Heng Bangladesh, Myanmar, Nepal, Bhutan leh ram tenau lutuk lam chu dah tha in, ram hausa leh lar leh thil ti thei ve si, Air Force lama dinhmun tha lo zualte chauh kan sawi thuak thuak ang!
US chakna thuruk chu an military tha-Marine, Army etc te reng reng khu US Air Force (USAF) lamin an cover hneh thin em avangin, lei leh tuipui piah lam boruak thlengin America chu khawvelah a chungnun phahin, a vawk lal len ngauh ngauh theih phah ta thin a ni. Air Force lama chak sawi chuan US leh Israeli Air Force te chu top-ah an lang zelin a rinawm. Chutih rualin Russia chu a tha lo tih theih a ni hauh lo, mahse, an hmanraw tam tak chu Soviet Union-Cold War vanglai siam leh chher an nih hlawm vangin, India-in a lei Mig-27 te, Sukhoi fighter te chu "Kuang thlawk thei" tih fiamthu nana hman phahin a tla deuh reng mai. Indo lawng a lei chhawn pawh kangmei a chhuak an ti fo mai!
Russian bomber Tu-95 Bear an tih mai Turboprop bomber te pawh US B-52 bomber aia upa tawh, 1956 daiha siam te an ni nual mai. Ram 200 chuang awmah pu Google han zawt ve teh! Air Force chakna leh theihna a zirin, indonaah pawh an chak zel mai dawn a ni. 1962 a India leh China indonaah khan India-in Air Force chaknain China kha nuai ta se, China an chak loh a rinawm. Tun hnuah India chu Air Force ah tunlai ber ber jet-fighters hmangin a inthuam hnuin, Pakistan pawhin Kargil War ah a hneh lo nasa a nih kha! 1983 a US-in Greneda a run khan Air Force nei tha vek ho, darkar 48 chhung lekin a hneh a ni. Chuvangin Air Force neih that a pawimawh hle.
Infiamna khawvelah talent nei viauin, chakin sek phiar fiat fuat, ram hrui truat mah ila, ei tur tha nei khawpa inenkawlna tha- sum leh pai leh inthununna tha kan neih chuan si loh chuan a chak fo theih lohva, champion cup leh medal a hawn fo theih loh ang maiin, Air Force tih chang tlun a nih loh chuan lei lam indona mualah sakawr leh fei ki bar leh ngunhnama in sah, invih sen zuai zuaina hun kan kal pelh tawh avangin, awmzia teh chiam a nei tawh lo a ni. Chuvangin Air Force tih phuisuia tih chak hi a pawimawh hle.
7. CANADA:
G-7 ah pawh tel pha mahse, Air Force lamah a chak lo tlat. Ottowa chu ava inthlah dah em! Canada hian indo tur zawngin a inbuatsaih ngailo niin alang. Canada ram hian NATO member dang anglo takin, indona ralthuam a lungkham ber tlat lo. NATO member ten Hornet-Super Hornets F-35 thlenga an duh laiin, ani hi chuan a ngaithah a, chuvangin Royal Canadian Air Force (RCAF) chu an tha lo, tih a ni! Canada chuan Sea King helicopters fleet nei mahse, airborne a tling ta meuh lova; thlawh chhuah dawn pawhin rei ngial siam that a ngai an tih pek chu! Hetianga Air Force a tihchak loh vangin RCAF zawm chak an tlem phah a ni, an ti. Canadian Defense Minister chu Herjit Sajjan-Punjabi a ni.
6. Gulf Cooperation Council:
Gulf ramah chengin an ram leilung hausak teh lul nen, tuisik aia oil tlawmna hmun an tih Gulf Cooperation Council an tih member Saudi Arabia, UAE, Bahrain, Qatar, Kuwait Oman ram te chu Air Force nei chhe ram an ni. US thlazar hnuaiah awmin, US Military Base ah an innghat nasa hle. Tin, an lalchhungkaw thisen kai vangin, mi thiam leh tha thlan chhuah an ni thin loh vangin, heng ram Air Force hi a lak tlak vak loh, tih a ni. Heng ramho hi Sunni muslim tamna niin, Shia muslim ram Iran chuan a duh hun hunah a vel thei ang!
Saudi Arabia chuan US siam F-15 leh F-16 hmangin Yemen rama Houthis helte chu "Decisive Storm" tih codename hmangin a bei ve a, an Air Force te chuan helho an bomb thelh nasa in, khawpuia mi inneihnaa pungkhawmte an bomb ta mai mai a! He dicisive storm ah hian jet fighters 100 dawn a tir tawh a, helho hmun a bomb fuh hlei thei der lo. Inneihna hmunah te bomb thlakin mi 700 an hliam a a nih kha! Khawvelin an sawisel luai luai. June 2016 atangin mi 7,600 an bomb hlum tawh a, building lah an bomb chhe nasa rapthlak! Sum an ngah vangin Saudi Arabia chuan Tornado, Typhoon fighter, F-15's leh F-35 te pawh nei mahse, Air Force lamah mi thiam a neih loh chuan an chak ngai lo vang.
5. SUDAN:
Sudanese Air Force thlawhna reng reng chu Soviet Era a siam deuh vek an ni. Hman deuh khan hel beihna lamah Parades ah a thlawh tir a, helhovin an lo kahthlak sak daih! An ram chhung cargo aircraft-transport flights te pawh Soviet Union hun laia siam deuh vek a ni. Kum 2011 ah khan Sudanese Military Senior official/ hruaitu zat ve deuh thaw chu thlawhna tlaah an thi. 1990's vel atangin Chinese Trainer aircraft an hmang ve leh tan. President al-Bashir chu human rights nasa taka bawhchhia tiin, International War Crime Tribunal lamin man turin thupek an chhuah.
Tunah Iran siam prop-driven drones a lei ve a, he UAV hian enthlakna (reconnaisance) leh ralthuam a pai ve a, mahse, heng drone te hian an target an kap fuh thin lo, an ti.
4. SWITZERLAND:
An ram zalen lutuk vangin Air Force neih tul an ti lo nge, Italy leh France-in an air-space an ven pui thin. Ni tin maiin 0800-1800 chu business hours ni mahse, a baka Swiss airspace chu ram thenawmten an lo Buh pho ar ven pui mai thin a ni! Kum 2014 ah thlawhna hijack a nihin, an Air Force ten an thlawhna chu an tinung (scramble) miah lo, an ti.
3. PAKISTAN:
Nuclear neiin in ham puar viau thin mahse, India chuan a sawisa leh thin! 1965 indo tumin India chuan a ralthuam-Air Force thlawhna te kha British siam Folland Gnat Trainer Aircraft hmangin, US thlawhna neitu Pakistan chu a hneh tlat! Chutih lai chuan US siam F-86 Sabres an hmang daih tawh, mahse, India chu hnehtu a ni! Chumi atanga indona chu khar fel a ni lova, 1971 ah te, Kargil War ah te hlet rawn nei mahse, Indian Air Force an umpha rih lo.
1971 ah India leh Pakistan indona vangin West Pakistan chuan East Pakistan chu chanin, tuna Bangladesh ram khu a lo pian phah ta a ni. Pakistan Air Force that tawk loh vangin, East Pakistan a Pakistan sipai 90,000 te chu India kutah "Ka pu sai sawm kap, dawl zawr angin ka zawr" tiin, an in surrender a ngai ta a ni! (Mizo zingah "inpe" tihna "surrender" tih hi "sulender" ti a lam tlat kan awm thin a, R lam rik talh tur a ni e)
1999 ah Pakistan chuan India a rawn cho leh ta. An inbeihna chu tlangsang tak (high mountain altitude) niin, sipai uniform hnim hring duk (coumaflage) ain vur anga var an hmang uar zawk! India sipaite chu Kargil tlang sangah Indian Air Force te chakna chuan a dah zung zung thei, chutih laiin Pakistan Air Force ten an sipaite an chhek ve hlei thei lo.
Pakistan hian Air Superiority fighters leh Airborne Early Warning leh Control Plane an tih ang chi-UAV an nei ve lo. Indian Air Force chu Fleet tih theih tura an chet theih laiin, Pakistan erawh chutianga che tur a nei vak lo. Indian Air Force hi Pakistan Air Force aiin ralthuam leh hmanruaah thuam that zawk an ni.
2. SYRIA:
Kum 2011 atangin a ram chhunga indona-civil war vangin an buai hle a, indona tur jet fighters tha an nei lo. Syrian Air Force te hi Soviet Era laia indo thlawhna hmang tute an ni. Syrian airspace chu a duh duh te tuallenna-mupui anga an thlawh duai duai theihna vek a ni ber mai! Zan lamah phei chuan ai mit thlawn ang maiin an ram boruak veng him thei lovin an awm a, a duh duhin bomb an va thlak thawr thawr zel mai a ni. Chuvangin Russia chuan lainat leh khawngaihin Syrian air-space ven nan kum 2013 atangin SAM-300 leh SAM-400 chu phur lutin, a vensak ta ringawt a nih khu! Syrian Air Force -ground attack aircraft chu thiltithei tak a awm lo, an ti.
Kum 1948 ah Israeli Air Force naupangte chuan duh tawkin, engin Tirhkoh Paula a chhun thlukna Damascus khawpuia Syrian jet fighters awmte a bomb chhe teuh. Israeli Air Force ten an va tihchhiat hi Indopui 2 hnua Germany airplanes te kha a ni, an ti.
Kum 1967 ah Israel ram chu Arab tangrual inti Jordan, Egypt, Syria, Iraq leh Lebanon ten an beih rawn dawn tumin, Israeli Air Force chuan Syria Air Force thlawhna 2/3 chu che hman eih lohvin an bomb chhiatsak vek bawk. Ni khat thilthuah Syria chu kut bengin an awm phah ringawt!
Kum 1982 ah Lebanon War ah Syria Aircrafts te chu tihchhiatsak leh teuh an ni. Six Day War ah thlawhna 150 chuang an hloh a ni. Israeli Air Force te hian Syrian MiG-23 fighters 24 a kahthlak sak bawk. Hetianga Israeli Air Force chetna hi "Bekaa Valley Turkey Shoot" an tih phah hial a ni.
1. NORTH KOREA: Tunlaiin US nen indo tur angin han Keipui hliam huk dur dur mahse, eng ual a ni lo vang. Nuclear leh Ballistic Missile a nei tih ni mahse, North Korean Air Force chu a tha lo hle a ni. Korean People's Air Force te chuan Rocket lam chu an ngah phian thei. Mahse, ral rama bomb thlaka lei lam sipaite cover turin Air Force a nei pachhe hle, tih a ni. North Korea indo thlawhna chu Soviet era hun laia siam niin, indo nun chan zirna emaw, flight training an nei tha lo, korean War 1950-1953 vela thlawhna vel bak, indo thlawhna thar a neih hriat a ni lo. Thlawhna chu 1,300 vel nei anga ngaih mah nise, indona hmachhawn turin flight training-na an nei tha lo hle a ni.
On 09 september 2024, at 03:26, Anonymous commented on 
0 Comments
I ngaihdan han thawh ve teh le!