VIETNAMESE-TEN AWLE SA TUI AN TI : SOUTH EAST ASIANHOTE AN EI HRAWM HRAW!

                           

December 26; 2017: Vawiinah Mizorama cheng Mizo mipuite chuan “Krismas Ruai” thehin, vawksa buhchiar, bawng chek, vawk lu bawl, etc kan ei tlangpui awm e. Mizote hi a tlangpuiin sa ei mi kan tamin, vawksa kan duh tlang lawn ber bawkin alang (vawksaah pawh a thau thau ang chi); chutih laiin South East Asia mite hian sa pawh an lo ei nasa ve hle a, mahse, vawikhatah keini Mizote angin an ei teuh lemlo thung. Ransaah hian a puitling-upa lam aiin a no deuh, a tuai deuh sa ei an ching hle. Vawksa hi a thau awm an ei ngai meuh lo!Cambodia te chuan vawk thau chu a hrangin an zuar thin.

Vawk thau chu Buddhist ho temple/ pagoda vela mombati malpui rual rual an chhit eng tung tung atan an hmang a; vawksa lei pawhin a thau an lo hleh thlak dah hran chu a dil belh mai theih thin.Artui/varak note awm (pongtia-korn), ni 13-17 inkara upa chhum te chu an ei nasa hle bawk. Artui hi a puiin Ni 21-23 inkarah a awp keu an ti thin. Artui note awm ei chu arpui tuilaichhum han ang deuhvin, chakna a tam hle, an ti. Vawk note pum hem hmin te, bawng pum hem hmin te, varak pum, sangha, sava, vahmim, rul, maimawm, khawmualkaikuang etc thlengin an hem hmin a, an ei hmiah hmiah mai thin a ni !Hnam tin hi ei leh in kawngah insawisel tur kan awmin alang lo.

Mizo thenkhatin an duh em em Uisa chu Chakma hoten anten em em a, an vulh nain, anmahni ina talha sawngbawl vel chu an duh thin lo. Chutih laiin Rulsa erawh an duh em em a; “Arpui tui lai sa nen an thleng duh” an ti thin. Mizo zingah erawh Rulsa ei duh chu mi tlemte kan niin a rinawm, a tlangpuiin kan ten deuh vek thung. Bru unauten Tangkawng sa an duh em em an ti. MLA inthlan dawnah vote zawn nan Bru-ho khuaah “Tangkawng man a khawl pek tiam” an awm thu an sawi ka hre tawh!

                        

Hindu hoten Bawngsa an ei duh lova, mahse, keinin a chek ( aek uih deuh rim nam) thlengin tui kan ti fu lawi si! Muslim hoten vawksa an ten hle laiin, Hindu pa erawh tui a ti viau lawi bawk a! Thenkhatin artui tak ngial pawh ei duhlo khawpainti thianghlim awmin, “Kei chu thlai eimi (vegetarian) ka ni” tideuh ngat lah Hindu zingah an tam hle.Chutah, vai zingah pawh, an tribal zingah Sazu sa ei duh em em an awm bawk. Keini Mizo te pawhin “Zu pawl sa” tui ti emem kan awm teuh mai.

Dangpuithu, Nghahpih, Bekang, Zawngtah, Khanghu, Thingthupui, etc duh em em an awm laiin, a rim vanga ei duh miah lo an awm bawk. Ei leh in kawngah hian inhriatthiam tawnna thui tak neih a lo ngai a nih awm hi.

Vietnamese-ho chuan an Restaurant thenkhatah chuan rulah pawh Chawngkawr (cobra) a nung chunga lo zuar te, chung chawngkawr thisen chu an tihhlum veleh in khan a hrisel te an ti a! Chu mai ni lovin tui chhunga awm reng reng thil nung sa an ei ta mai em ni? tih turin, thil an ei hrawm hraw viau.Vietnam-ah Awle (crocodile) a vun lip sa, a sa chu barbeque mai tura an lo siam hi ka hmu fo thin a, ei enah ka en ngai lo. Mahse, hmanni Dec 15-23 chhunga rawngbawl, Christian Leadership Training pe a kan va lut leh chu thiante vangin ka eichhin ve ta a; a hem hmin a ni bawk a, rin ai daihin a lo tui phian mai! Arpa lian deuh, 7kg vel tura rit sa ti ang mai niin kahria.

Cambodia ah Awle Farm 5 vel ka hmu tawh a, an chaw atan sangha te an pe mai thin. A vun chu bag, pheikhawk, kawnghren, purse, etc atan an siam a; Vietnamese ho chu an thenthiam bawk a, chung Awle vun atanga an thil siam chhuah te chu a nalhin, a man pawh a to theiin, Rs sing tel chuang man deuh vek an ni. Bawng ang maiin a vun chu an hmang tangkaiin, a sa lah ei atan an hralh thei phian bawk si! Thufing pakhatin, “Kan thil ei duh zawngin, tunge kan nih a tarlang thin” a ti, a dik viau mai.

@CT Lalrinawma