LEGAL NOTICE

Mizote hi Court kal hreh tak leh mi khin hreh tak kan ni a. Kan chunga mi an chet danah lungawilohna emaw lawm lohna kan nei emaw a nih pawhin Court kal loh hram erawh kan tum thin a. A lehlamah han ngaih bopui mai lah kan thinlung a dam thei thin bawk si lova. Chutianga tuilairapa rilru buai taka kan awm laia kan Ukil rawn ten kan phurrit min chhawkna ber thin chu *Legal Notice* hi a ni awm e.

Legal Notice kan tih hian a awmzia ber chu _‘Ukil (Advocate) ten dan anga mi an va vauna’_ hi a ni a. Heta kan hriat tur pawimawh em em chu kan pawisa batute emaw, kan thuneihna chhunga kan phalna la lova lo inrawlhtute emaw, kan chhiatna tura hmalatute emaw te hnena kan Lawyer rawn ten Legal Notice min pek sak hian Notice kan peka te kha Court ah kan khing tihna a ni lova, Court-a khin a nih loh hramna turin dan angin kan Lawyer ten min vausak tihna zawk a ni tih kan hriat a tha!

Mi thenkhatten kan hriat fuh loh chu kan Lawyer rawn ten Legal Notice hmanga kan phurrit min chhawksak hian a umzui lehzelnaah kan Lawyer te mawhphurhna zel emaw kan ti thin hi a ni a. Kan hriat atana pawimawh em em chu kan Lawyer ten an Letter Head hmanga Notice min siam sak hian an mawhphurhna chu an hlen tawh a.

A umzui lehzelte chu keimahni lam chan tawh a ni. Chutihlai erawh chuan Legal Notice in awmzia a neih lova Court hiala khin a ngaih chinah erawh tawi khaw muang lova Ukil pan nghal vat tur  a ni thung. Inthlahrunna tur chi a ni lo ve.