SAR A ZAM EM NI?

Hmunte khua chu in za hnih lai mai an ni a. Lal Suakphunga rorelna hnuaiah harsatna lutuk awm lovin hun leh ni an chhiar chho ve zel a. Pu Suaka hi lal tha tak a ni a, a mite pawh an tha. 'Lal zai dam' tia hriat a hlawh hial nghe nghe a ni. Vawi khat pawh a khaw tlangval awmherh deuh pakhatin an chawng chen  laiin an vawk a lo philsak a, mahse engtia ti vak lovin a upate nen an zilhhau va a duh tawk leh ta mai a ni.

 Kawng lehlamah chuan sawi neuh neuh a kai ve tho mai. A upa te zing ami pu Zahuala phei chuan a lo kam khat deuh zauh tawh nghe nge a ni. Tichuan he khua an lo pem darh takna chhan chu heti hian an sawi.

Favang awllen a ni a, Hmunte lal, Suakphunga'n khuang a chawi mup mup a. Nula leh tlangval pawh an hlim hle mai. Tichuan  Upain," Chhakah chhawkhlei, thlangah phunchawng par na ngai e" an lo tih thin angin Hmunte khuaah hian nula tlangval fel leh pian tha, hmela pawha kei ka ni inti thei ve tur hi pahnih khat an awm ve tlat mai a. Nula pakhat phei chu Khuavelchhingi tiin a hming an vuahsak nghe nghe a ni. A hming dik tak zawk chu Roliani a ni awm e. Rimtu a ngah thei em em mai a. An chhungkaw dinhmun erawh a sang lem bik vak lo va. Chu nakalaiin Pahrawn a hrawn a, a pahrawn hian a ngaizawng deuh tlat nia sawi a ni nghe nghe. Tlangval inleng an neih rei deuhte hian a lo muhil hlei thei lo thin a. Rovi(Roliani) nu lah pasal neih loh hlau chi a lo ni ve deuh nen, ringhlel deuh mah se a haw tha ngam tlat lo va. Nu ber tello hian an feh dun fo va, mahse an lo hmunhma a lo ualau deuh nen a pahrawn hian remchang a la hmu mai thei lo va. Ani Roliani pawh hi an khaw lal nen sawi neuh neuh an lo kai ve thin a. Chiang taka man erawh an la awm lo a ni awm e.

Tum khat an chawngchen zan hian lo phawk deuh an awm nge maw ni, a tukah chuan a khaw thanin an thang ta a.Chutia Rovi leh an khaw Lalin tlangsel an kai zual tak deuh hnu chuan Rovi pahrawn chuan remchang a zawng ta ran mai a.

Ni khat chu Rovi leh a pa (a pahrawn) chu an feh dun leh ta a. Chumi ni tak chuan mi dang feh thawm hriat tur leh hmuh tur an vang hle a. Reilote an chawlhnu chuan Rovi pa chuan," Rovi kha, i mal ami kha vangvat em ni?" a ti a. Rovi chu a inhlim chho kawk a, a inen vut vut a. Chutih lai tak chuan  a pa chuan a va bawh ta thut mai a. Rovi chu a lo tang ve nasa hle mai. Chutah a pa chuan lalpa nena an chet dan te chu sawi mualphovah vauin a rem dan dana thlem thluk a tum a. Rovi chuan,"Nia, ka pa ka thiam lo a ni, mahse nangnena mualpho leh zel zawng ka ngam tawh ngang lo"a ti a,a mittui a tla zawih zawih a. Chu pawh chu a pa chuan engahmah a ngai lo. A tawpah chuan thahah a vau ta a. Rovi chuan," A ka pa, i thah hran ka ngai lo vang" a ti a, a chau zawkah a tang ta si nen, a tihngaihna hre si lo beidawng chu a inpe ta ringawt mai a ni.

An inzawng zo va, Rovi chuan a pa ruala haw a duh lo va. "Ka zuk inthiar lawk ang e" a ti a. Kawng thlang lamah a peng ta a.  A pa chuan nghah a ngaih dawn leh dawn loh a zawt a. Rovi chuan," Ka rawn um leh mai ang che" a ti a. A pa chu ngaih tha vak lo chuan a kal ta a. Rovi chu a thu hnawk a,  a rawn dak leh lam chuan piah lawka kawihrui te reuh te batling kunga zam kai chu a va en vang vang a.

"Aw ka nu, ka pa, heti tur hian em ni ka lo pian? Ka dinhmun hi han en teh u" a ti a, a mittui sur zung zung a. Kawihrui chuan a nghawng a hling chawt chawt a, 'Ka pa, i kiangah ka rawn kal ve e' tih pah chuan a zuang kang auh a. Reiloteah chuan Hmunte nula hmeltha chu  damlai hringnun thlakhlelhna pawh nei zo lovin ram daiah a zal ta riai riai mai a nih chu.

Zanriah ei hun a lo nih pawh chuan Khuavelchhingi an tih mai, Roliani chu a lo la haw lo va. A nu chu a mangang tawh ngei mai. Thenawm khawvengte an lo lut nak nak a. A pahrawn chuan a penna lai vel te chu a sawi a. Tlangval thenkhat a hmun thleng hmasate chuan an au an au a. Mahse thehmeh ang maiin a reh vang vang mai si. Nakinah chuan kawngthlang lama hmeichhe tawng nawk nawk niawm tak hi an hre ta a. An han ngaithla chiang a a reh leh daih zel si.

Nakinah chuan hnu chu an hmu ta a. An zawh thla ve nghal a, thui pawh an kal hma chuan Rovi ruang lo inkhai zar chu an va hmu thut mai le! A then phei chu an tawlh let deuh hial a ni.

Hemi zan hian Lal in velah thawm a nasa hle a. Inhnuaiah te vawk leh bawng an tlan lut a, an tlan chhuak leh thul. Lalpa pawh a mu thei meuh lo. Tawngvai leh hlauh nei niawm tak hian a tawng nuaih nuaih reng mai a. A pahrawn paw'n mutmu a tuah meuh lo a ni. A ruang pawh a en tha ngam lo va, mi thenkhat sawi pawh a hlawhin rinhlelh pawh a kai phah hle a ni.

Zing khaw en hnu deuh, kawl a rawn sen tan tih chuan khawchhak lamah hian chhum tlemte hi sei zet mai hian a kham phei raih mai a. An en duh hle. Rovite thenawm pu Kawla kum 80 mi pawh chuan," A mak hle mai a, enge maw tak chu a thleng ngei ang' a ti hial a . Rovi thih atang hi chuan thim hlim ah an khaw daiah tau mei chher chhi a de thliah thluah zel mai a. Ar a khuang duh tawh hek lo. Mitthi an awm chho ta reng a. Rei awm lovin an pem darh ta a ni

Share and subcribe, enjoy.