhungte an lo mureh thiap tawha, kawngkhar chu ka chum dawt dawta, ka ni'n a lo hawng min hmu chiah chu a phu nasa lutk a te that reng ani. Chu zawng chu ka hriat theih chin a bak ka hre chhunzawm ta lo.

Ka han harh meuh chuan tlai lam dar thum a lo ri der tawh mai, engmah hrelo khan ka lo awm rei em ani.