Dam chhung rei lo te a hrisel lo taka nun ai chuan, hrisel taka hman a thlanawm zawk.
America ramah ringawt khuan vawi 688 chuang an mi thiam (Scientist) ten an lo zir tawh a, kum eng emaw lek kal ta chhung ringawt khan a chungchang hi ziakin lehkhaah vawi 400 chuang a chanchin tha hi an lo chhuah tawh a ni.
A thatna chhan ber chu amaha hlo awm ‘Curcumin’ hi a ni. A phut a ni emaw, tel a kan a ni emaw, a tui sawr a ni emaw, he a thatna ber hlo ‘curcumin’ hi a chhe chuang lo a ni.
I. CURCUMIN HIAN THIL THA LO KAN TAKSAA AWM THEI TE A VENG A, CHUNGTE CHU:-
1. Ruhseh – ruh chuktuah vung (arthritis)
2. Thisena thau chhia (VLDL & LDL) sang lutuk tur a dang.
3. Hmeichhiaah hnute leh tuibawm (ovaries) cancer a veng.
4. Ril cancer, chuap cancer, tai cancer a ven theihna chhan chu ‘Free Radical’ a then fai vang a ni (free radical chu oxygen atanga insiam chhuak, kan timur (cell) tichhe thei a ni, hemi avang hian cancer a lo awm thei).
5. Ril vung natna (Inflamatory bowel disease).
6. Kan taksa atanga bawlhhlawh insiam chhuak nasa tak leh kan ril atanga hlo thalo (toxin) kan lakluh hi thinah hian an lut a, thin hian a lo thlifim thin a, he hna a thawhnaah hian thin hi a hliam ve fo thin. Kan damdawi ei atang tein leh natna hrik vang te pawhin hemi tlen fai hna hi aieng hian a thawk tha hle a chuvangin, thin natna nei Hepatitis/thinro, etc. tih angreng te hian han ei se a duhawm hle mai.
7. Thisen hnang lutuk emaw thisen khal hun lova khal, pem awm si lova thisen zam chhungah chutianga buaina a lo awmin. Mi thau lutuk te hi an ni duh chawk, mei zu miah hian an tam ber; chuvangin, lung thisenzam a inhnawh pin avangin zai te an ni chawk thin (BYPASS SURGERY tih thu hi kan hre nual tawh awm e); chu bakah Stroke (thluaka thisenzam chat emaw hnawh ping), Deep vein ‘Throm Basis’ (ke thisenzam inhnawh ping) – hemi avang hian ke te a tawihin pan dam thei lote a lo awm thei; chu bakah, thisen khal thenkhat hi chuapah te a lut chho va, chuap thisenzam a hnawh thei (Pulmonary Embolism). Aieng hian thisen hnang lutuk tur leh khal lutuk tur hi a veng a ni.
8. Kawpuar atan a tha – natna hrik gas (vawih) siam chhuaktu an tam lutuk hian kua a puar thin, chungho chu han ti rem deuh ilangin vawih a tlem phah viau mai.
9. Pumpui chak lo tan (pai tawih lama harsatna neite) pai tawihna hnang pumpuiah hian a siam chhuak a, mit (bile) a rawn sawr chhuak a ni ber e, hriak pai tawih hlei thei lo tan te a tha a nih chu. Thil mawm ei avanga kawthalo ziah atan te pawh a hman tangkai theih viau.
10. Natna hrik a that thei (volatile oil an tih mai amahah hian hriak pawimawh tak natna hrik thahna hlo a awm vang a ni).
11. BP sang a veng – a chhan chu kan sawi tawh angin, thisen khal/hnang lutuk tur te a veng a, thisenzam timur (cell) fip lutuk tur te a veng (free radical vang hian thisenzam hi a fip tulh tulh thei a ni).
12. Tar at a veng (Alzheimers disease) he natna hi vai ho zingah khuan a tlem em em mai a, a chhan an hmuh chhuah tak chu aieng an ei nasat em vang a ni. He natna lo awm chhan chu thluakah ‘beta amyloid’ (hei hi taksa atanga insiamchhuak hnang chikhat) tawm khawm vang a ni.
13. Nachhawknain pumpui a hliam/tihpilh theihna tur a veng. Chuvangin damdawi ei nasate tana ei ngei ngei chi a ni.
14. Taksa vung a tireh thei, hliamna te (inter leukin1, vung siamna atan pawimawh em em kan taksaa rawn insiam chhuak thin chu a tlen fai vang a ni).
15. Kal vung (nepphritis) natna atan pawh eng emaw chen thatna a nei, a chungah kan tarlan ang khian.
16. Rulhut thenkhat te pawh a tihlum thei.
17. Psoriasis vun natna chi khat atan pawh hman a ni (he natnaah hian vun a phuhlip hrup a, han ziat deuh ila, a hnuaiah hian vun hi pan te in a pilh ser ser thin, kan tisa timur laimu (DNA) khawlohna avanga awm a ni deuh ber).
18. Chauhna benvawn nei tan pawh a tha, ka chau riau mai han ti deuh reng te tan pawh hian ei sela a duhawm hle.
19. Prostate cancer pawh hi thui tak a veng thei nia hriat a ni.
0 Comments
I ngaihdan han thawh ve teh le!