KA RAM RIAHPUI PA!!!

Kum 15 lai a liam ta reng mai. Kha zàn kha duhawm lo hle mah se, ka hriatna hian a hre thar leh fo mai...!!Kha mi kum khàn hmalak zauh ve deuh ka duh avàng riak lut meuhin vahsan ka la ve a. Kan khaw tlangval pakhat, fel zawk zawk lem lo, a hmuh apiang ruih tum zèl mai mi, tlawmngai thei tak leh chak tak ni bawk si chu hlawhfa atàn ka riahpui a.

Nì hnih chu tluang takin kan bung a. A nì thum nì tlaiah erawh chuan thil tha lo tak mai kan tàwk ta thut mai a. A zia lo khawp mai!Kan bunna a inhlat deuh a. A thawm atang chuan thing a kit mèk, tih ka hria a. Chutah, a kih thlùk rual deuh thaw chuan a te ta tuar tuar mai a. 'shh!' tih pahin ka tlan phei vat a. Ka rei! Ka va thleng chu le, amah sah chhawk tih hriat reng, mau tlawn tha zet mai chuan a thin zawnah lo chhunin, a dar vei lamah a tlang chho a. A lo te ruai ruai mai a. A tal nasa kher mai!

" Mi'n chhan teh! Mi'n tanpui hram teh! A thim! A thim lutuk! Ka duh... duh lo..! " tiin, a ban a rawn phàr tawk tawk a. Ka ràp bawk a, ka khawngaih lutuk kha ka mittui a tla hial a ni!Zam lo tùr leh a dam leh dàwn a ni, tiin, han thlamuan sateh mahila, ka thusawi chu kei paw'n ka ringhlel zawk a. A dam chhuah ka beisei lo tawp a ni!Amah thil tlangtu mau chu ka fik hmawk a. Ka phawisak ta a. Ka thlamuan mawlh mawlh a. Reilotèah chuan a chat thla ta reng a!

A thing kiha mau a chhawk tang kha, thing a'n kih khàn hruiin pawt kualin, ama lama rawn tlu leh si chuan a rawn chhun ta mai ni àwm tak a ni!A hmai leh a pum zawng zawng chu a thi chuan a bual sen nuau mai a. Mahni chauha han bawihsawm chu a nuam lo khawp mai!Ka buaipui fel meuh chuan khua a thim tan chu a ni ta der mai a.

Duhthlan tùr pahnih chiah ka nei ta. Zualko-a kal nghàl nge, tlaivarpuia a tuk zìnga kal mai?Kan riahna hi khua atanga hla ang reng tak ni mah se, lamlian atanga 2km vèl lek a ni a. Ka tih fuh chuan zànin la la paw'n ruang chu a lak theih dàwn avàngin zualko-a kal mai chu thain ka hre ta thut a. Ka iptèpui leh chemtum, kawlphekhawnvar ka ah hnu chuan ka inpeih chu a ni ta der a.

Thianpa ruang, kan mutna ka zalh, a mit ka siam that thlap chu ka kalsan dàwn chuan ka va keu leh kher a. A lo meng kur mai a. Min tiphu nasa kher mai. Ka tim sawk mai a!Sawhthing ka rawt dip chu buk vèlah chuan ka theh thawt thawt a. Ka kalsan ta a.Kan inbualna luitè ka thlenthlàk dàwn chuan boruak a danglam ta tlat mai le! Amah hmuh theih si lohin inbual an awm tlat mai!

Ka zu en a, engmah phei chu ka hmu lem lo a. Fimkhur takin ka chhuk thla a, harsatna awm lo in ka kal tlang ta zèl a.Kawngpui ka chhuak tep, tih chuan ka ding chawt a. Kawngpui sirah chuan min lo nghàktu an awm lehtlat mai! A taksa ruangam ka han hmu chuan midang an nih reng ka ring thei lo! Ka kalsan tak, thianpa ngei kha niin ka hre tlat!Hlau chung chungin ka chho lui a, ka'n en chhoh leh chuan tumah ka hmu leh si lo a. Mahse, min tihlautu a ni zawk! Ka kal ngei erawh a ngai si.

Ka chhuak chho a. Engmah ka hmu lo. Mahse, kan khaw lam kawng ka'n en chu kawng kawiah chuan ka thianpa ngei mai chu a puma mau invit tlang chunga a kal liam tùr chiah chu ka va en ta siah mai a. A rawn hawi zawk chu le, a hmai chu a sen vek mai a. A kal liam zui ta a. Ka ràpin, ka hmulthi a ding ur ur mai a.A reh ruih a. Motor lah lo kal rèng an awm thei si lo. Chutah, ka thlang kawr ruamah chuan patling tih hai rual loh, mangang taka au te ruai ruai chu ka hre leh ta thut a. A reh leh a. A rawn ti leh thin a. Pachang taka awm chu thil har tak a ni!

Chutah, truck a rawn tlan ta hlauh mai. Ka'n phar a, mahse, a ding lo chiang hle. Ka'n en zui chu, a bangah chuan mi pakhat hi a bet tui mai a. Chumi ka'n hmu zet chu ka khur hlum lo chauh a ni e!Kawngpui ka'n en kual chu le, awi ka rei! Thisen thar lam tak mai hi a lo far phei thluah mai a. A khang thlengin a awm ve tlat a ni!Chumi atanga minit 20 vèlah chuan lirthei a lo kal leh hlauh mai a, a rawn tlan chak lutuk chu ka piah fe-ah a ding ta tawk a.Ka va lut chu an hmèl lan dàn chu keimah ang bawk an ni!

Ka channa atanga 2km vèlah chuan pa pakhat, thisenin a bual nuau hi an motor-ah chuan a rawn thu ve ringawt mai a, lukhum lum sen a khum bawk thu chu an sawi ta zung zung mai a. I hè lovin ka thianpa thlahràng a ni tih, ka hre nghàl mai a. Kei erawh chuan engmah ka sawi lo a. Lui kal angin ka insawi chauh a!In ka thlen chuan thil chu an rèl zung zung a. A zán la la la chuan lak chhuah an rél ta a. Mahse, thil awm dàn erawh a kal tùr zínga mi, val upa 2 chiah ka hrilh a.Zàn dàr 12 vèl chuan light tha táwk nèn, motor lian pakhat kengin ruang zawn túr chuan kan thawk chhuak ta a.

Tlangval leh patling, mi 50 vèl the thaw chu ruang zawn tùrin kan kal ta a.Kal lam chuan tluang takin kan kal a.Mahse, a hmun kan thleng tùr chu kan buai tan ta der mai a.Ka lovah kan thlen dáwn chuan lovat thawm kan hre ta a. Thing tlu ri uan uan kàra mangang aw tawpa te ruai ruai thawm te chu kan hria a, tlema la ràwlthar deuh te chuan a lailum lam an chuh nghàl ta that that mai a . Kan hawi phawk ta hru hlawm a.Chutah, buk kan han thleng chho chu leh, ruang reng a lo awm ta hauh lo mai le! Thenkhatte chuan min ringhlel ta hial mai!

Ka muttìrna chu ka'n en thin a, fel tak hian a lo inphah thlap mai bawk si a. A ngaihna ka hriat loh rual chuan ka hlau a ni tawp mai a ni!! Ka muttìr chiang ngei si a!Loh theih lohin zawn a ngai ta. Thil awm dan kan man vek tawh avángin kan ti dak hlawm mai a. Mahse, reilotèah chuan kan buk chhak lawkah chuan a kapa a lù zep chunga a lo mu kawm reng chu kan hmu ta mai a. Mak kan titàwp thei lo a ni!Hlang kan siam zung zung a. Kan kal ta nghàl a.

Kawng tluanin thla rum leh patling mangang aw rawl, te ruai ruai mai te, a chànga nuihza miah si loa nui khek uar uar ri te chuan min tibuai reng a. Kan tam hrim hrim zawk a, kan inhuai chhuah a ni ber mai!Khawhar inriak tùr an hmu manglo kha ka dem hauh lo.Ka lovah pawh kan nuin chhunzawm a phal loh avàngin ka vat zui ta lo a ni!