TAXI DRIVER MIMAWLPA

A motor khalh lai chu signal pawh pe lem lovin a tiding thut. A hnung ami khan rawn su palh ta se a thinrim zawkah a tang ang em? Kawng sirah, pawngang reng takin a motor a la dah zui. Passenger, man chawia a motor hmangtute pawh a hmai zah lutuk lo a niang.

Hmanhmawh takin a motor atang chuan a la rawn chhuk. Kha taxi driver mawl tak kha chu aw!-----------Hmeichhe pakhat, kum la tam lo tih hriat tak mai, a tleirawl nun hmang tan ek ek hi kan dawr zawnah kal hleithei lo khawpa rui hian a rawn pai chho tiang tiang mai. Zu a rui ngei a ni! Kekawrbul leh T-shirt nghawng zau angreng tak hi a ha. Ruah a sur zeuh zeuh bawk nen a thawmhnaw zawng zawng chu a huh vek bakah chirh a kai luai mai. A ruih em avangin a hmeichhe zahawmnate kha a lang lo chauh.

A rawn kalna lamah a rawn tlu chho satliah mai ni lovin leiah te pawh a mu nasa viau ang, a chirh kai dan enin. Kan dawr zawn pelh hretah chuan kal hlei thei lovin ruah sur hnuaiah chuan a thu hnawk, lirthei lo tlan chu en pawh en mang lo hian a ban zawi tak chuan a lo phar lawm lawm; tuma'n an uksak lo.Chutih laia ka rilrua lo awm chu- he nu chu aw, engvanga rui nge ni ang? A duh reng vang chu a ni ang a; mahse, engvanga ruih duh tlat nge ni ang aw? Chhan chu a awm ang mawle. A chhungte chu an rilru a na dawn mang e. Nge, chhungte sawi tur mumal a nei lo zawk ang? (Sawrkar zu zawrh vangah lo puh thuai thuai lo ula.)

Kan inpuang lawk ang e, kei pawh sawrkarin a zawrh hma khan a ngawl ka lo vei tawh a; sawrkar zawrh leh zawrh lo lam vang pawh ni lovin Pathian zarah ka nghei ve hlauh mai. Ani kha a hmel atang pawhin zu in nasa hmel a pu lo; ruih duhna chhan lian tak a nei a ni ngei ang. Chutia ka ngaihtuah lai chuan han tanpui lam kha keimah bakah ka bula mite khan kan tum lo; hmuhnawm thlirin kan thlir thup! Tanpui chi-ah kan ngai lo te pawh a ni zawk maithei.Chutia kan thlir reng lai chuan taxi upa ve tawh tak leh a driver mawl tak chuan min tizak ta. A bul lamakan sawi ang khian rem leh rem lovin a rawn ding.

Hmanhmawh takin a rawn chhuk, a thlirtute min rawn en zeuh pah chuan a motor-ah chuan a let leh, a pawnchhe thianghlim deuh chu rawn la chhuakin chu nu chirh kai chu a rawn hruk faisak thuak thuak.A passenger-te pawh a zah zo lo. A awmna vengte an inzawh hnu chuan thlah a duh leh duh loh a zawt;chu nu chuan remti tih hriat tak hian a lu a bu nghat.A seat hnungah chuan a luh rual rualin a mu hlawm tawp. Zu rui tih takah thei leh thei lovin driver chu lawmthu a hrilh."In hmelhriat a ni em?

Hei ..... veng chu ka nia a ti a. Khu tilaiah khuan ka passenger-te hi ka zuk thlah phawt ang a, an veng lamah ka phur letleh mai ang. An vengah chuan hretu an lo awm em ang chu maw? Rawn kal ve thei te in awm em?" a rawn ti.Kan chhanna chu, "I fel hle mai, tikhan him takin va thlah raw," tih chauh a ni.Kha taxi driver mawl tak kha a hmel atang chuan a pack ve zeuh zeuh thin tih a hriat. Ani a buaipui avang khan a sum hlawh chhuah tur a hloh nual ngei ang. Kei intifel em em khan ka tih tur tih nachang hre lovin ka lo thlir, mi zurui mai mai ka tih rilruk laia tih tur diktak i rawn tih veleh fel ka tih thu ka sawi leh lawi si. Ka va tluk lo tak che em! Kohhran huangchhunga ka rawng bawlna chu ka hlen ve zel.

Mahse, kawtthlerah leh daiah te hian ka lo hlen lo nasa. Taxi driver mi mawl pa, vawiin chu min va tizak ve, ka tluk lo chein i lak atang khan zir tur ka va'n ngah tak. I motor registration number tal ka lo chhinchhiah lo kha aw!Kei engmah ni bik si lo hian kha nu kha Zikpuiipa tawngkam takin, ral lehlam chhemthei hmanga thlirang mai, ka hmuh fuh lai a ruihna lai chauh ka lo thlirsak. Taxi driver mimawlpa kha chuan a ruihna phena thil dang tamtak inthup awm kha chhemtheia hmu fuh lai bik kan nei ang ni lo hian; enlenna hmanga zau tak kan hmu ang mai hian a hmuh kim sak vek a ni.

Share and subscribes enjoy