THURUK PUANG TURIN A INLAR EM Ni?

A sawitu a la dam bakah kohhran Upa hial a lo ni tawh bawk nen, a hming chu tarlang lo mai ila, a tha âwm e. Tin, tihdan tlanglãwn zuiin 'ka' (first person) hmangin sawi ve mai ila, a ngaihnawm zawk ang e.

Mahni tawka rilru lian leh luhlul ve tãwk tak, hlauh awmzia pawh hre mang lo ka ni a. Sa lian tham deuhkah phei chu nei hauh mah suh ila, ka thinlung khauhtak, hlauh neilo keipui anga lunglian' tia miten ka chanchin an sawi der ve na thin hi phurhchhuah zawh ka tum em avãngin ka in dah hniam lo hle mai a. Pasaltha tenau deuh, miin 'sakhi pasaltha' tia an sawi ang chi te phei hi chu khû-tah, hniam takah ka dah a. Enge maw nikhua titi chânga an zawlpui bawla min han bâwl ve rauri leh lek phei hi chu ka thin a rim hlur zel mai thin. Chutiang taka mi inti chalngêng ve chu ka nih avangin chhun êng a ni emaw, zân thim a ni emaw, keimahah chuan danglamna vak a awm lo va. Thla leh huai tih vel phei hi chu, ka ringloin ka hlau lo hul hual a.

Miin an sawi nikhuate hian 'Awm tak tak sela, thiana siam asin' ka duh tiin fiamthuin ka pak liam sak mai mai thin a ni.Nimahsela, vawikhat chu thilmak tak mai tawngin chu chuan ka nunphung pawh a tikhaihlak rei ve hle mai a. Ka hlau e phei chu ka ti hauh lo nain ka ngaihdan erawh thui vak lo chu ka sawhsawn phah ve deuh a. He leilungah hian thilmak hi chu a lo awmchiang a ni tih ngaihdante pawh ka neih phah ve ta hial anih hi.

Chu ka thiltawn chu a lo intanna pawh damlai thla an tih fo, ka nuih pawh tiza pha lo khawp a, a chhin pawha ka awih duh ngai loh atangin a ni tlat mai leh nghal a. Mihringte hriatthiam phak loh thilmak hi chu a lo awm ve ngei a ni ange.Tumkhat chu ka ram vak a. Khua atui fûr tawh avângin a thlawka an thlawk a nih ngawt loh chuan kea kal engmahin hnuhma hnutchhiah lova an chetsawn theih lohna tur khawpa lei hnip hun lai a ni a. Mahse, mak deuh mai chu, ka sanghal hnu chhui lai, fiah tak mai chu ka hloh hmin der mai a. A ngaihna hre lova mak ti taka ka hawi mai mai lai chuan hmeichhe mangang tê rawl hi ka hre ta thut mai a.

Ka rilruin 'E..khai tawhsual tawk, tanpui ngai anawm a nih chu' tiin ka silai ak thain ka chempui chu ka phawrh a. Thâwm lo chhuahna lam nia ka hriat pan chuan ka tlan phei nghal buan buan mai a. Nimahsela, thui fe ka thlen hnu pawh chuan engmahka va hmu silo va. Mangang aurawl ka hriat lah chu dawt a ni ang e tih mai awlin a reh ta hmak mai bawksi a. Engemaw chen ngaichânga ka'n nghah leh vangvang hnu pawh chuan, thei reh takin a reh ta vawng vawng mai si a. Ka bengchhe ri mai mai lek a nih dawn hi tiin ka bansan ta a.

Chutia, ka hlawhchham tak siah chuan, pachang ramchhuak ve meuh chu, kut lâwnga haw tawp aiah tiin hruizik kheh haw zai ka rel ta a. Ka hruizik kheh ta chu, khua ka lo hawi lemlo nen, tum aiin ka tlai ta tlat mai a. Ka duhtawk ka ngah meuh chuan kâwlah ni a pil ani ruai tawh mai a. Tichuan haw turin ka intintuah ta a. Tlai te chu ka tih than loh a ni lemlo bawka chhungte pawn min lo ngaihtuah vak ring lemlovin muangchangin ka haw ta a.Ka ramchhuahna hi a hnai chhe lem lo bawka khawdai ka thlen meuh chuan thimhmul a ni chho dêrin chunglam pangah arsi pawh hmuh tur awm phauh phauh tawh mai a.

Akhawnge.. Inthlen chuan naupangin min lo bawr leh nghal tuau tuau âwm si a. Hahdam deuha thlen a thae. Meizuk siam pahin ka'n chawl hlek teh ang tiin thuthmun ka rem nghal a. Meizukte siamin ka pak ta vang vang a.Nimahsela, rei pawh ka la thut hma, ka meizuk lai, a zahve êm pawh ka la zûk ral hma chuan, ka piah thingkung chu insawi deuh hluauin kahria a. Ka va hawi phei nâk chuan a zârah nula pakhat hi, min hnungchhawn zawngin a lo thu vâng mai a. A tu chu ni mai mai che chu ni maw? Tun ang huna khawdai thingkunga lo lâwnchu, in awhhlum i tum te hi a ni mai mai ang ka ti. Khawi'nge ka thulh tir theih tak hlauh dahin' ti rilru chungin ka va pan a.Chutia ka va pan tâkah chuan, a rawn hawi phei a.

Kan vêngpa Hrangliana fanu Aizawla lehkha zira awm kha a ni tih ka va hre mai a. 'A ni pui roh hi vawiin lamah a lo haw chho a nih dawn hi a' ka ti rilrumai mai a. Mahse, ka thlen phei hma chuan hmanhmawh deuhin a chhuk zawt zawt a, khaw lam panin a tlan ta nul nul mai a. Enge ni ka hriat teh rengni, keipawh chuan ka um ve ta nghal luah luah mai a.Khawchhung luh dawn hnaihah chuan ka inngaihtuah fim a. Chutia pachang pui tawh nula nêna inthlûr tâk ngian ngian mai chu, miin min lo hmuin pawngsual tumah te rêu rêu min ngai palh ang tih hlauin ka dinsan ta a. Mahse, an in lam pan talo chuan thlanmual lam chu a pan ta tlat mai a.Chung hun lai chuan hmeichhia chu sawi loh mipa tam tak pawhin thlanmual chu tihin zan thimah leh lek phei chuan tul tâwpkhâwkah pawh pumpelh dan an zawng hrâm hrâm thin a ni si a. Chutia a ni nula puitling taka chhiar tham pawh la ni lo leh nghalin a pan ta mai chu ka hrethiam lovin mak ka ti khawp mai a.

Ka ngaih a ti tha lo ru viau nain, ka ngaihtuahna holam tak avâng khân ka ngaihven zui peih ta lo va. Engmah em a ti lovang chu maw? tiin in lam panin ka haw san ta a.In ka thlena thingpuite ina ka hahdam deuh hnu chuan, kan nu chaw ei min siam sak chu ka kil ta a. Bar thum vel bâk ka la bar hman kher âwm lo ve. Kantlangvâl nula rima lengchhuak chu lo tlan hawin, 'ka pa, tun lawk khân Pu Hrangliana fanu Aizawlah a boral anih chu.. zaninah an rawn phurchho nghal dâwn a, keipawh ka tlaivar ve a ngai ang' a rawn ti ta a. Chu thu ka'n hria chu mak ka ti thlu ngang a niang,antui hâwp tuma ka thirfian lek lai chu ka thlauh ri bawl mai a. Han awih loh ngawt chi lah a ni si lo.. Thlâ hi a lo awm tak tak ang a, kei hian chu chu ka lohmu a ni mai lo maw? tiin ka ngaihtuah a a. Ka fapa chu ka'n zâwt chiang a.

A hnukchah hun ni âwm velaa sawi chu, thingpuiina ka thut hahdam lai vêl a nih hmel si a. A.. thlâ tak tak ni lovin damlai thlã hi chu a awm ang a, chu zãwk chu ka hmu a nih lek chu' ti rilru chungin ka chaw ei chu ka chhunzawm leh ta a.Chaw ei khama eng emaw chen ka thut muan leh hnu chuan, naktuk lamah hun a la tam a. Taksa a chau bawk nen, mitthi in lamah pawh lang rih lo mai teh ang. Kan tlangval a tlaivar dawn tho kha maw' tiin ka mu ta a. Chutia ka mu ta chu muhil nghalin mumang mak deuh mai ka lo mang a. Chhun lama ka ramvah kha mangphanin, sanghal hnu kha ka lo chhui leh a.

Engemaw chen ka chhui hnu chuan sanghal chu ka va hmu ta a. Phûr tak maiin ka silai chu ka kokiah ka'n chhuang a. Kah tumin a cheng ka'n kau nghal rap a. Mahse, Ka hmeh per dawn lai takin chu sanghal chu Hrangliana fanu ah a rawn chang ta tlat mai a. Kap ta lo chuan a ngaihna hre lo takin ka en reng mai a. Eng emaw ni sawi tumin a'n âng zuau a. Mahse, a sawi hmain ka muhil chu ka harh ta hlawl mai a.Khua ala var chiang chiah lo nain,muthilhna hman vak tak tak awm tawh chuanga ka hriat loh avângin ka tho ta a.Ka tho ta chuan, meite nunin eng eng emaw ka khawih a. Chutih pah chuan,a hma ni a, ka thil tawn te leh zan lama ka mu mangte chu ka ngaihtuah chhun zawm a.

Chutia mumang lehzela ka lo mang phan chu mak ka tiin a ngaihna ka hre lo hle mai a. Kan nu a lo thawh ve tâkah chuan tlaivârte chhâwk turin mitthi in lamah ka kal ve ta a.Ka'n kamkeu hmasak duh che u chu.. pa titi thiam chuan ngaihnawm takin an phuah belh thiam thin a. Han chhui chiang tak tak tûrin heta tel ve, an hming a sawite hi an boral tawh hlawm bawk si a. Chuvangin thudik ziktluakah ngaia hlauh lama ramtang ngawt lovin ngaihthlâk dãn tâwk in thiam dawn nia.  Hrângliana fanu hi nula zezawi tak, tu pawi mah sawingailo anih avângin chutia a boral ta chu kan ui tlângkhawp mai a.

Thenrual tha lenpuitu pawh an nei reiinin riak tlangvâl pawh an tam ber tum a ni hial âwm e.Kan tlangval pawh a vawikhatna atân a inpu lut ve nghe nghe a ni.Nimahsela, zan hnih bâk riak lovin, chhuanlam siamin a rawn in puchhuak leh ta mai a. Dawihzep lutuk tia hauin ka'n dem viau dawn a. Nimahsela, a thil tawn chu, ani tleirawl chhuak ãwrh tân chuan a râpthlâk ve êm bawk avângin ka hriatthiampui tho mai a. Ani phei chuan a thil tawn hia sawi tha duh lo va. Mahse, dawihzep lutuk, mahni ngaihtuahna hlau ti zâwnga ka'n puh tâkah chuan a sawi duh ta hram chauh a ni.Khatia a inpu lut ve ta kha a thiante pawh an awm venek nek avângin nuam pawh a ti viau a.

Mahse, an han mu ta chu a muhil thei ta tlat lo mai a. A hlauh vang chu ni pawhin a hre lo va. Hun danga awngphah delh rual ruala muhil nghal mai thin si chutia a muhil thei miah lo mai chu amah ngei pawh chuan mak a inti khawp mai a. In riak dangte mut ngheh fe hnu chuan, kawngka lamah thâwm a hria a.Sazu mai mai ni turah ngaiin eng vakah a ngai duh lova. Mahse, a thâwm hriat chu sazu thâwm mai ni lo tlata a hriat tâk avângin a va en a. Kawngkapui chhûng lama an kalh vek chu lo inhawngin an nula chu kawngkaah ngei mai chuan a lo ding to mai a.

A va en lai tak chuan a kutin a rawn hui zoh zoh mai a. Mahse, engdang mah a thlen hmain Hrangliana tupa nausen chu rawn tap chhuakin a nu a rawn tho ta hlauh mai a. Chutia a rawn thawh tâkah chuan a thil hmuh pawh chu a hriat loh karin a lo bo daih mai a. Thovin kawngka chu a va endik ngat a, a lo inkalh tha thlap bawk si a. Mak a tiin a hrethiam lo hle a ni âwm e.Ka fapa hian min chhunna chen a nei vein mi dawihzep a ni hauh lo va. A thil hmuh pawh hi a mitvâiin a hmuh sual mai mai a nih ringin tu bulah mah a sawi duh lo va. Nimahsela, a tûk zân an han mut leh pawh chuan zan hmasaa a tawn ang bawk kha tawngin nula bawk chuan a rawn hui leh zoh zohmai a. Hemi tumah hi chuan a hlau ve ta deuh ni tur a ni. En rei ngam lovin a inlukhûp nghal hmak mai a.

A tukah thil dang chhuanlam siamin a rawn inpuchhuak ta mai a ni. Hranglianate chhungkua nenhian inchemhârna kan nei lem lo nain kan inpawh êm êm lem lo va. Tûl fêah lo phei chuan kan inah an rawn chuangkái zen zen hek lo. An fanu boral ta pawh hi lehkha zira a awm bo reng reng avângin kei phei chuan ka chian lo khawp mai a. Chutia ka fapain a'n hmu veleh ta zêl mai chu mak ka ti ang reng hle mai a. Midang hmuha inlâr ve si lo, chutia, keini pafa leh pafa a lawng lâwngina kan hmu ta bik chu ka ngaihte pawh a tha lovin ka ngaihtuahnate pawh a kalthui hle mai a. Kan chhungkua hian enge maw tak kan tâwk dâwn em maw'n le? tihte hial ka ngaihtuah phah rum rum mai a ni.

Nimahsela, ka fapa a rawn input chhuah atang chuan engmah kan tawng zui ta lem lo va. Kar hnih kar thum lai a liam leh hnu phei chuan hriat pawh ka hre zui leh ta meuhlo va. A pangngai tein ramchhuah pawh chu ka chhunzawm leh ta mai a. Eng thil danglam mah ka tawng leh ta rih hek lo.Chutia, muang leia nun kan hman lai chuan, nikhat erawh chu, ka thianpa Rintluanga ramvâk chuan sanghal a kâp hliam a. Khua a tlai deuh tawh avângina tukzinga chhui atân tiin a rawn haw san a. Zanah rawn kala chanchin min rawn hrilhin a tukzinga chhuipui turin min rawn sawm a. 'A thi far hnem danah a hliam na hle ang tih a chiang a, kan chhui thui vakin ka ring lo. Tunah te pawh hian khawiah emaw, a hliam tuar lovin a lo thi tlaw reng tawh zawkpawh a ni maithei' a tih avangin kaphur hle maia. Tichuan, a tukzing leilung lan ruala chhuak thei tura inbuatsaihin kan mu ta a.

A tuk khua alo var chuan leilung lan ruala chhuakin, kâr lovah a sanghal kahna hmun chu kan thleng a. A thi a far nasat em avângin harsa lo takin a hnu chu kan chhui thei zel a.

Nimahsela, kan chhuia kan chhui zel a. Thui tak kan chhui hnu, ni a tlangsân fê hnu pawh chuan kan la hmu ta chuang si lo va. A tawpah phei chuan, hmana sanghal hnu ka chhui ang khân, hnuhma engmah chhui theih lohin a tawp leh ta tlat mai a. A hnu tâwpna atanga zau tak thlenga kan enfiah hnu pawhin, han chhui zui theihna tur hnuhma engmah kan hmu ta si lo va. Beidawng leh mak ti takin kan haw san ta ringawt mai a ni.Hemi zana ka mu hian mumang mak deuh mai ka mang leh pek a. Ka mumangah chuan ka lo ramchhuak leh a. Sanghal lian tha zet mai hi hmuin ka lo kap a. Chutia, ka kah vêleh chuan rawn tawng chuakin 'engatinge min kah? a rawn ti a. Keichuan, 'ka kâp hleinem che, mau puak anih kha' ka ti a. Ka harh leh ta a. Mumang hi chu mak tak pawh man ngai a ni a. Nimahsela, sanghal leh sanghala lâwng lâwng mak tak tak maia vawihnih lai ka mang ta mai leh, ka fapa thil tawn chuan engtin emaw tak inkungkaihna nei tein ka'n ring deuh thut thut a.

Mahse, mumang mai mai lo thutak khûkpui ruai mai chu, mi nuihte rêu reu kan ti za palh ang tih hlauin karilru nuam zân lo pawh chu ka palzam lui ve ta ngat a.Hemi hnu hian vawi tam ramchhuak leh tawhin engmah ka tawng ngai ta lem lova. Mahse, mak tak maiin zantin deuhthaw chhun lama ka ramvahna chumumangah mangphanin Hrângliana fanu boral ta kha ka lo hmu tel ve ziah mai lehnghal a. Han palzam luih ngial ka tum nain theih loh chin a awm ta tlat mai a ni.Vawikhat chu, Pu Ramate fu huanah sanghal an che nasa tih thâwm hriain ka thianpa Rintluanga nen bawk chuan châng tûrin kan kal a.

Ani'n a lu lamah châng se, keiin a mawng lamah tia inremsiamin kan hmun tur ve ve chu kan pan ta a. Khua a thim fel awrh tihah chuan mihring chau taka rûm thâwm, awi,awi, awi ka nu... tih ka hre ta tlat mai a.Thli a thâwt deuh vûk vûk avângin, a tirah chuan khawilam nge tih ka hre thei mai lo va. Ka'n ngaithla chiang a, huan lu lam Rintluanga awmna lam chu niin ka hria a. E..khai, rintluanga kha a chesual a ni ngei ngei ang. Athangte dawhna kha a sâng bawk si a, tum loha chesualin a tla palh a niang.. tiin ka thangte dawh atâng chuan ka chhuk a. Lei atanga kan ngaihthlak leh hnu pawh chuan Rintluanga awmna lam chiah chiah niin ka hria a. Thli beng sual mai nia ka hriat tâk loh avâng chuan, huan lu lam panin fu chu ka pal chho ta buan buan mai a. Huan laita vel ka thlen chuan, chhak lam atangin a rawn ri thla ve buan buan mai bawk a.

Enge, sa nge sa lo deuh zâwk? ti rilru chungin kah mai inringin ka lo ngai chang ta a. Chutia inring rênrâwn taka ka lo din lai chuan, amah Rintluanga ngei mai chu a rawn lang ta hlawl mai a. Tlêmah tlêmah kan insâi palh ang tih a hlauhawm hle a ni. Rintluanga chuan hrilhhai hmel takin 'enge aawmzia? I na tuar rûm ri ka hria a, thing atangin i tla palh anih ka ring a. Rawn ngaihven che ka lo tum asin' a ti a. Keichuan, 'rûmri te chu i awmna lam atânga lo chhuak a lawm, chuvânga rawn ngaihven che tuma lo chho a lawm ka nih' ka ti ve bawk si a. Angaihna kan hre lovin kan bangbo dun hle a ni.Chutia, a ngaihna hre lova kan ngawih dun lai chuan, kan sir vau lam atangin rûm thâwm chu a lo ri leh a.

Rintluanga chuan, midang chesual an awm a ni zawkang. Ti teh, i va chian teh ang' a ti a. Zan lama ka mumang leh ka thil tawn tawhte atanga chhuidawn in, thildang vak anih theih ka ring ta lo tawp mai a. 'Ngawiteh, engdang ni lovin hauhûk fa tah mai mai lek a niang. Hauhûk hian mi a chhiat theiroh leh nghal a. Haw ila a tha zawk ang, naktuk zanah kan châng leh zawk dawn nia.

Hetiangah chuan sanghal pawh an lo chhuak lo tawp ang ka ti a.Ka sawi zo hman awrh tihah chuan, lo mawng ruam atang chuan Nghalrual hawk dawt dawt thâwma rawn ri a. Chu le.. tiin kan silai chu kan lek kawh dun nghal a. Mahse, chu nghalrual hawk dawt dawt thâwm kârah chuan pachang nui uarh uarh thâwm a tel ta tlat mai a. Chutah, ka bul vêla fu kung chu a che duala enge maw hian min tlanpêl thla fua niin kan hria a.

Rintluanga thin chuan a tuar ta lo va. A pachang thinthawk lo chhuak chuan engmah ngaihtuah lovin, chunglamah silai chu a kap puak thuai a. 'lo kal rawh le, engmi pawh ni la, i duh chu i hmu bik lovang' tia hming chhalin a inhrosa ta kûk kûk mai a. Chumi rual chuan thil tam tak a ti khawlo pawh ti ila, dawt muhlum ngawt zawng kan sawi bik hauh lovang. Chutia lên dênga ka kal ta chu, Khawdai mai atangin Rintluanga nên zâna kan sanghal chang kan haw lama min uap hmuktu boruak ang khân min rawn uap leh ta hmuk mai a. Ka sir velah te chuan kal ve awm tlatin ka hre leh ta a. Mahse, mak tak maiin kan nula-i ni turah ka ngaih tlat avãngin hlauhna leh tihna reng rêng ka nei miah lo va. A duh hunah rawn inlarin a duh chu rawn sawi mai rawh se' ka ti rilru mai a ni.Nimahsela, thui pawhka kal hmain Tâisena, mi pangngai pha zân lo deuh, kan bawlzân vel mai mai thin hi kawngsirah inthiarin alo thu rûn mai a.

Enge a tih dawn ka'n zawt a, tuinu um a lo tum ve bawk chu niin.. Ka tum ve thute ka'n sawi chuan, kal dun ila a ti a. Tichuan, inthurualin kan kal dun ta a. Tâisena nena kan kal dun atang chuan, a hmaa min uap hmuktu boruak leh ka sira kal ve zel nia ka hriat kha a reh ta daih mai a ni.Tum thuhmun ta na nâ nâ chu inthurual loh theih ni hek lo le.. kan hlawhtling dun viau nain ka kalchhan ber chu engmah ka tawng ta lem lo va. A leh alingin ka lungte pawh a hnûr lek lek mai a. He kan nula hian midang hriat ve chi loh thuruk sawi duh a nei ngei a ni ang tih chu ka ring nghet ta telh telh mai thung ani.Hemi zan hian mumangah ka mang chhunzawm leh nghal zat bawk a. Ka mumangah chuan vawiin lamah khan midang an awm ve avangaa inthiarfihlim tâk thu min hrilh a, thildang a sawi hmain ka harh leh ta a. Mahni lo maha intih chalngênve teh reng nen mumang mai mai buaipui leh ngaihtuah zui lo thei lova ka awm ta chu ka rilruin tlawmah lain tláwm pawh ka ngai takzet a.

Engah mah han ngai dawn lo ngawt ila, ngaihthah ngawt theih niin ka hre si lo va. Mahse, rilru ti paukhauh luiin mumang mai mai alawm, ka hmuh leh pawhin engah mah ka ngai tawh lo vang tiin ka inpet ruh a. Chuta tang chuan ka hmu ngai ta miah lo a ni. Hei hian, kan mumangte hi kan ngaihtuah na hian thui takchu a lo hruai ve thei a ni tih a tichiang hle awm e.Hemi hnu hian mahnia ramchhuah ka nei ta meuh lo va. Mahse, mak deuh maiin nunau ti râlti thei thâwm mak tak tak kan hre ta fo mai a.

Chung zawng zawngchu, hetah chuan sawi vek lo mai ila a tha âwm e. Chu boruak chuan kan khua chu thla khat dawn min chenchilhin min ti ralkhêl nasa hle mai a. Eng emaw chen chu zânah tlangval an in duty tlaivar chhâwk zak zak hial a ni.Chutia tlangval an in duty chhâwk zak zak hnu chuanthâwm chu a reh zui ve ta mai bawk a. Chuta tanga reilotêah kan khua chu chanchinthar danglam takin min rawn dêng a. Chu chu 'Pu Hrângliana fanu kha a awmna pain a pawngsual a. Police lamin ringhlelin an dâwpa a inpuang. Tunah chuan Tân Inah an khung tawh' tih thu a ni a.. mak kan ti hlawm hle a ni.

Chu thu kan hria chu, a thih danah ngaihdan chi hrang hrang zeldin thu bâwlin kan zam hlawm a. Thenkhatin a rilru hreawm lutuk muthilhna dam dawi hmangin a inti hlum aniang? an ti a. Thenkhat chuan,chutiangte chu nise hriat âwm tak tiin an hnial a. Thenkhat in, an thup tlatte chuan engtin nge an hriat ngawt ang' tiin tan an khawh bawk a. Chutiang chuan ngaihdan chi hran hran pawm nahawm tak tak a lêng nuaih nuaih a. Mahse, a thih dan dik tak chu kan hre lo hlen ta a ni. Khatia, police lamin chhuia an man chhuah tak hnua a thawm a reh ve ta hmak mai khân ka ngaihtuahna a ti kal thui hle a. Amah pawngsualtupa khân a phû tâwk hremna a hmuh theih ngeina turin thuruk inthup chu puan a duh ang a.

Chuvangin khatiang thâwm kha a chhuah ang a, an chhuichhuah takah chuan a thlarau pawh a lungawi ta ang a, a reh ve ta ni berin ka ring a. Chhui chhuah la ni lo se chuan thâwm pawh a la nei reng lovang tih sawi theih a ni bik miahlo a ni.He thu hi, ka pa bulah ka sawi a. Ka pa chuan, a hun lai chuan dawihzep deuhte tana ngaihbel tur ting chuan thâwm chu a awm ve pawh a ni maithei e.Nimahsela, asawi ang, thâwm riva chu ka hre ve lo. 

Share and subcribes enjoy.