MI HLAWHCHHAM LALDUHAWMA

(Good Friday pualin)

ziaktu : JL.Liana

Rawlthar chhuah tirh atanga "Zuanglawra" tia kan hriat tawh kha tlangval tak tak kan nih hnu, Good Friday vawi engemawzah kan hman leh hnu pawhin a lo la zuang lawr zak zak mai a, Opinion Poll-a CM atana duhtu ngah ber ni thin mahse a dinna bial ten MLA atana an duh ber anilo ngun hle thung!! Politics a luhchilh hnuah MP hialte lo ni tawh mahse MLA ah chuan kum 30 chuang chhungin vawihnih chiah a la tling ani.

Lehkhathiam tak ani bawk a, International Business te han khawih ta se a hausa tawh ngawtte hian ka ring thin a. Mizo zinga VVIP Guard ni thei kan neih chhun anih avang hian kan state te tak te kalsanin Central level politics-te hi han khel ta mai se a turu hian ka ring alawm le. Pu HT Sagliana pawh mizorama a lo kal changin politics-ah chuan eng vak ani bik lova, Central ah erawh a neplo tih kan  hria. Vaiho hian an ngaihsan tawh chu an pathian biak titih zel anih hi.

Indian MP rual Russia rama hruai theitu Pu Duha ve chu Mizoramah eng ni pha mang lovin hnawl sek ani a, a hlawhfa chhawr tui lo lakpen chu amah ertute sawi tawk a tling a, thanghnih lian vel zet a hlawhchham hnu, a huan ram neih chhunte pawh a tihral deuh vek  hnuah pawh "Nuai za (100) ka neih chuan ka tling ang" titu chu la khing zak zakin a la hnehlo tluang zel a, "Ka beidawng fel e" tih lah a tum der lo!! Engemaw tak hi chu min tum pui chu a nei mawle. Lehlamah chuan khawngaihthlak deuh ani a, a nupui fanaute chan hi rapthlak tih chang ka nei hial thin.

Vai contractor leh supplier liante, ruihhlo tawlhru hausa takte kawp duhin hna leh zalen taka sumdawnte han tiam ve phei se chu sumpaiah na na na chuan a phanglo tur le. Tlin ngawr ngawr tum ni se chu Chakma leh Tuikuk tan a bei anga, kan hnam himlo mahse a invawrh kang nasa dawn si; chuti ahnehin Chakma zinga a party in Unit an din pawh a duh der silo!!! 'A lal hnuah hnam himna chu ngaihtuah zawk mai se aw' tih chang ka nei hial thin.

An chhungkaw sum hmuhna pakhat, zirtirtu hnathawk a fapa hlawh chu an duhlo ani hauh lovang; mahse, a nungchang a thlir a, amah aia zirtirtu tha an awm ringin a hna atangin a bantir hmiah mai!!! MLA dang zawng zawngina an lak vek, diklo nia a hriat avanga a pekkirte chu amah sawichhiat nan kan hmang teh hlauhva, la la chhunzawm miah miahte erawh pakhatmah sawizui duh si lovin!!

IPS hna a bansan chhan hi pahnih niin a sawi a :

1. Remlohna sal ata Zo fate chhanchhuah.

2. Retheihna sal ata Zo fate chhanchhuah -te.

1 na hi chu mipui, Kohhran leh Zirlai hruai tute thlawpna zarah tihlawhtling tawhin a inhria a, a pahnihna erawh tithei dinhmun a din tumin hma a la ngar ngar rih anih hmel. Ei bara mizote kan intodelha, state dangte awh khawp kan nih theih dan nia a hriatte tihhlawhtlin tum hian a bei tar thak mai anga; a tar kun hnu, chhawr tlak mang loh anih hnu hian "Pu Duha policy kha Zoram tan a lo tha anih hi. Hawh u, i thlang tling ve tawh ang u?" kan ti chauh mai ang tihte pawh ka hlau deuh.

Sawisel hlawh reng, hnawl reng ni mahse CM atana kan duh ber ani reng thung a. Fiamthu thawh nana kan hman reng ni mahse a thu hi fing kan tiin ramin issue lian deuh kan neih phawt chuan kan ngai chang thup lawi si anih hi!!! Kan proplem lian heng Tuikuk leh Chakma, ramri chung changahte phei chuan a chingfel thei tur ber leh duh bertu ani tih hre mah ila chu ai chuan mahni thanhnan party kan hmangaih zawkna hi kan la lavāwng zawk hlawm niin a lang.

Politics-a amah beltuten an kalsan lehzel a, Pu Rualkhuma Hmar, (a chanchin ziak hialtu)te, Pu Andrew Lalherliana te, Pu Ramzauva te, Pu K.Liantlinga te hi a langsar zualte anni awm e. An kalsan leh chhan hi public hriata an sawi hrelo mah ila mi diklo leh thalo anih vanga kalsan an nih thu emaw kan hre ngai lova, party dang chhuah santute anglo takin anni hi chuan sawi chhiat zuina tur an hrelo ni berin a lang ani.

Mi angin dawt beiseiawm tak politics leh therhlo hmanga mi vehthlem lam a uar lova, bial chhunga tlaktlum hle ringawt chauh lah a tum heklo. Tlin tum ngawr ngawr politics game a khel  ngai lova, mizote moral life tihchhiat hi a thil hlauh berte zing ami ani reng thin ani. Zoram leh Zo fate nakin kum zatam a thlir thin a, rilru hah vanga hui pap pap chang lah a ngah narawh e.

A huanlo ram neihchhunte politics khelh nan, ZO FATE RETHEIHNA SAL ATA A CHHANCHHUAH THEIH NAN a tiral zo titih ta a, mizo zinga Doctorate degree 4 nei awmchhun ni mahse a inhmun tih mai loh chu "Min lo vote ve hram r'u aw?" tia ngen na thu hrilh tura zinchhuahna tur sum lah a nei tawh heklo; a chhung hnai deuhte thlenga retheihna thlentu mai ani ta awm e.

Hnam Hmangaihtu Pa ropui rethei tak ani mek a, amah sawichhe thintu leh phatsan thintute tan ZORAMTHAR dinsak tumin chempui leh Pen a lek chhawk zak zak ani ber a, RORELNA DIK pek tumin thi leh thau pawlhin a thawkrim hle ani. Hriatloh palh vanga hnam pawi a khawih palh hlauvin a inchhiar reng a, Zo fate inpumkhatna hi a damlai ngeiin thleng se tih hi a duhthusam ber ani thin.

Mizo zingah hei leh chen POLITICS DIK VAHVAIHPUITU kan nei hi a chhuanawm a, kan vannei takzet a, "Zawlnei ama khaw lama chawimawiin a awm ngailo" tih chan chu politics-a a chan a ni lek si!!!

Hawh u, vawiin Good Friday, khawvel tana tuartu tawrhna Ni-ah hian Mizote tana tuartu Pu  Lalduhawma hi ngaihtuah ve ila, engemaw tal tithei dinhmunah i dah ve tawh ang u hmiang?

                     PIC : LALDUHAWMA