SECTION 144 CR.PC PUAN CHUNGCHANG

Nimin March ni 14 nilaini-a Zophai, Bairabi-a MZP-in ‘Hnam Hnatlang’ an koh tihkham emaw, a dodalna ni ngeia lang, hnatlan hun khalha nizan hmasaa Kolasib DC leh Aizawl DC ten section 144 CR..PC hmanga ‘prohibitory oder’ (mi panga emaw, a aia tam emaw awmkhawm phal loh) an chhuah chuan titi a titam hle a. Social media-ah duh lam hawi hawia sawina a tam hle.

 Mizoram sawrkar dem luai luai a nih laiin nimina Mizoram Assembly inkhawmah Home Minister Pu R.Lalzirliana chuan a tawi zawngin, a hriat/rawn a nih loh thu, khapna thupuan a dem thu, District Magistrate-te chu Central sawrkar mi an nih thu, section 144 CR..PC puan chu Mizoram sawrkar tham loh (hmuhsitna) hiala a ngaih thu a sawi a.

 He thu Home Minister-in a sawi hma hian Assembly House-a a vei lama thu Chief Minister chu a bekbawr a, chutiang hnuah chuan Home Minister chuan amah emaw CM emaw (Mizoram sawrkar) rawn a nih loh thu a sawi a ni.

 Kolasib DC (DM) leh Aizawl DC(DM) ten section 144 CR..PC. an lo puang ve ngawt mai, tiin a puantirtu an awm ngei ngei ang tiin social media-ah chuan Mizoram sawrkar demna a tam hle a.

 Home Minister-in “Kan hre lo” a tih pawh a zep a niang, a hre ngei ngei ang, an ti a. Mahse, House-a thu sawi chu finfiah dawl, dawt sawi phal lohna a ni.

 Chief Minister leh Home Minister-in Section 144 CR.PC puan chu an hre lo tak tak a nih chuan eng vanga chutiang chu thleng thei nge ni ang tih ngaihtuahna hman a ngai ta a ni.

 Aizawl DC leh Kolasib DC te chuan an thuneihna chhungah dan leh thupek kenkawhna chungchangah thuneihna an neih chin a awmin a rinawm. Sawrkar laipui emaw state sawrkarin emaw “Ti rawh, ti suh” an tih ngai (nghak) kher loa, thil awm danin a zir (warrant) avanga an district awmnaa thil tha tur nia an ngaih kalpui theihna thuneihna an nei ngei ngei ang.

 Vaiho, engtin nge MZP an chet leh dawn tih hlaua khurten Mizoram an chhuahsan chum chum a, an inhawrkhawm a, an kalkawng Aizawl leh Silchar inkarahah thil an tichhe thei. Bakah Hnam Hnatlang chuan eng buaina nge a thlen dawn?

 Chutih laiin Aizawl leh Kolasib DC chuan CR.PC puang lovin buaina nasa tak thleng se, state emaw sawrkar laipuiin emaw chuan mawh an phurh dawn a ni. Chutih lai chuan DC ten thuneihna an hmang a nih loh a, State sawrkarin a hre bawk si lo a nih chuan IAS an ni a, sawrkar laipui tihtir a ni thei mai ang em?

 (MIZO AW editorial dt. 15,3,2018)