MOTOR NEI TAWH PHAWT CHUAN CHHIAR NGEI NGEI CHI

Clement Hualngo Chhakchhuak
.
A sarhu lai tak a ni bawk a, post hrangin i han tuihnih hlek teh ang. A bikin Mizoram chhunga kan khawpui neih zinga khawpui lian ber mai Aizawl hi, Jerusalem ang mai khuan hnam tin tan ruihna no-ah a lo chang tawh em maw tih mai turin, Mizo-te khawpui lian ber a ni bawk a, kan ruihpui suau suau ni ta berin a lang. A âwm ve tho ve.
.
Post pakhata kan hmuh ang khan mi motor park lai lo ziah rânsak țhin an awm a ni âwm a, a ngaihna hriat a har tawh hle. Kan hriat țheuh tawh angin Aizawl khawpuiah chuan lirthei ke pahnih lek pawh park-na tur a awm tawh meuh lo a tih theih. Park-na tura an siamah lah, 10% pawh kan leng ang em aw...a tih theih mai tawh bawk. Ke pali nei tan phei chuan dahna tur nilenga zawn ngaiin a awm tawh a ni.
.
Dan an siam a, an dan siam zawm dawn chuan mi mal motor pakhat mah ken chhuah loh hian kan zawm thei ang em aw...tih hi a ni leh a. Kan kawngpui a zauh theih tawh bawk si lo va, motor lah neih kan duh țheuh bawk si, chutih laiin mi kawta mahni motor lo park ringawt lah thil mawi leh tih chi a ni tawh hek lo. A va han buaithlak tak êm aw!
.
Heti hian ka lo ti fo tawh a. Kei hi Aizawl-a awm ka ni lo va, thingtlang khuaa cheng ve mai ka ni. Aizawl-a ka zin chang te hian mahni motor-in ka kal mai țhin a. A hmingin Aizawl-ah in te kan luah ve tak nain, park-na tur erawh ka nei lo. Sikul pakhat hi a awm a,  chumi kawt zawlah chuan mi dang pawn an park thluah hlawm avangin ka va inzep ve mai țhin. Ka ngaih erawh a țha zan lo.
.
Chuta ka motor ka va park avangin mawlmang takin ka park ngawt ngai bik lo va. Lehkha themah ka mobile number leh, ka hming leh thu tawi tê "motor dahna tur ka neih loh avangin he i ram chhungah hian ka motor ka lo dah tawp a, eng emaw harsatna i neiha ka lo dal palh a nih chuan khawngaihin ka mobile number-ah hian min lo be mai dawn nia" tiin ka ziak a, motor hma lam leh hnung lamah ka tar kuau țhin.
.
Vawi khat chu ka zan leng haw khan ka tlai deuh hlek a, ka motor park țhinna sikul kawt zawl chu a lo khat vek tawh a, ka buai ru khawp mai. Chutah le, a thlang lam, kan in luahna kawng zîm tê, motor kal theihna hi a awm a. Kan piah thlang lamah motor nei an awm lo tih ka hre sa bawk a, kawng luah zawngin ka park ta a. Ke pahnih nei erawh an tlang theihna tur ka zuah thei hram. Chutah pawh chuan ka lehkha chu țha takin ka tar a ni. Zan laiah ni se, mi lo tlan lut an awma min lo biak duh takah tiin ka mobile pawh silent-in ka dah duh lo va. A ringtone a sang berah khan ka dah ta a ni.
.
Zing lam dar 3 velah chuan ka mobile a rawn ri ta ngei a, "Hei, vawk kan talh dawn a, motor lo tlan luhtir kan duh avangin i motor hi min lo dahsawnsak lawk thei ang em?" an rawn ti a. Kei pawh chu phur tak leh inthlahrung tak siin ka tho vat a, ka han dahsawn ta a. A ruk tak  chuan ka hlim khawp mai. Mahnia kan tih tur pawimawh tak kan tih chuan, mite pawh kan chungah suahsualna an lantir nghal ngawt lo va, mi an hre thiam em em a ni. Ka mobile number te kha lo dah si lovin ti khan lo park mawl tawp ta i la, tu emaw tak chuan a lo khawih chhe duh hial maithei a ni.
.
Kan hriat tlan atana țha chu, motor neitute hian kan tih tur kan hriat a pawimawh a, ram/kawtzawl neitute paw'n thui tak min ngaihtuahsak a țul a ni. Aizawl khawpui chhungah ngat phei chuan eng angin "no parking" tar mah i la, mi tu emaw takin chu lai hmun chu rawn mamawh ngawih ngawih hun a la rawn nei thei tlat. A chhan han sawi vak ngai pawhin ka hre lo. Kan kawng a zîm a, kawng thluan hian a zau si lo. Hawihawm tawnna kan neiha kan inpuih tawn mai loh chuan tih theih dang kan nei si lo, tu sawrkar mah lah hian kan khawpui hlu tak kawng hi an rawn zauh ngai dawn si lo. Mi kawta motor va park duh kan awm a nih chuan, hawihhawm takin dil i la, dil tur an awm loh paw'n thu leh mobile number ziakin hnutchhiah ngei se. Chuti ang bawk chuan a ram/kawtzawl neituin zai lo dawh hram hram bawk se. Chuti ang chu kan rama kan tih theih chuan kan sawrkar dan hian awmzia aneih ka ring tawhlo.

sawrkarin dan asiam te hi kan ning anih ngai chuan hawh u mizo mipui te hi i in pui tawn ang u khai.