KA THIANNU CELL PHONE

Tlai khat ka hnathawk haw chu ka thiannu, thingtlàng nula pakhat chu kan inah chuan a lo awm a. A lo len fo avàngin chutia a lo thu chu mak ka ti lem lo a, mahse, a hmèla hlauhthawnna lo lang ka hmuh chuan eng emaw thil dik lo a awm, tih ka hmuh chuan mak erawh ka ti deuh a.

Ka thut fel hma hma chuan nula chuan a phone, thla khat vèl a hman tawh chungcháng chu min hrilh zung zung mai a. Zàn tin deuh thaw, dàr 12 vèl hian amaha rawn èngin, mi pakhat hmèl hi a rawn lang thin a. a tawng ri nawk nawk a, mahse, a sawi erawh hriat theih a nih loh thu te chu hlauh hmel takin a sawi a.

A setting vèl dik lo a nih ringin ka’n check vèl a. Mahse, thil fel lo engmah a awm bawk si lo.

” Khawi atanga i neih nge? “

” Ka thianpa ta ania. Ka leisak a.” a ti a.
Chumi lai la la chuan a thianpa chu ka’n bia a. Ani pawh chuan chutianga a rawn awm thin thu chu a lo sawi ve ta mai a. Ani paw’n a thianpa pakhat hnèn atanga a lei chhawn a nih thu chu a sawi leh bawk a. Mak ka ti ta hle mai. Ka awih lo letling zawk a ni!

A tukah chuan hna thulh thakin ka buaipui ta a. A tàwpah chuan kum hnih dàwn thaw liam ta a Bus accident kha kan thleng ta daih mai!

Kha Bus chesualah khàn mi 16 lai an thi a. A ràpthlàk takzet a ni! Kha chèt sualnaa ruang hlawmtute zìnga ràwl thar pakhat chuan passenger boral te zìnga pakhat phone a lo làk chu a lo ni a. A latu pawh chuan thla khat vèl bàk a kawl ngam lo a. An accident hun àwm vèl, zàn dàr 12 rik dàwn hian a phone chu amaha rawn nungin, mihring mangang te ruai ruai thawm te, hlau leh thlabar tih hriat taka te rawng rawng thawm te chu a rawn ri thut mai thin a. A screen chu a rawn var pup ringawt a, a ri ringawt a awm si a, a lo hlau thei hle a. A mangang chuan a hralh ta ringawt a.

Tichuan, mi pathumin an lei chhawng hman a, a nei apiangte’n buaina an nei chho ta zél a ni!

Chu phone-a thla lo lang thin chu a mak khawp mai. A tàwpah chuan lemziak thiam hnènah ka kalpui a, thu dik a ni nge, ni lo fiahna’n a lem chu ziahtìr ka tum ta a ni.

Lemziak thiam nèn chuan chu phone chu kan mutpui ta ran mai a. Dàr sàwmpahnih rik dàwn chu thinphu dep dep chungin kan nghàk ta ran mai a. Chutah, a hun a lo thlen chuan phone chu a rawn var pap a, mi pakhat thla chu a rawn lang leh ta a. Ka mi rawih pa pawh chuan a lo hmu ve a. Mak kan ti chu kan inen dun ta reng mai a. Minit khat ral hnu-ah chuan phone chuan ngai a awh leh ta a.

A tukah chuan lemziak thiam chuan chu thla lem chu a ziak ta a. Pawisa ka pe a, ka kal ta nal nal a.

Kha Bus accident-a thi ta te thlalak kha ka khawn kháwm ta a.

A tàwpah chuan phone-a thla lo lang thin pa chu ka hrechhuak ta a. Kha chètsualnaah khàn a lo thi ve ngei a. A phone làksaktu khàn hliampui tuar chunga a phone a lo mutpui lai kha laksak a tum a, mahse, a ni la harh bawk si chuan a lo phal ikhaw si lo a. A ni, ràwlthar chuan a aw hle mai si a. A bula lungtum chu a la lawk a, a chhu hlum ta mai a.

Tichuan, a phone chu a làksak ta a lo ni a. A mak viau mai.

A phone chu a ui ngang a ni ngei ang. A neitu apiangte umzuiin, a tibuai ta zèl a. Hetia, a thil tih tha lo tak mai kan han hailan tàka chuan a phone-ah a rawn inlàr ngai ta lo a ni!