THINGTLANG NULA NGAIHZAWN CHU

—Duhawma Kawlni
   Slumdog's Cabin
   Vawksa Steet
.
.
"Behlawi rêp ka nu'n naktukah min lo thawn dawn a, kan khaw sumo counter-ah min lo lamsak mai teh" tih thu emaw, "Buhban min lo thawn a, min lampui rawh aw..." tih thu emaw i phone-ah i dawng fo a nih chuan kei ang bawkin thingtlang nula i ngaizawng ve tihna a ni mai thei.
.
.
Lirthei ka nei si lo, anin a nei si lo, ke ngei maiin kan han kalpui a; Aizawla eng vak thawk lova awm reng ta chu taksa a fit lo va, bialnu te chhuahpui ve lêm si, anni aia fit lo tih hriat zetin hah thawh hluam hluamin sumo dinna hmun ka kal thlenpui fo a. Sumo dinna ațanga bus stand hnai ber pan tura buhban ip ung ve tawh tak put hi eng nge a an chiah hre tur chuan thingthlang nula ngaihzawn ve a ngai. Millenium Center ep sumo counter ațang sawn vawi eng zah nge baibing rêp te, behlawi rêp leh zupawl rêp thlenga ka khai chhuahsak tawh ka hre lo.
.
.
Zanin chu ka che hit viau ang, tih rilru pua han lên zan te hian an khaw lam ațanga lo zin mikhual an lo thlen țum te hi a lo ni daih a. Zan rei pawh a nih hmain an mikhualte'n chhuatah mutna an han phah sauh sauh a, mu chungin TV remote control an han hum ngei a, kan men chen chen an meng peih a ni tih hriat zeta meizial an pak tulh tulh hi chuan thin a ur tûk mai a ni! Chêt hit tum zan ber te hi vawi khat pawh inmuah lova kan inhawsan leh zan hi a ni duh viau mai.
.
.
Buaithlak bera ka hriat chu— min hawsan fo hi a ni. Kan lo nghahhlelh ve ber, nula leh tlangvalten kan ngaihzawng te nen hlim takin hun kan hmang dun ve ang chu tia beiseina kan neih hun Krismas-ah haw ngei ngei an ngai ta bik ziah hi a pawi lungrun lai a ni.  Mi faten, "Ar kan kang dawn em ni ang? Tandoori zawk nge ni ang?" tia ngaihtuahna senga an inrâwn nak nak lai te hian, nu leh pate zingah khaw khat tlangval rilru thianghlim ber ni awm ziazângin kan han zai khawm ta daih zel a; "Pawisa ka save a ni mai alawm, a pawi reng reng lo," tia lo inhnem ve mai loh chu tih theih a vâng țhin teh asin.
.
.
Krismas te hi chu chhung kima hman a pawimawh êm alawm le, tiin ngaih thiamna chen a la awm; ngaih thiam harsa ka tih fo chu— YMA Day mai mai te, inkhawmpui te, khaw pahnih khat lek țhalai inhmu khawm tur KTP Meet tih te thleng maia a chhim tura min hawsan fo hi a ni. "Pu Hniarbawnga'n chawimawina a nei dawn a, vawk a talh dawn" tih te mai mai min liamsan phah fo hi chu keini ang lungleng mi deuh tan chuan a buaithlak ngawt țhin mai.
.
.
Inhawsan ngei a țul si chuan kan invai liam ve ang chu, tiin kan programme neih sa te cancel phah țhakin kan han thlah ve a. An hawnna tur sumo kianga indinchilhin, Indopuia kal tur Sap nula leh tlangval inthlah liam tur ang maia romantic leh lunglenthlakin kan inthlah ve ang chu tih nak alaiin, an chhuanna tur sumo driver chuan an innêl tawh hle a ni tih hriat takin, a bialpa ka ni ang em tih ngaihtuah miah lovin a'n kuah chûk chûk a, a hnute a'n țham thawi thuak thuak a, a kheuh khêk ang tuarh tuarh a! Romantic tak, cool taka boruak kalpuia han inthlahna khua a kaw hlawl lo. Eng han sawina hman a awm lo va, "Ngaihzawng dang lo nei miah suh, mipa hi chu inrin tlak hlawl lo, nang phei chu i lerh si, lo hur miah suh, i hria em?" min tih êrh hnuah kan in-bye bye liam thei hrâm chauh țhin.
.
.
Keini ang lunglen la na, hmangaihna la na mi deuh chuan min hawsan tlai ațangin lung kan han tilêng nghal em em a, Vai film-a a changtupa lungleng ang maiin hmui hmul leh khabe hmul kan han ziat fai duh lo nghal ngawt a. "Heti chuan SMS  emaw ațangin thu leh hla thlum tak tak inthawnin lungleng takin kan inbe sek ang chu" tih rilruk nak alaiin, an khuaa signal tower awm chhun lo chhiat lai te a lo ni hlauh si hi chuan țah a chhuak hial thei. A hawn hma khan, "Kan khuaa tlâng sang ber chhipah signal a awm țha ve deuh, ka țhiante nena kan lawn hunah kan inbe dawn nia," kha a ti țhin a; tower a chhiat miau chuan tlang sanga lawn pawhin awmzia a nei vak lo a ni ang.
.
.
Signal tower chhia an siam țhat hun chu kan han nghak țang țang a, ni 3 ni 4 hnu velah te hian "Pu Hualkunga zawngțah kung ler ațang ngei hian 'muah muah' aw.." tih thu te kan han dawng ve thei ta țawk țhin a!
.
.
Thingtlang nula fel, taima, khawpui nula țhenkhat inla no satliahte ang lo taka rilru huaisen leh mahni nihna ang anga lang chhuak ngam, mahni ngeiin mahni mamawh thawk chhuak tura inhum ruh ngam nula i ngaihzawn fuh chuan i țhen phal tawh ngai lo vang. Țhianpa Bena Ralte-in a ti mathlawn lovin, he kan Zawlkhawpuiah hian ar kanpui tur nula chu i hmu țeuh mahna; mahse, in ar kan tur kha bazar mi tamna laiah chhuak se, umpui peih tur che nula chu an vang khawp ang. Khawpui nula an ni emaw, thingtlang nula an ni emaw mahni nihna ang ang pawm ngam mi, âwm pho lah chunga khawvel hmachhawn ngamtute tluka nupui atana țha an awm awm lo vang.