KA NULA RIM VE KHA

Thlahrang/Ramhuai hi chu a tawng tu dik tak ten an sawi leh a sawi thiam tak tak ten an sawi hi chuan beng a ti tlai bik thin riau. Hmanni pawh ka thiante rawn leng hian an thianpa pakhat a rawn hruai hian ama tawn ngei a sawi a. Kei lah ka beng verh zawng tak lo ni leh zel bawk nen a sawi zawh tawh hnu pawhin lehkhapuan leh pen chawp sak seuh seuh in ka ziah tir leh chu...ka rawn chhawpchhuah sak ang che u.

Kum 2007 kum ami tawh kha a ni a, thingtlang khaw pakhat(khaw hming thup) ah hian ka patea te an awm a, ka patea fapa(kei aia u, ka cousin) hian nupui a nei dawn a. Ka pa chuan 'Ka kal thei dawn silova, i nu nen hian han tawiawm ve ang che u,' min tih avang chuan ka nu nen chuan ka patea te awmna ah chuan mo lawm tur chuan kan kal a.

An khua kan thleng chu rin aiin a nuam reuh phian hman laia kan pi leh pu ten an lo hman thin thenkhat te pawh hmuh tur a la awm zeuh zeuh a, kei lah mi in zir mi ka nih vang chuan chu tiang thil hlui awmna te chu zir chian ka duh avang chuan zah pawh dawn lovin ka pan a, ka zawt a, ka zir pah a, a neitute pawh chuan chuti na na na chu tiin min hrilh hreh bik lo. Rin aiin ka tlangnel phian a, "Khawpui tlangval ve si, rin aiin a fel phian, khawpui tlangval changkang te chu an in duh tawk thin hle a nia, a changkang vak lo a niang," min ti lah bang lo, an rin ka an loh avang chuan min kawm tur te hian puitling deuh deuh entirnan kum upa lampang kum 60 leh 70 chuang te chuan min kawm tur ringawt te hian ka patea te in rawn pan tawk te an awm nawk thin. Chutih karah chuan kan pa rual vel ni awm a ni, a hmel en chuan kum 60 chu a pel tawh tih vel a ni, a rawn leng a. I hmuh duh deuh tur Pu Khawma(hming lem vuah) chumi chuan a nei a, zanah ka rawn hruai che anga ka kalpui dawn che a nia min ti a.

Ka pa chuan "Nang lah hi rin aiin i tlangnel mah mah lo maw?," min ti hial, chu pa min rawn kawm tu Pu Biaka(ti tawh mai ang hming lem vuahin) chuan "A tha ve alawm a fel a, tlangval fel tak a ni," ti chuan min fak der ve chiam a. Mo lawm tura kal kan ni na chu keimahah chuan mo lawm lam a lang tawh lo...hmanlai thil lam zir tura zin hi ka ni ringawt tawh...😬😬....a nupui nei tur ber ka unaupa pawh chuan "Josh-a chu ka nupui neih ni te hian thil hlui zir turin i lo chhuak leh luh ange," min han fiam ve deuh a, kei pawh uang thuang deuh chuan, "Chutiang te pawh chuan ka awm lo ang tih a sawi theih miah lo a nia," ka ti ve zauh a, kan nui dar dar a.

Zanah chuan Pu Biaka chuan Pu Khawma te ina kal tur chuan min rawn sawm ta a. Kan kal ta alawm. Pu Khawma te in chu rin aiin a țhui in a hla phian a, an in kawngah chuan an khaw field te pelh a ngaih mai bakah chu field thlang mi ram in pawh la awm lohna ah chuan dil lian vak lo...

(khuah chawp tiin Pa Biak a'n a sawi) a thuk lam pawh ft 8 vela thuk hi a awm a, a awmna hmun kha mi tlawhpawh vak lo a nih hmel a bul vel chu rin aiin a hnim angreng khawp mai a, kal pah chuan kan thlek vel a, Pa Biaka chuan Kum 2 liam ta khan hmeichhe tleirawl pakhat a tlahlum tawh a, a ti chauh. A bak a sawi lo. Kei pawh chuan chu bak chu ka zawh chhunzawm chuang lo...kan va lenna tur ringawt chu ka rilrua a awm vang a ni. Kan va thleng chu hmanlai pi leh pu ten an lo hman thin thil chi hrang hrang chu a lo rem thup a, an bangah te chu an thlahtu bul pasaltha in a se kah lu te, sial lu te leh chi hrang hrang te chu an lo tar far mai bawk a, hmuhnawm a tling khawp mai. Ka lehkhapuan leh pen te chu phawrh chhuakin chu a in neitupa Pu Khawma chu ka han zawt vel ta alawm, rin aiin biak a nuam in a thil min hrilh te kha chik takin ka zawt a, min hrilh hreh bik lo.

Chutia kan in kawm lai chuan min kal pui tu pa Pa Biaka chuan "Josh haw lam chu nangmah in i lo haw thei mai ang tiraw, in leng ka nei dawn tih ka theihnghilh a, kawng chu i hriat tawh tho kha, ka lo va hawsan mai ang che," min ti a, kei pawh chuan ka hnial hran lem lo, ka haw tir ta a. Ka zawh chik em avang chuan rin aiin ka leng rei a, min hrilhfiah zawh meuh chuan ka sana bun chu ka en dar 11 hi min 5 velin a lo ri lo chauh hi a ni a. Kei chuan kan in hrilh zo tawh tho ti leh ka lenna ten mut an duh tawh ang tiin mi hmai kan zah ve deuh a, ka haw ve mai a. A kawng chu Pa Biaka min kal pui tawh ang khan ka hre tawh tho a, thla a en em avang chuan phone light on lo chuan ka kal ta alawm...chutia ka thil va hriat ka va zir ngaihtuah chunga ka kal lai chuan an khaw field chu ka thleng țep hi a lo ni a, rilru ah eng dang mah a awm thei chuang lo ka tih tawh kha ka thil va zir chauh lo chu. Chutia field ka thlen hma deuh hret chuan kawngthlang lam dil awmna lam kawngsirah chuan thut hmun rem deuh si hian lung tauh lawt an tih hi a awm a, chutah chuan hmeichhe pakhat kawr var ha min hnungchhawn zawnga țhu hian a lo țap leh feih feih thin a, kei chuan ka rilru chuan 'A chhungte nena in ti thiam lo' a nih ka ring a...

kei chuan amah lam chu va pan in "Thiannu, zan rei tawh lamah enge hetah i tih, i hlau lo ami, misual te i hlau lo ami, an sual mai tur che asin,"ka ti a, mahse ka thusawi bengkhawn lo ang mai chuan a țap leh feih feih thin a, kei bawk chuan," Nih thiannu ka rim mai ang che aw, pawi i tih loh chuan, in kawm ila, Joshua ka nia, Josh tiin min ko dawn nia, nang engtin nge ka koh ang che, "ti chuan ka bia a, ani erawh chuan a melh pawh min melh chuang lo...a sam chu a awm china sei niin, a sam chuan a hmel chu a hliah deuh vek a, kei bawk chuan biak phet tum chuan," Thiannu tunge i hming?, "tiin ka lo zawt ve sek bawk a, a ni lah chuan min hre lo awm ang mai chuan a ngawi ngal mai a. Keimah bawk chuan" Khawi maw i sam te chu, i hmel a tha em tih te pawh kan hre ve duh alawm, ka rim zui duh tak che in, "tia fiamthu deuh pah chuan a sam han keu sak ka tum chu rang zet mai hian ka kut chu a rawn vuan vat a, ka banrekah tak chuan a hmer a, a hmer na angreng khawp mai a," thinrim vin țawng deuh chuan "MIN KHAWIH SUH" a ti bung hlut a.

Kei lah in la pa ve chi lo ni bawk si nen chuan ka ti thei ta bik lo, ka kut a vawnna lak thlak pah chuan "I eng pawi nge ka sawi a, khitianga min vin ve vak ringawt a, rim tlak pawh i ni lo, ka hawsan dawn che," tia thawh tuma ka in bengkan lai tak chuan zawi muang fan raih chuan ka lam a rawn hawi a, ka va hmu thut a, ka phu dawrh a, ka kat nawk mai a, kha ka nula rim kha mihring pangngai a ni lo tih chiang takin a hmelah a lang...."A hmel a dang vek a, a mit khur a thuk dak a, a val kual ruih mai bakah, a hmui a duk ruih mai bawka,"hetiang lam ka la tawn ngai loh avang chuan ka hlau lutuk kha awmdan pawh ka thiam lo...ka tawn vawikhatna a nih ang bawk in tawn leh pawh ka duh tawh lo. Ka hlau lutuk chu ka ti ril a khur țan a, ka hmul thi te ding in ka mur chhuak vek mai a.

Mihring ina kan thil hlauh ber leh ka duh loh ber kan hmuh a, ka tawn hian ka hlau a ni tih hriata kan awmdan ang zawng zawng chu(chhiartuten amahah hian in chan ta ula, engtin nge in awm ang) tih ang vel zawng zawng chu ka pu deuh vek tawh. Chutah chu nu chuan "Khu laia dil khu i hmu em? Ka tlak hlumna," a nih khu tia vin awka deuhva min hrilh lai te pawh chuan a khurh hian ka khur zawih zawih thei,  thla nei ila chuan ka thlawk chhuak nal nal ang....ka rilruah chuan kan kal lama Pa Biaka'n khu dilah khuan tleirawl pakhat a tla hlum tawha tia a sawi kha min hriatchhuah tir zawk nghe nghe a. Ka hlau lutuk chu thawh lawka tlanchhiat mai ka tumna lamah a hma zawnah tak mai chuan hnung zang sawh dawtin a zang thal awrh chuan ka la tlu leh ta deuh deuh...thawh tuma ka in beng kang, chutah ka hlauh leh zual turin a ti emaw ni hmai in si lo chauh chuan a lo kun hniam chu niin mi hi a lo melh kul mai a, ka hlau lutuk ka chiai a, nikhawhrelovin ka awm nghal a.

Ka harh leh chuan ni chu a lo kang sang ut tawh mai a, ka bulah chuan ka nute, ka patea te ho chuan min lo kil bial laih mai a, tuman a chhan erawh min zawt chuang lo...

ka nu chuan "Bawiha, i tha maw?," min lo ti a, kei chuan "Tha e, nizan khan....,"tia ka sawi zawh hma chuan ka patea chuan" Josh a tawk sawi suh, kan hre vek, a hunah tak ka rawn nangching che a, lawmawm ah ngai zawk ang aw,"tiin min rawn pawh chah sak a, Pa Biaka pawh lo awm ve in, Pa Biaka pawn in thiam lo tak chuan "A pawi ngei mai, ka tihpalh a ni, ka thiam loh a ni, inleng ka nei dawn tih ka theihnghilh a, theihnghilh lo ila, ka kalpui tawp lo tur," a rawn ti ve bawk a...kei chuan "Pa Biak a ho lutuk, awm ve thei alawm mahse eng nge thil awmzia hi, kha tleirawl dila tla hlum kha tiang khan a in lar thin ami?," tia ka zawh chuan ka unaupa nupui nei tur ber chuan, "Zep lohvah chuan saw lai bul hnaiah sawn a thla an hmu fo thin alawm, mahni chauhva kal ngam an awm ngai hlei nem," a rawn ti zauh pek a. Ka nutei chuan ka unaupa chu a hau leh rih...a sawt tawh chuang silo.

Khata tang khan tun thleng hian veng dangah pawh nise nula ka rim pawhin tlai lutuk ah ka haw tawh ngai lo. MIPA MAHNI NI ILA KA HLAU, TAWN LEH KA DUH TAWH LOH VANG A NI.