THE DYATLOV PASS INCIDENT

Introduction : The Dyatlov Pass chan chin hi in hre tawh hlawm e maw. Russian history a thil thleng mak leh rapthlak ber mai an tih ţhin kha a ni a. He hmun hi Russia khawthlang lama vûrin a khuh vârvo mai, Ural Tlângdunga awm a ni a. February ni 2, 1959 khan vûr tlengna hmanga tlânglâwnmi, experience nei ţha tak tak mi 9 te chu he kalkhân 'pass' hmunah hian thihdan mak leh râpthlâk takin an thi phiar ringawt mai a. He'ng ram daidar tum mi vânduai tak te hian an tum ber chu mêl ruk vela hlaa awm tlâng pakhat 0torten kal thlen chu a ni. Mahse an tum ram chu an thleng lo chiang ngei mai; a tihlauhawm lehzualtu atan 0torten tih chu helai tlâng bâwrvela chêng hnam chikhat Mansi ho tawngin "Mitthite Awmna Tlâng" tihna a lo ni lehzel bawk nên! He thil thleng mak tak chanchin hi chipchiar deuh, chhiar tham deuh lawih law law in ka'n post a nge...

Atîr takah chuan an rammutnaa thawkchhuakte hi kum 23 mi Igor Dyatlov-a kaihhruaina hnuaiah an vaiin mi 10 an ni a; mipa 8 leh hmeichhia 2 an ni. Hmeichhia pahnihte hming hi Zinaida Kolmogorova leh Lyudmila Dubinin te an ni a; mipaho hming chu Alexander Kolevatov, Rusterm Slobodin, Yuri Krivonischenko, Yuri Doroshenko, Nicolai Thibeaux-Brignolle, Alexander Zolotarev leh Yuri Yudin te an ni. He'ng tlânglâwnmi te hi Ural Polytechnic Institute (Boris Yeltsin, 1991 - 1999 chhunga Russia President pawh lo luh ve tawhna ţhin), a hnua Ural State Technical University ti-a an thlâk tâk-a zirlai leh a hma lawka graduate hlim hlawl te an ni a. Thalai lehkhathiam rual leh chak ţha, engkima inringtawk leh in 'fit' zekzawk rual ţhiau an ni a, ngaihtuahawm tak chu an ni lem lo.

Hmarlam ram bung khat Sverdlovsk Oblast khawpui Ivdel chu rël in January 25 ah an thleng a. Heta ţang hian January 27, 1959 zingkârah chuan an zinkawng chu zawh turin Vizhai chu truck in an chhuahsan ta a. Vizhai hi hmar lam biala khaw awm tâwpber a ni. Tluang taka kalzelin a tûk ni 28 chuan an zing ami Yuri Yudin chu a damlo ta tlat mai a, a lêt leh lo thei ta lova; mahse a nun a chhanhimna'na kîr leh a lo ni reng mai. He rammutna vangduaithlak takah hian amah chauh hi damkhawchhuak awmchhun a nih phah ta zawk a ni. Hemi hnu atang hian a la awm hote'n an diary-a an ziah leh camera-a thla an lâk te aţangin an hun hman chhoh zel dante hi hriat a ni a...

- January ni-31 ah tlâng an lâwn ţan.

- February ni-1 ah tlâng kaltlangna kalkhân Kholat Syakhl an thleng. Helai bawrvel tak hi a ni vanduaina an tawhna hmun anih tâk avanga an hruaitupa hming chawia “Dyatlov Pass” an tih tâk chu.

He kalkhân (pass) an thlen hian an tumdan chuan pass chu kaltlanga tlâng lehlama riahbûk sual ani a. An han kal ta chu khaw awmdan namenlovin a rawn chhe zual a, vûr thlipui a tleh chiam bawk a, khua pawh an hmuh that theih tâk mang loh avangin an kal tumna lamah kal lovin kawng an bo ta a ni. Chutianga buai phili chiam ta chu an han hriatchhuah meuh chuan pass chung tlângchhîp deuhthaw ah an lo han kal reng tawh mai a lo ni a. Tichuan, tihngaihna dang awm ta rih hek lo le, an awmna hmunah chuan riahbûk sual tawp phawt a, a tuk lama kalzawm leh mai chu an titlu ta a. Mahse helai hmun hi an pêl ta lo a ni.

He expedition team te hi an chhuah hma khan February ni-12 ah Vizhai kha thlengthla leh tura tih an ni a;

Vizhai an thlen veleh hian an hruaitu Igor Dyatlov chu an sport club hnena thirhrui thawn nghal vat tura hrilhlawksa thlap ani bawk a. Nimahsela ni-12 a lo thlen chuan tlânglâwnmi te hnên aţang chuan eng thâwm mah an hre ta reng reng lova, the-hmeh ang maiin an reh ta vang vang mai a ni. Amaherawhchu, hetihlai hi chuan mi tam zawkte erawh chu an la mangang lem lova, a chhan chu ramchhuah ilovah te chuan huntiam bawhpelh leh han tlãi zeuh chângte chu thil awm ve fo ţhin ani a; bâkah, experienced nei ţha tak tak leh tlâng lãwn thei tak tak mi-9 an ni a, an ring tawk a, ngaihţhatlohna turah an ngai rih lemlo a ni.

Mahse, ni a liamzel a, an chanchin lah a rim a rã pawh hriattur a awm thei ta chuang silo; an chhungte chu an mangang ţan ta hle mai. February ni-20 a lo inherchhuah chuan Ural Polytechnic Institute chuan chhanchhuaktu pawl - zirlai leh zirtirtu ţhenkhatte awmna chu dinin mibo te zawng tur chuan a tîrchhuak ta nge nge a; mahse he'ng mite hi an hlawhchham chiang hle. A hnuah police, sipai rual leh rescue team te chuan mibote zawn beihpui chu an thlâk ta a ni

Rescue team te chuan ngawrh taka zawn chhunzawm zelin a tawp a tawpah, February ni-26, 1959 ah chuan an mi zawnte chu an hmuchhuak ta. Mahse, an hmuh tumdan leh beisei dan ang nilo lutuk maia hmuh an ni ta si chuan anmahni zawngtute leh khawvel a barakhaih ta em em mai a ni

Hikers te chuan an riahbûk sualna hmun chu an lo rauhsan vek mai a, an puanin te lah chu a thlêr veng vung a. Bûk hmutu Mikhail Sharavin, zirlaite zing ami chuan,"Puanin chu a chanve ah thlêrbungin vûrin a khuh a. Tumah an awm tawh lova, an bungrua leh pheikhawk te erawh an lo hnutchhiah a ni," tiin a sawi. He thil chhuitute chuan puanin chu chhunglam aţanga zaithlêr ngei a ni an ti bawk.

Hikers ruang ţhenkhatte chu hla vaklo ah te hmuh an ni a; mitthi ruang dangte pawh tlema hla deuh hlek hmun khuar lai deuh ah te chuan vûrin a lo chhilh bawk a. An vai mai chuan thawmhnaw pawh an inbel mumal lova, a ţhenin kekawrte chauh an ha a, a ţhen an thian anmahni aia thi hmasa zawk te thawmhnaw them zaithlak inbel a hmuh an ni a, ţhenkhat chuan pheikhawk an bun lova, a then mawza pawh bunlo te pawh an awm bawk a. An vun chu a sen ût deuh ruam hlawm a, ruang ţhenkhat thawmhnaw ah te chuan nuclear zungzam nasa tak hmuh a ni bawk a ni. Mitthi te ruang an exam na ah hian an thih hma darkar 6-8 velah an chaw ei hnuhnung ber an ei tih an hre thei bawk.

Camp an hmuh tirh hian hniak inzawm pariat/pakua vel thleng, a ţhen mawza chauh bun te, pheikhawk khing lehlam chauh bun te leh a ţhen kelâwng chauh - chutiang hniakhnu chi hrang hrang mi engemawzatin an hnutchhiah te chu hmuh theihin a lo la awm a. An hniak hi metre 500 vel bak chu hmuh theih lohvin vûrin a lo khuhbo tawh a, mahse a landan hmuhtheih chin aţang hian an awmna bul ngaw, pass hmarchhak rál lehlam km1 leh a chanve ah chuan an kal ngei ani tih a chhuiluh theih a ni.

Ngaw tawntirh ah chuan anmahni zawngtute chuan fâr thing lian tak hnuaiah hian mei chhemna hnuhma an hmu a, hetah hian mitthi ruang an hmuh hmasak pahnihte, Yuri Krivonischenko leh Yuri Doroshenko te ruang chu pheikhawk bun lo leh kawrhnuai nen chauh an hmu a. An awmna bul thingkung zâr chu meter 5 vela sáng thleng a tliak chho a, thingah hian engemaw zawng/en turin an lâwn niawm tak a ni; an bûk pawh a ni maithei. Fâr thing leh an camp inkarah hian ruang dang pathum Dyatlov, Zina Kolmogorova leh Rustem Slobodin te chu hmuh ni lehin an awmdan ah chuan camp ah chuan kir leh an tum a ang khawp mai. An ruang hi fâr thingkung atang khan meter 300, 480 leh 630 a hla ah te a lo awmdarh nuaih hlawm a ni.

Panga hmuh an ni ta a, midang 4 te ruang hi hmuh an ni mai lova, thla hnih chuang tehmeuh an zawng chhunzawm a ni. A tawp ah, May 4 chuan he'ng mite ruang pawh hi kan sawi tâk fâr thing atanga meter 75 a hla thing hmunah, khuarkhurum pakhata vûr meter 4 a chhahin a lo chhilh chu hmuh an ni ve leh ta a. He'ng an hmuhchhuah thar mi pali te hi chu a hmaa mi te ai kha chuan an inthuamna a ţha deuh a; tin, a thi hmasate khan an thih hmain midangte hnenah an thawmhnawte an pechhawng niin a lang bawk. Zolotaryov chuan Dubinin sahmul kawrlum hain a lukhum a lo khum bawk a, chutihlaiin Dubinin ke chu Krivonishenko-a kekawr themin a lo intuam ve bawk a ni.

Aw le, tarlan tawh angin mibo zawngtute'n February 26, 1959 a puanin an hmuhchhuah a thil awmdan an han hmuh khan, an ngaihdan ah chuan puanin chu a chhunglam aţanga zaihawn a ni a, tichuan a chhunga mi te chu kelâwngin emaw mawza nen chauh an tlanchhe ta niin an ngai a ni a. Mi pangate ruang an hmuh veleh khan uluk takin chhuichianna neih nghal a ni a, an taksa an endikna ah chuan han thihpuina tur hliam hnuhma engmah an hmu tlat lo mai a; chuvang chuan khawvawt lutukin a hmehhlum an ni tiin thutlûkna an siam a. Slobodin luruh chu tlemin a khi deuh a, mahse hei pawh hi thihpuina tham chu niin an ngai lemlo a ni.

Mahse, May thlaa midang pali te ruang an examna result hian thil a rawn tidanglam ta vek mai a ni. An zinga mi pathumte chuan hliampui an lo tuar nameuh mai a. Nicolai Thibeaux- Brignolle chu thihpui tham khawpin a luruh a lo kehchhia a, Dubinin leh Zolotarev te awmbâwr ruh chu a chhe hneh viau bawk a ni. Mi pathumte taksaa an hliam dan en hian thahrui 'force' chak lutuk, mihring aia chak daih engemaw chuan a khawih niin a lang a. Dr. Boris Vozrozhdenny chuan hetiang khawpa chhiatna thlen thei chakna chu a theneu lo viau ang tiin a force chu Car in na taka a sut tlukzeta na ah a tehkhin a ni

Mahse hetah hian kan hriat leh tur chu, he'ng ruang an hmuhchhuah thar leh te pawh hian an taksa pawnlamah hliam an nei leh mang hauh lo mai a, na taka nem/sut ang maiin an ruh te a chhe ringawt mai a ni. An zinga taksa pawnlam hliam langsar nei awmchhun chu Dubinin hi a ni deuh mai. Ani hian lei leh mit a nei tawh lo a, a hmui ţhenlai leh hmai vun ţhenkhat awm tawh lovin a luruh a keh bawk a; tin, a kut vun te pawh a pilh nual bawk a ni. Dubinin hi han sawibelh lawk ila. Mi ţhenkhatin a ruang kha vûr kara tuiluang te tak te ah a hmai phûm zawngin hmuh a ni ti-a sawiin, a hmaia hliam awm te chu a thih hnuah tui leh boruak hnâwngin a eichhiat vanga lo awm a ni tiin a thihna nen inzawmna neilo angin an sawi a. Mahse, an hmuh tirha a lo awmdan thlalâk ah chuan a ruang hi tui bulah nilovin, lung lian tak nghêngin a ţhingţhi tih chiangtakin a lang a ni.

A landanah chuan he'ng ramchhuak hote hian an ngamloh thil hlauhawm tak an hmuh avangin hmanhmawh baklêngin an riahbûk hi an tlânchhiat san ta a ang hle a. Mahse, eng thil nge chu thil hlauhawm em em chu nita ang..?!

A landanah chuan he'ng ramchhuak hote hian an ngamloh thil hlauhawm tak an hmuh avangin hmanhmawh baklêngin an riahbûk hi an tlânchhiat san ta a ang hle a. Mahse, eng thil nge chu thil hlauhawm em em chu nita ang..?!

He thil thleng ah hian ngaihdan tamtak a awm a, khawvel piahlam thil hnathawh atanga râlthuam a rûka enchhinna thlengin. An hmuhchhuah hlim khan atîr berah chuan helai vela chêng Mansi hovin an bei ani ang tih hi an rindan ani a; mahse, riahbuk chhûng leh a bulvêl vûr hmunah te chuan anmahni (hikers ho) kehniak tih loh chu midang hniak reng reng hmuh tur a awm bawk silova.

Bâkah an vunchhia takngial pawh pilh lova lo beihlêtna hnuhma an taksa pawnlama a lan miah bawk siloh avang te leh, mi pathumte taksaa sawisakna hnuhma ah chuan mihring pangngai tha chaknain a tlin rualloh khawp chakna thahrui hmanga sawisak ni-a a lan avangtein anmahni thattu ah chuan Mansi ho emaw mihring hrim hrim an nih chu an ring leh ta lo deuh a. Tichuan, ngaihdan chi dang dang an vawrh chho leh ta zel a. Chu'ng zingah chuan vûr tawlh vanga he chhiatna hi lo thleng a ni ang tih rindan chu pawmawm deuh bera ngaih a ni a. An rindan chuan vûr tawlh chuan zanah puanin chu a delhchhia ang a, camp leh a bulvel chu a rawn suasam tak chiam avangin hiker ho chuan puanin chu zaithlerin an inchhanhim ta niin an ngai a. Tlang a vûr tawlh hi a hlauhawmzia keini chuan kan hrethiam pha kher awm love; vûrin a tawlh hnan tawh te tan chuan damchhuahna chance a sâng lemlo hle a ni.

Anni pawh hian hei hi an hrechiang viau ang a, a thawm an hriat khan hmanhmawh takin insaseng an tum nghal ngei ang a, chuti chung chuan vûr tawlh chuan a rawn nangching hman teuh hle a, an boot leh thawmhnaw dangte chu a rawn tichhe hman tho a ni an ti a. Hetia an tlanchhuak ta hi khawvawt turu lutuk hnuaiah vûr huhin a han bawh lehnghal phei chuan nunna atan pawh thil hlauhawm tak tur a ni a, khawvawt lutuk chuan min.15 lekah nikhaw hre lovin a hmet chau zui nghal thei mai dawn a ni. Rindan dang leh ah chuan, thli lo thawk thut vang a ni ang tih te pawh a awm bawk a. Tin, an thihchhan ah hian thu ziakmi Alexander Popoff-a zeldinna pawh hi a ngaihnawm ve phian mai.

A lehkhabu ziah The Dyatlov Pass Incident ah chuan tlânglâwn ho chu boruaka electric awm che velin an bûk atang chuan ûmchhuakin a tihlum zui ta bawk niin a sawi a. Ani hian Electric hlâwm power sâng tak chuan an bûk ban chu rawn manin ţêk angin a rawn dêng ta aniang a ti a. A sawizel dan chuan, khatia an bûk an tlânchhiatsan hnu khan thil tihsual lian tak tak pahnih an nei a; ţêk tla laka invendan/ inkaih hruaina dan bawhchhiain fâr thing hnuaiah awmkhawmin mei an chhêm leh ta nghal a. An meichhem chu ţêk chuan a rawn dêng leh ta a ni tiin, an ruang awmdan atang hian an thihchhan chu boruak a electric kal vel ţêk anga insiamin a den vang a ni, a ti a. Report thenkhat ah chuan, Dyatlov-a leh a hote inkulhna hnuhnungber hi Soviet Union in rocket missile R-7 a dahţhatna hmun Baikonur Cosmodrome aţanga nuclear a test ţhinna hmunpui Chyornaya Guba, Novaya Zemlyaarchipelago panna kawnga awm a ni a. He an chhiat tawhna lai bial ah hian thir them tam tak hmuh a ni tih sawiin, helai vel hi sipai lamin an râlthuam enchhin vel nân a rûkin an hmang ţhin a niang an ti bawk a ni.

Ama'rawh chu he'ng te pawh hi an ngaihdan mai a ni a, a chhan dik tak, chumi/khami vang chu a ni ngei e ti-a han puhthlûk theih tura finfiahna chu a awm chuang lo

He chhiat tawhna chhuitute zingah pawh hian ngaihdan chi hrang hrang a tam khawp mai a. Thenkhat chuan hemi chungchanga thudik ţhenkhat hi official te hian an hmuh hmaih emaw an hrelo der niin an ngai a. Chu'ng te chu :

* Kum 12 mi Yury Kuntsevich, a hnu a Dyatlov Foundation, Yekaterinburg a hotu ber ni ta chu hiker pangate vuina ah khan a tel ve a. Ani hian hiker te chu an vai mai chuan an vun a sen uk khuk mai a ni a ti.

* Hiker ţhenkhat thawmhnaw (kekawr pahnih leh kawrlum) ah chuan nuclear zungzam chak tak hmuh a ni.

* Dyatlov Pass atanga chhimlam km 50 vela hlaa tlâng lâwn ve midang te chuan khami zan khan an awmna aţanga hmâr lam (Kholat Syakhl lai vel hi niawm tak) vân ah serthlum rawng thil bial thlawk kual vel an hmuh thu an report a ni. * He thil bial thlâwk hi Ivdel leh a chhehvel ah hian mi chi hrang hrang, khawchin zirmi te leh sipai te pawhin February atanga March 1959 chhung khan vawi tam tak an hmu bawk a ni.

He'ng te hi sorkar lam chuan an chhui duh lo tlat a, an ngaihthah lui tlat ah an ngai a ni.

Tichuan, ngawrh taka an beih hnu pawh a an thihchhan diktak chu an chhuichhuah theih tâk loh avangin he case hi May 1959 ah official in an titâwp ta ringawt a. Court chuan he expedition a kal mak tak maia bo leh thi ta te hi 'hriatloh thahrui chak tak' vanga thi tiin thutlûkna a siam ta tawp mai a ni. He thil chhuina lehkha pawimawhte hi thuh-rûk tlat a ni a, ţhanghnih lian zet liam hnu, 90's tîrlam khan thlalâk ţhenkhat chu an rawn pholang leh ta a ni.

He hikers ho thihdan mak tak chanchin hian khawvel hmun hrang hranga mite ngaihven leh mak tih a hlawh ngiang mai a. Aliens, ramhuai, Yeti, he'ng ho zinga a eng emaw ber hnathawh hi a niang ti-a lo puhthlu tâwk lah bo lo. Journalist lâr tak Yuri Yarovoi pawhin Dyatlov Pass-a thil thleng mak tak behchhan hian thawnthubu ngaih nawm tak 'Of The Highest Rank 0f Complexity' tih chu kum 1967 khan a chhuah nghe nghe a ni. Ani ziah bâkah hian he chhiat tawhna chanchin ziahna lehkhabu hi a dang tam tak a awm bawk a, a film te pawhin an siam hial a ni. Lev Ivanov, he case chhuitu police hotute zing ami in 1990 kuma a article ah chuan kha thil thlen hunlai khan vanah thil mak tak tak, thil mûm thlâwk an hmu tih report an dawn thu a ziak ve bawk. An thihdân hi a mak danglam hle mai a, an thihchhan ah pawh hian rin thu leh ngaihdan chi hran chi hrâi a tam hle a ni.

Engpawhnise, a chhan dik tak hi an chhuichhuak thei bawk silova, vawiin thlengin thilmak chhuichhuah lohte zingah a la tel ve ta zel anih hi.

Yuri Kuntsevitch kaihhruaina hnuaiah Ural State Technical University tanpuinain The Dyatlov Foundation chu Yekaterinburg ah din a ni a. He foundation in a tum chu Dyatlov case hi tharthawh leh a chhui ţha leh tura Russian thuneitute nawr a ni a; chubakah, hiker thi ta te hriatrengna'na Dyatlov Museum siam chu a ni bawk a ni.

Heti chinah hian duhtawk tawh mai ang aw. In chhiarbelh duh chuan Dyatlov ti ringawt paw'n han google ula, chhiar tur tamtak a awm e.

He thu ziaktu hi ka hre ta mai lova, ka inthlahrung hle mai. Ngaihnawm tihzawng hi a inang lo thei viau a, ngaihnawm ka tih em vang leh post tura request a awm fo avangin ka rawn suan lut thawr mai a ni e.Blog share la subcribes ve rawh le. Enjoy.